?Mi Bin Kasem Tru Fogivnes?

Samfala yia i pas, mi mo Sista Nattress i muv i go long Aedaho long ples ia mitufala i openem wan niufala bisnis. I bin gat ol longfala dei mo naet long ofis. Tangkyu tumas from se mifala i stap kolosap nomo long ples blong wok. Evri wik, Shawna mo trifala gel blong mitufala—evriwan oli anda sikis yia—bae oli kam long ofis mo mifala serem lanj kaekae tugeta.

Long wan dei afta long famli lanj blong mifala, mi luksave se gel blong mitufala we i gat faef yia, Michelle, i bin putum wan mesej blong mi, we hem i raetem long wan pis pepa mo stikim long telefon blong ofis blong mi.

I simpol mo i rid olsem, “Papa, tingbaot blong lavem mi. Lav, Michelle. Hemia i wan rimaenda we i gat paoa long wan yangfala papa abaot ol samting we oli moa impoten.

Ol brata mo sista, mi testifae se oltaem Papa blong yumi long Heven i tingbaot yumi mo se Hem i lavem yumi i stret evriwan. Kwestin blong mi i we: ?Yumi stap tingbaot Hem? Mo ?yumi lavem Hem?

Sam yia i pas, mi bin givim seves olsem wan lokol lida blong Jos. Wan long ol yang man blong mifala, Danny, i wan gudfala boe long evri wei. Hem i stap obei, kaen, gud mo gat wan gudfala hat. Be, taem hem i graduet long hae skul, hem i stat blong joenem wan grup blong ol pipol we oli stronghed. Hem i joen blong tekem ol drag, speseli metamfetamin, mo mekem ol samting we bae i save spolem laef blong hem. I no longtaem, man i no luksave hem from i jenis bigwan. I had blong luksave hem. Samting we i jenis bigwan i ae blong hem—laet long ae blong hem i nomo saen gud. Plante taem mi traem blong kasem hem be, nogat nomo. Hem i nogat intres.

!I had tumas blong luk wan gudfala yang man olsem we i safa mo laef long wan laef we i no hem nomo! Hem i save mekem plante samting yet.

Nao, wan dei, merikel blong hem i stat.

Hem i kam long wan sakramen miting, long ples ia, yangfala brata blong hem i serem testemoni blong hem bifo bae i go long wan misin. Long taem blong miting, Danny i bin filim wan samting we hem i no bin filim blong wan longfala taem. Hem i filim lav blong Lod. Long en, hem i gat hop.

Nomata se hem i gat wan hat we i wantem jenis, i bin had tumas long Danny. Ol samting we hem i no save kontrolem mo ol samting we oli mekem hem i sem, oli kam moa bigwan bitim we hem i save tekem.

Wan aftenun, taem mi stap aotsaed mo stap katem gras, Danny i draev i kam stop, mo hem i no bin talem se bae i kam. Hem i stap traehad bigwan. Mi ofem masin blong katem gras, mo mitufala i sidaon tugeta long veranda long ples we i no gat san long fored blong veranda. Long tetaem ia nao, hem i bin serem ol filing blong hat blong hem. I tru, hem i wantem kambak. Be, blong tanem hem long ol samting we hem i no save kontrolem mo laef stael blong hem i had tumas. Blong ademap long hemia, hem i filim bigfala sem from hem i foldaon i go longwe tumas. Hem i askem, “?Mi save kasem fogivnes fulwan? ?I tru se i gat wan wei blong kambak?”

Afta we hem i talemaot ol harem nogud blong hat blong hem, mitufala i ridim tugeta Alma japta 36 :

“Yes, mi bin tingbaot ol sin mo ol rabis fasin blong mi.

“Yes, … mekem se tingting ia blong kam stap wetem God blong mi, i bin terem sol blong mi wetem fraet ia we i nogat toktok we i save talem.” (ol ves 13–14).

Afta long ol ves ia, Danny i talem, “!Hemia i semmak filing we mi gat!”

Mitufala i gohed:

“Long semtaem ia mi stap tingbaot wetem bigfala soa, ol plante sin blong mi, luk, mi bin tingbaot tu we mi bin harem papa blong mi i profesae long ol pipol long saed blong wan Jisas Kraes, wan Pikinini blong God, we bae i kam blong pem praes blong ol sin blong wol.

“ Mo, !o, glad ia we mi gat, mo gudfala laet ia we mi bin luk” (ol ves 17, 20).

Taem mitufala stap ridim ol sentens ia, wota blong ae i stat blong ron i kamdaon. !Glad blong Alma i glad ia nao we hem i bin stap lukaotem!

Mitufala i tokbaot se wanem we Alma i mekem i moa nogud. Be, long wantaem ia we hem i sakem sin, hem i neva lukluk i gobak. Hem i kam wan fetful disaepol blong Jisas Kraes. !Hem i kam wan profet! Ol ae blong Danny oli open bigwan. Hem i talem, “?Wan profet?

Mi ansa wetem simpol toktok, “Yes, wan profet. !No nid blong wari!”

Mitufala i tokbaot, from se ol sin blong hem oli no kasem level blong Alma, semmak promes blong fogivnes we i fulwan mo stret evriwan i blong evri man—tru long Atonmen blong Jisas Kraes we i nogat en.

Naoia, Danny i andastanem. Hem i save se, hem i nidim blong mekem: !hem i nidim blong statem rod blong hem tru !fasin blong stap trastem Lod mo fogivim hemwan!

Bigfala jenis we i save tekem ples long hat blong Danny bae i nidim wan merikel. Ol taem afta, fes blong hem i jenis, laet we i saen long ae blong hem, i bin kambak. !Hem i kam klin inaf blong go long tempol. Long en, !Hem i bin kambak!

Afta sam manis i pas, mi askem Danny sapos hem i wantem blong putum wan fom blong aplae blong go long wan fultaem misin. Ansa blong hem i wan we i mekem mi sek mo sapraes.

Hem i talem, “!Bae mi wantem blong givim seves long wan misin, be yu save ol ples we mi bin stap long hem mo ol samting we mi bin mekem! Mi ting se bae, mi no kwalifae.”

Mi ansa se, “maet yu talem tru. Be i no samting we i stopem yumitu blong mekem wan rikwes. Sapos bae yu no save go, bae i gud yet from bae yu save se yu bin soem wan tru hat blong givim seves long Lod.” Ol ae blong hem oli laet. Hem i glad tumas long tingting ia. Long hem samting we hem i no ting se bae i hapen be i wan janis we hem i wantem blong tekem.

Samfala wik afta, hem i sapraes, wan narafala merikel i hapen. Danny i kasem wan singaot blong givim seves blong wan fultaem misin.

Afta long sam manis we Danny i kasem misin fil blong hem, mi kasem wan kol long telefon. Wetem simpol toktok, presiden blong hem i talem, “?Wanem ia i spesel tumas abaot yangfala man ia? !Hem i wan nambawan misinari we mi neva bin luk bifo!” Yu save, Presiden ia i bin kasem wan Yangfala Alma blong taem tedei.

Tu yia i pas, Danny i kambak hom wetem ona, i bin givim seves long Lod wetem ful hat, ful paoa long tingting, ful maen mo ful paoa blong hem.

Folem misinari ripot blong hem blong sakramen miting, mi kambak hom mo harem wan noknok long fored blong doa. Long ples ia Danny i stanap wetem wota blong ae i fulap. Hem i talem, “?Bae yumitu save toktok blong wan minit?” Mitufala i go aotsaed long semmak veranda ia.

Hem i talem, “Presiden, “?yu ting se, Lod i save fogivim mi fulwan?”

Naoia wota blong ae blong mi i kam fulap blong joenem blong hem. Wan fetful disaepol blong Jisas Kraes i stanap long fored blong mi we i givim evri samting blong hem blong stap tijim mo testifae abaot Sevya. I klia se hem i ripresentem hiling mo paoa blong helpem ol narawan tru long Atonmen blong Sevya.

Mi talem, “!Danny! ?Yu bin lukluk long mira? ?Yu bin luk ol ae blong yu? Oli fulap long laet, mo yu stap saen wetem Spirit blong Lod. !I tru, Lod i bin fogivim yu! !Yu yu gud tumas! Wanem we yu nid blong mekem naoia, i blong muv i go fored wetem laef blong yu. !Yu nomo lukluk i gobak biaen! Lukluk fored wetem fet blong kasem nekis odinens.”

Merikel blong Danny i stap gohed tedei. Hem i mared long tempol mo gobak long skul, long ples ia, hem i kasem masta digri blong hem. Hem i gohed blong givim seves long Lod wetem ona mo respek long ol koling blong hem. Wanem i moa impoten i we, hem i kam wan gudfala hasban mo wan fetful papa. Hem i wan fetful disaepol blong Jisas Kraes.

Presiden Russell M. Nelson i tijim, “Sapos i no gat Atonmen blong [Sevya] we i no gat en, evri man bae oli lus.”¹ Danny i no lus, mo yumi tu, yumi no save lus long Lod. Hem i stanap long doa blong leftemap yumi, givim paoa long yumi, mo blong fogivim yumi. !Oltaem, Hem i tingbaot blong lavem yumi!

Wan nambawan merikel we Buk blong Momon i soem abaot lav blong Sevya long God: “Taem we Jisas i toktok olsem ia nao, hem i sakem ol ae blong hem raonabaot long grup blong pipol ia, mo i luk we oli stap krae, mo i luk stret long hem olsem se bae oli askem hem blong stap wetem olgeta smol taem moa.” (3 Nifae 17:5).

Sevya i spenem fuldei finis blong givhan long ol pipol. Be yet, Hem i gat moa samting blong mekem—Hem i mas visitim ol narafala sipsip blong Hem; Hem i mas go long Papa blong Hem.

Nomata ol responsabiliti ia, Hem i luksave wanem we hat blong ol pipol oli wantem we i blong Hem i stap wetem olgeta smol taem moa. Afta, wetem hat we i fulap long sore mo lav blong Sevya, wan long ol bigfala merikel long histri blong wol i bin hapen:

Hem i bin stap wetem olgeta.

Hem i blesem olgeta.

Hem i givhan long ol pikinini blong olgeta, wan afta wan.

Hem i prea from olgeta; Hem i krae wetem olgeta.

Mo Hem i hilim olgeta. (Luk long 3 Nifae 17.)

Promes blong Hem i stap blong taem we i no save finis; Hem bae i hilim yumi.

Long olgeta we oli aot long rod ia blong kavenan, plis save se, oltaem i gat hop, oltaem i gat hiling mo oltaem i gat wan rod we i kambak.

Mesej blong hop blong Hem we i no save finis i han blong olgeta we oli save hilim olgeta we oli laef long wan trabol wol. Jisas i talem: “Mi nao rod ya, mo mi mi stamba blong trutok, mo mi stamba blong laef” (John 14:6).

Ol brata mo sista, letem yumi tingbaot blong lukaotem Hem, lavem Hem, mo blong oltaem tingbaot Hem.

Mi testifae se God i stap laef mo se Hem i lavem yumi. Mi testifae moa se Jisas Kraes i Sevya mo Ridima blong wol. Hem nao, man we i gat paoa blong hilim man. Mi save Ridima blong mi i laef. Long nem blong Jisas Kraes, amen.