Jeneral Konfrens
Kam Sef Tugeta long Hom
Epril 2023 jeneral konfrens

Kam Sef Tugeta long Hom

I Kam long Elda Quentin L. Cook

Blong Kworom blong Olgeta Twelef Aposol

Yumi stap long wan spesel posisen blong karem Isrel i kam tugeta long tugeta saed blong vel moa naoia bitim evri nara taem long plan blong Papa.

Presiden Russell M. Nelson, profet blong yumi we yumi lavem tumas i toktok plante abaot spesel responsabiliti blong yumi blong help blong karem Isrel i kam tugeta mo rere long wol ia from Seken Kaming blong Jisas Kraes.1 Papa blong ol spirit blong yumi i wantem ol pikinini blong Hem blong kam sef tugeta long hom.

Plan blong Papa long Heven blong karem sef tugeta ol pikinini blong Hem i gobak hom long heven i no dipen long sakses long ol samting blong wol, hamas mane hem i gat, edukesen, kala blong skin, man o woman. Plan blong Papa i dipen long stret mo gud fasin, stap obei olgeta komanmen blong Hem mo kasem ol tabu odinens mo ona long ol kavenan we yumi mekem.2

Tabu doktrin blong insperesen se yumi ol brata mo sista mo “evriwan i semmak long God” we i stamba blong wok blong kam tugeta. Doktrin ia i agri wetem olgeta we oli wantem tumas blong pipol blong ol defdefren kaen ekonomi mo kala blong skin, blong oli eksperiensem ol laef we oli moa gud. Yumi putum han tugeta mo joen tugeta long ol efot olsem ia. Antap long hemia, yumi wantem tumas blong evri pikinini blong God oli kam long Hem mo kasem ol blesing we i no save finis we Hem i givim tru long gospel blong Hem.3 Long Introdaksen blong Lod long Doktrin mo Ol Kavenan Hem i talem, ““Lisin gud, yufala ol pipol we yufala i stap longwe; mo yufala we i stap long ol aelan blong solwota, lisin tugeta.4

Mi laekem we fas ves long Doktrin mo Ol Kavenan we i tekem tu evri pipol we oli stap long “ol aelan blong solwota.” Mi bin gat tri spesel koling blong givim seves mo laef long ol aelan blong solwota. Faswan, mi bin givim seves olsem yang misinari long Ol Britis Aelan, nambatu olsem wan Jeneral Atoriti long Ol Filipin Aelan, mo afta olsem Eria Presiden long Ol Pasifik Aelan we i tekem tu plante aelan blong Polinesia.

Evri trifala ples ia oli bin save karem olgeta we oli biliv i kam tugeta long gospel blong Jisas Kraes we i kambak. Ol misinari oli kam faswan long Ol Britis Aelan long 1837. Hemia i wan yia afta we Josef Smit i dediketem Ketlan Tempol, long ples we Moses i kam “givim ol ki blong wok blong karem Isrel i kam wanples aot long ol fo pat blong wol, mo blong lidim ol ten traeb aot long kantri long Not.”5 Sakses we i bin gat long Ol Britis Aelan i wan we bae oli oltaem tingbaot. Stat long taem ia kasem 1851, ova haf long memba blong Jos long Ol Britis Aelan, oli joenem jos tru long baptaes nomo.6

Long 1961, Elda Gordon B. Hinckley i visitim mo i statem wok blong ful-taem misinari long Ol Filipin Aelan. Long taem ia i gat wan Filipino nomo we i holem Melkesedek Prishud. Wetem sapraes, i gat ova 850,000 memba blong Jos long Ol Filipin Aelan tedei. Mi laekem tumas ol man blong Filipin; oli gat wan bigfala mo strong lav long Sevya.

Ating plante oli no save gud long ol misinari wok we i stap gohed long ol Aelan long Polinesia. I stat log 1844 taem Addison Pratt i go long ples ia we naoia oli singaotem Franis Polinesia.7 Plante long ol man Polinesia oli biliv finis long famli we i no save finis mo akseptem Jisas Kraes olsem Sevya blong olgeta. Tedei kolosap 25 pesen long ol man Polinesia, long Ol Polinesia Aelan, oli ol memba blong Jos.8

Wan taem mi bin lisin long wan gel we i gat 17 yia, we i namba 7 jeneresen olsem memba blong jos, long wan aelan blong Tahiti we i stap longwe. Hem i talem tangkyu i go long ol bubu blong hem we oli konvet i kam long jos long 1845 long Tubai, tu yia bifo ol eli Jos memba oli kasem Sol Lek Vale.

Doktrin blong yumi i klia se bae i gat wan taem blong ol pipol blong oli kasem mo ansa long mesej blong gospel. Ol eksampol ia ol wan pat nomo blong wan bigfala pikja. Presiden Nelson i ripripitim plante taem se, “kam tugeta ia blong Isrel, i wanbigfala jalenj, … stamba, mo … wok long wol tedei.”10

Kasem taem blong Restoresen blong Jos Ia blong Kraes, we i tekem tu Buk blong Momon we i kamaot mo revelesen mo ol prishud ki we oli givim long Profet Josef Smit, save long saed blong “kam tugeta blong Isrel” i no fulwan mo i smol nomo.11

Nem ia “Isrel” hem i taetol we oli givim long Jekob.12 I kam blong ripresentem laen blong Abraham tru long Aesak mo Jekob. Stret promes mo kavenan i go long Papa Abraham i stap long Ebraham 2:9–10, we wan pat i rid olsem ia:

“Mo aot long yu, bae mi mekem wan bigfala nesen, …

Mo bambae mi blesem olgeta tru long nem blong yu; from se hamas long olgeta we bae oli akseptem Gospel ia, bae mi singaotem olgeta folem nem blong mi, mo bae mi kaontem olgeta olsem laen blong yu, mo bambae oli girap mo blesem yu, olsem papa blong olgeta.”

Long taem blong Kaonsel long Heven long laef bifo long wol ia, oli tokbaot plan blong sevem man mo oli sastenem. Plan ia i tekem tu sam loa mo ol odinens blong prishud we i tekem ples bifo oli krietem wol ia mo i folem kam tugeta ia.13 Mo i tekem tu prinsipol blong fridom blong mekem joes.

Afta plante handred yia olsem ol man we oli gat paoa, hemia i tekem tu, rul blong Sol, Deved, mo Solomon, Isrel i seraot. Traeb blong Juda mo pat blong traeb blong Benjamin i kam Kingdom blong Juda. Ol narafalawan, oli luksave olgeta olsem ol ten traeb, oli kam kingdom blong Isrel.14 Afta 200 yia we oli seperetem olgeta, fas seraot blong Isrel i hapen long 721 yia bifo Kraes i bon, taem we king blong Asaria i karem ol ten traeb blong Isrel oli kam olsem ol prisena.15 Afta long hemia oli go long ol kantri long not.16

Long 600 yia bifo Kraes i bon, long stat blong Buk blong Momon, Papa Lihae i lidim wan koloni blong Ol man Isrel i go long Amerika. Lihae i andastanem Isrel i seraot we hem tu i pat long hem. Nifae i kwotem ol toktok blong hem we i se bae haos blong Isrel “bae oli skelem olgeta long wan olif tri, we ol branj blong hem bae oli mas kamaot mo oli mas seraot long ful fes blong wol.”17

Long wol we oli singaotem Niufala Wol, ol histri blong ol Man blong Nifae mo Ol Man blong Leman olsem we oli talem long Buk blong Momon, i en kolosap 400 yia afta we Jisas i bin ded. Ol bubu blong Papa Lihae oli seraot truaot long Amerika.18

Momon i tokbaot klia hemia long 3 Nifae 5:20, we i rid olsem:”Mi mi Momon, mo mi wan stret laen blong Lihae. Mi gat stamba tingting blong presem God blong mi mo Sevya blong mi Jisas Kraes, from hem i bin tekem ol papa blong mifala aot long graon blong Jerusalem.”19

I klia se hae poen long oda blong histri blong Isrel i taem we Jisas Kraes i bon i kam long wol, mesej, ministri mo misin blong Lod mo Sevya blong yumi Jisas Kraes.20

Afta long ded mo girap bakegen blong Sevya we i mekem yumi kasem laef we i no save finis, nambatu seraot blong Juda we yumi save gud long hem i hapen 70 yia mo 135 yia afta we Jisas i bin ded, from raorao mo wo blong ol man Rom mekem se ol man Jiu oli seraot raon long wol.

Olsem we Presiden Nelson i tijim: “Buk blong Momon i kamaot olsem wan saen blong Lod i statem blong karem kam tugeta [ol] pikinini blong kavenan.”21 From hemia, Buk blong Momon we Josef Smit i transletem tru long presen mo paoa blong God, i stap go long ol bubu blong Lihae, Isrel we i seraot, mo ol Jentael we oli adoptem olgeta i kam long ol traeb Isrel. Heding blong 1 Nifae 22 pat blong hem i rid olsem, “Isrel bae i seraot long ful fes blong wol—Ol Jentael bae oli fidim mo givim ol gudfala kakae long Isrel long ol las dei wetem gospel.” Taetol pej blong Buk blong Momon i talem se wan long ol stamba tingting blong hem i “blong winim tingting blong Ol Jiu mo Jentael se Jisas hem i Kraes.” Wetem Restoresen mo Buk blong Momon, doktrin ia blong karem Isrel i kam tugeta i stap gro bigwan.22

Olgeta we oli akseptem gospel blong Jisas Kraes, nomata wanem laen oli kam long hem, oli kam pat blong kam tugeta blong Isrel.23 Wetem kam tugeta ia mo plante tempol we oli stap bildim mo oli stap anaonsem, yumi stap long wan spesel posisen blong karem Isrel i kam tugeta long tugeta saed blong vel, moa naoia bitim evri nara taem long plan blong Papa.

Presiden Spencer W. Kimball, i stap tokbaot kam tugeta blong Isrel. Hem i talem: “Naoia, kam tugeta blong Isrel i blong joenem tru jos mo … kam blong save tru God. … Eniwan, we i akseptem gospel ia we i kambak, mo i lukaotem blong wosip long Lod long lanwis blong hem mo wetem Ol Sent long ol nesen long ples we hem i stap long hem, i folem loa blong kam tugeta blong Isrel mo i gat raet blong kasem evri promes blesing blong ol Sent long ol las dei ia.”24

“Kam tugeta blong Isrel naoia i tekem tu, fasin jenisim laef.”25

Taem yumi lukluk wetem wan klia ae, ol memba blong Jos Ia blong Jisas Kraes blong Ol Lata Dei Sent oli gat bigfala janis ia blong lavem, serem, invaetem mo helpem blong karem Isrel i kam tugeta blong kasem ful blesing blong kavenan blong Lod. Hemia i tekem tu, ol man Afrika, mo ol man Yurop, ol man Saot mo Not Amerika, ol man Esia, ol man Ostrelia, mo olgeta we oli stap long ol aelan blong solwota. “From i tru, voes blong Lod i stap go aot long evri man.”26 “Kam tugeta ia bae i gohed kasem evri man we i stret mo gud oli kam tugeta long ol kongregesen blong Ol Sent long ol nesen raon long wol.”27

I nogat wan we i tok stret abaot kam tugeta bitim Presiden Nelson: “Eni taem yu mekem eni samting we i helpem eniwan—long eni saed blong vel—evri taem yu tekem wan step fored blong stap mekem ol kavenan wetem God mo stap kasem baptaes mo tempol odinens we i nid long bihaf blong olgeta, yu stap help blong karem Isrel i kam tugeta. Hem i simpol olsem ia nao.”28

?Jos i stap wea tedei? Long 62 yia stat long taem we mi jes stat blong givim seves long wan misin long 1960, namba blong fultaem misinari we oli stap givim seves anda long singaot blong profet, i go antap long 7,683 kasem 62,544. Namba blong ol misin i aot long 58 i go long 411. Namba blong ol memba i i go antap long samples 1,700,000 i go long samples 17,000,000.

KOVID‑19 i stopem blong wan sot taem, sam long ol janis blong yumi blong serem gospel. I givim tu eksperiens ia blong yusum niu teknoloji, we bae i mekem wok blong kam tugeta i kam moa bigwan. Mifala i glad se ol memba mo misinari oli stap mekem ol efot we oli moa bigwan blong karem ia Isrel we i seraot, i kam tugeta. Fasin blong gro i gogohed evri ples, speseli long Saot Amerika mo Afrika. Mifala i talem tangkyu long plante raon long wol we oli bin ansa long invitesen blong Presiden Nelson we i gat paoa, blong gat moa misinari seves. Nomata long hemia, komitmen blong yumi blong lavem, serem mo invaetem i save kam moa bigwan.

Wan impoten pat blong misinari wok ia i blong wanwan memba blong stap olsem wan laet blong ol eksampol29 wea ples yumi stap long hem.30 Yumi no save stap haed long ol narafala wan. Eksampol blong yumi olsem fasin blong Kraes blong stap kaen, stret mo gud, hapi mo gat tru lav long ol pipol, i save krietem wan laet blong olgeta, mo tu, blong gat wan save se i gat wan sef ples i stap long ol odinens blong sevem man mo kam olsem wan god long gospel blong Jisas Kraes we i kambak.

Plis andastanem se i gat ol naesfala blesing blong stap serem gospel blong Jisas Kraes. Ol skripja oli tokbaot glad mo pis, fogivnes blong ol sin, proteksen long ol temtesen, mo paoa blong help we i kam long God.31 Blong stap lukluk i go bitim laef long wol ia, bae yumi rere blong serem gospel wetem olgeta we “oli stap long tudak mo oli stap anda long fasin blong stap slef long sin insaed long bigfala wol blong spirit blong ol dedman”.32

Spesel prea blong mi tedei i blong evri pikinini, yang man, yang woman, famli, kworom, Rilif Sosaeti, mo klas blong oli luklukbak long olsem wanem yumi wanwan mo olsem wan grup, i akseptem kaonsel ia we i gat paoa blong karem Isrel i kam tugeta we Lod mo profet we yumi lavem tumas i bin givimaot.

Yumi respektem fridom blong mekem joes. Long wol ia, plante bae oli no ansa mo tekpat long kam tugeta blong Isrel. Be plante bae oli mekem, mo Lod i wantem olgeta we oli kasem gospel blong Hem blong oli traehad plante blong stap olsem wan laet blong eksampol we bae i helpem ol narawan blong kam long God. Hemia i letem ol brata mo sista blong yumi raon long wol blong stap glad long ol blesing mo odinens blong gospel blong Jisas Kraes we i kambak mo stap kam sef tugeta long hom.

Mi talem stret witnes blong mi olsem wan aposol blong tabu Jisas Kraes mo plan blong Papa long Heven blong yumi long nem blong Jisas Kraes, amen.

Ol Not

  1. Luk long Russell M. Nelson, “Welkam Mesej,” Liahona, May 2021, 7.

  2. Luk long Doktrin mo Ol Kavenan 20:37.

  3. Luk long 2 Nifae 26:33.

  4. Doktrin mo Ol Kavenan 1:1. Long Doktrin mo Ol Kavenan 1:4, Lod i gohed blong talem: “Mo voes blong woning ia bae i stap go aot long evri pipol, tru long maot blong ol disaepol blong mi we mi bin jusum long ol las dei ia.”

  5. Doktrin mo Ol Kavenan 110:11

  6. Long 1851 i gat samples long 52,165 memba blong Jos. Folem ol Jos rikod mo “Religious Census of 1851” long Inglan mo Wel, i gat ova long 28,000 memba long ol ples ia (luk long Robert L. Lively Jr., “Some Sociological Reflections on the Nineteenth-Century British Mission,” long Mormons in Early Victorian Britained. Richard L. Jensen and Malcolm R. Thorp [1989], 19–20).

  7. Luk long Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 494–95, 514–15, 573.

  8. Tonga: 45 pesen; Samoa: 31 pesen; Ameriken Samoa: 22.5 pesen; mo French Polinesia: 7 pesen.

  9. Luk long Saints, 573–74.

  10. Russell M. Nelson, “Hope of Israel” (worldwide youth devotional, June 3, 2018), HopeofIsrael.ChurchofJesusChrist.org.

  11. Doktrin ia we i spesel mo i gat paoa i stap insaed long Buk blong Momon mo i klia long namba 10 atikol blong fet, we i stat wetem, “Mifala i biliv we Isrel bambae i mas kambak tugeta mo Olgeta Ten Traeb bambae oli kambak bakegen” (luk long James E. Talmage, The Articles of Faith, 12th ed. [1924], 314–44).

  12. Olsem we oli rekodem long Jenesis 32:28, storian long saed blong spirit, i talem, “Nem blong yu bambae i no moa Jekob. Yu yu faet agens long God, mo agens long man tu, mo yu yu win. From samting ya, i stat naoia, bambae nem blong yu Isrel.”

  13. Luk long Joseph Smith, long “History, 1838–1856, volume D-1,” 1572, josephsmithpapers.org; luk tu long Joseph Smith, “Discourse, 11 June 1843–A, as Reported by Wilford Woodruff,” [42–43], josephsmithpapers.org; Joseph Smith, “Discourse, 11 June 1843–A, as Reported by Willard Richards,” [241], josephsmithpapers.org.

  14. Luk long Bible Dictionary, “Israel, Kingdom of”; James E. Talmage, The Articles of Faith, 315. Rehoboam mo ol samting blong hem olsem kingdom blong Juda mo oli stap long saot pat blong niufala Isrel.

  15. Luk long 2 King 17:23.

  16. Luk long Doktrin mo Ol Kavenan 133:26; luk tu long Doktrin mo Ol Kavenan 110:11.

  17. 1 Nifae 10:12. Afta, Amon i talem: “Blesem nem blong God blong mi, we i tingbaot ol pipol ia we oli wan branj blong tri blong Isrel, mo i bin kamaot long stamba blong hem long wan graon we oli no save” (Alma 26:36).

  18. Presiden Spencer W. Kimball, i stap tokbaot Ol Man blong Laman, mo i tijim se Saeon hem i evri pat blong Amerika. Hem i talem, “Yumi stap insaed long Isrel mo yumi stap kam tugeta” (The Teachings of Spencer W. Kimball, ed. Edward L. Kimball [1982], 462).

  19. Taem Papa Lihae i kasem instraksen blong karem famli blong hem mo go long ples we i nogat man long hem, sam pat blong risen ia i from bae oli prapa spolem Jerusalem (luk long 1 Nifae 2). Tempol blong Solomon we oli prapa spolem, Jerusalem we i foldaon, mo traeb blong Juda we oli holemtaet olgeta oli prisena, i hapen long samples 586 yia Bifo Kraes i bon.

    “Long samples 720 yia bifo Kraes i bon, oli tekova long Isrel, mo olits 10 tribes driven into exile. … [In Jerusalem,] Solomon’s Temple sustained several attacks by foreign powers before finally, in 586 B.C.E., being totally destroyed by the army of Nebuchadnezzar, the Babylonian king” (David B. Green, “The History of the Jewish Temple in Jerusalem,” Haaretz, Aug. 11, 2014, haaretz.com/jewish/.premium-history-of-the-temple-in-jerusalem-1.5256337). Luk long 2 King 25:8–9.

  20. Luk long Tad R. Callister, The Infinite Atonement (2000).

  21. Russell M. Nelson, “Children of the Covenant,” Ensign, May 1995, 33; luk tu long “Covenants,” Liahona, Nov. 2011, 88.

  22. Luk long Russell M. Nelson, long R. Scott Lloyd, “Seminar for New Mission Presidents: ‘Swift Messengers’ to Scattered Israel,” Church News, July 13, 2013, thechurchnews.com. Presiden Nelson i bin talem se kam tugeta “i no wan kwestin abaot ples; hem i wan invitesen blong komitmen blong wanwan man mo woman. Ol pipol oli save kam “blong kasem save long saed blong Lod” [3 Nifae 20:13] mo oli neva aot long homples blong olgeta” (“The Gathering of Scattered Israel,” Liahona, Nov. 2006, 81). Luk tu long 3 Nifae 21:1–7.

  23. Doktrin blong yumi i klia; Lod i seraotem ol traeb blong Isrel from fasin blong olgeta blong go agens mo no stap mekem stret mo gud fasin. Be Lod i yusum tu ol pipol blong Hem we Hem i jusum blong oli seraot long ol kantri blong wol blong blesem ol kantri ia. (Luk long Guide to the Scriptures, “Israel—The Scattering of Israel,” scriptures.ChurchofJesusChrist.org.)

  24. Spencer W. Kimball, The Teachings of Spencer W. Kimball, 439.

  25. Samari heding long Spencer W. Kimball, The Teachings of Spencer W. Kimball, 438. Luk tu long “All Are Alike unto God,” ed. E. Dale LeBaron (1990), wan koleksen blong 23 storian we i kam long wan blak Lata-dei Sent blong Afrika. Sisa Julia N. Mavimbela i talem se bifo hem i joenem Jos, taem hem luk toktok ia Isrel, bae hem i “sakem buk long saed mo talem se, ‘Hemia blong ol waet man. Hem i no blong yumi. Oli no jusum yumi.’ Tedei mi save se mi blong wan famli blong King, sapos mi laef long stret mo gud fasin. Mi mi wan man Isrel, mo taem mi stap mekem ol odinens blong mi long tempol, mi kasem wan filing se yumi evriwan i stap long wol ia olsem wan famli nomo” (insaed long “All Are Alike unto God,” 151).

  26. Doktrin mo Ol Kavenan 1:2.

  27. Spencer W. Kimball, The Teachings of Spencer W. Kimball, 438.

  28. Russell M. Nelson, “Hope of Israel.”

  29. Aposol Pol i talem long yangfala fren blong hem Timoti blong i “mas soemaot gudfala eksampol long ol Kristin man” (1 Timoti 4:12).

  30. Luk long 3 Nifae 18:24.

  31. Luk long Mosaea 18:8–13; 3 Nifae 18:25; Doktrin mo Ol Kavenan 18:10–16; 31:5; 62:3.

  32. Doktrin mo Ol Kavenan 138:57.