I Nidim Ol Man blong Putum Pis

Ol dia brata mo sista blong mi. !Hem i gud tumas blong stap wetem yufala! Long ol pas sikis manis, oltaem mi tingbaot yufala long maen blong mi mo long ol prea blong mi. Mi prea se Tabu Spirit bae i talem long yu wanem Lod i wantem yu blong harem taem mi toktok long yu naoia.

Long taem blong wan sejikol trening blong mi sam yia i pas finis, mi bin helpem dokta blong katem man, we i stap katemaot wan leg from we soa i kakae bigwan. Hem i bin wan had operesen. Afta, blong mekem i moa had, wan long ol tim memba i no bin mekem gud wok blong hem, mekem se dokta ia i kros. Long medel blong kros blong hem, hem i sakem naef ia we i stap yusum we i fulap long ol toti blong leg ia. Naef ia i fas long saed blong han blong mi!

Evriwan long operesen rum ia—be i no dokta ia we i lusum kontrol ia—i bin seksek from fasin ia we hem i bin mekem we i brekem rul blong sejikol o operesen. Tangkyu we, mi no bin kasem eni kil. Be eksperiens ia i bin givim wan filing we i stap wetem mi longtaem. Long semtaem blong operesen ia, mi mekem promes ia se nomata wanem i hapen long operesen rum blong mi , bae mi neva lusum kontrol long ol filing blong mi. Mi mekem promes tu long dei ia se bae mi neva sakem wan samting wetem kros—nomata se i wan naef o ol toktok.

Iven naoia, afta 10 yia long taem ia, mi stap tingting yet sapos naef ia we i fulap long bebet i kasem han blong mi i posen semmak nomo long ol toktok mo raorao we i stap afektem ol storian insaed long komuniti mo long plante rilesensip long laef. I luk olsem ol pipol i nomo stap soem gudfala fasin mo wei blong laef long taem ia tedei we i gat ol strong tingting ia blong lukluk man i defren o fasin blong no agri.

Ol rabis toktok, lukaotem rong blong wan man, mo talem nogud ol man oli kam antap bigwan. I gat plante pablik spika, ol man blong politik, mo man blong pulum intres mo plante moa we oli no stop blong toktok nogud. Mi wari tumas se plante man i biliv se i oraet nomo blong putum daon wan, mekem nogud, mo talem nogud eni man we i no agri wetem olgeta. Plante oli filim gud blong spolem laef blong wan wetem ol nogud toktok we i sap olsem en blong naef.

Fasin blong kros i neva save win. Fasin blong no akseptem wan tingting i no save mekem wan i kam moa gud. Fasin blong raorao i neva givim wan gud ansa wetem insperesen. Sori tumas tu se samtaem yumi luk ol fasin blong raorao iven long medel blong ol memba blong jos blong yumi. Yumi harem olgeta we oli no tritim gud ol hasban mo waef mo ol pikinini, blong olgeta we oli yusum ol strong toktok blong kontrolem ol narawan, mo long olgeta we oli stap panisim ol famli memba wetem fasin blong no wantem toktok long olgeta. Yumi harem abaot ol yut mo ol pikinini we oli stap spolemgud olgeta mo abaot ol wokman we oli stap putumdaon ol fren blong wok blong olgeta.

Ol dia brata mo sista blong mi. I no mas olsem. Olsem ol disaepol blong Jisas Kraes, yumi mas stap ol eksampol long hao blong toktok wetem ol narawan—speseli taem yumi no agri wetem wan samting. Wan long ol isi wei blong faenemaot wan tru man blong folem Jisas Kraes, hem i hao wan man i mekem gud wan nara man wetem lav mo sore.

Sevya i mekem i klia gud long ol toktok blong Hem long ol man we i stap folem Hem long tufala saed blong wol. “Olgeta we oli man blong mekem pis oli save harem gud,” Hem i talem.¹ “Sipos wan man i slavem fes blong yu long raet saed, yu mas letem hem i slavem yu long lef saed tu.”² Mo afta, i tru, Hem i givim komanmen ia olsem wan jalenj blong wanwan long yumi “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.”³

Bifo Hem i ded, Sevya i bin givim komanmen long olgeta Twelef Aposol blong lavem wanwan long olgeta olsem we Hem i bin lavem olgeta.⁴ Mo afta Hem i ademap, “Nao from we yufala i stap lavlavem yufala, bambae olgeta man oli luksave se yufala i man blong mi.”⁵

Mesej blong Sevya i klia: Ol tru disaepol blong Hem, oli bildim, leftemap, leftemap tingting, pulum intres, mo givim insperesen—nomata se situesen i olsem wanem. Ol tru disaepol blong Jisas Kraes, oli stap putum pis.⁶

Tedei i Pam Sandei. Yumi stap rere long wan impoten taem we i bigwan bitim eni nara samting we oli bin rekodem long wol, we hem i Atonmen mo taem we Lod Jisas Kraes i girap bakegen long ded. Wan long ol wei blong save givim ona long Sevya i blong kam wan man blong putum pis.⁷

Atonmen blong Sevya i mekem se yumi save winim evri ivel—wetem fasin blong raorao. No mekem mistek long hemia: fasin blong raorao hem i ivel! Jisas Kraes i talem se olgeta we i gat “spirit blong raorao” i no blong Hem, be hem i “blong devel, we i papa blong raorao, mo [devel] i tantanem hat blong ol man blong raorao wetem kros, wan wetem narawan.”⁸ Olgeta we oli sapotem fasin blong raorao, i olsem we oli wantem folem Setan, iven sapos oli luksave o no luksave. “I no gat man i save wok blong tu masta.”⁹ Yumi no save sapotem Setan wetem ol rabis toktok mo afta ting se yumi save gohed blong givim seves long God.

Ol dia brata mo sista blong mi. !Hao yumi tritim yumi wanwan i impoten tumas! Hao yumi toktok long mo abaot ol nara man long hom, jos, wok, mo onlaen i impoten tumas. Tedei, mi stap askem yumi blong gat kontak wetem ol nara man long wan wei we i moa hae mo moa tabu. Plis, lisin gud. “Sapos i gat samting we i klin, i luk naes, o i gudfala mo i nambawan tru”¹⁰ we yumi save talem abaot wan nara man—long fes blong hem stret o biaen bak blong hem—hemia nao fasin blong yumi blong toktok.

Sapos wan kapol long wod blong yu i divos, o wan yang misinari i kambak eli long misin, o wan yangfala i no sua long testemoni blong hem, oli no nidim yu blong jajem olgeta. Oli nid blong eksperiensem klin lav blong Jisas Kraes tru ol toktok mo aksen blong yu.

Sapos wan fren long sosol media i gat wan strong tingting long saed blong politik o laef we i agensem evri samting we yu bilif long hem, bae i no nid blong yu kros o ansabak nogud. Blong stap bildim gud koneksen mo filing wetem ol nara man i wanem we yu nidim moa, mo hemia i wanem we ol fren blong yu i nidim.

Fasin blong raorao i ronemaot Spirit—evri taem. Fasin blong raorao i givim rong tingting ia se fasin blong fesem man wetem kros i wei ia nao blong stretem ol samting; be i neva tru. Fasin blong rao i wan joes. Blong putum pis i wan joes. Yu gat ejensi blong jusum fasin blong raorao o fasin blong stretem ol samting. Mi askem yu blong jusum blong stap man blong putum pis, naoia mo oltaem.¹¹

Ol brata mo sista, yumi save jenisim wol—wan man mo wan kontak long wan taem. ?Hao? Taem yumi soem hao blong handelem ol defdefren tingting wetem respek mo gudfala fasin blong toktok long wan ones wei.

Gat ol defdefren tingting, hem i pat blong laef. Mi wok evri dei wetem ol wokman blong Lod we oli givim taem blong olgeta, we oltaem oli no luksave wan jalenj long sem wei. Oli save se mi wantem harem ol tingting mo ones filing abaot evri samting we mifala i toktok raon long hem—speseli ol jalenj we i afektem kwik wan.

Pikja

Presiden Dallin H. Oaks mo Presiden Henry B. Eyring

Tufala gudfala kaonsela blong mi, Presiden Dallin H. Oaks mo Presiden Henry B. Eyring, tufala i eksampol taem tufala i serem ol filing blong tufala—speseli taem tufala i defren. Oli mekem olsem wetem klin lav we tufala i gat long tufala wanwan. I no gat wan i save talem se hem i moa gud mo mas faet from posisen blong hem. I no gat pruf i soem se i gat nid blong kompit wetem wanwan long tufala. From wanwan long olgeta i fulap wetem, “klin lav blong Kraes,”¹² i mekem se Spirit blong Lod i save givhan long storian blong mifala. !O hamas mi lavem mo givim ona long tufala impoten man ia!

Jareti i meresin blong fasin blong raorao. Jareti i presen ia long saed blong spirit we i helpem yumi blong sakemaot man blong wol, we i selfis, protektem hemwan, fulap long hae tingting, mo jalus. Jareti hem i top fasin ia nao blong wan tru man blong folem Jisas Kraes.¹³ Jareti i soem man blong putum pis.

Taem yumi putum tingting i stap daon long fored blong God mo prea wetem evri paoa blong hat, God bae i givim yumi jareti.¹⁴

Olgeta we oli kasem blesing wetem tabu presen ia, oli safa longtaem mo stap kaen. Oli no save jalus, i no mekem tingting i go antap, mo i no save flas. Oli no save kros kwik mo i no save stap kros longtaem.¹⁵

Ol brata mo sista. Klin lav ia blong Kraes i ansa blong raorao we i stap afektem yumi tedei. Jareti i lidim yumi “blong karem ol hevi samting blong wanwan long yumi”¹⁶ bitim we blong hipimap long wanwan. Klin lav blong Kraes i letem yumi “blong stanap olsem ol witnes blong God long evri taem mo evri samting”¹⁷—speseli long taem blong situesen. Jareti i letem yumi blong soem hao ol man mo woman blong Kraes i toktok mo mekem samting—speseli taem oli talem nogud olgeta bigwan.

Nao mi no stap tokbaot “pis we i kam wetem praes.”¹⁸ Mi stap tokbaot fasin blong tritim nara man long ol wei we yumi save long hem tru kipim ol kavenan we yu mekem taem yu tekpat long sakramen. Yu mekem kavenan blong oltaem tingbaot Sevya. Long ol situesen we i afektem tingting blong yu mo mekem yu kros, mi invaetem yu blong tingbaot Jisas Kraes. Prea blong gat strong tingting mo waes blong talem o mekem wanem we bae Hem i mekem. Taem yumi folem Prins blong Pis, bae yumi kam ol man blong Hem blong putum pis.

Naoia, bae yu tingting se mesej ia bae i save helpem wan we yu save. Ating yu stap hop se bae i helpem wan man o woman we bae i mekem gud long yu. Mi hop se bae i olsem.” Be mi hop tu se bae yu lukluk moa dip insaed long hat blong yu blong luk sapos i gat smol pis blong hae tingting o fasin blong jalus we i stopem yu blong kam wan man o woman blong putum pis.¹⁹

Sapos yu series blong helpem karembak haos blong Isrel mo blong bildim ol rilesensip we bae i stap blong ol taem we i no save finis, naoia i taem blong putum long saed ol rabis fasin. Naoia i taem blong stopem tingting se hemia i wei blong yu o i no gat wei. Naoia i taem blong stopem fasin ia blong mekem se ol man oli fraet blong mekem yu harem nogud. Naoia i taem blong berem ol tul blong faet blong yu.²⁰ Sapos ol toktok blong yu i fulap wetem swea mo rabis toktok, naoia i taem blong sakemaot evriwan.²¹ Bae yu kam wan strong man o woman blong Kraes long saed blong spirit.

Tempol i save helpem yumi long longfala rod blong yumi. Long tempol, yumi endao wetem paoa blong God, i givim yumi fasin ia blong save winim Setan, man blong evri raorao.²² !Sakemaot hem long laef blong yu! Tekem not se mifala tu i stap ronemaot devel evri taem we mifala i traem stretem wan situesen o no wantem tekem saed blong wan. Be wanem we mifala i mekem, hem i blong soem sore we i fasin blong wan tru disaepol blong Jisas Kraes. Man o Woman blong putum pis stopem devel.

Bae yumi stap olsem wan pipol blong kam wan tru laet antap long hil—wan laet we i “no save haed.”²³ Bae yumi soem se i gat wan wei blong stretem ol jalenj we i had wetem respek mo pis, blong stretem yumi taem i no gat agrimen. Taem yu soem jareti we ol tru man blong folem Jisas Kraes i stap gat, Lod bae i luksave yu moa long wan wei we yu no save tingting long hem.

Gospel net i wan bigfala netwok long wol ia. Hem i stap invaetem evriwan blong kam long Hem, “blak mo waet, slef mo fri, man mo woman.”²⁴ I Gat Rum I Stap blong Evriwan Be, i no gat rum blong spolem man, putum daon man, o eni kaen fasin blong raorao.

Ol dia brata mo sista. I gat ol moa gud samting we i stap kam yet blong olgeta we oli givim moa taem blong bildimap ol nara man. Tedei mi invaetem yu blong fiksim fasin blong yu blong stap olsem wan disaepol speseli long wei ia blong stap tritim ol nara man. Mi blesem yu blong stretem ol fasin we i nidim blong yu save bildim respek, mo ripresentem wan tru man blong folem Jisas Kraes.

Mi blesem yu blong riplesem strong fasin wetem sopsop hat, fasin blong no laekem man wetem andastanem man, mo fasin blong raorao wetem pis.

!God i stap laef! Jisas Hem I Kraes. Sevya i stanap long hed blong Jos ia. Yumi, yumi ol wokman blong Hem. Hem bae i helpem yumi blong kam ol man blong putum pis. Mi testifae olsem long tabu nem blong Jisas Kraes, amen.