Wan long Kraes

Olsem we Presiden Dallin H. Oaks i talem, tedei hem i Pam Sandei, stat blong Tabu Wik, we i makem bigfala win blong Jisas we i kam insaed long Jerusalem, safaring blong Hem long Getsemane mo ded long kros sam dei nomo afta, mo Girap Bakegen long Ded blong Hem long glori long Ista Sandei. Bae yumi neva fogetem wanem Kraes i bin go tru long hem blong pemaot yumi.¹ Mo bae yumi neva lusum glad ia we i bigwan mo i kavremap yumi we bae yumi filim bakegen long Ista taem yumi tingbaot win blong Hem ova long gref mo presen blong girap bakegen long ded we i blong ful wol.

Long naet bifo ol tes mo krusifiksen we i stap wet long Hem, Jisas i joen wetem Ol Aposol blong Hem long wan kaekae blong Pasova. Long en blong Las Kaekae ia, long wan tabu Prea blong Ol Disaepol blong Hem, Jisas i plis long Papa blong Hem ol toktok ia: “Papa, yu yu tabu. Plis yu holem [Ol Aposol blong mi] blong oli sef long paoa blong nem ya blong yu, we yu yu givim long mi, blong olgeta oli save stap wan nomo, olsem we yumitufala i wan nomo.”²

Afta, Sevya i plis long Lod blong tekem tu evriwan we i biliv long Hem:

“Mi no prea from olgeta ia nomo, mi prea tu from ol man we bambae oli save bilif long mi from tok blong olgeta;

Blong olgeta evriwan oli save stap wan nomo Papa. Laef blong yu i joen gud long laef blong mi, mo laef blong mi i joen gud long laef blong yu.”.”³

Blong kam wan i wan stamba toktok we i stap hapen oltaem insaed long gospel blong Jisas Kraes mo long samting we God i stap mekem wetem ol pikinini blong Hem. Wetem respek long siti blong Saeon long ol dei blong Inok, oli bin talem se “oli bin gat wan hat mo wan maen.”⁴ Long taem blong Ol Sent taem Jos Ia blong Jisas Kraes i jes kambak bakegen, Niu Testeman i rekodem se, “Olgeta ya we oli bilif long Jisas, tingting blong olgeta, mo tok blong olgeta i wan nomo.”⁵

Long taem blong yumi, Lod i askem strong long yumi, “Mi talem long yufala, yufala i mas stap wan; mo sapos yufala i no stap wan, yufala i no blong mi.”⁶ Long ol risen we Lod i givim long from wanem ol fas Sent long Misuri oli no bin save stanemap wan ples blong Saeon, hem i from oli “no wan folem fasin blong kam wan we loa blong selestial kingdom i askem.”⁷

Long ples we God i win long evri hat mo maen, bae oli tokbaot ol pipol ia se oli “stap wan; oli ol pikinini blong Kraes.”⁸

Taem Sevya we i girap bakegen long ded i kamkamaot long ol pipol long Buk blong Momon, Hem i bin luksave mo no agri long ol raorao we ol pipol oli bin gat abaot baptaes mo ol nara samting long bifo. Hem i givim komanmen se:

“Mo bae i no gat eni rao long medel blong yufala, olsem we i bin gat bifo; mo tu bae i no gat ol smol rao long medel blong yufala long saed blong ol poen blong doktrin blong mi, olsem we i bin gat bifo.

From i tru, i tru mi talem long yufala, hem we i gat spirit blong raorao i no blong mi, be hem i blong devel, we i papa blong raorao.”⁹

Long wol blong yumi we i fulap long tumas raorao, ?hao nao yumi save kasem yuniti, speseli long Jos long ples we yumi mas gat “wan Masta nomo, mo yumi gat wan tok nomo we yumi bilif long hem, mo i gat wan baptaes nomo”?¹⁰ Pol i givim ki long yumi:

“Yufala evriwan we i baptaes finis blong joen long Kraes, yufala i tekem Kraes finis.

“I no moa gat we sam long yufala oli laen blong Isrel, sam oli slef*, sam oli friman, sam oli man, sam oli woman, nogat. Yufala evriwan i joen long Jisas Kraes, yufala i kam wan nomo.”¹¹

Yumi defdefren tumas mo samtaem yumi wanwan tumas blong save kam tugeta olsem wan long eni nara samting o andanit long eni nara nem. Long Jisas Kraes nomo, yumi save kam wan blong tru.

Blong kam wan long Kraes i hapen wan afta long wan—wanwan long yumi i stat wetem yumiwan. Yumi tu man long saed blong bodi mo spirit mo samtaem yumi stap gat wo bitwin yumiwan. Olsem Pol i talem:

“From se mi laekem loa blong God folem fasin blong man we i stap insaed long mi.

“Be ol pat blong bodi blong mi oli faet agensem loa insaed long maen blong mi, mo oli mekem mi mi slef long loa blong sin we i stap insaed long bodi blong mi.”¹²

Jisas tu i wan man blong bodi mo spirit. Oli givim tes long Hem; Hem i andastanem; Hem i save helpem yumi blong kasem yuniti ia we i stap insaed long yumi.¹³ From hemia, blong stap kasem laet mo gladhat mo sore blong Kraes, yumi traehad blong givim spirit blong yumi—mo Tabu Spirit—i tekova long bodi blong yumi. Mo taem yumi sot, Kraes, tru long Atonmen blong Hem, i givim yumi presen ia blong sakem sin mo janis ia blong traem bakegen.

Sapos wanwan long yumi i “[kam olsem Kraes],” nao tugeta yumi save hop blong kam wan, olsem we Pol i talem, “bodi blong Kraes.”¹⁴ Blong “[kam olsem Kraes]” i tru i minim blong stap obei long “[komanmen blong Hem we i faswan mo i moa hae]”¹⁵ fas komitmen blong yumi we i moa hae, mo sapos yumi lavem God, bae yumi obei long ol komanmen blong Hem.¹⁶

Yuniti wetem ol brata mo sista blong yumi long bodi blong Kraes, i gro taem yumi folem nambatu komanmen—we i fas gud long faswan—blong lavem ol narawan olsem we yumi lavem yumiwan.¹⁷ Mo mi ting se wan yuniti we i stret gud evriwan bae i stap long medel blong yumi sapos yumi folem nambatu komanmen blong Sevya we i hae mo tabu—blong lavem ol narawan i no olsem we yumi lavem yumiwan, be olsem we Hem i lavem yumi.¹⁸ “Evri man i mas traem blong lukaotem gud laef blong neba blong hem, mo mekem evri samting wetem wan ae we i lukluk nomo long glori blong God.”¹⁹

Presiden Marion G. Romney, wan foma kaonsela long Fas Presidensi, i eksplenem olsem wanem yumi kasem pis mo yuniti we i stap oltaem:

“Sapos wan man, i mekem folem Setan, i fulap long ol nogud fasin, hem i stap faet wetem hemwan blong mekem gud wetem tingting blong wantem mekem nogud. Sapos tu man i mekem folem Setan, wanwan long tufala i stap faet wetem tufalawan insaed mo faet wetem tufala bakegen. Sapos plante pipol i mekem folem Setan, wan sosaeti [i karem] risal blong bigfala wari mo raorao. Sapos ol man blong rul long wan kantri oli mekem folem Setan, ful wol i gat raorao.”

Presiden Romney i gohed i talem: “Olsem we ol nogud fasin oli gat paoa long ful wol, i semmak tu long gospel blong pis. Sapos wan man i laef folem, hem i gat pis wetem hemwan. Sapos tu man i laef folem, wanwan long tufala i gat pis insaed long tufalawan mo wetem tufala bakegen. Sapos ol man blong kantri oli laef folem, bae kantri i gat pis. Taem i gat inaf kantri we oli stap enjoem frut blong Spirit blong kontrolem ol problem blong wol, afta, mo afta nomo, bae i nomo gat wo, mo bae oli foldem ol flag blong wo. (Luk long Alfred Lord Tennyson, “Locksley Hall,” The Complete Poetical Works of Tennyson, ed. W. J. Rolfe, Boston: Houghton-Mifflin Co., 1898, p. 93, lines 27–28.)”²⁰

Taem yumi “kam olsem Kraes,” hem i posibol blong yumi faenem ansa o putum long saed ol samting we yumi defdefren long hem, no agri long hem, mo ol raorao. Wan nara eksampol blong stap winim fasin blong stap wanwan, i stap insaed long Jos histri blong yumi. Elda Brigham Henry Roberts (we oli save hem olsem B. H. Roberts), i bon long Inglan long 1857, i givim seves olsem wan memba blong Fas Kaonsel blong Olgeta Seventi—we tedei yumi singaotem Presidensi blong Olgeta Seventi. Elda Roberts hem i wan long ol man we i no taet blong stanap from gospel we i kambak long wol mo Jos, long sam long ol taem we i bin had tumas.

Long 1895, seves blong Elda Roberts long Jos i stap long kwestin mak from ol raorao. B. Oli bin jusum H. olsem wan deleget long wan konvensen we bae oli draftem wan konstitusen blong Yuta taem hem i kam wan stet. Afta long hemia, hem i disaed blong kam wan kandidet blong Yunaeted Stet Kongres, be hem i no bin letem o askem raet long Fas Presidensi. Presiden Josef F. Smit, wan kaonsela long Fas Presidensi i no bin agri se: B H. blong hem we i fel long wan jeneral prishud miting. Elda Roberts i bin lus long eleksen mo i filim se lus blong hem i from ol toktok blong Presiden Smit. Hem i bin sakem sam toktok abaot ol lida blong Jos long sam long ol politik toktok blong hem mo ol intaviu. Hem i kamaot mo nomo stap aktiv long seves blong hem long Jos. Long wan longfala miting long Sol Lek Tempol wetem ol memba blong Fas Presidensi mo Kaonsel blong Olgeta Twelef, B. H. i gohed blong stanap from hemwan mo no jenis. Afta, “Presiden [Wilford] Woodruff i givim tri wik long [Elda Roberts] blong tingting bakegen abaot posisen blong hem. Sapos hem i gohed blong stanap mo no jenis mo sakem sin, bae oli rilisim hem long Olgeta Seventi.”²¹

Long wan praevet miting afta wetem Ol Aposol, Heber J. Grant mo Francis Lyman, B. H. i gohed yet blong no lisin, be lav mo Tabu Spirit i bin tekova mo win kwiktaem. Wota blong ae blong hem i kamaot. Tufala Aposol ia i bin save ansa long ol nogud toktok mo aksen we i bin trabolem B. H., mo oli bin aot wetem wan gladhat blong mekem pis. Long nekis moning, afta long wan longfala prea, Elda Roberts i sendem wan not i go long Elda Grant mo Lyman, se hem i rere blong joen bakegen wetem ol brata lida blong hem.²²

Taem hem i bin mit wetem Fas Presidensi afta, Elda Roberts i talem, “Mi bin go long Lod mo kasem laet mo instraksen tru long Spirit blong Hem blong lisin long atoriti blong God.”²³ Lav blong hem long God i pusum, B. H. Roberts blong gohed blong stap wan fetful mo gud lida long Jos kasem en blong laef blong hem.²⁴

Yumi save luk tu long eksampol ia se yuniti i no minim blong agri nomo se evriwan i sapos blong mekem tingting blong hemwan o folem rod blong hemwan. Yumi no save stap wan, be sapos nomo yumi givim ol efot blong yumi i go long wan stamba tingting. Hem i minim, olsem long toktok blong B. H. Roberts, blong lisin long atoriti blong God. Yumi ol defren memba blong bodi blong Kraes, we yumi stap mekem ol defren wok long ol defren taem—sora, ae, hed, han, leg—be evriwan long wan bodi.²⁵ From hemia, gol blong yumi i we “ol haf blong bodi blong yumi oli no save seraot. Evri haf blong bodi oli mas lukaot gud blong givhan long ol narafala haf blong hem.”²⁶

Yuniti i no nidim blong yumi semmak, hem i nidim yumi blong stap wan. Yumi save mekem ol hat blong yumi i joen tugeta long lav, blong stap wan long fet mo doktrin, mo yet, sapotem ol defren tim, no agri long ol problem blong politik, toktok abaot ol gol mo stret wei blong winim olgeta, mo plante nara samting. Be yumi neva save no agri o rao wetem kros o tingdaon long wanwan long yumi. Sevya i talem:

“From i tru, i tru mi talem long yufala, hem we i gat spirit blong rao i no blong mi, be hem i blong devel, we i papa blong rao, mo hem i tanem ol hat blong ol man blong rao wetem kros, wan wetem narawan.

“Luk, hemia i no doktrin blong mi, blong tantanem hat blong ol man wetem kros, wan agensem narawan; be hemia i doktrin blong mi, se ol samting olsem oli mas stop.”²⁷

Wan yia i pas, Presiden Russell M. Nelson i askem long yumi wetem ol toktok ia “I no gat wan long yumi we i save kontrolem ol nesen, o aksen blong ol narawan, o iven hemia blong ol memba blong stret famli blong yumi. Be yumi save kontrolem yumiwan. Singaot blong mi, tedei, ol brata mo sista, i blong endem ol raorao we oli stap strong insaed long hat blong yu, insaed long hom blong yu, mo insaed long laef blong yu. Berem eni tingting mo evri tingting blong spolem nara man—nomata tingting ia i blong gat sot maen, wan sap tang, o nogud filing long wan we i bin mekem nogud long yu. Sevya i givim komanmen long yumi blong tanem narasaed fes [luk long 3 Nifae 12:39], blong lavem ol enemi blong yumi, mo blong prea from olgeta we oli stap yusum yumi long nogud fasin [luk long 3 Nifae 12:44].”²⁸

Mi talem bakegen se hem i tru nomo long wanwan fasin blong stap fetful blong yumi wanwan, long mo lav blong Jisas Kraes, we yumi save hop blong stap wan—wan long hom, wan long Jos, wan long Saeon, mo antap long evri samting, wan wetem Papa mo Pikinini mo Tabu Spirit.

Mi gobak long ol samting we oli hapen long Tabu Wik mo bigfala win blong Ridima blong yumi. Girap long Ded blong Jisas Kraes i talemaot witnes long tabu fasin blong Hem mo se Hem i bin winim evri samting. Girap blong Hem long Ded i talem witnes se, taem yumi fasem yumi long Hem tru long kavenan, yumi tu i save winim evri samting mo kam wan. Girap blong Hem long Ded i talem witnes se tru long Hem, blong no save ded mo laef we i no save finis, oli samting we oli tru.

Long moning ia, mi talem witnes blong mi abaot Hem we I Girap long Ded mo evri samting we hemia i minim, long nem blong Jisas Kraes, amen.