Jeneral Konfrens
Tingting blong Mi i Fas long Tingting Ia we i Jisas Kraes.
Epril 2023 jeneral konfrens

Tingting blong Mi i Fas long Tingting Ia we i Jisas Kraes.

I Kam long Elda Neil L. Andersen

Blong Kworom blong Olgeta Twelef Aposol

Taem yu gohed blong tingting gud long tingting blong yu we i fas long Jisas Kraes, mi promesem se bae yu no kasem gaed nomo, be paoa we i kam long heven.

Long naesfala taem blong Ista ia, mi talem bakegen prea blong hym ia we i gat paoa, “Gaedem mifala, O Jehova we Yu Hae.”1

Wan naes stori insaed long Buk blong Momon i tokbaot wan yangfala man we i kamaot long wan impoten famli we nem blong hem Alma, we ol skripja i tokbaot hem olsem wan man we i no bilif mo i wosipim aedol.2 Hem i save toktok gud mo winim tingting, mo hem i yusum ol toktok blong winim ol man blong folem hem. Wetem sapraes, wan enjel i kamkamaot long Alma mo ol fren blong hem. Alma i foldaon long graon mo i nomo gat paoa tumas mekem se oli mas karem hem i go long haos blong papa blong hem. Hem i silip mo no save wekap blong tri dei.3 Afta, hem i eksplenem se taem ol man oli luk we hem i silip mo no save wekap, maen blong hem i wekap bigwan i stap mo sol blong hem i stap krae, mo i stap tingbaot laef blong hem we hem i no wantem stap save long ol komanmen blong God. Hem i tokbaot se maen blong hem i “stap tingbaot wetem bigfala soa, ol plante sin [blong hem]”4 mo “harem nogud from evri sin [blong hem].”5

Insaed long bigfala harem nogud blong hem, hem i tingbaot we oli bin tijim hem taem hem i yangfala abaot “Jisas Kraes, wan Pikinini blong God, we bae i kam blong pem praes blong ol sin blong wol.”6 Afta hem i talem ol toktok we i mekem mi tingting fulap: “taem we tingting blong mi i fas long tingting ia, mi bin prea insaed long hat blong mi: “O Jisas, yu yu Pikinini blong God, gat sore long mi”7 Taem hem i stap askem tabu paoa long Sevya, wan merikel i hapen: “taem we mi tingbaot samting ia,” hem i talem, “mi nomo save tingbaot ol soa blong mi.”8 Kwiktaem hem i filim pis mo laet. “I no [bin] gat eni samting we i dip tumas mo swit olsem glad blong mi.”9 hem i talem.

Alma “i fas long tingting ia” we i trutok blong Jisas Kraes. Sapos yumi stap yusum ol toktok ia “fas long” long saed blong bodi, maet bae yumi talem, “Hem i fas long rel blong aean stret long taem we hem i stap foldaon,” we i minim, hem i putumaot han blong hem mo hang kwiktaem mo strong long wan samting we oli putum simen long hem long wan strong fandesen.

Long situesen blong Alma, hem i bin maen blong hem we i pusumaot hemwan mo hang strong long wan trutok we i gat paoa, blong sakrifaes blong Atonmen blong Jisas Kraes. Taem hem i stap mekem aksen folem fet long trutok ia, mo tru long paoa mo sore blong God, God i sevem hem long harem nogud mo i fulap long hop.

Nomata se ol eksperiens blong yumi oli no bigbigwan olsem blong Alma, oli impoten semmak long taem we i no save finis. Ol tingting blong yumi tu oli bin “fas long tingting ia” blong Jisas Kraes mo sakrifaes blong hem we i gat sore long yumi, mo sol blong yumi i bin filim laet mo glad we i kam afta.

Stap Holemtaet Tingting ia blong Jisas Kraes

Prea blong mi se long taem blong Ista ia, i blong yumi lukluk moa long tingting ia long saed blong spirit mo mekem i stap strong insaed long sol blong yumi,10 letem i kam fri insaed long maen blong yumi, blong i gaedem yumi long wanem bae yumi tingting long hem mo mekem, mo gohed karem swit blong lav blong Sevya i kam.11

Blong stap fulumap tingting blong yumi wetem paoa blong Jisas Kraes i no minim se yumi stap tingting long Hem nomo. Be i minim se evri tingting blong yumi i sud stap raon long lav blong Hem nomo, laef mo tijing blong Hem, mo sakrifaes blong Atonmen blong Sevya we yumi no save komperem, mo Girap blong Hem long Ded wetem glori. Yumi neva fogetem Jisas long wan kona, from se ol tingting blong yumi abaot Hem oli stap oltaem mo “!evri samting we i stap insaed long [yumi i lavem tumas] Hem!”12 Yumi prea mo tingting bakegen long ol eksperiens we i bin karem yumi i kam moa kolosap long Hem. Yumi welkamem ol tabu pikja insaed long maen blong yumi, ol tabu skripja, mo ol hym blong insperesen we i stap andanit long ol tingting blong yumi blong evri dei we oli stap hariap long ol bisi laef blong yumi. Lav blong yumi long Hem i no haedem yumi blong no stap hapi mo harem nogud long laef ia, be hem i letem yumi blong wokbaot tru long ol jalenj wetem wan paoa we i bigwan bitim blong yumiwan.

Jisas, taem mi tingting long yu nomo

Hat blong mi wom insaed;

Be bae i moa naes blong luk fes blong yu

Mo kasem spel long ples we yu stap long hem.13

Tingbaot, se yu wan spirit pikinini blong Papa long heven. Olsem Aposol Pol i eksplenem, se “yumi pikinini blong God”.”14 Yu bin laef wetem aedentiti blong yuwan, longtaem bifo yu kam long wol. Papa blong yumi i bin mekem wan plan we i stret evriwan blong yumi kam long wol blong lanem samting, mo gobak long Hem. Hem i sendem Pikinini blong Hem we Hem i lavem tumas, mekem se tru long paoa blong Atonmen blong Hem we i no save finis mo Girap blong Hem long Ded, yumi save laef bakegen long ded; taem yumi wantem blong eksasaesem fet long Hem mo sakem sin blong yumi,15 bae Hem i fogivim yumi mo kasem hop blong laef we i no save finis.16

Stap Wajem Gud Maen mo Spirit blong Yumi

Long laef long wol ia, spirit mo maen blong yumi i nidim blong yumi luklukgud long olgeta.17 Maen blong yumi oli letem yumi blong laef, blong jusum, mo blong luksave wanem i gud mo nogud.18 Spirit blong yumi i kasem witnes se God i Papa blong yumi, se Jisas Kraes i Pikinini blong God, mo we ol tijing blong Tufala oli gaed blong yumi i go long hapines long ples ia mo long laef we i no save finis.

Tingting blong Alma i fas long tingting ia we i Jisas Kraes. Hemia i bin jenisim laef blong hem. Jeneral konfrens i wan taem blong andastanem wanem we Lod i wantem yumi blong mekem mo kam olsem. Hem i wan taem tu blong luklukbak long progres blong yumi. Taem ol wok blong mi i tekem mi go raon long wol, mi bin luk paoa we i moa bigwan long ol memba blong Jos we oli laef folem stret mo gud fasin mo givim olgeta fulwan.

Faef yia i pas, oli bin askem yumi blong mekem Sevya i kam moa impoten long evri samting yumi mekem, taem yumi yusum tru nem blong Jos Ia blong Jisas Kraes blong Ol Lata-dei Sent.19 Yumi stap wantem blong tokbaot mo talem nem blong Hem moa.

Fo yia i pas, taem oli katemdaon taem blong sakramen miting blong yumi, yumi kam blong lukluk moa blong stap tekpat long sakramen blong Lod. Yumi stap tingting moa long Jisas Kraes mo yumi series moa long promes blong yumi blong oltaem tingbaot Hem.20

Long taem blong stap yumiwan long wol sik mo help blong Kam Folem Mi, ol tijing blong Sevya oli kam moa impoten long ol hom blong yumi, mo i helpem yumi long wosip blong yumi long Sevya truaot long wik.

Taem yumi folem kaonsel blong Presiden Russell M. Nelson blong “lisin gud long Hem,”21 yumi stap mekem paoa blong yumi blong luksave ol wispa blong Tabu Spirit, i kam moa gud, mo blong luk han blong Lod insaed long laef blong yumi.

Wetem anaonsmen blong ol tempol mo olgeta we oli finisim, yumi stap go insaed moa long haos blong Lod mo stap kasem ol promes blesing blong Hem. Yumi stap filim wetem moa paoa, hamas Sevya mo Ridima blong i naes tumas.

Presiden Nelson i talem: “I no gat wan samting we i isi, o i otomatik blong kam [wan] strong disaepol olsem. Lukluk blong yumi i mas lok long Sevya mo gospel blong Hem. Long saed blong tingting, hem i wan wok blong traem stap lukluk long Hem long evri tingting.”22

Taem yumi putum lukluk blong yumi moa long Jisas Kraes, evri samting raon long yumi—long taem naoia—yumi stap luk wetem ae blong lav blong yumi long Hem. Ol samting we i pulum tingting we i no impoten tumas oli lus, mo yumi karemaot ol samting we oli mekem yumi no stap holemtaet laet mo fasin blong Hem. Taem yu gohed blong tingting gud long tingting blong yu we i fas long Jisas Kraes, trastem Hem, mo obei ol komanmen blong Hem, mi promesem se bae yu no kasem gaed nomo, be paoa we i kam long heven—paoa we i karem moa paoa long ol kavenan blong yu, pis long ol hadtaem blong yu, mo glad long ol blesing blong yu.

Stap Tingbaot Jisas Kraes.

Samfala wik i pas, Kathy mo mi i bin visitim hom blong Matt mo Sarah Johnson. Long wol i gat wan pikja blong naesfala famli blong olgeta, mo wan naesfala pikja blong Sevya, mo wan pikja droing blong tempol.

Ol fo gel blong tufala, Maddy, Ruby, Claire, mo June, oli toktok wetem glad abaot hamas oli lavem mama blong olgeta.

Blong ova long wan yia, Sarah i stap gat ol apoenmen long ol Satedei blong famli blong hem blong oli go long tempol tugeta blong mekem se ol gel oli save tekpat long ol baptaes blong ol memba blong famli we oli bin ded i no longtaem.

Long Novemba las yia, Sarah i putum taem blong wan famli tempol apoenmen long las wik blong Disemba long Tosdei be i no long Satedei. “Mi hop yu oraet wetem hemia,” hem i talem long Matt.

Sarah i gat kansa, be ol dokta oli ting se bae hem i laef blong tu o tri moa yia. Long wan taem blong sakramen miting, Sarah i serem testemoni blong hem we i gat paoa, mo i talem se nomata wanem i hapen long hem, hem i lavem Sevya wetem evri hat blong hem mo “Jisas i bin win finis.” Taem Disemba i kam, helt blong Sarah i go daon bigwan mo oli no bin ting se bae i olsem, mo hem i silip long hospital. Long eli moning blong Tosdei, 29 Disemba, hem i finisim taem blong hem long wol ia. Matt i bin stap long saed blong Sarah long ful naet ia.

Wetem hat blong hem we i stap brok mo bigfala taet long bodi mo filing, hem i kambak long hom, mo serem sore wetem ol gel blong hem. Taem Matt i lukluk fon blong hem, hem i luksave rimaenda ia we i no nomol, blong Tosdei tempol apoenmen we Sarah i bin putum blong dei ia. Matt i talem, “Long fas taem we mi luk, mi tingting se, hemia bae i no save wok nomo.”

Be afta tingting blong Matt i fas long tingting ia: “Sevya i stap laef. I no gat wan ples moa we mifala i wantem stap long hem olsem wan famli, be long tabu Haos blong Lod.”

Pikja
Johnson Famli

Matt, Maddy, Ruby, Claire, mo June oli kam long tempol from apoenmen ia we Sarah i bin putum blong olgeta. Wetem wota blong ae we i stap foldaon long fes blong hem, Matt i mekem ol baptaes wetem ol gel blong hem. Oli bin filim dip lav ia mo we oli fas blong taem we i no save finis wetem Sarah, mo oli bin filim bigfala lav mo kamfot blong pis blong Sevya. Matt i serem se, “Taem mi stap filim bigfala harem nogud mo sore, mi stap singaot from glad tu, from mi save bigfala plan blong Papa blong sevem man.”

Long Ista taem ia, mi witnes long trutok we i fulwan mo tru abaot sakrifaes blong Atonmen blong Sevya we yumi no save komperem, mo Girap blong Hem long Ded wetem glori. Taem maen blong yu i gohed blong fas strong mo oltaem long tingting ia we i Jisas Kraes, mo taem yu gohed blong lukluk moa fulwan long Sevya long laef blong yu, mi promes se bae yu filim hop blong Hem, pis blong Hem, mo lav blong Hem. Long nem blong Jisas Kraes, amen.

Ol Not

  1. “Guide Us, O Thou Great Jehovah,” Hymns, no. 83.

  2. Luk long Mosaea 27:8.

  3. Luk long Alma 36:10.

  4. Alma 36:17.

  5. Alma 36:12.

  6. Alma 36:17.

  7. Alma 36:18. Nara taem we oli yusum “fas long” oli yusum long Buk blong Momon taem i stap tokbaot olgeta we oli “holem strong en blong aean rel” (1 Nifae 8:24, 30).

  8. Alma 36:19.

  9. Alma 36:21.

  10. “Faet ia we i moa bigwan long laef, i stap hapen long ol kwaet rum blong sol blong yuwan” (David O. McKay, in Conference Report, Apr. 1967, 84).

  11. “[Ol tingting] oli stamba blong evri aksen. Ol tingting blong yumi oli bod blong swij, ples blong kontrol we i stap kontrolem ol aksen blong yumi” (Boyd K. Packer, That All May Be Edified [1982], 33).

    Presiden Dallin H. Oaks i tijim: “Yumi save putum en long ol nogud tingting blong hat mo gat ol stret mo gud tingting. Hemia i tekem edukesen mo praktis. Presiden Joseph F. Smith i tijim se “edukesen… blong ol tingting blong hat blong yumi, i impoten tumas mo hadwok blong kasem’” (Pure in Heart [1988], 149).

  12. “Praise to the Lord, the Almighty,” Hymns, no. 72.

  13. “Jesus, the Very Thought of Thee,” Hymns, no. 141.

  14. Ol Wok 17:29.

  15. Luk long Doktrin mo Ol Kavenan 58:42–43.

  16. Luk long Doktrin mo Ol Kavenan 14:7.

  17. “I no gat wan narafala man bakegen, be God nomo, we bae i save ol tingting blong yu mo ol samting we hat blong yu i wantem mekem” (Doktrin mo Ol Kavenan 6:16).

  18. “Gudfala man we i fulap long ol gudfala tingting, hem i save mekem ol gudfala fasin. Mo rabis man we i fulap long rabis tingting, hem i save mekem ol rabis fasin, from we taem man i tok, hem i stap talemaot ol samting we tingting blong hem i fulap long hem” (Luk 6:45).

  19. Luk long Russell M. Nelson, “Stret Nem blong Jos,” Liahona, Nov 2018, 87–89.

  20. Kavenan blong yumi evri wik long sakramen prea i blong bae yumi “oltaem tingbaot hem” (Moronae 4:3; Doktrin mo Ol Kavenan 20:77). Buk blong Momon i leftemap tingting blong yumi taem i yusum toktok ia tu taem, wan afta narawan: “tingbaot, tingbaot” (Mosaea 2:41; Alma 37:13; Hileman 5:9). Blong tingbaot long saed blong spirit, i kam tru long paoa blong Tabu Spirit: “Tabu Spirit, … we bae i save tijim yufala long evri samting, mo bae hem i save mekem yufala i tingbaot olgeta samting ya bakegen” (John 14:26).

  21. Russell M. Nelson, “Lisin Gud long Hem,” Liahona, Mei 2020, 88.

  22. Russell M. Nelson, “Pulum Paoa blong Jisas Kraes Insaed long Laef blong Yumi,” Liahona, Mei 2017, 41. Presiden Russell M. Nelson i talem: “Glad we [Ol Lata-dei Sent oli] filim i wan smol pat nomo blong ol situesen blong laef blong yumi, mo i evri samting we i go wetem ol samting we yumi lukluk moa long hem long laef blong yumi.”(“Glad mo Traehad blong Laef long Saed blong Spirit,” Liahona, Nov. 2016)