Fasin We I No Stret Evriwan Long Taem Blong Karemaot Ol Kaekae We Oli Rere

Olsem wan yang boe, mi lanem blong lavem ol spesel taem blong yia we ol sisen oli stap jenis long saotwes Montana, ples we mi bin groap long hem. Sisen we mi laekem hem i sisen blong Fol—taem blong karemaot ol kaekae we oli rere. Famli blong mifala i hop mo prea se ol manis blong mifala blong hadwok bae i gat pei blong hem blong karemaot plante kaekae we oli rere. Papa mo mama blong mi i wari long weta, helt blong ol animol mo ol kaekae long garen mo plante narafala samting we oli no save kontrolem tumas.

Taem mi stap groap, mi kam blong luksave moa wanem we oli impoten. Laef blong mifala i dipen long taem we oli karemaot kaekae we oli rere. Papa blong mi i tijim mi abaot tul we mifala i yusum blong karemaot ol sid we oli rere blong kakae. Mi wajem taem hem i muvum masin i go long fil, i katem wan smol laen blong ol sid mo afta i jekem biaen blong mekemsua se hamas sid we masin i sevem, bae i nomo foldaon i go aotsaed wetem ol toti blong sid. Evri taem hem i ripitim pat ia, hem i mas stretem masin folem. Mi ron long saed blong masin we i sakem toti blong sid mo mekem olsem se mi save finis wanem blong mekem.

Afta we hem i filim gud from masin we hem i stretem, mi faenem sam gudfala sid we i stap wetem ol toti blong sid long graon, mo wetem nogud fes, mi soem long hem. Bae mi no fogetem wanem we papa blong mi i talem long mi: “Hemia i gud inaf mo hem i wanem we masin ia i save mekem gud inaf.” Mi no glad tumas wetem wanem hem i eksplenem, mi tingting hevi long fasin ia we i no stret evriwan long taem blong karemaot kaekae we oli rere.

Smol taem afta, taem ples i kolkol long ol naet, mi stap wajem taosen blong ol swan [bigfala pijin blong wota], gus, mo dakdak we oli kam long nara ples mo kam fidim olgetawan long fil long longfala wokbaot blong olgeta i go long saot. Oli kakae ol hafhaf sid we mifala i no bin karemaot gud . God i mekem i stret gud evriwan. Mo i no gat wan smol pat blong ol sid ia i lus.

Plante taem hem i wan temtesen long wol blong yumi mo iven insaed long kalja blong Jos blong wantem evri samting i mas stret evriwan. Sosol media, ol drim blong gat samting, mo plante taem jajmen blong yumi i soem se yumi no inaf—se yumi no gud inaf mo neva save kam gud inaf. Iven sam oli andastanem rong invitesen blong Sevya blong “mas stret gud.”¹

Tingbaot se fasin blong kam stret evriwan i no semmak olsem stap stret gud evriwan long Kraes.² Fasin blong kam stret evriwan i wan standet we i no posibol we yumiwan yumi mekem, we i blong stap komperem yumi long ol narawan. Hemia i mekem man i harem nogud, mo wari mo i save pulumaot yumi mo mekem yumi stap yumiwan.

Blong stap kam stret evriwan long Kraes i wan defren samting. Hem i wan proses—we Tabu Spirit i givhan wetem lav—blong stap kam moa olsem Sevya. Papa long Heven we i save evri samting i putum ol standet mo mining blong hem i klia insaed long ol kavenan we oli invaetem yumi blong mekem. Oli karemaot ol harem nogud blong yumi mo se yumi no gud inaf, mo oltaem talem bigwan huia yumi long ae blong God. Taem step we yumi tekem i leftemap yumi mo i pusum yumi blong kam moa gud, i soem hamas yumi givim divosen blong yumi long God we yumi soemaot tru ol hadwok blong yumi blong folem Hem wetem fet. Taem yumi akseptem invitesen blong Sevya blong kam long Hem, kwiktaem yumi kam blong luksave se wanem yumi mekem i gud tumas i gud inaf mo se gladhat blong wan Sevya we i gat lav, bae i mekemap ples we i stap long ol wei we yumi no save tingting long hem.

Yumi save luk paoa blong prinsipol ia long taem we Sevya i fidim faef taosen man.

“Nao Jisas i lukluk i go longwe mo i luk we plante man oli stap wokbaot i kam. Nao hem i askem long Filip se, ?Bambae yumi save pem bred olsem wanem, blong ol man ya oli save kakae?

“Nao Filip i talem long hem se, “!Ei! Sipos yumi pem kakae long tu handred taosen vatu*, be bambae i no naf yet blong olgeta ya evriwan oli save kakae smosmol nomo.

“Nao wan man blong Jisas we i brata blong Saemon Pita, nem blong hem Andru, hem i talem long Jisas se,

“I gat wan yang boe i stap long ples ya, we hem i gat faef bale bred mo tu fis. Be bambae i no naf nating long olgeta man ya.”³

?Yu neva gat tingting ia se Sevya i filim olsem wanem long yangfala boe ia we, wetem fet blong wan pikinini, hem i givim wanem we hem i save finis se bae i no inaf long fored blong bigfala wok we i stap?

“Nao Jisas i tekem bred, i talem tangkyu long God from, nao i givimaot bred ya long olgeta evriwan we oli stap sidaon. Hem i mekem olsem long fis tu, nao olgeta oli kakae olsem we oli wantem.

“Mo taem oli kakae finis, Jisas i talem long ol man blong hem se, “Yufala i go pikmap ol hafhafkakae ya we i stap. I nogud yumi westem.”⁴

Sevya i mekem smol kaekae ia i stret gud inaf blong evri man.

Sot taem afta long eksperiens ia, Jisas i sendem ol disaepol blong Hem long wan bot. I no longtaem oli luk se oli stap long fesem wan strong win blong solwota long medel blong naet. Oli fraet taem oli luk wan spirit blong wan man i stap wokbaot antap long wota mo stap go stret long olgeta.

“Be wantaem nomo, Jisas i talem long olgeta se ‘Yufala i no harem nogud. Mi nomo ya. Yufala i no fraet.”

“Mo Pita i talem se: ‘?Masta i tru, yu ya? Sapos i olsem, yu talem long mi blong mi wokbaot antap long wota mi kam long yu.’

“Nao Jisas i talem se, Yu Kam. Mo taem Pita i aot long bot, i stat wokbaot antap long wota, i go kolosap long Jisas.

“Be taem hem i harem we win ya i strong, hem i fraet; nao i stat draon, mo i singaot se: ‘Masta plis yu sevem mi.’

“Nao wantaem nomo Jisas i stretem han blong hem, i holem hem nao i talem se: “?Man, from wanem yu gat tu tingting olsem? !Bilif blong yu i smol tumas!”⁵

Ol brata mo sista, maet hemia i no bin en blong storian ia. Mi biliv se taem Pita mo Sevya i holem han mo wokbaot i gobak long sip, Pita i mas wetwet gud mo filim olsem wan krangke man, Sevya maet i talem wan samting olsem: “O, Pita, no fraet mo no wari. Sapos yu save luk yuwan olsem we mi luk yu, fraet blong yu bae i save lus mo fet blong yu bae i kam antap. Mi lavem yu, dia Pita; yu bin kamaot long bot. Mi akseptem wanem yu mekem, mo iven we yu foldaon, bae mi oltaem stap ia blong leftemap yu aot long ol trabol, mo wanem yu mekem, bae i kam stret evriwan.”

Elda Dieter F. Uchtdorf i tijim:

“Mi biliv se Sevya Jisas Kraes bae i wantem yufala blong luk, filim, mo save se Hem i paoa blong yufala. Se wetem help blong Hem, i no gat limit long wanem we yu wantem blong mekem i kamtru. Se paoa blong yuwan i no gat limit. Hem i wantem blong yufala i luk yufala long wei we Hem i luk yufala. Mo hemia i defren long wei we wol i luk long yufala. …

“Hem i givim paoa long olgeta we oli taet; mo long olgeta we oli filim se oli no gat paoa, Hem i givim moa paoa.”⁶

Yumi mas tingbaot se wanem we yumi givim we i gud tumas be i no stret evriwan, Sevya i save mekem i kam stret evriwan. I nomata yumi ting se hadwok blong yumi oli no impoten, yumi no mas tingdaon long paoa blong Sevya. Wan simpol kaen toktok, wan sot be tru visit blong givhan, o wan Praemeri lesen we oli bin tijim wetem lav i save, wetem help blong Sevya, givim kamfot, mekem ol hat oli sopsop, mo jenisim ol laef we i no save finis. Ol hadwok blong yumi we i no gud tumas, i save lid i go long ol merikel, mo long wei ia, yumi save tekpat long wan taem we i stret gud evriwan blong karemaot ol kaekae we oli rere.

Plante taem, yumi stap long ol situesen we i mekem yumi gro long saed blong spirit tru ol eksperiens we i had. Maet yumi no filim se yumi inaf blong mekem wok ia. Maet yumi luk long olgeta we yumi wok wetem mo filim se bae yumi neva save kam olsem olgeta. Ol brata mo sista, sapos yu filim olsem, luk ol spesel man mo woman we oli sidaon biaen long mi, we mi stap givim seves wetem olgeta.

Mi filim harem nogud blong yufala.

Be mi bin lanem, se olsem fasin blong kam stret evriwan i no semmak olsem blong stap stret gud evriwan long Kraes, stap komperem yuwan i no semmak olsem fasin blong mekem folem. Taem yumi komperem yumiwan long ol narawan, bae i gat tu(2) samting nomo we i kamaot. Ating bae yumi luk se yumi moa gud long ol nara man mo stap jajem mo talem nogud olgeta, o bae yumi putum daon yumiwan bitim ol nara man mo wari tumas, nogat gud lukluk long yuwan, mo lukdaon long yu. Stap komperem yumiwan long ol nara man i wan samting we i no help nating, i no stap leftemap man, mo samtaem i mekem tingting i foldaon. I tru, ol fasin blong komperem man i save spolem laef long saed blong spirit, mo stap stopem yumi blong kasem help we yumi nidim long saed blong spirit. Long narafala wei, mekem folem olgeta we yumi respektem we oli soem ol fasin olsem hemia blong Kraes, i save tijim, mo leftemap, mo save helpem yumi kam ol moa gud disaepol blong Jisas Kraes.

Sevya i givim yumi wan eksampol blong folem olsem we Hem i mekem folem Papa. Hem i givim instraksen long disaepol blong Hem Filip: “?Filip, mi mi stap longtaem finis wetem yufala, be yu no save mi yet? Man we i luk mi hem i luk Papa blong mi. ?Olsem wanem yu yu talem se, Plis yu soemaot Papa blong yu long mifala?”⁷

Mo afta Hem i tijim, “Tru mi talem long yufala. Man we i bilif long mi, hem bambae i save mekem ol wok ya we mi mi stap mekem.”⁸

I nomata yumi ting se hadwok blong yumi oli no impoten, sapos yumi gat tru tingting, Sevya bae i yusum yumi blong mekem wok blong Hem. Sapos yumi givim bes we yumi save mekem mo trastem Hem blong mekemap ples we i stap, yumi save kam pat blong ol merikel we i stap raon long yumi.

Elda Dale G. Renlund i talem, “Yufala i no nid blong kam stret evriwan, be mifala i nidim yufala from evriwan we oli wiling, oli save mekem wan samting.”⁹

Mo Presiden Nelson i tijim yumi se, “Lod i lavem hadwok.”¹⁰

Sevya i stanap rere blong akseptem smol we yumi save givim mo mekem olgeta oli kam stret evriwan tru long gladhat blong Hem. Wetem Kraes i nogat wan taem we i no stret evriwan blong karemaot ol kaekae we oli rere. Yumi mas leftemap tingting blong biliv se gladhat blong Hem i blong yumi—se bae Hem i helpem yumi, sevem yumi long ol trabol taem we yumi foldaon, mo mekem i kam stret evriwan ol hadwok blong yumi we i no stret evriwan.

Long parabol blong man we i planem sid, Sevya i tokbaot ol sid we oli planem long gudfala graon. Sam oli karem kaekae handred taem, sam siksti, mo sam teti. Evriwan i pat blong taem we i stret gud evriwan blong karemaot ol kaekae we oli rere.¹¹

Profet Moronae i invaetem evriwan, “Yes, kam long Kraes, mo kam stret evriwan tru hem, … mo sapos bae yufala i tanem baksaed blong yufala long evri fasin we i no olsem blong god, mo lavem God wetem ful paoa blong tingting, ful maen mo ful paoa blong yufala, afta nao, gladhat blong hem i naf blong yufala, blong tru long gladhat blong hem, yufala i save kam stret evriwan tru Kraes.”¹²

Ol brata mo sista, mi testifae abaot Kraes, we i gat paoa blong mekem smol samting we yumi givim i kam stret evriwan. Letem yumi mekem bes blong yumi, karem wanem yumi save karem, mo wetem fet, putumdaon wanem we yumi gat blong givim we i no stret evriwan long leg blong Hem. Long nem blong Hem we i Masta blong taem we i stret evriwan blong karemaot ol kaekae we oli rere, iven Jisas Kraes, amen.