Mua’i Faau’uina e Auauna Atu

O le afiafi nei, ou te talanoa atu ai i le autalavou o le Ekalesia, le tupulaga faia’e o alii talavou ma tamaitai talavou o e o loo tauaveina tulaga faatonuina mo le isi augatupulaga.

Ia Oketopa 2013, sa tautino mai ai e lo tatou perofeta pele o, Peresitene Russell M. Nelson: “Ua loa ona silafia oe e lou Tama Faalelagi. O oe, o Lona atalii po o le afafine, sa Ia filifilia e sau i le lalolagi i le taimi tonu lava lenei, ia avea ma se taitai o Lana galuega maoae i le lalolagi.”¹

I le lua tausaga talu ai, sa faaauau ai le saunoaga a Peresitene Nelson:

“O le asō ou te toefaamautu malosi atu ai ua poloaiina e le Alii ia alii talavou agavaa uma lava, ma malolosi ia sauniuni mo, ma auauna atu i se misiona. Mo alii talavou o le Au Paia o Aso e Gata Ai, o le galuega faafaifeautalai o se tiutetauave faaleperisitua. Na faapolopoloina outou alii talavou mo lenei taimi o loo tupu ai le faapotopotoina o Isaraelu na folafolaina. …

“Mo outou tuafafine talavou ma malolosi, o se misiona o se avanoa mamana foi, ae tuu i le faitalia. … Tatalo ia iloa pe finagalo le Alii ia te oe e auauna atu i se misiona, ma o le a tali mai le Agaga Paia i lou loto ma [lou] mafaufau.”²

O le faatatauga o lo tatou perofeta i le taofiofia e le Alii o le autalavou o o tatou aso e faapolopolo mo lenei taimi i le faapotopotoina o Isaraelu ma lana valaaulia e tatalo ia iloa po o le a le mea e finagalo le Alii e te faia, i se vaega, e faatatau i le olaga na e ola ai ma faamanuiaga na e mauaina mai le Atua ae e te lei fanau mai i lenei lalolagi.³ O i tatou uma o e ua fananau mai i lenei lalolagi na muai nonofo faatasi ma lo tatou Tama Faalelagi o Ana fanau agaga.⁴ Na tautino atu e le Alii ia Mose, “O A’u, o le Alii le Atua, na foafoaina faaleagaga mea uma … ae lei i ai faaletino i latou i luga o le lalolagi.”⁵

Ina ua Ia foafoaina oe faaleagaga, sa alofa o Ia ia te oe o Ona atalii ma afafine agaga ma faatumauina i totonu o outou taitoatasi se natura paia ma se faasinomaga e faavavau.⁶

I le taimi o lou muai olaga, sa e “atiina ae [lou] faasinomaga ma faateleina [ou] gafatia faaleagaga.”⁷ Sa faamanuiaina oe i le meaalofa o le faitalia, o le tomai e faia ai filifiliga mo oe lava, ma sa e faia ni faaiuga taua, e pei o le faaiuga e mulimuli i le fuafuaga o le fiafia a le Tama Faalelagi, o le “maua lea o se tino faaletino ma maua le poto masani faalelalolagi e alualu ai i luma … ma iu ai ina iloa [lo outou] taunuuga paia o ni suli o le ola e faavavau.”⁸ O lenei faaiuga na aafia ai lou olaga i lena taimi, i lou muai olaga, ma o loo faaauau pea ona aafia ai lou olaga i le taimi nei.⁹ I le avea ai ma se atalii/afafine o le Atua na ola i lou muai olaga, sa e “tuputupu ae i le atamai ma sa e aoao ia fiafia i le upumoni.”¹⁰

Ae e te lei fanau mai, na tofia outou taitoatasi e le Atua e faataunuu ni misiona patino i le taimi o lou olaga faaletino i luga o le fogaeleele.¹¹ Afai e tumau lou agavaa, o faamanuiaga o lena tulafono i le muai olaga o le a mafai ai ona e maua ituaiga uma o avanoa i lenei olaga, e aofia ai avanoa e auauna atu ai i le Ekalesia ma auai i le faatinoga o le galuega aupito taua o loo tupu i le lalolagi i aso nei: o le faapotopotoina o Isaraelu.¹² O na folafolaga ma faamanuiaga i le muai olaga ua ta’ua o lou muai faauuina. “O le aoaoga faavae o le muai faauuina e faatatau i tagata uma o le Ekalesia.”¹³ O le mua’i faau’uina e le faapea ua mautinoa ai o le a e maua ni valaauga po o ni tiutetauave faapitoa. O nei faamanuiaga ma avanoa e oo mai i lenei olaga o se taunuuga o lou faaaogaina ma le amiotonu o le faitalia, e pei lava ona oo mai lou mua’i faau’uina i lou muai olaga o se taunuuga o le amiotonu.¹⁴ A o e faamaonia lou lava agavaa ma le alualu i luma i luga o le ala o feagaiga, o le a e maua avanoa e auauna atu ai i lau vasega o Tamaitai Talavou po o le korama a le perisitua. O le a faamanuiaina oe e auauna atu i le malumalu, e avea ma se uso po o se tuafafine o auaunaga, ma auauna atu i se misiona o se soo o Iesu Keriso.

Aisea e taua ai le saili ia iloa ma malamalama i lou mua’i faau’uina? I se vaitaimi ua anoanoai ai fesili, ua toatele naua ua saili ia iloa lo latou faasinomaga moni, o le mea moni e faapea, ua silafia ma ua faamanuiaina i tatou taitoatasi e le Atua ae tatou te lei fananau mai i lenei lalolagi ma ni “uiga taua o le … muai olaga, olaga faitino, ma le faasinomaga ma le faamoemoega e faavavau” e aumaia ai le filemu matagofie ma le faamautinoaga i o tatou mafaufau ma loto.¹⁵ O le iloaina po o ai oe e amata i le malamalama i faamanuiaga na mua’i faau’uina ai oe e le Atua, na tuuina atu i ou luga ae e te lei fanau mai i lenei lalolagi. E finagalo lo tatou Tama Faalelagi e faaali atu ia te oe lou mua’i faauuina patino, ma o le a Ia faia a o e saili e aoao ma mulimuli i Lona finagalo.¹⁶

Ou te fiafia e faitau i tusiga a Peresitene Nelson i le Instagram. O se tasi o na tusiga e sili ona ou fiafia i ai o le aso 20 o Iulai, 2022. Na ia tusia:

“Ou te talitonu ana faapea o loo fetalai tuusa’o atu le Alii ia te oe, o le mea muamua lava Na te faamautinoa ua e malamalama i ai o lou faasinomaga moni. A’u uo pele, o outou moni lava o fanau agaga a le Atua. …

“… Aua ne’i e sasi ai: O lou gafatia e paia. Faatasi ai ma lau sailiga filiga, o le a avatu e le Atua ia te oe ni faatepaga o le tagata e mafai ona avea ai oe.”¹⁷

E mafai ona o’u faasoa atu ia te outou le ala na aoaoina ai a’u e lo’u tamā faalelalolagi ia iloa lo’u faasinomaga ma le fuafuaga a le Atua i lo’u olaga?

I se tasi taeao o se Aso Toonai ina ua 13 o’u tausaga, sa ou moaina le vao o se vaega o a’u feau faalevaiaso. Ina ua uma, sa ou faalogoina le tapuni o le faitotoa i le pito i tua o lo matou fale ma tilotilo atu ma iloa ai lo’u tamā o valaau mai ou te alu atu ia te ia. Sa ou savali atu i le faapaologa pito i tua, ma sa ia valaaulia a’u ma te nonofo faatasi i luga o sitepu. Sa o se taeao matagofie. Ou te manatua lona nofo latalata mai ia te a’u lea sa fepa’ia’i o ma tauau. Sa ia amata i le fai mai e alofa ia te a’u. Sa ia fesili mai po o a a’u sini o le olaga. Sa ou mafaufau, “Ia, ta’i faigofie.” E lua mea sa ou iloa ma le mautinoa: Sa ou fia tupu umī, ma sa ou manao e alu soo e tolauapi. O a’u o se tagata faigofie lava. Sa ataata o ia, malōlō mo sina taimi, ma fai mai: “Sitivi, ou te fia faasoa atu ia te oe se mea e taua tele ia te a’u. Sa ou tatalo o le a faia e lo tatou Tama Faalelagi mea ou te fai atu ai i le taimi nei ina ia tā mau i lou mafaufau ma lou agaga ina ia le galo lava ia te oe.”

Sa ou gauai atoa atu i lo’u tamā i lena taimi. Sa faliu mai o ia ma tilotilo mai i o’u mata ma fai mai, “Atalii, ia puipui taimi o lou olaga e na o oe ai.” Sa umi se taimi o sāō a o ia tuu le uiga ia goto loloto ifo i lo’u loto.

Ona ia faaauau lea: “E te iloa, o na taimi pe a na’o oe lava o loo i ai ma e leai se tasi o iloa le mea o loo e faia? O taimi na pe a e mafaufau, ‘Soo se mea ou te faia i le taimi nei e le aafia ai se isi tagata, ae na’o a’u lava’?”

Ona ia fai mai lea, “E sili atu nai lo se isi lava taimi i lou olaga, o mea e te faia i taimi o lou olaga e tuua ai na’o oe, o le a i ai se aafiaga silisili i le auala e te faafetauia ai luitau ma le lototiga o le a feagai ma oe; ma o mea e te faia i taimi o lou olaga e tuua ai na’o oe, o le a i ai foi se aafiaga sili atu i le auala e te faafetauia ai manuia ma le olioli o le a e oo i ai nai lo se isi lava taimi i lou olaga.”

Sa maua e lo’u tamā le moomooga o lona loto. O le leo ma le faamaoni o lona siufofoga, ma le alofa sa ou lagonaina i ana upu, sa ta mau i lo’u mafaufau ma lo’u loto i lena aso.

Ua ou aoaoina i le aluga o tausaga e faapea, o le vavega aupito maoae o lena aso i sitepu o lo’u fale a o ou laitiiti o le, i taimi o lo’u olaga e tuua ai na’o a’u, e mafai ona ou alu i le Atua i le tatalo ia maua faaaliga. Sa aoaoina a’u e lo’u tamā i le auala e mafai ona ou iloa ai faamanuiaga o le mua’i faauuina. I na taimi paganoa, sa ou aoaoina ai o le Tusi a Mamona o le afioga a le Atua. Sa ou aoaoina na mua’i faau’uina a’u e le Atua e auauna atu i se misiona. Sa ou aoaoina e silafia a’u e le Atua ma faafofoga ma tali mai i a’u tatalo. Sa ou aoaoina o Iesu o le Keriso, o lo tatou Faaola ma le Togiola.

E ui ina sa ou faia le tele o mea sese talu mai lena aso e le mafaagaloina ma lo’u tamā, o le taumafai e puipui taimi na’o au o lo’u olaga ua tumau pea o se taula i le lotolotoi o afā o le olaga ma ua mafai ai ona ou sailia sulufaiga saogalemu ma le faamalologa, ma faamalosia faamanuiaga o le alofa o lo tatou Faaola ma le taulaga togiola.

O’u uso e ma tuafafine talavou, a o outou puipuia taimi paganoa o o outou olaga i faafiafiaga lelei, faalogologo i musika faagaeetia, faitauina o tusitusiga paia, faia o tatalo anoa e le aunoa, ma le faia o taumafaiga ia maua ma mafaufau loloto i lou faamanuiaga faapeteriaka, o le a outou maua faaaliga. I upu a Peresitene Nelson, o ou mata o le a “pupula tele i le upumoni e faapea, o lenei olaga o le taimi lea e te filifili ai pe o le a le ituaiga o olaga e te manao e ola ai e faavavau.”¹⁸

O le a tali mai lo tatou Tama oi le Lagi i au tatalo, aemaise lava au tatalo na faia i taimi paganoa o lou olaga. O le a Ia faaali atu ia te oe au meaalofa ma taleni na mua’i faau’uina, ma o le a e lagonaina Lona alofa e siomia ai oe, pe afai o le a e ole atu ma le faamaoni ma le manao moni ia iloa. A o e puipuia taimi paganoa o lou olaga, o le a sili atu ona anoa lou auai i sauniga ma feagaiga o le talalelei. O le a sili atu ona e fusia atoatoa oe lava i le Atua i feagaiga e te osia ma Ia, ma o le a siitia oe ia maua le faamoemoe sili atu, faatuatua, ma le faamautinoaga i folafolaga ua Ia faia ia te oe. E te fia iloa le fuafuaga a le Atua mo oe? Ou te molimau atu e finagalo o Ia ia outou iloa, ma sa Ia musuia Lana perofeta i le lalolagi e valaaulia i tatou taitoatasi e tatalo ma maua lenei aafiaga e malamalama ai mo i tatou lava.¹⁹ Ou te molimau atu i le moni ma le mana o le taulaga togiola a lo tatou Faaola lea e mafai ai ona ola ai ma olioli i faamanuiaga uma na mua’i faau’uina e le Atua, i le suafa o Iesu Keriso, amene.