O Le Molimau ia Iesu
O la’u valaaulia ia galue nei loa e faamautu lou nofoaga o sē tasi e lototoa i le molimau ia Iesu.
I le 1832, na maua ai e Iosefa Samita ma Sini Rikitone se faaaliga mataina e faatatau i le taunuuga e faavavau o fanau a le Atua. Na talanoa le faaaliga lenei e uiga i ni malo faalelagi se tolu. Sa saunoa Peresitene Dallin H. Oaks e uiga i nei “malo o le mamalu” ia Oketopa talu ai,1 ma ta’ua ai e faapea “e ala i le manumalo ma le mamalu o le Tamai Mamoe,”2 o tagata uma vagana ai ni nai tagata toalaiti e iu ina faaolaina i totonu o se tasi o nei malo, “e tusa ai ma manaoga na faaalia e ala i a latou filifiliga.”3 O le fuafuaga o le faaolataga a le Atua e aofia ai se avanoa aoao mo Ana fanau uma, po o anafea ma po o fea lava na latou ola ai i luga o le fogaeleele.
E ui lava o le mamalu aupito itiiti o malo e tolu, le telesitila, “ua sili mamao atu i malamalamaaga uma,”4 ae o le faamoemoe o lo tatou Tama, o le a tatou filifili—ma, e ala i le alofa tunoa o Lona Alo e agavaa ai mo—malo aupito maualuga ma aupito mamalu o nei malo, le selesitila, lea e mafai ai ona tatou olioli i le ola e faavavau o ni “suli faatasi ma Keriso.”5 Ua fautuaina i tatou e Peresitene Russell M. Nelson ia “mafaufau faaselesitila,” o le faia lea o le malo selesitila ma a tatou sini e faavavau ona “iloilo lea ma le faaeteete a [tatou] faai’uga taitasi a o [tatou] i ai iinei i le lalolagi, po o fea o le a latou tuu ai [tatou] i le lalolagi a sau.”6
O i latou e i le malo selesitila o “e na taliaina le molimau ia Iesu, … o e o tagata amiotonu ua faaatoatoaina e ala ia Iesu le puluvaga o le feagaiga fou.”7 O e nonofo i le malo lona lua, po o terasitila, ua faamatalaina o ni tagata lelei, e aofia ai “tagata mamalu o le lalolagi, o e na faatauasoina i le faitogafiti o tagata.” O lo latou uiga autu na faatapulaaina ai o le, o i latou ia “sa lei totoa i le molimau ia Iesu.”8 O le faatusatusaga, o i latou i le malo maualalo, le telesitila o i latou ia o e “sa lē taliaina le talalelei, po o le molimau ia Iesu.”9
Matau o le uiga faaalia tulagaese mo e e nonofo i malo taitasi, o le ala lea latou te fesootai ai i “le molimau ia Iesu,” e mai le (1) tuuto ma le loto atoa, i le (2) ’e le totoa, i le (3) matuai teena lava. O le uiga faaalia o tagata taitoatasi e tautau ai lona lumanai e faavavau.
I.
O le a le molimau Ia Iesu?
O le molimau lea a le Agaga Paia, o Ia o le Alo paia o le Atua, le Mesia ma le Togiola. O le molimau a Ioane, sa i ai Iesu i le amataga ma le Atua, o Ia o le Foafoa o le lagi ma le lalolagi, ma “sa ia te ia le talalelei, ma o le talalelei o le ola, o le ola foi o le malamalama lea o tagata.”10 O “le molimau a Aposetolo ma Perofeta, … e faapea na Ia maliu, ma tanumia, ma toetu mai i le aso tolu, ma afio ae i le lagi.”11 O le malamalama e faapea, “ua leai se isi lava suafa ua tuuina mai e mafai ona oo mai ai le olataga.”12 O le “molimau mulimuli lenei,” na tuuina mai e le Perofeta o Iosefa Samita “o loo soifua o ia! … O Ia o le Alo e Toatasi na Fanaua e le Tama, —e ala mai ia te ia, ma o ia, ua i ai lalolagi ma na foafoaina, ma o e ua nonofo ai o atalii ma afafine fanauina mo le Atua.”13
II.
O tua atu o lenei molimau o i ai le fesili, O le a la le mea tatou te faia e uiga i ai?
O e mautofi i le malo selesitila e “maua” le molimau a Keriso i lona uiga atoa lava e ala i le papatisoina, maua le Agaga Paia, ma manumalo ai e ala i le faatuatua.14 O nei mataupu faavae ma upumoni o le talalelei a Iesu Keriso e taitaia ai mea latou te faamuamua ma filifiliga. O le molimau a Iesu e faaalia mai i tagata latou te avea ai ma tagata ua avea ai i latou. O lo latou faamoemoe o le alofa mama, “o le alofa le pona lea o Keriso.”15 O lo latou taulaiga o le tulitulimatagauina lea o le “fua o le ua matua e tatau ma le tumu o Keriso.”16
O le mea e lelei ai, o ni isi o e o le a maua i le malo terasitila e talia foi le molimau a Iesu, peitai e iloa i latou ona o mea latou te lei faia e uiga i ai. O le le lototoa i le molimau a le Faaola e tau mai ai se vaega o le faapaie po o le faasamasamanoa—o le “faaleogalua”17— mo se faataitaiga, e ese mai i tagata o Amona i le Tusi a Mamona, o e sa “iloga foi i latou i lo latou finafinau i le Atua.”18
O i latou o e mautofi i le malo telesitila o i latou ia o e teena le molimau ia Iesu faapea ma Lana talalelei, Ana feagaiga, ma Ana perofeta. Ua faamatalaina i latou e Apinati “sa o i latou e tusa ma o latou lava loto ma manaoga faaletino; ona sa latou lē valaau atu lava i le Alii aʼo faaloloa mai aao o le alofa mutimutivale ia te i latou; ona sa faaloloa mai ia te i latou aao o le alofa mutimutivale, ae sa latou lē mananao i ai.”19
III.
O le a le uiga o le totoa i le molimau ia Iesu?
E i ai ni nai vaega e mafai ona manatulia i le taliina o le fesili lenei. O le a ou taʻua ni nai vaega. O le totoa i le molimau ia Iesu e mautinoa lava le aofia ai le fafagaina ma le faamalosia o lena molimau. O soo moni latou te amana’ia mea e foliga laiti lea e lagolago ma faamalosia ai a latou molimau ia Iesu,e pei o le tatalo, suesue i tusitusiga paia, tausia o le Sapati, aai ma feinu i le faamanatuga, salamo, auaunaga, ma le tapuai i le maota o le Alii. Ua faamanatu mai e Peresitene Nelson ia i tatou e faapea, “faatasi ai ma le saoasaoa taufaamatau, o se molimau e le faafaileleina i aso taitasi ‘i le afioga lelei a le Atua’ [Moronae 6:4] e mafai ona solofa i lalo. O le mea lea, … tatou te manaomia ni aafiaga i aso taitasi e tapuai ai i le Alii ma suesue i Lana talalelei.” Ona ia faaopoopo mai lea: “Ou te augani atu ia te outou ia faamuamua le Atua i lou olaga. Avatu ia te Ia se vaega talafeagai o lou taimi. A e faia, ia matau le mea e tupu i lou malosiaga lelei faaleagaga.”20
O le totoa foi e fautuaina ai le le taofiofia ma le faailoa atu i tagata lautele e uiga i le molimau a se tagata. I le papatisoga, tatou te faamautu ai lo tatou naunau, “e tutu o ni molimau a le Atua i taimi uma ma i mea uma, ma i nofoaga uma atonu [tatou te] i ai, seia oo lava i le oti.”21 E faapitoa lava i lenei vaitau o le Eseta, tatou te folafola atu ma le olioli, saoloto, ma le le mataofiofia la tatou molimau i le Keriso toetu, ma soifua.
O se tasi o vaega o le totoa i le molimau ia Iesu o le faalogo ma usitai i Ana avefeau. E le faamalosia i tatou e le Atua i le ala lelei atu, le ala o feagaiga, ae ua Ia aoaoina Ana perofeta ia mautinoa ua tatou nofouta lelei i taunuuga o a tatou filifiliga. Ma e le na o tagata o Lana Ekalesia. E ala mai i Ana perofeta ma aposetolo, ua Ia augani mai ai ma le alofa i le lalolagi atoa ina ia faalogo ma usitai i le upumoni o le a faasaoloto ai i latou,22 laveai ai i latou mai puapuaga e le manaomia, ma aumai ia i latou le olioli tumau.
O le totoa i le molimau ia Iesu o lona uiga o le faamalosiauina o isi, e ala i le upu ma faataitaiga, ia faapena foi ona totoa, ae maise lava i latou o o tatou lava aiga. Sa ta’ua e Elder Neal A. Maxwell i se tasi o taimi “o tagata ‘mamalu’ [o le Ekalesia] o e o loo tafitafia luga o le laufola nai lo o le faalolotoina o lo latou avea ma soo, ma o e o loo auai faasamasamanoa nai lo o le ‘auai ma le naunautai’ [Mataupu Faavae ma Feagaiga 76:75; 58:27].”23 O le ta’ua ai ua saoloto tagata uma e filifili, sa auē ai Elder Maxwell: “Ae peitai, o le mea e leaga ai, a filifili e ni isi le faatalale, latou te le o filifili mo na o i latou, ae e mo le isi augatupulaga ma le isi augatupulaga. O upu faauigalua laiti a matua e mafai ona oo ai i le se ese tele a a latou fanau! O augatupulaga na muamua atu o se aiga atonu e atagia ai le tuuto, ae o ni isi i le augatupulaga i le taimi nei ua mautinoa lava le i ai o le faauigalua. O le mea e faanoanoa ai, i le isi augatupulaga e sosoo ai, e ono filifili e ni isi le feteenai a o faateteleina lava tulaga afaina.”24
O tausaga ua mavae, sa faamatalaina ai e Elder John H. Groberg le tala e uiga i se aiga talavou sa nonofo i se paranesi toagaogao i Hawaii i le popofou o le vaitau o le 1900. Pe na tusa ma le lua tausaga talu ona avea i latou ma tagata o le Ekalesia, ae ma’i loa se tasi o le la fanau teine i se faama’i sa lei mailoa ma sa faataotolia ai i le falemai. I le lotu i le Aso Sa na sosoo ai, sa saunia ai e le tamā ma lona atalii le faamanatuga e pei ona laua faia i le tele o vaiaso, ae a o tootuli le tamā talavou e faamanuia le falaoa, sa faafuasei ona iloa e le peresitene o le paranesi, le tagata sa i ai i le laulau o le faamanatuga, sa puna i luga ma alaga atu, “Taofi. E le mafai ona e tago i le faamanatuga. O loo ma’i lou afafine i se faama’i e le mailoa. Aluese nei loa lava ae fai e se isi tagata se falaoa fou o le faamanatuga. E le mafai ona e i ai iinei. Alu.” Sa matuai te’i le tamā ma tilotilo atu ma le le mautonu i le peresitene o le paranesi sosoo ai ma le aulotu, ma o le lagona ai o le loloto o le atuatuvale ma le maasiasi mai tagata uma, na geno atu ai i lona aiga, ma sa latou solo filemu i fafo o le falesa.
Na leai se upu na faia, ma le le fiafia, sa savavali taitoatasi ai le aiga i le auala agai atu i si o latou tamaifale. Sa latou saofafai i se li’o, ma sa faapea atu le tamā, “Faamolemole ia fifilemu seia uma ona ou tautala.” Sa taumafaufau le atalii talavou i se mea o le a latou faia e taui atu ai mo le maasiasi na latou mafatia ai: o le a latou tapēina meaituāolō a le peresitene o le paranesi, pe susunu lona fale, pe auai i se isi lotu? Sa mavae le lima, sefulu, sefululima, luasefulu lima minute i le sāō.
Sa amata ona matalatala moto na uumau a le tamā, ma sa melotagi. Sa amata ona tagi le tina, ma sa le’i umi ae fetagisi leleoa tamaiti taitoatasi. Sa liliu atu le tamā i lana āvā ma fai atu, “ou te alofa ia te oe” ona toe fai atu lea o na lava upu i lana fanau taitoatasi. “Ou te alofa ia te outou uma ma ou te manao ia tatou faatasi, e faavavau, o se aiga. Ma e na o le pau le auala e mafai ai lena mea, e mo i tatou uma ia avea o ni tagata lelei O Le Ekalesia a Iesu Keriso o le Au Paia o Aso e Gata Ai ma ia faamauina e ala i le perisitua paia i le malumalu. E le o se lotu lenei a le peresitene o le paranesi. O le Ekalesia a Iesu Keriso. O le a tatou le faatagaina soo se tagata po o soo se afaina po o se faalumaina po o le faamaualuga e taofia i tatou mai le faatasia e faavavau. O le Aso Sa a sau, o le a tatou toe foi ai i le lotu. O le a tatou nonofo nao i tatou seia iloa le ma’i o si o tatou afafine, ae o le a tatou toe foi.”
Sa latou toe foi mai, sa manuia lo la afafine, ma sa faamauina le aiga i le Malumalu o Laie Hawaii ina ua faamaeaina. O le asō, ua silia ma le 100 tagata sa ta’ua lo latou tamā, tamamatua, ma le tamā o le tamamatua amuia, ona sa taulai atu lana vaai i le faavavau.25
O le vaega mulimuli e tasi o le totoa i le molimau ia Keriso o le a ou ta’ua, o lo tatou sailiga taitoatasi o le paia patino. O Iesu o lo tatou Togiola e tatau ai,26 ma ua Ia augani mai, “Ia salamo, outou tuluiga uma o le lalolagi, ma o mai ia te a’u ma ia papatiso i lo’u igoa, ina ia faapaiaina outou i le taliaina o le Agaga Paia, ina ia outou tutu ma le le pona i o’u luma i le aso gataaga.”27
Na faamatala e le perofeta o Mamona le tasi vaega o le Au Paia o e sa tutumau i lenei faiga e ui ina sa “asa atu ai i puapuaga e tele.”28
“E ui i lea, sa latou anapopogi ma tatalo soo, ma sa faasolo malolosi ma atili malolosi ai i lo latou lotomaualalalo, ma mausali ma atili mausali ai i le faatuatua ia Keriso, seia oo ina faatutumuina o latou agaga i le olioli ma le faamafanafanaga, ioe, seia oo ina faamamaina ma faapaiaina o latou loto, o le faapaiaga lea e oo mai ona o lo latou tuu atu o o latou loto i le Atua.”29 O lenei liuga tele i o latou loto—tuuina atu o o latou loto i le Atua ma le toefanauina faaleagaga e ala i le alofa tunoa o le Faaola—tatou te sailia.30
O la’u valaaulia ia galue nei loa e faamautu lou nofoaga o se tasi e loto totoa i le molimau ia Iesu. Pe a manaomia le salamo, “aua ne’i o outou faatuai le aso o lo outou salamo,”31 ina nei oo “i se itula tou te lē manatunatu ai o le a mavae atu ai le taumafanafana, ma uma ai le seleselega, ma lē faaolaina ai o outou agaga.”32 Ia naunau i le tausiga o a outou feagaiga ma le Atua. Aua nei [tou] “le fiafia ona o le faigata ona tausia o le upu.”33 “Manatua ia faatumauina le suafa [o Keriso] ia tusia pea i o outou loto, … [ina] ia outou lagona ma iloa le leo o le a valaauina ai outou, ma le igoa foi, o le a valaauina ai outou e ia.”34 Ma le faaiuga, “ia faamautu lenei mea i o outou loto, o le a outou faia mea o le a aoao atu [e Iesu] ia te outou, ma poloaiina ai outou.”35
E finagalo lo tatou tamā i Ana fanau uma o e o le a olioli i le ola e faavavau faatasi ma Ia i Lona malo selesitila. Sa puapuagatia, maliu ma toetu mai Iesu ina ia mafai ai lena mea. Ua toe afio atu [o Ia] i le lagi, ma ua afio i le itu taumatau o le Atua, e maua mai i le Tamā ana aiā o le alofa mutimutivale lea ua ia te ia mo le fanauga a tagata.”36 Ou te tatalo ia faamanuiaina i tatou uma i se molimau mumu i le Alii o Iesu Keriso, olioli ma ia totoa i lena molimau, ma olioli pea lava pea i fua o Lona alofa tunoa i o tatou olaga. I le suafa o Iesu Keriso, amene.