Amiosa’o: O Se Uiga FaaKeriso

O Iesu Keriso o lo tatou Faataitai. O le ola ai i se olaga o le amiosa’o e manaomia ai ona tatou faamaoni i le Atua, i le tasi ma le isi, ma i lo tatou faasinomaga paia. E tafe mai le amiosa’o mai le poloaiga muamua ma le sili ia alofa i le Atua. Ona e te alofa i le Atua, ua e faamaoni ia te Ia i taimi uma. Ua e malamalama e i ai le sa’o ma le sese ma o loo i ai le upumoni a’ia’i—o le upumoni a le Atua. O le amiosa’o o lona uiga e te le tuuina i lalo ou tulaga faatonuina po o amioga ina ia faafiafia pe ina ia taliaina ai e isi.⁵ E te “fai mea tonu” ma “e mulimuli mai le taunuuga.”⁶ O le toeiloiloga talu ai nei o le Tala’i La’u Talalelei le tusitaulima a faifeautalai, na iloga le faaopoopo i ai o le amiosa’o o se tasi o uiga FaaKeriso.⁷

I ni nai tausaga ua mavae, sa tofi mai ai Elder Uchtdorf e toefaatulaga lo matou siteki. I le taimi o la ma’ua faatalanoaga, na ia fai mai ai se fesili e le’i galo lava ia te au: “Pe na i ai se mea i lou olaga, pe ana silafia e tagata lautele, mata o le a avea o se mea e faamaasiasia ai oe po o le Ekalesia?” Na ou te’i, ma sa faatele’a’i la’u iloiloga faalemafaufau o lo’u olaga atoa, ma taumafai e tomanatu i na taimi atonu na ou sasi ai ma fesili ifo ia te au lava, “Pe ana iloa e isi tagata mea uma sa ou faia, mata o le a so latou manatu ia te au po o le Ekalesia?”

I lea taimi, sa ou mafaufau sa na ona fesili mai Elder Uchtdorf e uiga i le agavaa, ae sa oo ina ou malamalama o se fesili moni e uiga i le amiosa’o. Pe na ou faamaoni i mea sa ou folafolaina atu? Mata e vaaia e le lalolagi le ogatusa o a’u upu ma a’u galuega? Mata e vaaia e isi le Atua e ala i la’u amio?

Na aoao mai Peresitene Spencer W. Kimball, o le “Amiosa’o” o lo tatou “naunautaiga ma le mafai ona ola i o tatou talitonuga ma tautinoga.”⁸

O le mea muamua ma aupito taua e manaomia e se olaga amiosa’o o le tatou faamaoni i le Atua.

Mai le popofou o lo tatou olaga, sa tatou aoao ai i le tala e uiga ia Tanielu i le lua o leona. Sa faamaoni i taimi uma Tanielu i le Atua. O ana tupulaga lotoleaga “na saili ia maua se mea e faasagatau ai ia te [ia]”⁹ ma fafau ai se poloaiga e faatonuina ai ia na o o latou atua e tatalo i ai. Sa iloa e Tanielu le poloaiga ae sa alu o ia i le fale ma—a o “talai ona faamalama”¹⁰—sa tootuli o ia ma tatalo faatolu i le aso i le Atua o Isaraelu. O le taunuuga, sa lafo Tanielu i le lua o leona. I le taeao, sa maua e le tupu na lavea’iina e le Atua o Tanielu o ia ma sa ia toe tuuina atu ai se poloaiga fou e faapea, e ao i tagata uma ona “gatete ma matata’u i luma o le Atua o Tanielu: aua o ia o le Atua soifua.”¹¹

Sa oo ina iloa e le tupu le Atua e ala i le amiosa’o o Tanielu. E vaai isi i le Atua e ala i a tatou—upu ma galuega. E faapei foi o Tanielu, o le faamaoni i le Atua o le a faateleina ai ona tulaga ese i tatou mai le lalolagi.

Ua faamanatu mai e le Faaola ia i tatou, “E maua foi outou e le puapuaga i le lalolagi: a ia outou loto tetele; ua ou manumalo i le lalolagi.”¹² Sa fautua mai Peresitene Russell M. Nelson o le [faatoilaloina o le lalolagi] o lona uiga o le manumalo lea i le faaosoosoga ia popole atu i mea a le lalolagi nai lo mea a le Atua. O lona uiga o le sili atu ona faatuatuaina o le mataupu faavae a Keriso i lo manatu o tagata.”¹³ E faapena foi, e tatau ona tatou teena le faaosoosoga e savavali “i o [tatou] lava ala, ma tusa ai ma le faatusa o lo [tatou] lava atua, o lona foliga ua tusa ma foliga o le lalolagi.”¹⁴

O le tulaga faafeagai o lenei lalolagi, o se vaega e tatau ai o le ata o le faaolataga a le Atua. O le faapefea ona tatou tali atu i lea tulaga o le ute lea o lo tatou faasinomaga—o se fuataga o lo tatou amiosa’o. O tulaga faalelalolagi e mafai ona tuusa’o e faaumatia ai le faamaoni i faaipoipoga, po o le faaleano foi i ai e pei o le tuuina i luga o lafoga lē mailoa e faitioina ai aoaoga faavae po o le aganuu a le Ekalesia. O le faaaogaina o le amiosa’o i a tatou filifiliga o se faailoaga vaaia lea o se tautinoga i le loto e mulimuli i le Faaola o Iesu Keriso.

E faapei lava foi ona tafe atu le amiosa’o mai le poloaiga sili muamua e alofa i le Atua, o le faamaoni foi i le tasi ma le isi e tafe atu mai le lona lua, o le alofa i o tatou tuaoi e faapei o i tatou lava. O se olaga amiotonu e le o se olaga ua atoatoa; o se olaga tatou te tauivi ai i aso uma ia muai faataua le faamaoni i le Atua ma i totonu o lena matalalaga o le faamaoni i isi. Ua faamanatu mai ia i tatou e Peresitene Oaks: “O lo tatou naunau e tausia [le] poloaiga lona lua e le tatau ona mafua ai ona tatou faagalo le muamua.”¹⁵

Ua faateteleina le tauivi o le lalolagi ma le amiosa’o e ala i le faia faamalosi o tulaga aiaiga faavae o le amio po o tulafono talafeagai ia e puipuia ai sootaga i le va o tagata ma faalapotopotoga. E ui ina lelei, a o nei tulafono e masani lava e le faavaea i mea moni a’ia’i ma e matele ina faatupula’ia e faavae i le taliaina faaleaganuu. E talitutusa i le fesili na tuuina mai e Elder Uchtdorf, o nisi faalapotopotoga e aoaoina tagata faigaluega e mafaufau pe o le a faape’i foliga o a latou faaiuga po o le faagasologa o le faiga o faaiuga, pe a faasasalalau i luga o upega tafa’ilagi po o le itulau tamua o se nusipepa tele. A o sau i fafo le Ekalesia mai le lē māiloa ma le pogisa,¹⁶ o i tatou, faapei o Tanielu, e tatau ona tatou tutula’i a’e i luga atu o faamoemoega faalelalolagi, ma ia avea ma foliga o le Atua moni soifua i taimi uma ma i nofoaga uma.¹⁷

O le faapea ua ia i tatou le amiosa’o, e le lava pe afai e le ogatusa a tatou faatinoga ma a tatou upu. E faapena foi, o le agalelei FaaKerisiano e le o se suimomo’e mo le amiosa’o. I le avea ai o se nuu o le feagaiga, ma o le avea ai ma taitai o Lana Ekalesia, e tatau ona matua maualuga le tulaga faatonuina ma ia ogatusa ma tulaga faatonuina ua faatuina e le Alii.

O le faatinoina ma le amiosa’o e fausia ai le faatuatua ma le faalagolago ma faamautinoa atu ai i isi ua na ona tatou saili e faia le finagalo o le Alii. I totonu o a tatou aufono, tatou te teena tosinaga mai fafo ae mulimuli i le faagasologa ua faaalia mai a le Alii, e sailia malamalamaaga mai alii ma tamaitai taitasi ma galulue faatasi ai i le fautuaga musuia e maua.¹⁸

O la tatou taula’iga ua i le Faaola, ma e tatou te faaeteete foi ia aloese mai faatinoga e ono vaaia ai faapea o tatou faamalieina o tatou lava naunauga, e manuia ai o tatou aiga, pe faapito foi i se tasi ae afaina ai se isi. Tatou te faia taumafaiga faaopoopo e taumamao ai mai soo se vaaiga e ono tosina ai a tatou faatinoga i mamalu faalelalolagi,¹⁹ ia maua ai faalauiloaga faaletagata lava ia, fatua’i ai nisi mau lagolago i saite fesootai, ta’uta’ua, po o le faasalalauina.

O le mea mulimuli, o se ola ai i se olaga o le amiosa’o e manaomia ai ona tatou faamaoni i lo tatou faasinomaga paia.

Ua tatou iloa ni isi sa le’i faamaoni. E faapitoa le maoae o le aneti-keriso o Kori’oa, o lē sa ta’ita’iesea loto o le toatele, na tosina i o latou “mafaufau faaletino.”²⁰ Ae, i taimi faaiu o lona olaga, sa ia tautino atu ai, “sa ou iloa i taimi uma lava o loo i ai se Atua.”²¹ Sa aoao mai e Peresitene Henry B. Eyring e faapea, o le pepelo “e feteena’i ma le natura o o tatou agaga,”²² lo tatou faasinomaga paia. Sa faasese e Kori’oa o ia lava, ma sa le’i i ai ia te ia le upumoni.²³

O se eseesega, sa tautino atu ma le mautinoa e le Perofeta o Iosefa Samita, “sa ou iloaina, ma sa ou iloaina sa silafia e le Atua, ma sa le mafai ona ou faafitiaina.”²⁴

Sa alofagia e le Alii ia Ailama le uso o Iosefa “ona o le faamaoni o lona loto.”²⁵ Na tumau faamaoni o ia ma Iosefa e oo i le iuga—faamaoni i o la’ua faasinomaga paia, le malamalama ma le silafia sa o la mauaina, ma faamaoni i le tagata sa la iloaina e mafai ona avea ai i la’ua.

Inā tatou faaleleia ia i tatou lava “i le finagalo o le Atua”²⁶ ma atia’e le uiga FaaKeriso o le amiosa’o. Ina tatou mulimuli ia i lo tatou Faataitai, le Faaola o le lalolagi, ma aua le solomuli ae ia ola i se olaga e faamaoni i le Atua, i le tasi ma le isi, ma i lo tatou faasinomaga paia.

E pei ona fai mai Iopu, “Ia fuatia a’u e ia i le fua faatatau e tusa, ia silafia ai e le Atua ua sa’o la’u amio.”²⁷ I le suafa paia o Iesu Keriso, amene.