Li junelikil yaal

Chirix naq li wixaqil, xAnne, ut laa’in xqak’ul qab’oqb’al chi k’anjelak jo’ aj jolominel re mision, kiqaj jo’ junkab’al xtzolb’al lix k’ab’a’ li junjunq chi misioneer rub’elaj naq toowulaq aran. Xqach’utub’eb’ lix jalam-uuch, xqatz’iib’a xk’ab’a’eb’, ut koo’ok chixtz’ilb’aleb’ rix li xnaq’ uhej ut li k’ab’a’ej.

Naq koowulak aran, koowan sa’ jun ch’utub’aj-ib’ re xnawb’aleb’ ru li misioneer. Naq yooko chixnawb’aleb’ ru, kiwab’i xyaab’ xkux li qalal aj b’eleeb’ chihab’:

“Sa inch’ool xnawb’al aawu, Sam!”

“Rachel, b’ar wan laa tenamit?”

“David, mas nim aateram!”

Kisach inch’ool, kinhasb’a re li walal, “Chinaq sa’ qach’ool naq Elder malaj Hermana taqaye reheb’ li misioneer.”

Kinixka’ya ut kixye, “At inyuwa’, xink’oxla naq xawaj naq taqatzol xk’ab’a’eb’.” Li qalal kixb’aanu li xk’oxla naq us a’ yaal li xtawom ru.

Jo’kan ut, k’a’ru naqataw ru chirix li yaal sa’ li ruchich’och’ anajwan? Rajlal neke’qab’i li kawil aatin, li kawil esil, ut li na’leb’ moko ch’olch’o ta ru. Jo’kan ajwi’, yookeb’ chi tamk li yo’leb’aal naqataw wi’ li na’leb’. Jo’ maajun wa jwal chalen chalen, aajel ru xk’eeb’al reetal li yaal anajwan.

Aajel ru li yaal re naq tooruuq chixxaqab’ankil ut chixkawob’resinkil li qasumwanjik rik’in li Dios, chixtawb’al li tuqtuukilal ut li sahil ch’oolejil, ut chixtawb’al qajunelikil eechanihom. Anajwan, qatz’ilaq rixeb’ li patz’om a’in:

• K’a’ru li yaal, ut k’a’ut naq aajel ru?

• Chan ru naqataw li yaal?

• Naq naqataw, chan ru naru naqawotz?

Li Qaawa’ kixk’ut chiqu sa’ li loq’laj hu naq “li yaal aʼan xnawbʼal li kʼaʼaq re ru joʼ chan ru wan, joʼ kiwan, ut joʼ toj taawanq” (Tzol’leb’ ut Sumwank 93:24). “Inkʼaʼ kiyoʼobʼtesiman chi moko kiyiibʼaman” (Tzol’leb’ ut Sumwank 93:29) ut “maajun rosoʼjik wan” (Tzol’leb’ ut Sumwank 88:66).¹ Li yaal a’an tz’aqal re ru, xaqab’anb’il, ut ink’a’ naru xjalb’al. Sa’ jalan chik aatin, li yaal wan chi junelik.²

Li yaal nokoxtenq’a chi numtaak sa’ xb’een li b’alaq’,³ chixk’eeb’al reetal k’a’ru li us ut k’a’ru li ink’a’ us,⁴ chixk’ulb’al xkolb’al qix,⁵ jo’ ajwi’ xk’ojob’ankil qach’ool ut qak’irtesinkil.⁶ Li yaal naru tixb’eresi li qab’aanuhom⁷, toorach’ab’,⁸ tooxsantob’resi,⁹ ut tooxk’am sa’ li junelik yu’am.¹⁰

Li Dios naxk’utb’esi li junelikil yaal chiqu rik’ineb’ li k’utb’esink wan wi’ a’an, li Jesukristo, li Santil Musiq’ej, eb’ li profeet, ut laa’o. Tin’aatinaq chirix lix k’anjel li junjunq li neke’xk’am rib’ sa’ li na’leb’ a’in.

Xb’een wa, li Dios a’an lix yo’leb’aal li junelikil yaal.¹¹ A’an ut li Jesukristo, li Ralal,¹² neke’xtaw ru li yaal chi tz’aqal ut junelik neke’k’anjelak a’ yaaleb’ li na’leb’ ut li chaq’rab’ li yaaleb’.¹³ Li wankil a’in naxk’eheb’ xwankil chixyo’ob’tesinkileb’ ut xjolominkileb’ li ruchich’och’¹⁴ jo’ ajwi’ re qaraab’al, qab’eresinkil, ut qach’oolaninkil chiqajunilo chi tz’aqal re ru.¹⁵ Neke’raj naq laa’o taqataw ru ut taqayu’ami li yaal re naq laa’o tooruuq chixk’ulb’aleb’ li osob’tesihom ak wankeb’ re.¹⁶ Neke’ru chixk’utb’al li yaal xjuneseb’ rib’, a’ut chi kok’ xaj xsa’ neke’xk’ut rik’in xtz’uumaleb’ re laj taql jo’ li Santil Musiq’ej, eb’ li anjel, malaj eb’ li yo’yookil profeet.

Xkab’, li Santil Musiq’ej naxch’olob’ xyaalal chixjunil li yaal.¹⁷ A’an naxk’utb’esi li yaal chiqu ut naxch’olob’ ajwi’ xyaalal li yaal li k’utb’il xb’aaneb’ li qas qiitz’in. Chi kok’ aj xsa’, li na’leb’ k’eeb’ileb’ xb’aan li Musiq’ej neke’chal jo’ k’oxlahom sa’ qak’a’uxl ut jo’ eek’ahom sa’ qach’ool.¹⁸

Rox, eb’ li profeet neke’xk’ul li yaal rik’in li Dios ut neke’xwotz li yaal a’an qik’in.¹⁹ Naqatzol li yaal rik’ineb’ li najter profeet sa’eb’ li loq’laj hu²⁰ ut rik’ineb’ li yo’yookil profeet sa’ li jolomil ch’utub’aj-ib’ ut sa’ jalan chik hoonal nokohe’raatina wi’.

Ut sa’ roso’jik, laa’ex ut laa’in wan qak’anjel sa’ a’in. Li Dios naraj naq taqasik’, taqak’e reetal, ut taqak’anjela li yaal. Li qaseeb’al chixk’ulb’al ut chixyu’aminkil li yaal nachal a’ yaal lix kawilal li qasumwanjik rik’in li Yuwa’b’ej ut li K’ajolb’ej, li qajom chixpaab’ankil lix hasb’ li Santil Musiq’ej, ut li qajom chirab’inkileb’ li profeet sa’ roso’jikeb’ li kutan.

Tento taajultiko’q qe naq laj Satanas naxyal qaramb’al chirab’inkil li yaal. A’an naxnaw naq chi maak’a’ li yaal, ink’a’ naru naqak’ul li junelik yu’am. A’an naxjunaji li yaal rik’in xna’leb’il li ruchich’och’ re xsachb’al qana’leb’ ut re qajalb’ehinkil chiru li k’a’ru naxye li Dios.²¹

Naq naqasik’ li yaal,²² li wiib’ chi patz’om a’in naru nokohe’xtenq’a chixk’eeb’al reetal ma nachal jun na’leb’ rik’in li Dios malaj rik’in k’a’ruhaq malaj anihaq chik:

• Ma k’utb’il li na’leb’ naab’al sut sa’eb’ li loq’laj hu ut xb’aaneb’ li yo’yookil profeet?

• Ma xaqab’anb’il xyaalal li na’leb’ xb’aan li Santil Musiq’ej?

Li Dios naxk’utb’esi li yaal chiruheb’ li profeet, ut li Santil Musiq’ej naxk’ut xyaalaleb’ li yaal a’an chiqu ut nokoxtenq’a chixk’anjelankileb’.²³ Tento naq yooko chi sik’ok ut kawresinb’ilaqo re xk’ulb’al li musiq’ejil na’leb’ a’in naq taachalq.²⁴ Naru naqak’ul chi us lix ch’olob’ahom li Musiq’ej naq naqatuulanob’resi qib’,²⁵ naq nokotijok chi anchal qach’ool ut naqatzol li raatin li Dios,²⁶ ut naq neke’qapaab’ lix taqlahom.²⁷

Chirix naq xaqab’anb’il xyaalal jun na’leb’ xb’aan li Santil Musiq’ej chiqu, taachamo’q li qanawom naq taqayu’ami li na’leb’ a’an. Rik’in xnumik li hoonal, naq naqayu’ami rajlal li na’leb’ a’an, naqak’ul jun tz’aqal nawom chirix li yaal a’an.²⁸

Qayehaq, laa’in inb’aanuhom li ink’a’ us ut week’ahom lin xutaan xb’aan. A’b’an rik’in li tijok, li tzolok, ut lin paab’aal chirix li Jesukristo, ink’ulum xnawom inch’ool chirix li na’leb’ re li jalb’a-k’a’uxlej.²⁹ Naq toj yookin chaq chixjalb’al ink’a’uxl, xniman lin nawom chirix li jalb’a-k’a’uxlej. Nach’ chik kiweek’a wib’ rik’in li Dios ut li Ralal. Anajwan ninnaw chik naq naru taakuye’q li maak xb’aan li Jesukristo, xb’aan naq nink’uleb’ li rosob’tesihom li jalb’a-k’a’uxlej wulaj wulaj.³⁰

K’a’ru taqab’aanu naq naqasik’ chi anchal qach’ool li yaal li maji’ k’utb’esinb’il? Nintoq’ob’a ruheb’ li neke’royb’eniheb’ li sumehom li maji’ neke’chal.

Re laj Jose Smith li Qaawa’ kixye, “Chʼanchʼo chatwanq, toj reetal naq tinkʼoxla naq us xkʼeebʼal chi nawmank chixjunil li kʼaʼaq re ru … chirix li naʼlebʼ aʼin” (Tzol’leb’ ut Sumwank 10:37).

Ut re li xEmma Smith kixye, “Matwechʼink xbʼaan li kʼaʼaq re ru inkʼaʼ xawil, xbʼaan naq tzʼapbʼil chawu ut chiru li ruchichʼochʼ, aʼan xchaabʼilal innaʼlebʼ saʼ jun kutan toj chalel” (Tzol’leb’ ut Sumwank 25:4).

Laa’in ajwi’ kinsik’eb’ xsumenkileb’ lin patz’om. Ak sumenb’ileb’ junjunq reheb’; wankeb’ chik li ink’a’ sumenb’ileb’.³¹ Naq ch’anch’o wanko—xkanab’ankil qib’ chiru xrahom ut xnawom li Dios, xpaab’ankileb’ lix taqlahom, ut xyu’aminkil li k’a’ru naqanaw—a’an nokoxtenq’a chixtawb’al tuqtuukilal toj reetal naq tixk’e chi nawmank xyaalalil chixjunil li k’a’aq re ru.³²

Naq yooko chixsik’b’al li yaal, us xnawb’al k’a’ru xjalanil li tzol’leb’ rik’in li chaq’rab’. Li tzol’leb’ a’aneb’ li junelikil yaal, jo’ xwanjik li Roxichal li Dios, li k’uub’anb’il na’leb’ re li kolb’a-ib’, ut lix tojb’al rix li maak xb’aan li Jesukristo. Li chaq’rab’ink a’an lix k’anjelankil li tzol’leb’ a’ yaal li kutan wanko wi’. Li chaq’rab’ink nokoxtenq’a chixb’eresinkil li Iglees chi tustu ru.

Maajo’q’e najalman li tzol’leb’, a’b’an naru najalman li chaq’rab’ink. Li Qaawa’ naroksiheb’ lix profeet re xxaqab’ankileb’ xwankil li tzol’leb’ ut re xjalb’aleb’ lix chaq’rab’il li Iglees a’ yaal li rajom ruheb’ li ralal xk’ajol.

A’b’an, wan naq ink’a’ naqataw ru xjalanil li chaq’rab’ rik’in li tzol’leb’. Wi ink’a’ naqataw ru xjalanil, naru nalaj li qapaab’aal naq najalman li chaq’rab’ink, ut maare too’ok chixwech’b’al rix lix nawom li Dios malaj lix k’anjeleb’ li profeet re k’utb’esink.³³

Naq naqak’ul li yaal rik’in li Dios, a’an naxwaklesi qach’ool chixwotzb’al li nawom a’an rik’ineb’ li qas qiitz’in.³⁴ Naru naqab’aanu a’in naq nokok’utuk, naq naqab’eresi jun ch’ina al, malaj naq noko’aatinak chirix li evangelio rik’in jun li qamiiw.

Naqaj xk’utb’al li yaal chi jo’kan naq b’oqb’ilaq lix wankil li Santil Musiq’ej re jalok ch’oolej.³⁵ Nawaj xwotzb’al wiib’ oxib’ li b’oqok moko ch’a’ajeb’ ta naxk’e li Qaawa’ ut eb’ lix profeet li naru nokohe’xtenq’a.²⁶

1. Chajayali li na’leb’ rik’in li qaChoxahil Yuwa’, li Jesukristo, ut eb’ lix tz’aqal tzol’leb’.³⁷

2. Chawoksiheb’ li loq’laj hu ut eb’ lix k’utumeb’ li profeet re roso’jikeb’ li kutan.³⁸

3. Chawoksi li tzol’leb’ li xxaqab’anb’il xwankil xb’aan xtz’uumal reheb’ li tz’aqal aj yehol nawom.³⁹

4. Maawoksi li na’leb’ank, xna’leb’eb’ li junjunq, malaj xna’leb’ li ruchich’och’.⁴⁰

5. Chak’ut jun tzol’leb’ rochb’een jalaneb’ chik li na’leb’ re li evangelio.⁴¹

6. Chawoksi sa’ li k’utuk li k’a’ru tixb’oq li Musiq’ej.⁴²

7. Chat-aatinaq rik’in saqen ruhil aatin re naq maajun taasachq xna’leb’.⁴³

Chan ru naqak’ut li yaal a’an jwal nim xwankil. Laj Pablo kixwaklesi qach’ool chixyaab’asinkil “li yaal rik’in li rahok” (chi’ilmanq Efesios 4:14–15). Li yaal wan xwankil chirosob’tesinkil jun kristiaan naq wotzb’il rik’in li rahok narahok wi’ li Kristo.⁴⁴

Li yaal k’utb’il chi maak’a’ li rahok naru tixk’e li kristiaan chireek’ankil naq raqb’il aatin chirix, naq natawa xch’ool, ut naq wan sa’ junaatalil. Kok’ aj xsa’ nak’amok sa’ li josq’o’k ut li jachok-ib’—jo’ ajwi’ li wech’ok-ib’. Chi junpak’al chik, li rahok chi maak’a’ li yaal maak’a’ na’ok wi’ ut ink’a’ naxyeechi’i li k’iik.

Xkab’ichal li yaal ut li rahok aajeleb’ ru choq’ re li qak’iijik sa’ musiq’ej.⁴⁵ Sa’ li yaal wankeb’ li tzol’leb’, li jolomil na’leb’, ut li chaq’rab’ li te’ajmanq ru re xk’ulb’al li junelik yu’am, ut li rahok naxk’e li ajom taa’ajmanq ru re xk’ulb’al ut xyu’aminkil li k’a’ru yaal.

Junelik tinb’antioxinq xb’aaneb’ li ani ke’xk’ut li junelikil yaal chiwu rik’in kuyum ut rahok.

Re xraqb’al li waatin, nawaj xwotzb’al k’a’ruheb’ li junelikil yaal li neke’xaqab’ank re li waam. Kink’ul innawom chirixeb’ li na’leb’ a’in rik’in xk’anjelankileb’ li na’leb’ xinwotz anajwan.

Ninnaw naq li Dios a’an li qaChoxahil Yuwa’.⁴⁶ Naxnaw chixjunil,⁴⁷ numtajenaq xwankil,⁴⁸ ut narahok chi tz’aqal re ru.⁴⁹ A’an kixk’uub’ jun na’leb’ choq’ qe re naq tooruuq chixk’ulb’al li junelik yu’am ut chi wulak jo’ chanru a’an.⁵⁰

Jo’ xcha’al li k’uub’anb’il na’leb’ a’an, kixtaqla chaq li Jesukristo, li Ralal, re qatenq’ankil.⁵¹ Li Jesus kixk’ut chiqu naq taqab’aanu li rajom li Yuwa’b’ej⁵² ut naq taqara qib’ chiqib’il qib’.⁵³ A’an kixtoj rix li qamaak⁵⁴ ut kixq’axtesi lix yu’am chiru li krus.⁵⁵ A’an kiwakli sa’ xyanqeb’ li kamenaq sa’ rox li kutan.⁵⁶ Sa’ xk’ab’a’ li Kristo ut li rusilal chiqajunilo toowakliiq chi yo’yo⁵⁷ naru te’kuye’q li qamaak,⁵⁸ ut naru taqtaw qakawilal sa’ xyi’ li ch’a’ajkilal.⁵⁹

Naq kiwan sa’ ruchich’och’, a’an kixxaqab’ lix Iglees.⁶⁰ Chiru xnumik li hoonal, kijalman li Iglees, ut ke’sach li yaalil na’leb’.⁶¹ Li Jesukristo kixk’ojob’ wi’chik lix Iglees ut eb’ li na’leb’ re li evangelio rik’in li profeet aj Jose Smith.⁶² Ut sa’ li kutan a’in, li Kristo toj naxb’eresi lix Iglees rik’ineb’ li yo’yookil profeet ut apostol.⁶³

Ninnaw naq wi toochalq rik’in li Kristo, sa’ junaq kutan tooruuq chi “tz’aqloq qe qu rik’in a’an” (Moroni 10:32), taqak’ul “xtz’aqalil li sahil ch’oolejil” (Tzol’leb’ ut Sumwank 93:33), ut taqak’ul “chixjunil li k’a’ru re li Yuwa’b’ej” (Tzol’leb’ ut Sumwank 84:38). Chirixeb’ li junelikil yaal a’in ninch’olob’ xyaalal sa’ lix santil k’ab’a’ li Jesukristo, amen.