Ansa Hem I Oltaem Jisas Kraes

Ol dia brata mo sista blong mi. Yumi bin kasem ol gudfala kakae long saed blong spirit long ol las tu dei ia. Miusik kwaea i bin top. Olgeta we oli toktok, oli bin ol tul long han blong Lod. Mi prea se bae yu lukaotem Tabu Spirit blong givhan long yu long stadi blong yu taem yu lukluk long ol trutok we oli bin tijim long pulpit ia. I tru se heven i bin sendem olgeta i kam.

Wan wik afta long Pam Sandei, hem i Ista Sandei. Hem i wan spesel taem we i moa impoten blong plante relijin blong olgeta we oli folem Jisas Kraes. Mein risen from wanem yumi selebretem Krismes, hem i from Ista. Kam Folem Mi lesen long wik ia bae i givim yu insperesen blong stadi taem we Sevya i go insaed long Jerusalem, taem Hem i klinim tempol, taem Hem i safa long garen blong Getsemane, taem oli krusifae Hem, taem Hem i winim ded mo girap bakegen long ded, taem we Hem i kamaot long olgeta we oli stap folem blong Hem.¹

Glad long ol tabu ves ia mo faenem evri wei yu we yu save talem tangkyu long Papa long Heven blong sendem Wan Stret Pikinini Ia blong Hem.² From Jisas Kraes, bae yumi save kasem fogivnes from ol sin blong yumi. From Jisas Kraes, bae wanwan long yumi i laef bakegen long ded.

Mi invaetem yu tu blong stadi bakegen long stori blong Sevya taem i kamaot long ol pipol blong Nifae long Amerika, olsem we oli bin rekodem long 3 Nifae. I no longtaem bifo Hem i kamaot, ol pipol i bin harem voes blong Hem long medel blong olgeta, wetem ol toktok ia blong sore.

“?Bae yufala i no kambak naoia long mi, mo sakem ol sin blong yufala, mo jenisim laef blong yufala blong mekem se mi save mekem yufala i kam oraet?”

“… Luk, mi stretem han blong sore blong mi i kam long yufala, mo huia we bae i kam long mi, bae mi akseptem hem.”³

Ol dia brata mo sista, Jisas Kraes i givimaot sem invitesen ia long yu tedei. Mi plis long yu blong kam long Hem, blong Hem i save hilim yu! Bae hem i hilim yu aot long sin taem yu sakem sin. Bae hem i hilim yu aot long sore mo fraet. Bae Hem i hilim yu aot long ol soa blong wol ia.

Nomata wanem ol kwestin o problem we yu gat, oltaem ansa i stap long laef mo ol tijing blong Jisas Kraes. Lan moa abaot Atonmen blong Hem, lav, sore, doktrin blong Hem, mo gospel blong hiling, fasin blong gro, mo blong stap pat. !Tanem yu i go long Hem! !Folem Hem!

Jisas Kraes Hem i risen from wanem yumi bildim ol tempol. Wanwan i tabu Haos blong Hem. Stap mekem ol kavenan mo kasem ol impoten odinens insaed long tempol, mo tu blong stap lukaotem blong kam moa kolosap long Hem insaed, bae i blesem laef long ol wei we yu no save kasem long ol nara wei blong wosip. From risen ia, yumi stap mekem evri samting wetem paoa we yumi gat blong mekem ol blesing blong tempol i isi moa blong ol memba blong yumi raon long wol. Tedei, mi mi glad blong anaonsem ol plan blong yumi blong bildim wan niu tempol long wanwan ples ia:

• Retalhuleu, Gwatemala

• Ikwitos, Peru

• Teresina, Brasil

• Natal, Brasil

• Tukwekarao Siti, Filipin

• Iloilo, Filipin

• Jakata, Indonesia

• Hambeg, Jemani

• Letbrij, Albeta, Kanada

• San Jose, Kalifonia

• Bekesfil, Kalifonia

• Springfil, Misuri

• Jalot, Not Karolina

• Winjesta, Vijinia

• Harisbeg, Pensilvania

Ol dia brata mo sista. Mi talem witnes blong mi se Jisas Kraes i stap daerektem ol afea blong Jos ia. Mi testifae se blong stap folem Hem, hem i wan wei ia nomo blong gat wan hapines we i stap strong. Mi save se paoa blong Hem i kamdaon long ol pipol blong Hem we i kipim kavenan, we oli “werem klos blong stret fasin mo wetem paoa blong God long bigfala glori.”⁴ Mi testifae olsem, wetem lav mo blesing blong mi long wanwan long yufala, long tabu nem blong Jisas Kraes, amen.