Sureta na Karisito me Vola na Kemu iTalanoa

Au na tekivu ena vakatataro, ka mo na dikevi iko kina:

• Na mataqali itukutuku cava ni nomu bula o sa vola tiko?

• Na sala o tukuna tiko ena kemu italanoa e dodonu?

• E laki cava beka ena kena itekitekivu, ena nomu itikotiko vakalomalagi?

• O vakamuri cei tiko ena kemu italanoa—sa iVakabula o Jisu Karisito beka?

Au vakadinata ni iVakabula sa “vakatekivuna ena sauma talega na noda vakabauta.”¹ O na sureti Koya beka me vola ka tinia talega na kemu italanoa?

E kila na itekitekivu mai na kena itinitini. O Koya a Dauniveibuli kei lomalagi kei vuravura. E gadreva o Koya meda lesu ki vale Vua kei na Tamada Vakalomalagi. Sa vakaiyautaki keda ena ka kece ka gadreva meda na gumatua.

Cava beka o kila ena tarova noda moica na keda italanoa ki Vua?

Na ivakaraitaki oqo ena rairai vukea nomu dikevi iko.

Na loya vinaka ni veilewai e kila vinaka tu ni gauna ni tarolesu, o na sega ni dau taroga na ivakadinadina na taro o sega ni o kila tu na kena isau. Na taro vakaoqo sa sureta tiko na ivakadinadina me kaya vei iko—kei turaga ni lewa kei na juri—na ka dou se bera ni kila. O na rogoca na isaunitaro o na kurabui kina ka veicalati ki na itukutuku o sa tuvanaka tu baleta na nomu veilewai.

Dina ni tarogi o ivakadinadina ena taro o sega ni kila tu na kena isau e dau sega tu ni ka vinaka vua e dua na loya, na kena veibasai sa ka dina vei keda. Eda rawa ni taroga na Tamada Vakalomalagi dauloloma, ena yaca dauloloma ni noda iVakabula, ka sauma mai o ivakadinadina o ya na Yalo Tabu, sa dau tukuna na ka dina.² Baleta ga ni Yalo Tabu e cakacaka ena duavata cecere kei Tamada Vakalomalagi kei Jisu Karisito, eda kila ni cakacaka ni Yalo Tabu sa veivakadeitaki. Cava, na vuna, eda dau guce kina meda kerea na veivuke vakalomalagi oqo, na dina e vakatakila mai vei keda na Yalo Tabu? Cava eda sega ni taroga tiko kina na ka eda sega tu ni kila na kena isau ni sega walega ni itokani vinaka o ivakadinadina ia ena dau tukuna na ka dina?

E rairai baleta beka ni sega na noda vakabauta meda ciqoma na kena isau eda na taura. E baleta beka oi keda na tagane se yalewa vakayago oqo eda besetaka na moica na veika vakataucoko vua na Turaga ka nuitaki Koya vakatabakidua. E rairai qo na vuna eda digitaka meda tiko ga ena itukutuku eda sa volai keda kina, e dua na saumaki vakacegu ni keda italanoa sega ni vukica o Daunivola. Eda sega ni via taroga na taro e saumi mai ena veika veicalati ki na keda italanoa eda sa vola ga oi keda vakaikeda.

E dina, ni vica vei keda eda na rairai vola ena keda italanoa na vakatovolei e samaki keda. Ia eda sega beka ni taleitaka na cecere lagilagi ni italanoa eda wilika ni o ravouvou sa mai qaqa? Na vakatovolei sa gacagaca ni usutu e yaco kina na keda italanoa me veirawai, tawamudu, vure vakabauta ka itukuni yaga. Na sasaga bula totoka toqai tu ena keda italanoa sa vakavolekati keda vua na iVakabula sa savai keda, ka da sa vakataki Koya sara.

Me qaqa o Tevita vei Koliaci, sa dodonu vei cauravou me tucake ka sotava na tuwawa. Na itukutuku totoka kei Tevita a rairai koya beka me lesu ka laki vakatawa sipi. Ia a dikeva na veika sa sotava mai ni a vakabulai ira na sipi mai na dua na laione kei na pera. Ni yavutaki koya ena valu qaqa, sa nona na vakabauta kei na yaloqaqa me vola ga na Kalou na kena italanoa, ka kaya, “Ko Jiova o koya ka vakabulai au mai na liga ni laioni kei na liga ni pera, ena vakabulai au mai na ligana na kai Filisitia oqo.”³ Ni a gadreva me qaqa na Kalou, ni rogoca tiko na Yalo Tabu ka yalona sara me laiva vua na iVakabula me vola ka tinia na kena italanoa, na cauravou o Tevita a vakadrukai Koliaci ka vakabulai ira nona tamata.

Na ivakavuvuli cecere ni bula galala, sa dina sara, e vakatara meda vola ga na keda italanoa—a rawa vei Tevita me lesu i vale, ka laki vakatawa sipi. Ia o Jisu Karisito sa tu vakarau me vakayagataki keda vakaiyaragi vakalou, penikau gagata e Ligana, me vola na italanoa naba dua! Sa lomana yalololoma me taurivaki au, na penikau lila, meu iyaya ni cakacaka e Ligana, keu vakabauta meu laiva Vua, me na vola na kequ italanoa.

E dua tale na ivakaraitaki totoka o Esiteri nona laiva na Kalou me qaqa. Ni a sega ni via toka ga ena kena itukutuku me maroroi koya ga, a cakacaka ena vakabauta, a vuki ka soli koya taucoko vua na Turaga. A bukivere o Emani mera vakarusai taucoko na Jiu mai Perisia. A rogoca na bukivere o Moatekai, na wekai Esiteri, ka volavola vua, ka kerea vua me vosa vua na tui ena vukudra na nona tamata. A kaya vua ke dua na tamata ena gole vua na tui ke sega ni lewa mai na tui ena vakamatei vakaidina. Ia ena kaukauwa cecere ni vakabauta, a kerei Moatekai me soqoni ira na Jiu mera lolovaki koya. “Koi au kei iratou na noqu goneyalewa keitou na lolo talega,” a kaya, “kau na qai lako vua na tui, ia sa sega ni vaka na lawa: ia kevaka kau sa mate, au sa mate ga.”⁴

Sa yaloi Esiteri me laiva vua na iVakabula me vola na kena italanoa, ni raici vakatamata, sa rawa me na laki tini ena mate. E kalougata sara, a ciqomi Esiteri na tui, ka ra vakabulai na Jiu mai Perisia.

E dina, na itagede ni yaloqaqa nei Esiteri e sega tu ni da kerei kina. Ia me qaqa ga na Kalou, me vola ga o Koya ka tinia na keda italanoa, ena gadrevi kina meda maroroya na Nona ivakaro kei na veiyalayalati eda sa cakava. Na noda maroroya na ivakaro kei na veiyalayalati ena dolava na wa ni vosavosa vei keda meda ciqoma na ivakatakila mai vua na Yalo Tabu. Ni ivakaraitaki sa mai vua na Yalo eda sa vakila na ligana na iVakavuvuli sa vola vata kei keda na keda italanoa

Ena Epereli 2021, na noda parofita o Peresitedi Russell M. Nelson, a kerea meda raica na veika eda rawa ni cakava ke levu noda vakabauti Jisu Karisito. Ni levu noda vakabauti Jisu Karisito, eda rawa ni taroga na ka eda sega ni kila na kena isau—kerea na Tamada mai Lomalagi, ena yaca i Jisu Karisito, me sauma mai vua na Yalo Tabu, sa tukuna na dina. Ke levu noda vakabauta, eda na taro ka lomada meda ciqoma na kena isau eda na taura, ke sega mada ga ni ganita na keda itukutuku veivakacegui. Kei na kalougata yalataki e yaco mai ena cakacaka ni vakabauti Jisu Karisito sa torocake ni vakabauti Koya ni sa vola ka tinia talega. E kaya o Peresitedi Nelson ni da “na ciqoma vakalevu cake na vakabauta ni caka e dua na ka e gadrevi vakalevu na vakabauta.”⁵

Ni dua na veiwatini tawa vakaluveni tiko e rawa me rau kerea ena vakabauta me rau susu gone ka lomadrau me ciqomi na kena isau, dina ga ni itukutuku rau sa vola tu baleti rau e oka kina na vakasucu e mana.

E rawa ni kerea e dua na veiwatini qase ke sa gauna me rau kaulotu kina ni sa lomadrau, dina ga na itukutuku rau sa vola baleti rau e oka kina na levu ni gauna ni cakacaka. Se na rairai kena isau “se bera,” ka rau na vulica ena wase e muri ni kedrau italanoa na vuna rau a gadrevi kina vakalailai tale e vale.

E dua na itabagone cauravou se goneyalewa ena kerea beka ena vakabauta me qito se me vuli tale se daunivakatagi sa yaga sara ka lomana me muria na veiuqeti nei ivakadinadina uasivi, na Yalo Tabu.

Cava na vuna eda gadreva kina na iVakabula me vola ka tinia na keda italanoa? Baleta ni kila vinaka o Koya na noda gugumatua, ena kauti keda ki na veivanua eda sega mada ni da raitayalotaka. Ena cakava o Koya meda sa Tevita se Esiteri. Ena teteki keda ka savai keda meda vakataki Koya sara. Na veika eda na rawata ni da cakacaka ena vakabauta ena vakalevutaka noda vakabauti Jisu Karisito.

Kemuni na taciqu kei na ganequ, ena yabaki sa oti a taroga na noda parofita lomani: “Sa lomamu beka me qaqa na Kalou ena nomu bula? … Sa lomamu beka mo laiva Vua na veika cava ga e gadreva o Koya mo cakava me liu mai na veisasaga kece?”⁶ Au kuria ena veidokai na taro vakaparofita oqo: “O na vakatara beka na Kalou me vola ka tinia na kemu italanoa?”

Ena iVakatakila eda vulica ni da na tu e mata ni Kalou ka lewai mai na ivola ni bula, me vaka na noda ivalavala.⁷

Eda na lewai mai na noda ivola ni bula. Eda rawa ni digitaka meda vola na keda itukutuku veivakacegui. Se meda vakatara na iLiuliu Daunivola ka iTini meda vola vata na keda italanoa, kei na ilesilesi e gadreva meda cakava e uasivia na sasaga tale eso.

Laiva na Karisito me vola ka tinia na kemu italanoa!

Laiva vua na Yalo Tabu me nomu ivakadinadina!

Vola na italanoa ni sala o tiko kina sa dodonu, ki na salatu e muataki iko lesu ki na nomu itikotiko vakalomalagi mo bula vata kei na Kalou.

Laiva na ka dredre kei na ka rarawa sa tiki ni italanoa vinaka yadua me sala ni nomu voleka sara, ka mo vakataki Jisu Karisito sara.

Tukuna e dua na italanoa ko a kila kina ni sa tadola ko lomalagi. Taroga na veika o sega tu ni kila na kena isau, ka kila ni Kalou sa lewa mai me kilai na Lomana me baleti iko mai vua na Yalo Tabu.

Laiva na kemu itukutuku me ka ni vakabauta, ni ko muria na nomu Daunivakaraitaki, na iVakabula o Jisu Karisito. Ena yacai Jisu Karisito, emeni.