Neva Mestem wan Janis blong Testifae abaot Kraes
Tru glad i stap long fasin blong yumi blong wantem blong kam kolosap long Kraes mo kasem witnes blong yumiwan.
Faef yia i pas yumi bin leftemap ol han blong yumi blong sastenem profet blong yumi we yumi lavem tumas Presiden Russell M. Nelson, olsem Presiden blong Jos ia blong Jisas Kraes blong Ol Lata-dei Sent―hem i toktok long bihaf blong Lod long gudfala sisen ia blong gro mo revelesen. Tru long hem, yumi kasem plante invitesen mo Hem i bin promesem yumi ol gudgudfala blesing sapos yumi putum laef blong yumi long Sevya, Jisas Kraes.
Long 2011, taem mi mo man blong mi i stap givim seves olsem ol misin lida long naesfala Curitiba, Brasil, fon blong mi i ring long taem blong wan miting. Mi hariap blong putum long saelen, mi luksave we kol ia hem i kam long papa blong mi. Kwiktaem mi lego rum blong miting blong ansarem: !“Halo, Papa!”
Wetem sapraes, voes blong hem i fulap wetem harem nogud: “Halo, Bonnie. Mi nid blong talem yu wan samting. Oli faenemaot se mi kasem ALS.”
Maen blong mi i fasfas long plante tingting,! “Wet! ?Wanem hem i ALS?”
Papa i stap eksplenem finis, “Maen blong mi bae i gohed blong wok be bodi blong mi sloslo bae i nomo wok.”
Mi kam blong luk save se sad nius ia hem i wan bigfala samting, taem mi stap wokem aot ol samting we bae hapen afta. Be long dei ia we bae mi neva fogetem, hem i bin las toktok blong hem we i stap long hat blong mi kasem tedei. Dia papa blong mi i talem stret se, “Bonnie, neva mestem wan janis blong testifae abaot Kraes.”
Mi bin tingting hevi mo prea plante abaot kaonsel blong Papa blong mi. Mi bin askem miwan plante taem sapos mi save fulwan wanem i minim blong neva mestem wan janis blong testifae abaot Jisas Kraes.
Olsem yufala, plante taem mi stanap long fored blong fas Sandei blong manis mo serem witnes blong mi abaot Kraes. Plante taem mi testifae abaot ol tru tok blong gospel olsem pat blong wan lesen. Mi no fraet blong tijim tru tok mo talemaot tabu fasin blong Kraes olsem wan misinari.
!Yet rikwes ia long mi hem i moa blong mi wan! I luk olsem we hem i stap talem se, !“Bonnie, no letem wol i winim yu! Stap tru long ol kavenan blong yu wetem Sevya. !Lukaotem blong kasem ol eksperiens blong ol blesing blong Hem evri dei, mo save testifae tru long Tabu Spirit abaot paoa blong Hem mo presen blong Hem long laef blong yu!”
Yumi laef long wan wol we i fulap long sin, wetem wetem ol samting we i pulum yumi blong lukluk moa long ol samting blong wol bitim ol samting blong heven. Semmak olsem ol Man blong Nifae long 3 Nifae 11, yumi nidim Jisas Kraes. ?Yu yu save pikjarem yuwan long we, long medel blong pipol we oli bin eksperiensem plante raorao mo damej? Bae yu filim olsem wanem blong harem invitesen blong Lod i kam long yuwan.
“Girap mo kam fored long mi, blong yufala i save putum ol han blong yufala insaed long saed blong mi, mo tu, blong yufala i save filim ol mak blong ol nil long ol han blong mi mo long ol leg blong mi, blong yufala i save se mi mi … God blong ful wol, mo oli bin kilimded mi from ol sin blong wol.
“Mo … i bin hapen se grup blong ol pipol ia oli go fored … wan afta narawan … mo oli luk wetem ol ae blong olgeta oli filim wetem ol han blong olgeta, mo oli save gud … mo oli witnes blong olgetawan.”1
Ol Man blong Nifae oli go fored mo putum ol han blong olgeta long saed blong Hem mo filim ol mak blong nil long ol han mo leg blong Hem, blong oli save witnes olgetawan se hemia i Kraes. I semmak, plante fetful pipol we yumi stadi abaot olgeta long Niu Testeman long yia ia oli bin wet longtaem from taem ia we Kraes bae i kam. Afta oli kamaot long ol garen blong olgeta, long wok, mo tebol blong kakae mo bin folem Hem, oli hipap raon long hem, oli paspas raon long Hem mo sidaon wetem Hem. ?Yumi evriwan i wet blong witnesem yumiwan, olsem hip blong ol man ia insaed long ol skripja? ?Ol blesing we yumi stap lukaotem ia i no impoten olsem blong olgeta?
Taem Sevya i visitim ol Man blong Nifae long tempol blong olgeta, Hem i invaetem olgeta blong no stanap longwe mo lukluk Hem, be blong tajem Hem, blong filim long olgetawan tru Sevya ia we i blong evri man long wol ia. ?Olsem wan nao yumi save kam moa kolosap blong kasem wan witnes blong yumiwan abaot Jisas Kraes? Hemia i pat blong wanem papa blong mi i bin stap traem blong tijim mi. !Naoia ating yumi no save enjoem semmak filing blong stap kolosap olsem olgeta we oli bin wokbaot wetem Kraes long taem we Hem i bin stap long ministri blong Hem long wol ia, be tru long Tabu Spirit yumi save eksperiensem paoa blong Hem evri dei! !Fulap taem olsem we yumi nidim!
Ol yang woman raon long wol oli bin tijim mi plante abaot fasin blong lukaotem Kraes mo kasem wan witnes blong miwan abaot Hem evri dei. Letem mi serem waes tingting blong tu long olgeta:
Livvy i bin wajem jeneral konfrens blong ful laef blong hem. I tru, long hom blong hem, hem i kam wan kastom blong wajem evri faef sesen olsem wan famli. Bifo, konfrens long Livvy i bin taem blong dro o blong stap tekem smolsmol slip. Be long Oktoba konfrens we i jes pas hem i bin defren. Hem i bin kam pat blong hemwan.
Long taem ia, Livvy i disaed blong folem gud ol toktok. Hem i ofem saon blong mesej long fon blong hem mo tekem not long ol toktok we hem i kasem strong tingting long hem we Spirit i givim long hem. Hem i sapraes taem hem i filim sam impoten samting we God i wantem hem blong harem mo mekem. Desisen ia i bin mekem wan jenis long laef blong hem kolosap kwik taem nomo.
Sam dei i pas, ol fren blong hem oli invaetem hem long wan muvi we i no stret tumas. Hem i pikjarem taem ia, “Mi bin filim ol toktok mo spirit blong konfrens i kam bak insaed long hat blong mi, mo mi harem miwan mi talem no long invitesen blong olgeta.” Hem i bin gat strong paoa long tingting tu blong serem testemoni blong hem abaot Sevya long wod blong hem.
Afta long taem ia, hem i talem “Sapraes samting i we, taem mi harem miwan i stap testifae se Jisas Hem i Kraes, mi filim Tabu Spirit i konfemem hemia bakegen long mi.”
Livvy long konfrens ia, i no olsem wan ston we yu sakem antap long wota mo i jam jam; hem i bin draon i go insaed, long maen mo spirit, mo faenem Sevya long ples ia nao.
Mo i gat Maddy. Taem famli blong hem oli stop blong stap go long jos, Maddy i bin konfius mo no save gud wanem blong mekem. Hem i sapraes taem hem i filim sam impoten samting oli lus. Taem hem i gat 13 yia, Maddy i stat blong go long jos hemwan. Nomata se blong stap yuwan samtaem hem i had mo i nogat kamfot, hem i save se hem bae i save faenem Sevya long jos mo hem i wantem blong stap long ples we Jisas i stap long hem. Hem i se, “Long jos, sol blong mi i filim olsem se mi stap long hom”
Maddy i tingting strong long siling blong famli blong hem blong taem we i no save finis. Hem i bin statem blong stap tekem ol yangfala brata blong hem i go long jos wetem hem mo stap stadi long ol skripja wetem olgeta long hom. Long en mama blong hem i stat blong stap joenem olgeta. Maddy i talem long mama blong hem se hem i wantem blong go long misin mo askem sapos mama blong hem i save rere blong go long tempol wetem hem.
Tedei Maddy i stap long MTC. Hem i stap givim seves. Hem i stap witnesem Kraes. Eksampol blong hem i bin help blong lidim tugeta papa mo mama blong hem i gobak long tempol mo Kraes.
Olsem Livvy mo Maddy, taem yumi jusum blong lukaotem Kraes, Spirit bae i witnes abaot Hem long plante defren situesen. Ol witnes ia blong Spirit oli hapen taem yumi fas, prea, wet mo gohed blong go fored. Yumi kam moa kolosap long Kraes taem yumi stap wosip evri taem insaed long tempol, stap sakem sin evri dei, stap stadi ol skripja, stap go long jos mo seminari, stap tingting hevi long ol petriakol blesing blong yumi, stap kasem ol odinens long wan klin mo stret fasin, mo stap ona long ol tabu kavenan. Evri samting ia oli invaetem Spirit blong fulumap ol maen blong yumi, mo oli givim moa pis mo proteksen. ?Be yumi stap ona long olgeta olsem ol tabu janis blong testifae abaot Kraes?
Mi bin go long tempol plante taem, be taem mi wosip insaed long haos blong Lod, i jenisim mi. Samtaem taem mi stap fas, mi faenem se mi stap hanggri nomo be long ol nara taem, mi kakae long Spirit wetem stamba tingting. Samtaem mi mekem ol hariap prea nomo we mi stap ripitim mo i kam wan samting we mi mekem evri dei be mi kam blong wantem tumas blong karem kaonsel long Lod tru long prea.
I gat paoa taem yumi mekem ol tabu fasin ia oli no kam olsem wan lis blong ol samting blong mekem mo kam moa olsem wan witnes. Rod blong kasem en hem i longfala be bae yumi gro taem yumi tekpat evri dei wetem stamba tingting ia blong kasem ol eksperiens wetem Kraes. Taem yumi oltaem mekem folem ol tijing blong hem, yumi kasem wan testemoni abaot Hem; yumi bildimap wan rilesensip wetem Hem mo Papa blong yumi long Heven. Yumi statem blong kam moa olsem Tufala.
Setan i krietem tumas noes we i save mekem i had blong harem voes blong Lod. Wol, jalenj mo situesen blong yumi bae oli no kam kwaet, be yumi save mo mas hanggri mo tosta from ol samting blong Kraes blong “lisin gud long Hem” wetem fasin blong lisin gud.2 Yumi wantem blong krietem memori insaed long hed blong yumi abaot fasin blong wan disaepol mo testemoni, we i bae helpem yumi blong lukluk moa long Sevya evri dei.
Papa blong mi i ded 11 yia i pas nao, be ol toktok blong hem i laef i stap wetem mi. “Bonnie, neva mestem wan janis blong testifae abaot Kraes.” Mi invaetem yu blong joen wetem mi blong stap akseptem invitesen blong Hem. Lukaotem Kraes long evri ples―Mi promes se Hem i stap ia!3 Tru glad i stap long fasin blong yumi blong wantem blong kam kolosap long Kraes mo kasem witnes blong yumiwan.
Yumi save se long las dei, “evri ni bae i bodaon, mo evri tang bae i talemaot” se Jisas hem i Kraes.4 Mi prea se witnes ia bae kam wan nomol eksperiens blong yumi naoia—se bae yumi tekem janis ia wetem glad blong testifae: !Jisas Kraes i laef!
O, mi lavem Hem tumas. Yumi talem tangkyu from tabu Atonmen blong Hem “mo i mekem se fasin blong nomo save ded, i ril long [yumi] evriwan.”5 Mi testifae abaot ol gudfala samting we Hem i mekem mo bigfala glori long tabu nem blong Hem, iven Jisas Kraes, amen