Tingbaot Wanem I Impoten Moa

Taem yumi stap tingbaot wiken ia mo bigfala win blong Sevya we i kam insaed long Jerusalem, i no longtaem afta long sakrifaes blong Atonmen blong Hem, mi tingbaot ol toktok blong Hem blong hop mo kamfot: “Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef.”¹

Mi lavem Hem. Mi biliv long Hem. Mi testifae se Hem i laef ia mo i Laef Bakegen long Ded.

Testemoni ia i bin givim mi kamfot mo i mekem mi strong long ol pas fo mo haf yia, stat long taem we waef blong mi, Barbara i bin lus. Mi misim hem.

Plante taem, mi bin stap luklukbak long mared blong mitufala we i no save finis mo laef blong mitufala tugeta.

Las taem mi bin serem olsem wanem mi bin mitim Barbara blong fas taem mo olsem wanem eksperiens ia i bin tijim mi blong yusum skil ia blong “stap folemap” we mi bin lanem long misin blong mi. Mi mas folemap hem kwik afta we mitufala i bin mit blong fas taem from se hem i naes, i popula, mo hem i bisi tumas long sosol laef blong hem. Mi bin lavem hem hariap from se hem i open mo i wan gud fren. Mi laekem gudfala fasin blong hem. Mi filim se hem mo mi i blong mitufala. Hem i simpol nomo olsem long maen blong mi.

Barbara mo mi i bin deit, mo rilesensip blong mitufala i stat blong gro, be hem i no sua se blong hem i maredem mi i stret blong hem.

Hem i no inaf blong mi blong save; Barbara i nidim blong save blong hemwan. Mi save se sapos mitufala i spendem taem blong livim kaekae mo prea from samting ia, Barbara bae i save karem wan konfemesen we i kam long heven.

Mitufala i spendem wan wiken we mitufala i no deit blong mekem se mitufala i save livim kaekae mo prea wanwan blong save blong mitufalawan. Laki blong mi, hem i bin kasem semmak konfemesen olsem we mi kasem. Evri haf blong stori, olsem we oli stap talem, hem i histri.

Taem Barbara i lus, ol pikinini blong mitufala oli putum sam lesen we Barbara i bin wantem olgeta blong tingbaot, long gref blong hem. Wan long ol lesen ia hem i “wanem i impoten moa hem i wanem we bae i stap longtaem.”

Tedei, bae mi serem aot long hat blong mi, sam filing mo tingting long wanem i impoten moa.

Faswan, wan rilesensip wetem Papa blong yumi long Heven mo Pikinini blong Hem, Lod Jisas Kraes, i impoten moa. Rilesensip ia i impoten naoia mo blong taem we i no save finis.

Nambatu, ol famli rilesensip oli stap long medel blong ol samting we oli impoten moa.

Truaot long ministri blong mi, mi bin visitim plante man, woman mo famli we ol disasta i bin spolem olgeta. Plante oli stap olbaot, oli hanggri, mo oli fraet. Oli nidim help long medikol saed, kaekae, mo ples blong stap long hem.

Oli nidim ol famli blong olgeta tu.

Mi luksave se maet sam oli nogat ol blesing olsem wan famli we oli stap kolkolosap long olgeta, mekem se mi tekem tu ol famli we oli stap longwe, ol fren, mo iven ol famli long wod olsem “famli.” Ol rilesensip ia oli impoten long saed blong filing mo bodi.

Ol rilesensip ia i save givim tu lav, glad, hapines, mo filing blong stap pat.

Blong lukaotemgud ol impoten rilesensip ia hem i wan joes. Wan joes blong stap pat blong wan famli i nidim komitmen, lav, fasin blong wet longtaem, komunikesen, mo fogivnes.² Bae i save gat ol taem we bae yumi no agri wetem wan narawan, be save no agri long wan fasin we i stret. Long ol series rilesensip mo mared, yumi no stap lavem o stop lavem olsem se yumi ol samting we wan i stap muvmuvum olbaot. Yumi jusum blong lavem mo helhelpem wanwan long yumi. Yumi mekem i semmak long ol nara famli rilesensip mo wetem ol fren we oli olsem famli long yumi.

Ofisol toktok blong famli i talem se “plan blong God blong stap hapi, i mekem se fasin blong holem taet famle tugeta i save gohed afta long ded. Ol tabu odinens mo ol kavenan we oli stap insaed long ol tabu tempol oli mekem rod i klia long wanwan man o woman i save gobak long ples blong God mo ol famle oli save joen tugeta kasem taem we i no save finis”³

Wan nara samting we i impoten moa i blong stap folem ol toktok blong Tabu Spirit long ol rilesensip blong yumi we oli impoten moa, mo ol traehad blong yumi blong lavem ol neba blong yumi olsem we yumi lavem yumiwan, we i tekem tu ol praevet mo pablik ministri blong yumi. Mi bin lanem lesen ia eli long laef blong mi taem mi stap givim seves olsem wan bisop.

Long wan naet we i let, i kolkol mo i stap sno, mi stap aot long ofis blong mi olsem wan bisop, taem mi gat wan strong filing blong visitim wan olfala wido long wod. Mi lukluk waj blong mi—hem i 10 klok long naet. Mi tingting se hem i let tumas blong mekem wan visit olsem. Mo antap long hem, i stap sno. Mi disaed blong visitim dia sista ia fas samting long moning bitim blong distebem hem long wan let naet olsem. Mi draev i gobak long haos mo go silip, be mi wokem tantanem mi truaot long naet from se Spirit i stap pusum mi.

Eli long nekis moning, mi draev stret long i go long haos blong wido ia. Gel blong hem i openem doa mo wetem wota long ae blong hem, hem i talem, “O Bisop, tangkyu blong yu save kam. Mama blong mi i lus tu aoa i pas”—Mi bin sapraes mo harem nogud tumas. Bae mi neva fogetem ol filing blong hat blong mi. Mi krae. ?Huia moa be dia wido, we i stret blong hem i gat bisop blong hem blong i holem han blong hem mo kamfotem hem, mo ating givim las blesing blong hem? Mi bin mestem janis ia from se mi bin ting se tingting blong mi i stret mo mi pusumaot toktok blong Tabu Spirit.⁴

Ol brata mo sista, ol yang man mo woman, mo ol Praemeri pikinini, mi testifae se blong stap folem ol toktok blong Spirit, i wan long ol samting we i impoten moa long evri rilesensip blong yumi.

Laswan, long Pam Sandei wiken ia, mi testifae se blong jenisim laef i go long Lod, blong serem testemoni abaot Hem, mo blong givim seves long Hem, oli stap tu long medel blong ol samting we oli impoten moa.

Fet long Lod Jisas Kraes i fandesen blong ol testemoni blong yumi. Wan testemoni i wan witnes o konfemesen blong trutok we i no save finis, we i stap strong long hat mo sol blong wanwan man mo woman tru long Tabu Spirit. Wan testemoni abaot Jisas Kraes, we i kamaot long Spirit mo Spirit i mekem i strong moa, i jenisim ol laef—i jenisim wei we yumi tingting mo olsem wanem yumi laef. Wan testemoni i tanem yumi i go long Papa blong yumi long Heven mo Tabu Pikinini blong Hem.

Alma i bin tijim:

“Luk, mi testifae long yufala se mi save se ol samting we mi bin talemaot long yufala oli tru. Mo ?olsem wanem nao yufala i ting se mi save se oli tru? Mo ?olsem wanem nao yufala i ting se mi save se oli tru?

“Luk, mi talem long yufala se, Tabu Spirit blong God i bin mekem mi save ol samting ia. Luk mi bin livim kakae mo prea plante dei blong mi save ol samting ia miwan. Mo nao mi save long miwan se oli tru; from Lod God i bin soemaot olgeta long mi tru long Tabu Spirit blong Hem.”⁵

Blong gat wan testemoni hemwan i no inaf. Taem fasin blong jenisim laef blong yumi i go long Jisas Kraes i gro, bae hem i nomol blong yumi wantem testifae abaot Hem—gud fasin blong Hem, lav, mo kaen fasin blong Hem.

Plante taem ol testemoni miting blong yumi long ol fast Sandei, yumi harem ol toktok olsem “mi talem tangkyu” mo “mi lavem” bitim we yumi harem ol toktok ia “mi save” mo “mi biliv.”

Mi invaetem yu blong serem testemoni blong yu abaot Jisas Kraes plante taem moa. Serem wanem yu save mo biliv mo wanem yu filim, no wanem we tangkyu from nomo. Testifae abaot ol eksperiens blong yuwan blong kam blong save mo lavem Sevya, blong stap laef folem ol tijing blong Hem, mo long paoa blong Hem we i pemaot yu, insaed long laef blong yu. Taem yu serem testemoni blong yu abaot wanem yu save, biliv, mo filim, Tabu Spirit bae i konfemem trutok long olgeta we oli lisingud long testemoni blong yu. Bae oli mekem olsem from se oli bin wajem yu we yu kam wan man o woman blong folem Jisas Kraes wetem pis. Bae oli luk wanem i minim blong stap olsem disaepol blong Hem. Bae oli filim tu, wan samting we maet oli no bin filim bifo. Wan tru testemoni i kam long wan hat we i jenis mo i letem paoa blong Tabu Spirit i karem hem i go long hat blong olgeta we oli open blong kasem.

Olgeta we oli filim wan samting olsem wan risal blong testemoni blong yu, maet afta bae oli Lod tru long prea blong konfemem trutok blong testemoni blong yu. Bae oli save save blong olgetawan.

Ol brata mo sista, mi testifae mo witnes long yu se mi save se Jisas Kraes i Sevya mo Ridima blong wol. Hem i stap laef. Hem i Pikinini blong God we i laef bakegen long ded, mo hemia hem i Jos blong Hem we profet mo ol aposol blong Hem oli lidim. Mi prea se sam dei taem mi pas i go long nekis wol, bae mi mekem olsem wetem testemoni blong mi we i saen strong.

Long ministri blong mi, mi bin lanem se wanem i impoten moa hem i ol rilesensip blong yumi wetem Papa long Heven mo Pikinini blong Hem, ol famli blong yumi, ol neba blong yumi, mo blong letem Spirit blong Lod blong i gaedem yumi long ol rilesensip ia mekem se yumi save testifae long ol samting we oli impoten moa. Long nem blong Jisas Kraes, amen.