Stap Gohed Nomo—wetem Fet

Elda George A. Smith, wan Aposol, i bin kasem kaonsel long Profet Josef Smit long wan taem blong bigfala hadtaem: “Hem i talem long mi se bae mi neva mekem tingting blong mi i kam slak, nomata wanem kaen hadtaem mi stap fesem. Sapos oli slakem mi long bigfala hol blong Nova Skotia mo evri Ston blong Hil oli hip antap long mi, bambae mi no mas mekem tingting blong mi i kam slak, be mi mas hang i stap, mi yusum fet blong mi, mo gat strong paoa long tingting mo afta mi save kamaot i go antap long wanem we oli hipimap ia, long en blong dei.”¹

?Hao nao Profet Josef i save talem olsem—long wan we i stap safa? From hem i bin save se hemia i tru. Hem i bin laef folem. Josef i bin fesem ol hadtaem we oli nogud tumas mo oli stap ripripit long laef blong hem. Be nomata long hemia, taem hem i praktisim fet long Jisas Kraes mo Atonmen blong Hem mo stap gohed nomo, hem i winim ol samting we man i luk se oli bigwan tumas mo we oli stap blokem hem.²

Tedei mi wantem mekem krae blong Josef i kam niu bakegen, blong no letem tingting we i slak i fulmap yumi taem yumi fesem harem nogud, ol eksperiens we i soa, taem yumi filim yumi no inaf, o ol narafala jalenj.

Taem mi talem slak long tingting, mi no stap tokbaot moa ol jalenj blong harem nogud we i nidim klinik, ol bigfala wari, o ol narafala sik we oli nidim spesel tritmen.³ Mi stap tokbaot nomo ol nomol tingting we oli kam slak evriwan tru long ol gud mo nogud eksperiens blong laef.

Mi bin kasem insperesen tru ol hiro blong mi we oli bin stap gohed nomo—wetem fet—nomata wanem oli fesem.⁴ Insaed long Buk blong Momon, yumi stap rid abaot Soram, wokman blong Leban. Taem we Nifae i kasem ol buk we oli wokem long bras, Soram i mas jusum blong folem Nifae mo ol brata blong hem i go long waelples o i save lusum laef blong hem.

!Joes ia i no isis! Strong tingting we i kam long Soram faswan, i blong ron be Nifae i holem hem mo i mekem wan promes se sapos hem i go wetem olgeta, bae hem i kam fri mo bae i gat ples wetem famli blong hem. Soram i gat strong paoa long tingting mo go wetem olgeta.⁵

Soram i safa long plante hadtaem long niufala laef blong hem be, yet, hem i go fored wetem fet. Yumi no luk se Soram i gat tingting blong gobak long fasfala laef blong hem o blong holemtaet ol harem nogud blong hem agensem God o ol narawan.⁶ Hem i kam tru fren blong Nifae, wan profet, mo hem mo ol laen blong hem oli bin gat fridom mo bigfala sakses long promes graon. Wanem we i bin wan bigfala samting we i blokem rod blong Soram, long en, i karem ol blesing i kam, from we hem i stap fetful mo gat tingting blong wantem blong stap gohed nomo—wetem fet.⁷

I no longtaem i pas, mi lisin long wan sista we i gat strong paoa long tingting, we i serem olsem wanem hem i save winim ol hadtaem.⁸ Hem i bin gat sam jalenj, mo wan Sandei taem hem i stap sidaon insaed long Rilif Sosaeti, mo stap lisin long wan tija, we hem i ting se, tija ia i bin gat wan gudfala laef—we i defren fulwan long laef blong hemwan. Hem i taet mo tingting i kam slak. Hem i filim se hem i no kasem mak blong olgeta—o iven, no kam pat—mekem se hem i girap mo aot, mo mekem plan blong neva kambak long jos bakegen. Taem hem i stap go long trak, wan kwik filing i kasem hem: “Go insaed long japel mo lisin long spika blong sakramen miting.” Hem i gat kwestin long toktok blong spirit ia, be hem i filim bakegen i kam strong moa, mekem se hem i go long miting.

Mesej ia i stret samting we hem i nidim. Hem i filim Spirit. Hem i save se Lod i wantem blong hem i stap wetem Hem, blong stap olsem disaepol blong Hem, mo blong go long jos, so, hem i mekem.

?Yu save wanem hem i glad from? Se, hem i no givap. Hem i stap gohed nomo—wetem fet long Jisas Kraes, nomata i had long hem, mo hem mo famli blong hem oli kasem bigfala blesing taem oli stap strong mo go fored.

God blong heven mo wol bae i helpem yumi blong winim ol tingting we oli kam slak mo fesem wanem samting we i stap blokem yumi sapos yumi lukluk i go long Hem, folem kwaet voes blong Tabu Spirit,⁹ mo stap gohed nomo—wetem fet.

Tangkyu tumas, se taem yumi kam slak o no save mekem, Lod i save mekem fet blong yumi i kam strong. Hem i save mekem paoa blong yumi blong mekem samting i kam moa bigwan bitim we yumi save mekem. Mi bin kasem eksperiens long hemia. Moa long 20 yia i pas, mi no ting se bae oli singaotem mi olsem wan Eria Seventi, mo mi filim se mi no inaf. Folem ol trening asaenmen, oli bin askem mi blong prisaed long fas stek konfrens blong mi.¹⁰ Mi mo Stek presiden i mekem gud plan wetem evri ditel. I no longtaem bifo konfrens, Presiden Boyd K. Packer, afta we hem i kam–Akting Presiden blong Kworom blong Olgeta Twelef Aposol, i ringim mi blong luk sapos hem i save stap wetem mi long taem ia. Mi sapraes mo yes, mi agri. Mi askem olsem wanem hem i wantem mekem, from hem bae i prisaed. Hem i givim tingting se, bae mifala i kanselem ol plan mo rere blong folem Spirit nomo. Tangkyu tumas, mi gat 10 dei yet blong stadi, prea mo rere.

Wetem wan open ajenda, mifala i stap long fored 20 minit bifo lidasip miting i stat. Mi lei i go long stek presiden mo toktok long kwaet voes, “Hemia i wan naesfala stek.”

Presiden Packer i stikim mi slo long saed blong han blong hem mo talem, “No toktok.”

Mi stop blong toktok, mo toktok blong hem long jeneral konfrens “Fasin blong Stap Revren, I Stap Invaetem Revelesen”¹¹ i bin kam long maen blong mi. Mi luk se Presiden Packer i stap raetemdaon ol skripja refrens. Spirit i konfemem long mi se hem i stap kasem ol filing long miting ia. Eksperiens blong mi blong stap lanem samting, i jes stat.

Presiden Packer i bin toktok blong 15 minit mo tokbaot bigwan from wanem i impoten blong kondaktem miting folem daereksen blong Spirit.¹² Afta, hem i se, “Naoia bae yumi harem Elda Cook i toktok.”

Taem mi stap go long pulpit, mi askem hamas taem mi gat blong toktok mo sapos hem i gat wan topik we i wantem mi blong tokbaot. Hem i se, “Yu gat 15 minit mo gohed olsem we yu filim insperesen.” Mi yusum 14 minit mo serem evri samting mi bin tingbaot long maen blong mi.

Presiden i stanap bakegen mo toktok blong narafala 15 minit. Hem i serem skripja ia:

“Talemaot ol tingting we bae mi putum long hat blong yutufala, mo bae yutufala i no lusum fes long fored blong ol man;

“From we bae mi givim yu … long stret taem, wanem we bae yu talem.”¹³

Afta, hem i se, “Naoia bae yumi harem Elda Cook i toktok.”

Mi sek wantaem. Mi neva tingting se bae i posibol se bae oli askem mi blong toktok nambatu taem long wan semmak miting. Mi nogat eni samting long maen blong talem. Wetem wan tru prea long hat mo stap dipen long Lod blong kasem help, long wan wei, mi kasem blesing tru wan tingting, wan skripja, mo mi bin save toktok bakegen blong 15 minit. Mi sidaon, mi taet fulwan.

Presiden Packer i toktok bakegen blong 15 minit abaot stap folem Spirit mo serem ol tijing blong Pol we i se, yumi no talem “ol toktok we waes blong man i tijim, be hemia we Tabu Spirit i tijim.”¹⁴ Olsem we yufala i save finis, mi bin sek taem hem i kasem filing ia blong talem nambatri taem se, “Naoia bae yumi harem Elda Cook i toktok.”

Mi mi emti. Mi nogat samting blong talem. Mi save se i taem blong yusum moa fet. Sloslo, mi wokbaot i go long pulpit, mo stap prea from help blong God. Taem mi stap go from maek, i wan merikel we Lod i blesem mi blong mi save givim wan mesej blong narafala 15 minit.¹⁵

Long en, miting i stop, be kwiktaem mi luksave se adalt sesen bae i stat long wan aoa taem. !O no! Olsem Soram, mi wantem blong ron, be semmak olsem we Nifae i holemtaet hem, mi save se Presiden Packer bae i holem mi. Adalt miting i folem semmak fasin. Mi toktok blong tri moa taem. Long nekis dei, long taem blong jeneral sesen, mi toktok wantaem nomo.

Afta long konfrens, Presiden Packer i talem wetem lav se, “bae yumi mekem olsem bakegen samtaem.” Mi lavem Presiden Boyd K. Packer mo glad long evri samting we mi bin lanem.

?Yu save wanem mi glad from? Se, mi no givap—o stop blong mekem. Sapos mi bin folem wanem we hat blong mi i talem, i we blong ronwe long ol miting ia, bae mi bin mestem wan janis blong kam antap long fet blong mi mo kasem wan rij lav we i stap kapsaet mo sapot we i kam long Papa blong mi long Heven. Mi lanem abaot sore blong Hem, merikel blesing we i save kam nomo tru long paoa blong Jisas Kraes mo Atonmen blong Hem, mo bigfala paoa we i kam tru long Tabu Spirit. Nomata long ol samting we mi no strong long hem,¹⁶ mi lanem se mi save givim seves; mi save kontribiut taem Lod i stap long saed blong mi, sapos mi stap gohed nomo—wetem fet.

Nomata long saes, eria, o hamas ol jalenj we yumi stap fesem long laef oli series, yumi evriwan i gat taem we yumi filim se bae yumi stop, lego, ronwe o iven save givap. Be taem yumi stap yusum fet long Sevya, Jisas Kraes, i helpem yumi blong winim ol tingting we oli kam slak, nomata wanem samting yumi stap fesem we i stap blokem yumi.

Olsem we Sevya i finisim wok we oli givim long Hem blong mekem, Hem i gat paoa blong helpem yumi finisim wok we oli givim long yumi.¹⁷ Yumi save kasem blesing blong muv i go fored folem rod blong kavenan, nomata hamas rod ia bae i kam rafraf, long en, bae yumi kasem laef we i no save finis.¹⁸

Olsem we Profet Josef Smit i talem, “Stanap strong, yufala Ol Sent blong God, hang strong smoltaem moa, mo ol strong win blong laef bae oli pas i go, mo God bae i givim riwod long yufala, from yufala i ol wokman blong Hem.”¹⁹ Long nem blong Jisas Kraes, amen.