Stap Trastem Doktrin Blong Kraes

Long tingting blong mi, mi luk olfala profet Nifae long tebol blong hem, ol buk we oli wokem long gol, oli stap long tebol long fored blong hem, mo wan tul we oli yusum blong raet long hem.

Nifae i stap long pat ia blong finisim ol las raeting blong hem long rekod. Hem i bin raetem, “Mo nao, ol brata blong mi we mi lavem tumas, mi stop long ol toktok blong mi.”¹ I no longtaem afta, Spirit i talem strong long Nifae blong gobak long rekod blong hem mo raetem wan las mesej. Wetem paoa blong Tabu Spirit, profet ia i tekem tul we i yusum blong raet bakegen long han blong hem mo raetem, “Taswe, ol samting we mi bin raetem oli inaf long mi, be samfala toktok … mi mas talemaot long saed blong doktrin blong Kraes.”³

Hamas yumi talem tangkyu we i no save finis from “samfala toktok”⁴ ia mo blong Spirit we i stap fosem Nifae blong raetem olgeta. Wok blong raet blong Nifae we i abaot doktrin blong Kraes, i spesel mo gat bigfala valiu long olgeta we oli ridim oltaem. I gat insaed visen blong baptaes⁴ blong Sevya mo voes blong Pikinini, i stap invaetem evriwan blong folem Hem⁵ mo “mekem ol samting we [yumi] bin luk [Hem] i mekem.”⁶ I gat insaed witnes blong Nifae se olgeta we oli gat fet long Kraes, sakem sin wetem tru hat mo folem Sevya i go long wota blong baptaes bae oli “kasem Tabu Spirit; yes, afta nao baptaes blong faea mo blong Tabu Spirit.”⁶ Yumi harem tu voes blong Papa we i stap talemaot: “Yes, ol toktok blong Pikinini blong mi we Mi Lavem Tumas oli tru mo oli fetful. Hem we i stap strong kasem en, semfala man ia bae hem i sevem.”⁸

Presiden Russell M. Nelson i bin tokbaot bigwan wan impoten doktrin blong Kraes long las toktok blong hem i go long ol lida blong misin: “Bitim eni narafala samting, mifala i wantem ol misinari … blong oli raetem long hat blong olgeta doktrin blong Kraes—we oli save hang strong … long hem long laef blong olgeta.”⁹

Prijim Gopsel blong Mi i talem sot stori blong ol faefala stamba doktrin blong Kraes. Hem i talem, “[Yumi] invaetem ol narafala man blong kam long Kraes tru long fet long Jisas Kraes mo Atonmen blong Hem, fasin blong sakem sin, baptaes, kasem presen we i Tabu Spirit, mo stanap strong kasem en.”¹⁰

!Be hamas we doktrin blong Kraes i impoten, i no blong ol misinari nomo! Mo hem i moa gud bitim blong stap ripitim wan sot stori abaot hemia long ol faevfala ki pat blong hem. Hem i holem insaed ol loa blong gospel. Hem i bigfala plan blong laef we i no save finis.

Ol brata mo sista, sapos yumi akseptem invitesen blong Presiden Nelson blong gat doktrin blong Kraes i kam stamba blong laef blong yumi bae, yumi mas tingting hevi long fasin blong jenisim laef blong yumi i go long Lod tru long stadi, prea, stap fetful long laef ia mo gohed long fasin blong sakem sin. Yumi mas invaetem Tabu Spirit blong i raetem doktrin blong Kraes long “ol tingting mo [hat] blong [yumi]”¹⁰ i go dip mo bae i nomo save kamaot olsem we Nifae i raetem long buk we oli wokem long gol.

Long las Oktoba, Presiden Nelson i askem, “?Wanem i minim blong winim wol?” Long medel blong ol narafala samting, hem i talem, “I minim blong trastem doktrin blong Kraes moa bitim save blong man.”¹¹

Toktok ia tras oli talem mining blong hem olsem “wan hop we i dipen long fasin, paoa blong mekem samting, paoa, o trutok abaot wan man o wan samting.”¹² Man ia hem i Jisas Kraes, mo se wan samting ia, i doktrin blong Hem.

So, ?Olsem wanem nao taem yumi filim se yumi stap trastem doktrin blong Kraes, i save jenisim wei we yumi stap laef?

Sapos yumi bin trastem doktrin blong Kraes, bae yumi save trastem Hem i, inaf blong laef folem evri toktok blong Hem.¹³ Bae yumi mekem stadi blong yumi abaot Jisas Kraes i pat blong laef blong yumi,¹⁵ Seves blong Hem, ol tijing blong Hem mo Atonmen blong Hem we i no gat en we i tekem tu, Laef Bakegen long Ded blong Hem we i fulap long glori. Bae yumi stadi long ol promes blong Hem mo ol kondisen we ol promes ia oli stanap long hem.¹⁵ Taem yumi stadi, bambae yumi fulap wetem bigfala lav blong Lod.

Sapos yumi trastem doktrin blong Kraes, bae yumi kam long Papa blong yumi long Heven tru long prea we i sikret, evri dei wetem tingting we i stap daon, long wei ia bae yumi save soem tangkyu blong yumi from presen ia we i Pikinini blong Hem mo from evri blesing blong yumi.¹⁷ Yumi save prea from revelesen we i kam tru long kompanionsip blong Tabu Spirit¹⁷ prea blong mekem tingting blong yumi i stret wetem tingting blong Hem,¹⁸ prea blong luklukbak long ol kavenan blong yumi mo blong mekem i kam niu bakegen komitmen blong yumi blong kipim olgeta.¹⁹ Yumi save prea blong sapotem mo soem lav blong yumi long ol profet, sia mo ol reveleta;²¹ prea from paoa blong kam klin tru long fogivnes;²² mo prea from paoa blong winim temtesen.²³ Mi invaetem yufala blong mekem prea i kam ol fas samting long laef blong yufala, lukaotem evri dei blong mekem fasin blong toktok wetem God i kam antap.

Sapos yumi trastem doktrin blong Kraes, bae yumi putum long saed ol saensaen samting blong wol mekem se yumi save lukluk nomo long Ridima blong wol.²⁶ Bae yumi katemdaon o karemaot taem we yumi stap spentem long sosol media; ol dijitol gem; ol aktiviti we oli westem taem, mo oli nogud mo oli no impoten; paoa blong ol rij samting mo ol flas samting blong wol; mo eni narafala aktiviti we oli letem ol kastom mo ol tingting blong man oli lidim yumi i go rong. Hem i tru long Kraes nomo, bae yumi faenem trutok mo bae i hapen olsem blong oltaem.

Fasin blong sakem sin we i hapen wetem tru hat²⁶ bae i mekem yumi fulap wetem glad²⁷ olsem pat blong laef blong yumi—tugeta blong Hem i fogivim yumi from ol sin blong yumi mo blong kasem pikja blong hem long fes blong yumi.²⁸ Fasin blong sakem sin tru fet long Jisas Kraes i stap lidim yumi i go long Atonmen blong Kraes. Presiden Dallin H. Oaks i bin tijim se, taem we Sevya i fogiv, Hem “i mekem moa, bitim blong mekem yumi kam klin long ol sin blong [yumi], mo tu, Hem i givim niufala paoa. Hem i givim long [yumi] tu, niufala paoa.”²⁸ Wanwan long yumi i nidim paoa ia blong obei long ol komanmen blong God mo blong mekem i hapen stamba tingting blong laef we i no save finis i kam tru.

Long Jisas mo long doktrin blong Hem, yumi faenem paoa. Hem i talem, “I tru, i tru, mi talem long yufala, se hemia i doktrin blong mi, mo huia we i bildimap hem long hemia hem i bildimap hem antap long strong ston blong mi, mo ol get blong hel oli no save win agensem hem.”³⁶

Yumi luk promes ia i kam tru long laef blong ol pipol we oli stap fetful. Smoltaem afta long wan yia i pas, i bin wan janis blong mi blong mitim Travis mo Kacie. Tufala i mekem sivil mared long 2007. Long taem ia, Travis i no bin wan memba blong Jos. Nomata se Kacie, i groap long wan hom we i gat ol aktiv memba long hem, i bin lusum fet blong hem long taem hem i yangfala mo i bin kam slak long testemoni blong Hem.

Long 2018, Travis i bin mitim ol misinari mo hem i bin baptaes long 2019. Travis i kam wan misinari long Kacie, we hem tu i bin kasem wan eksperiens we i jenisim laef fulwan. Tufala i bin sil long tempol long Septemba 2020. Kolosap tu yia i pas, oli singaotem Travis blong givim seves long bisoprik.

Travis i gat wan sik we i no hapen tumas, we i stap gohed blong fomem ol kansa insaed long ol pat blong bodi blong hem. Hem i bin go tru long plante operesen blong karemaot kansa we i stap fom bakegen wanwan taem, be sik ia oli no save stopem. Sam yia i pas, oli talem long Travis se bae hem i no save laef ova long 10 yia.

Kacie i kasem sik blong nomo save lukluk gud, wan sik we i no hapen tumas, we i mekem se ae bae i nomo save luk samting sloslo gogo kasem we i mekem man i kam blaen fulwan.

Kacie i toktok long mi abaot fiuja blong hem. Hem i stap tingting se bae i no longtaem bae hem i kam wido, blaen, no gat sapot long saed blong mane, mo stap hemwan blong lukaotem ol fofala pikinini we oli stap groap. Mi askem Kacie se olsem wanem nao hem i save gohed strong wetem wan situesen we i mekem hem i save lusum hop. Hem i smael wetem filing blong pis mo talem, “mi neva bin hapi moa o gat moa hop long laef blong mi. Yumi hang strong long ol promes we yumi kasem long tempol.”

Naoia, Travis hem i bisop. Tu manis i pas, hem i gat wan narafala series operesen. Be hem i gat tras mo pis. Sik blong ae blong Kacie i kam moa nogud. Naoia hem i gat wan dog we i stap lidim hem mo hem i nomo save draev. Be hem i hapi, blong stap lukaot long ol pikinini mo stap givim seves olsem wan kaonsela insaed long presidensi blong Yang Woman.

Travis mo Kacie tufala i stap bildimap haos blong tufala long strong ston. Travis mo Kacie tufala i trastem Doktrin Blong Kraes mo promes we God, “bambae hem i konsekretem ol hadtaem blong [tufala] blong oli kam wan blesing blong [tufala].”³⁰ Long plan blong God we i stret evriwan, fasin blong stap harem nogud wetem fet long Jisas Kraes i konek wetem fasin blong yumi blong kam stret gud evriwan long Kraes.³¹ Olsem waes man long parabol we i bildimap haos blong hem long wan strong ston³⁴ taem we ren i foldaon, mo ol wota oli ron bigwan, mo win i blo mo oli kilim haos ia we Travis mo Kacie i bin bildimap, i no foldaon, from we hem i stap stanap strong long wan strong ston.³⁵

Jisas i no tokbaot se bae i posibol blong ren mo bigfala wota bae i ron mo win bae i blo long laef blong yumi; Hem i tokbaot se bae i gat ol strong win bae i girap. Ol jenis insaed long parabol ia oli no from se strong win bae i kam o no, be hem i olsem wanem yumi bin stap folem invitesen blong Hem we i gat lav blong tugeta, harem mo mekem wanem we Hem i bin tijim.³⁶ I no gat wan narafala wei blong win long laef.

Taem yumi bildimap ol haos blong yumi long fandesen blong wan rilesensip tru long kavenan we yumi mekem wetem Kraes, yumi stap trastem doktrin blong Kraes mo taem yumi kam long Hem, yumi gat promes blong Hem blong kasem laef we i no save finis. Ol pipol we oli trastem doktrin blong Kraes oli muv i go fored wetem strong biliv long Kraes mo stanap strong kasem en. I no gat wan narafala rod we ol man i save sef long kingdom blong God.³⁵

Mi serem witnes blong miwan se, i tru, Lod, Jisas Kraes i bin girap bakegen long ded. Mi testifae se God i lavem wol tumas mekem se I sendem Pikinini blong Hem i kam blong pemaot yumi long sin³⁹ mo hilim yumi long ol harem nogud blong yumi.⁴⁰ Mi testifae se Hem i bin singaotem wan profet blong God long taem blong yumi, iven Presiden Russell M. Nelson, we tru long hem, i toktok mo lidim yumi.

Wetem ful hat blong mi, mi invaetem yufala, blong trastem doktrin blong Kraes mo bildimap laef blong yufala long ston blong Ridima. !Bae Hem i neva lego yu! Long nem blong Jisas Kraes, amen.