O Uunaiga o se Afi Lilo

Uso e ma tuafafine, ua ou aoaoina se lesona tiga talu mai le taimi mulimuli na ou tula’i ai i lenei pulelaa ia Oketopa o le 2022. O lena lesona o le: afai e te le tuuina atu se lauga e taliaina, e mafai ona faasa oe mo le isi konafesi e sosoo ai. O loo mafai ona outou tagai mai ua tofia a’u i le amataga o le sauniga muamua o lenei [aso]. O le mea e le mafai ona outou vaai mai i ai o loo ua faatulaga a’u i luga o se fola e i ai se faitotoa e na o le leua lava o le ki, matala ou pa’ū ai i totonu. Afai e le lelei lenei lauga, o le a ou le toe vaai ia te outou mo ni nai konafesi.

I le agaga o lena viiga matagofie faatasi ai ma lenei aufaipese matagofie, ua ou aoaoina nisi o lesona talu ai nei e faapea, faatasi ai ma le fesoasoani a le Alii, ou te fia faasoa atu ai ia te outou i le asō. O lena mea o le a avea ai lenei lauga ma se lauga patino tele.

O le aafiaga aupito patino ma tiga o nei aafiaga uma talu ai nei o le maliu lea o lo’u toalua pele, o Pat. O ia o le tamaitai silisili ua ou iloaina—o se avā ma se tina atoatoa, ae leai se tala e faia i lona mamā, meaalofa o lona lagona faaalia, lona tulaga faaleagaga. Sa ia tuuina atu se lauga i se tasi taimi e faaautuina “Faataunuuina o le Faamoemoe Na Foafoa ai Oe.” E foliga mai ia te a’u sa sili atu ona manuia lona faataunuuina o le faamoemoe o le foafoaina o ia nai lo se mea na mafai ona moemiti i ai se tasi. O ia o se afafine atoatoa o le Atua, o se tamaitai o faataitaiga FaaKeriso. Sa sili ona faamanuiaina a’u i alii i le faaaluina o le 60 tausaga o lo’u olaga faatasi ma ia. Afai e faamaonia lo’u agavaa, o lona uiga o le ma faamauga o le a mafai ai ona ou faaaluina le faavavau faatasi ma ia.

O se isi aafiaga na amata i le 48 itula talu ona mavae le falelauasiga o lo’u toalua. I lena taimi, sa faanatinati atu a’u i le falemai ona o se ma’i tigaina. Ona ou faaaluina lea o vaiaso muamua e fa o le ono vaiaso e nofo ai i totonu ma toe aluese mai i le vaega e taofia ai ma’i tigaina faapea ai ma lo’u le iloaina o se mea i lea taimi ma lea taimi.

O le mea moni, o o’u aafiaga uma i le falemai i lena vaitaimi muamua e le o mafai ona manatuaina. Ae o le mea e le o aveesea mai o’u manatuaga, o se malaga i fafo atu o le falemai, i le mea sa foliga mai o le faatausi’usi’uga o le faavavau. E le mafai ona ou tautala atoatoa e uiga i lena aafiaga iinei, ae e mafai ona ou fai atu se vaega o le mea na ou mauaina o se apoapoaiga e toe foi atu i la’u auaunaga i se faanatinati sili atu, faapaiaina sili atu, taulaiga sili atu i le Faaola, faatuatua sili atu i Lana afioga.

Sa le mafai ona ou taofia lo’u lagona sa ou mauaina la’u lava ituaiga faaaliga patino e tai pei o le faaaliga na tuuina mai i le Toasefululua i le toeitiiti 200 tausaga talu ai:

“Ia e molimau atu lo’u igoa, … ma ia e auina atu la’u upu i tuluiga o le lalolagi. …

“… I lea taeao i lea taeao; ma ia tuu atu lou leo lapatai e alu atu i lea aso ma lea aso; ma a oo mai le po, aua neʼi tuua o e nonofo i le lalolagi ia momoe, ona o lou tautala atu. …

“Tutulai ia[,] … ave i luga a outou satauro, [ma] mulimuli mai ia te a’u.”¹

O’u uso e ma tuafafine pele, talu mai lena aafiaga, sa ou taumafai ai e tauave lo’u satauro ma le faamaoni atili, ma le naunautai sili atu e saili po o fea e mafai ona ou sii a’e ai se leo faaaposetolo o le mafanafana ma le lapataiga i le taeao, i le ao, ma i le po.

Mai lena manatu e taitai atu ai a’u i se mea moni lona tolu lea na oo mai i na masina o le maliu, ma’i, ma le faanoanoa. O se molimau faafouina lena ma le lotofaafetai e le gata mo tatalo maumaututu—a o outou tatalo—ia sa ou manuia ai. O le a ou faafetai pea e faavavau mo talosaga a le faitau afe o tagata, o ē, faapei o le aioiga a le fafine ua oti lana tane,² sa saili atu pea i le faasalaveiga a le lagi mo a’u. Sa ou mauaina faamanuiaga o le perisitua, ma sa ou vaai i la’u vasega o le aoga maualuga o anapopogi mo a’u, e pei ona faia e nisi o uarota i le Ekalesia atoa. Ma o lo’u igoa sa manino lava i le lisi o tatalo o malumalu uma i le Ekalesia.

I lo’u lotofaafetai tele mo nei mea uma, ou te auai faatasi ai ma G. K. Chesterton, o le na fai mai i se tasi taimi “o le faafetai o le ituaiga manatu aupito maualuga lea; ma … o le lotofaafetai o le fiafia lea e faateleina i le maofa.”³ Faatasi ai ma lo’u lava “fiafia e vaavaalua ma le maofa,” ou te faafetai atu ai ia te outou uma ma faafetai atu i lo’u Tama o i le Lagi, o le sa faafofogaina a outou tatalo ma faamanuia mai i lo’u ola.

Uso e ma tuafafine, ou te molimau atu e faafofogaina e le Atua tatalo uma tatou te tuuina atu ma tali taitasi mai ai e tusa ma le ala ua Ia otooto mai mo lo tatou atoatoa. Ou te iloa e tusa o le taimi lava lea e tasi na tatalo ai le toatele mo le toefuataiga o lo’u ola maloloina, o se aofaiga tutusa—e aofia ai ma a’u—sa tatalo foi mo le toefuataiga o le ola maloloina o si o’u toalua. Ou te molimau atu o na tatalo uma e lua sa faafofogaina ma taliina e se Tama Faalelagi na agaalofa mai le lagi, e tusa lava pe sa le’i taliina ia tatalo mo Pat i le ala na ou aioi atu ai. E mo mafuaaga ua na o le Atua Na te silafiaina pe aisea e ese ai le taliina o tatalo nai lo tatou faamoemoe—ae ou te folafola atu ia te outou ua faafofogaina, ma ua taliina e tusa ai ma Lona alofa e le mavae ma le taimi ua Ia faatulagaina.

Afai “e le sese ona [tatou] ole atu,”⁴ e leai ni tapulaa i le taimi, o fea, po o a mea e tatau ona tatou tatalo ai. E tusa ai ma faaaliga, e tatau ona tatou “tatalo e le aunoa.”⁵ E ao ona tatou tatalo, na fai mai ai Amoleka, mo “i latou o e ua siomia outou,”⁶ ma le talitonuga o le “tatalo faatauanau a se [nuu] amiotonu ua tele ina aoga.”⁷ E tatau ona faaleo a tatou tatalo pe a tatou i ai i se nofoaga e tuuatoatasi ai ma o loo mafai ona faia ai.⁸ Afai e le o mafai ona faia faapena, e tatau ona tauaveina o ni upu le leoa i o tatou loto.⁹ Tatou te pepese o a tatou tatalo o “uunaiga o se afi lilo,”¹⁰ e tuuina atu e le aunoa, e tusa ai ma le Faaola Lava Ia, i le Atua le Tama Faavavau i le suafa o Lona Alo Pele e Toatasi na Fanaua.¹¹

A’u uo pele, o a tatou tatalo o a tatou itula sili ia ona suamalie,¹² o o tatou “moomooga moni” sili¹³ o la tatou tapuaiga sili ona faigofie ma mamā.¹⁴ E tatau ona tatou tatalo taitoatasi, i o tatou aiga, ma i faapotopotoga tusa pe o le a le tele.¹⁵ E ao ona tatou faaaogaina le tatalo e fai ma talipupuni e tetee atu ai i faaosoosoga,¹⁶ ma afai e i ai se taimi tatou te lagona ai le lē fia tatalo, e mafai ona tatou mautinoa o le faatuutuu e lē sau mai le Atua, o lē e naunau e fesootai ma Ana fanau i soo se taimi ma taimi uma. O le mea moni, o nisi o taumafaiga e taofia i tatou mai le tatalo e sau sa’o lava mai le fili.¹⁷ Pe a tatou lē iloa pe faapefea, ae po o le a tonu foi le mea e tatalo ai, e tatau ona tatou amata, ma faaauau pea, seia oo ina taitaiina i tatou e le Agaga Paia i le tatalo e tatau ona tatou ofoina atu.¹⁸ O lenei auala atonu o le ala lea e tatau ona tatou talosagaina pe a tatalo mo o tatou fili ma i latou e faaaoga ma le faalealofa i tatou.¹⁹

I le iuga, e mafai ona tatou vaai atu i le faataitaiga a le Faaola, o lē sa tatalo soo, i le tele o taimi. Ae o taimi uma lava e faagaeetia ai a’u i le lagonaina e Iesu o le manaomia ona tatalo. Sa le’i atoatoa ea o Ia? Ae o le a se mea e manaomia ona Ia tatalo ai? Ia, ua ou iloaina o Ia foi, faatasi ma i tatou, sa finagalo e “saili fofoga [o le Tama], ma faalagolago ia te ia.”²⁰ Mai lea taimi i lea taimi, sa Ia tuumuli ese ai mai tagata ia tuua ai na o ia a o le’i tuia le lagi i Ana tatalo.²¹ I isi taimi, sa Ia tatalo faatasi ai ma ni nai soa. Ona Ia saili atu lea i le lagi e fai ma sui o le motu o tagata o le a lilofia ai se itumauga. O nisi taimi o le tatalo e faamamaluina ai Ona laei.²² O nisi taimi e faamamaluina ai Ona fofoga.²³ O nisi taimi sa tu ai o Ia e tatalo, o nisi taimi sa Ia tootuli, ma e masalo e faa-tasi ona Ia pa’ū fao i le tatalo.²⁴

Ua faamatala e Luka le tigaina o Iesu i Ona puapuaga [i Ketesemane] na manaomia ai ona Ia tatalo ma le faatauanau “atili.”²⁵ E faapefea e se tasi sa atoatoa ona tatalo ma le faatauanau atili? Tatou te manatu o Ana tatalo uma sa sili ona faatauanau, ae i le faataunuuina o Lana taulaga togiola ma e ala i le tiga ua i ai mo tagata uma, sa Ia lagona ai le tatau ona tatalo ma aioi atili, faatasi ai ma le mamafa o Lana taulaga na i’u ai ina puna mai le toto mai pu afu uma.

I lena vaaiga o le manumalo o Keriso i le oti atoa ai ma Lana meaalofa talu ai nei ia te a’u o le toe faaopoopo ai o ni nai vaiaso, po o ni masina i le olaga faitino, ou te molimau atu ai ma le faamaoni i le moni o le ola e faavavau ma le manaomia ona tatou manatu mamafa i a tatou fuafuaga mo lena mea.

Ou te molimau atu pe a afio mai Keriso, e manaomia ona Ia silafia i tatou—e le o ni tagata ua i ai igoa i luga o se faamaumauga o le papatisoga ua tau le iloa ae o ni soo tuuto atoatoa, talitonu faamaoni, ma tausi feagaiga. O se mataupu faanatinati lenei mo i tatou uma, ina ne’i tatou faalogoina ma le faanoanoa tele: Ou te le’i iloa lava outou,”²⁶ pe, e pei ona faaliliuina e Iosefa Samita lena fasifuaitau, “[E te] le’i iloaina lava a’u.”²⁷

O le mea e lelei ai, o loo i ai se fesoasoani mo lenei galuega—le mau fesoasoani. E manaomia ona tatou talitonu i agelu ma vavega ma folafolaga o le perisitua paia. E manaomia ona tatou talitonu i le meaalofa o le Agaga Paia, le faatosinaga a aiga ma uo lelei, ma le mana o le alofa mama o Keriso. E manaomia ona tatou talitonu i faaaliga ma perofeta, tagatavaai, ma talifaaaliga ma Peresitene Russell M. Nelson. E manaomia ona tatou talitonu faapea o le tatalo ma aioiga ma le amiotonu faaletagata lava ia, e mafai moni lava ona tatou a’e i le “Mauga o Siona, … o le aai o le Atua soifua, o le nofoaga faalelagi, e sili ona paia i aai uma.”²⁸

Uso e ma tuafafine, pe a tatou salamo mai i a tatou agasala ma o mai ma le totoa i le “nofoalii o le alofa tunoa,”²⁹ ma tuua ai i Ona luma a tatou meaalofa ma talosaga ma le loto, o le a tatou maua le alofa mutimutivale ma le faamagaloga i aao agalelei o lo tatou Tama Faavavau ma Lona Alo usiusitai ma mamā atoatoa. Ona, faatasi ai lea ma Iopu ma le au faamaoni uma ua faamamaina, o le a tatou vaai i se lalolagi “ua sili ona faigata”³⁰ ona malamalama i ai. I le suafa o Iesu Keriso, amene.