Lod Jisas Kraes i Tijim Yumi blong Givhan

Lod Jisas Kraes i talem se:

“Mi nao, gudfala man ya blong lukaot long sipsip: I glad nomo blong ded blong sevem ol sipsip blong hem.”

“Olsem we Papa blong mi i save mi, mo mi mi save hem: mo mi glad nomo blong mi ded blong sevem ol sipsip blong mi.”¹

Long Grik translesen blong skripja ia, toktok ia gud i minim tu “naes, nambawan .” Tedei, mi wantem tokbaot gudfala Man blong Lukaot long Sipsip, Naesfala Man blong lukaot long sipsip, Stret Man blong lukaot long sipsip, we i Jisas Kraes.

Long Niu Testeman, oli singaotem Hem “nambawan man blong lukaot long sipsip,”² Jif blong lukaot long sipsip,”³ mo “Man blong lukaot long sipsip mo Bisop blong ol sol blong [yumi].⁴

Long OlTesteman, Aesea i raetem se “Hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem.”⁵

Long Buk blong Momon, oli singaotem Hem “gudfala man blong lukaot long sipsip”⁶ mo “tru masta blong lukaot long sipsip.”⁷

Long Doktrin mo Ol Kavenan, Hem i talemaot se, “Taswe, mi stap long medel blong yufala, mo mi mi gudfala man blong lukaot long sipsip.”⁸

Long dei blong yumi, Presiden Russell M. Nelson i bin talem se: “Gudfala Man blong Lukaot long Sipsip i lukaot gud long evri sipsip long yad blong Hem, mo yumi yumi ol tru wokman blong Man blong lukaot long ol sipsip ia. Janis blong yumi hem i blong tekem lav blong Hem mo ademap lav blong yumiwan from ol fren mo ol neba —stap fidim, stap kea, mo stap lukaotem olgeta—olsem we Sevya bae i mekem blong yumi.”⁹

Presiden Nelson i eksplenem tu se, “Wan hae mak long Jos ia we i tru mo i laef we i blong Lod, i we, oltaem hem i oganaes, i lidim wok blong givhan long wanwan pikinini blong God mo famli blong olgeta. From hem i Jos blong Hem, yumi, olsem ol wokman blong Hem, bae yumi givhan long wan ia, semmak olsem we hem i bin mekem. Bambae yumi givhan long nem blong Hem, wetem paoa mo atoriti blong Hem, mo wetem lav blong Hem we i kaen.”¹⁰

Taem ol Farisi* mo ol tija blong Loa* oli stat tok agens long Jisas, oli talem se, “Man ya, hem i glad blong luk ol man nogud, mo blong go kakae wetem olgeta.”¹¹ Hem i ansa taem Hem i talem tri naesfala stori we yumi kam blong save olsem parabol blong sipsip we i lus, parabol blong wan smol mane we i lus, mo parabol long yang boe we i lusum rod.

Hem i intresting blong save se taem Luk, Man blong raetem Gospel, i stap raetem trifala stori ia, hem i yusum parabol we i minim wan i no plante.¹² I klia se Lod i stap tijim wan spesel lesen wetem trifala stori ia—ol stori we presentem ol defren namba, 100 sipsip, 10 smol mane, mo 2 boe.

Impoten namba long wanwan long ol stori ia, hem i namba wan. Mo wan lesen we yumi lanem long namba ia se yu maet wan wokman blong man blong lukaot sipsip blong 100 elda mo ol fiuja elda long kworom blong ol elda, o wan advaesa blong 10 yang woman, o wan tija blong 2 Praemeri pikinini, be yu oltaem, oltaem givhan long olgeta, kea long olgeta mo lavem olgeta wan afta narawan, wanwan. Yu neva talem se, “Wan krangke sipsip stret” o “Lego, mi nidim smol mane ia” o “Wanem stronghed pikinini stret.” Sapos yumitu gat wetem yumi “bigfala lav i klin lav blong Kraes,”¹³ yumi, olsem man long stori we i mas livim ol naenti naen sipsip blong hem oli stap kakae long open ples, nao hem i mas go lukaot sipsip ya we i lus, gogo [… gogo… gogo yumi] faenem.”¹⁴ O olsem woman long stori we i lusum wan smol mane, bae yumi “laetem laet, mo i mas brum long haos blong lukaot mane ya gogo, gogo[… gogo… gogo yumi] faenem.”¹⁵ Sapos yumi gat wetem yumi “bigfala lav i klin lav blong Kraes,” yumi bae folem eksampol blong papa long stori blong yang boe we i lusum rod, we “taem hem i stap longwe yet, papa blong hem i luk hem, mo i sore tumas long hem. Nao papa blong hem i resis, i go mitim hem, i putum han blong hem i goraon long hem, i kis long hem.”¹⁶

?Yu filim save hat blong man we i lusum wan sipsip nomo mo wantem tumas blong faenem? ?O semmak filing long hat blong woman we i lusum wan smol mane mo wantem tumas blong faenem? ?O strong filing blong lav mo sore long hat blong papa blong boe we i lusum rod?

Mi mo woman blong mi, Maria Isabel, i bin givim seves long Sentrol Amerika, oli putum mitufala long Gwatemala Siti. Long ples nao mi bin gat janis blong mitim Julia, wan fetful memba blong Jos. Mi gat strong filing ia blong askem hem abaot famli blong hem. Mama blong hem i ded from kansa long 2011. Papa blong hem i bin wan fetful lida long stek blong hem, hem i stap givim seves olsem wan bisop mo wan kaonsela long stek presiden blong hem blong sam yia. Hem i wan tru wokman blong man blong lukaot sipsip blong Lod. Julia i bin talem long mi abaot plante efot blong hem blong visit, blong givhan, mo blong givim seves. Hem i glad blong stap fidim mo stap lukaotem gud ol impoten sipsip blong Lod. Hem i bin mared mo stap aktiv long Jos.

Sam yia afta, hem i go tru long wan divos mo naoia hem i go long jos hem wan bakegen. Hem i bin filim se hem i no gat ples mo filim tu se sam pipol oli no glad long hem from hem i divos. Hem i stop blong stap go long jos taem wan nogud spirit i fulumap hat blong hem.

Julia i tokbaot plante gudfala samting we hem i bin mekem olsem wan wokman blong man blong lukaotem sipsip, we i wokhad, soem lav mo sore long man. Mi tingbaot i klia se wan filing blong wantem tumas i kam long mi taem hem i stap tokbaot hem. Mi wantem blong mekem wan samting blong man ia, wan man we i bin mekem plante samting tumas blong plante man truaot long ol yia.

Hem i givim long mi fon namba blong hem mo mi stat blong kolem hem, mi stap hop blong gat janis ia blong mitim wetem hem. Afta samfala wik mo plante, plante fon kol we i no gat sakses, wan dei hem i jes ansarem fon.

Mi talem long hem se mi bin mitim Julia, pikinini gel blong hem, mo mi intres long wei we hem i bin givim seves, bin givhan, mo soem lav long ol impoten sipsip blong Lod blong plante yia. Hem i no bin ting se bae harem wan komen olsem. Mi talem long hem se mi wantem tumas blong visitim hem blong luk hem. Hem i askem long mi stamba tingting blong askem blong gat wan miting. Mi ansa se, “Mi wantem tumas blong mitim papa blong naesfala gel ia.” Afta i nomo gat toktok long fon blong sam seken—sam seken ia nomo i olsem i no gat en. Hem i ansa smol nomo se, “Wetaem mo wea?”

Long dei we mi mitim hem, mi invaetem hem blong serem wetem mi sam long ol eksperiens blong hem long saed blong stap visit, stap givhan, mo stap givim seves long ol impoten sipsip blong Lod. Taem hem i stap gobak long sam stori ia, mi luksave se voes blong hem i jenis mo sem spirit we hem i bin filim plante taem olsem wan wokman blong man blong lukaot sipsip i bin kambak. Naoia ol ae blong hem oli fulap long wota blong ae. Mi save hemia i stret taem blong mi, be mi faenem se mi no save wanem blong talem. Mi prea long tingting blong mi, “Papa, helpem mi.”

Kwiktaem nomo, mi harem we mi stap talem long hem se, “Brata Florian, olsem wan wokman blong Lod, mi talem sori we mi no bin helpem yu long taem ia. Plis, fogivim mifala. Givim mifala wan nara janis blong soem long yu se mifala i lavem yu. We mifala i nidim yu. We yu yu impoten long mifala.”

Long nekis Sandei hem i kambak. Hem i gat wan longfala storian wetem bisop blong hem mo stap aktiv. Sam manis i pas hem i ded—be hem i bin kambak. Hem i bin kambak. Mi testifae se wetem help blong Sevya blong yumi, yumi save lavem ol impoten sipsip blong Hem mo givhan long olgeta olsem we Hem bae i mekem. Mekem se, long Gwatemala Siti, Lod, Jisas Kraes i karem i kambak long olgeta wan moa impoten sipsip i kam insaed long yad. Mo Hem i tijim mi wan lesen abaot fasin blong givhan we bae mi no fogetem. Long nem blong Gudfala Man blong Lukaot long Sipsip, Naesfala Man blong lukaot long sipsip, Nambawan Man blong lukaot long sipsip, we i Jisas Kraes, amen.