Ina tu ia! O Loo Valaau o Ia ia te Oe

I se taimi ua mavae sa ou fesili ai i lo’u toalua, “E mafai ona e ta’u mai pe aisea, i lo’u manatua ai, e le’i i ai lava ni faafitauli tetele i o tatou olaga?”

Sa ia tilotilo mai ia te a’u ma fai mai, “Ioe. O le a ou ta’u atua le mafuaaga na le’i i ai lava ni o tatou faafitauli tetele; ona e puupuu tele lou manatuaga!”

O lana tali vave ma le atamai na ou toe iloaina ai, o le ola i le talalelei a Iesu Keriso e le aveesea ai tiga ma tofotofoga, ia e tatau ai mo lo tatou tuputupu a’e.

O le talalelei e le o se auala e aloese ai mai luitau ma faafitauli, ae o se vaifofo e faateleina ai lo tatou faatuatua ma aoao ai le auala e faafoe ai.

Sa ou lagonaina lenei mea moni i ni nai masina talu ai a o o’u savali i se tasi aso ma sa faafuasei ona nenefu, pogisa, ma taavilivili la’u vaai. Sa ou fefe. Ona fai mai lea o le fomai ia te a’u, “Afai o le a lē amataina loa ou togafitiga, e ono po lau vaai i ni nai vaiaso.” Sa atili ai ona ou fefe.

Ona latou faapea mai lea, “E manaomia ona tui sa’o le vailaau—i le ‘afu’afu o lou mata taumatau, a’o pupula lou mata—i le ta’ifa vaiaso, mo aso uma o totoe o lou ola.”

Sa o se fafagu faalēmanuia lena mea.

Ona oo mai lea o se manatu i le ala o se fesili. Sa ou fesili ifo ai ia te a’u lava ia, “Ua lelei! Ua le o lelei la’u vaaiga faaletino, ae o faapefea la’u vaaiga faaleagaga? Pe o o’u manaomia se togafitiga iina? A o le a foi le uiga o le i ai o se vaaiga manino faaleagaga?”

Sa ou manatunatu loloto i le tala i se tagata tauaso e igoa ia Patimaio, o loo faamatala mai i le Talalelei a Mareko. Fai mai le mau, “Ma ina ua ia faalogo ia Iesu le Nasareta, sa amata ona ia alaga ma faapea atu, Iesu, o oe le Alo o Tavita, ia e alofa mai ia te a’u.”¹

O le mea moni lava ia, i mata o le toatele, o Iesu ua na o le atalii lava o Iosefa, aisea la na valaau atu ai Patimaio ia te Ia le “Atalii o Tavita”? Na pau lava le mea ona sa ia iloaina o Iesu lava o le Mesia, o lē sa valoia o le a fanau mai o sē e tupuga mai ia Tavita.²

E mālie ona o lenei tauaso, e le’i i ai se vaaiga faaletino, ae na iloaina Iesu. Sa ia vaaia faaleagaga le mea sa le mafai ona ia vaaia faaletino, ae e toatele isi na mafai ona vaai faaletino ia Iesu ae sa matuai tauaso lava faaleagaga.

Mai lea tala, ua tatou aoao atili ai e uiga i le vaaiga faaleagaga.

Ua tatou faitauina, “Sa matua vavao atu tagata e toatele ia te ia, ina ia faalologo ia, a o ia ua atili ai ona alaga, Le Alo o Tavita e, ia e alofa mai ia te a’u.”³

O i latou uma na vagaia o ia sa fai atu i ai e fifilemu, ae sa atili ai ona ia tau’alaga ona sa ia iloaina moni Iesu. Sa ia lē amana’iaina na leo ma saga faataiō leotele ai.

Sa ia gaoioi nai lo le tau faatonu e gaoioi. E ui i le tapulaa o ona tulaga, ae sa ia faaaogaina lona faatuatua e sopo’ia ai talaatu o ona tapulaa.

O le mea la lea, o le uluai mataupu faavae ua tatou aoaoina o le tatou te maua se vaaiga manino faaleagaga, pe a tatou taulai atu ia Iesu Keriso ma tumau faamaoni i mea ua tatou iloa e moni.

Uso e ma tuafafine, ina ia tausisia le maopo o la tatou vaaiga faaleagaga, e tatau ona tonu ia i tatou ia lē faalogo i leo o le lalolagi o vagaia i tatou. I lenei lalolagi lē mautonu ma le fenumia’i, e tatau ona tatou tumau faamaoni i mea ua tatou iloa, faamaoni i a tatou feagaiga, faamaoni i le tausiga o poloaiga ma toefaamautu o tatou talitonuga ia malolosi atili atu, e faapei ona faia e lenei tagata. E manaomia ona atili leotetele le alagaina i le lalolagi o a tatou molimau i le Alii. Sa iloa Iesu e lenei tagata, sa tumau faamaoni i mea sa ia talitonuina, ma sa le’i faalavelaveina lava e leo na siomia ai o ia.

E tele leo i aso nei o loo taumafai e taotaomia o tatou leo o ni soo o Iesu Keriso. O loo taumafai leo o le lalolagi e faagūgū i tatou. Ae o le mea tonu lava lena e tatau ai ona leotetele atili ma malolosi le ta’utino atu o a tatou molimau i le Faaola. I le lotolotoi o leo uma o le lalolagi, o loo faamoemoe ai le Alii ia te a’u ma oe e tautino atu a tatou molimau, e sii a’e o tatou leo, ma avea ma Ona siufofoga. Afai tatou te le faia, o ai la o le a molimau atu e uiga ia Iesu Keriso? O ai o le a ta’uta’u atua Lona suafa ma folafola atu Lana misiona paia?

Ua ia i tatou se poloaiga faaleagaga e maua mai lo tatou iloa e uiga ia Iesu Keriso.

Ae o le a le mea na fai e Patimaio ina ua mavae lena mea?

I le poloaiga a le Alii e tu, sa ia toe gaoioi ai foi i le faatuatua.

Fai mai le mau, “Ma sa ia lafo ese ona ofu, tu i luga, ma sau ia Iesu.”⁴

Sa malamalama lenei tagata faatauvaa ma le faamaoni e mafai ona ia tula’i i se olaga e sili atu pe a poloaiina ai e Iesu. Sa ia iloa sa sili atu o ia nai lo ona tulaga sa i ai, ma o le mea muamua sa ia faia ina ua ia faalogo o valaau Iesu ia te ia, o le lafoa’i ese o lona ofutele faaletagata ‘aisi.

Sa ia toe gaoioi foi nai lo le tau faatonu e gaoioi.

Atonu na ia mafaufau, “Ou te le toe manaomia lenei mea, o lea ua sau Iesu i lo’u olaga. O se aso fou lenei. Ua uma a’u ma lenei olaga faanoanoa. Faatasi ai ma Iesu ua mafai nei ona amata so’u olaga fou o le fiafia ma le olioli ia te Ia, faatasi ma Ia, ma ala atu ia te Ia. Ou te le popole po o a manatu o le lalolagi ia te a’u. O loo valaau mai Iesu ia te a’u, ma o le a fesoasoani o Ia ia te a’u e ola i se olaga fou.”

Oka se suiga ina a ofoofogia!

A o ia lafoa’iesea lona ofutele faaletagata ‘aisi, na ia lafoa’ia uma foi ‘alofaga uma.

Ma o se mataupu faavae lona lua lea: tatou te maua se vaaiga manino faaleagaga pe a tatou lafoa’ia le tagata natura, salamo, ma amata se olaga fou ia Keriso.

O le ala e faia ai o le osia lea ma tausia feagaiga e tulai a’e i se olaga sili atu e ala ia Iesu Keriso.

O le tele lava o le tatou faia o ‘alofaga e misi alofa ai mo i tatou lava, misi alofa i o tatou tulaga ma faafitauli ma mea leaga uma e tutupu i o tatou olaga e oo lava i tagata leaga uma ia tatou te manatu ua afua ai ona tatou faanoanoa, o lo tatou tuuina foi lena o le ofutele faaletagata ‘aisi i o tatou tau’au. E moni e i ai taimi, e faatiga ai (ma le iloa pe lē mafaufauina foi) i tatou e tagata. Ae e moomia ona tatou filifili e gaoioi ma le faatuatua ia Keriso e ala i le aveesea o le ofutele faalemafaufau ma faalelagona lea atonu tatou te ofuina pea, e nanā ai ‘alofaga po o le agasala ma lafoa’iese, ma le iloa e mafai ma o le a faamaloloina tatou e Ia.

E leai lava se ‘alofaga lelei e faapea mai ai, “Ua ou faapea lava a’u ia ona o ni tulaga lē manuia ma lē lelei. Ma e le mafai ona ou suia, ma ua ta’uamiotonuina a’u.”

A tatou mafaufau faapena, ua tatou filifili se’i faatonu mai i tatou.

Ua tatou taofi pea i le ofutele faaletagata ‘aisi.

O le gaoioi i le faatuatua e faalagolago i lo tatou Faaola, ma le talitonu o Lana Togiola e mafai ai ona tatou tutū i luga a’e o mea uma pe a poloaiina ai e Ia.

O le mataupu faavae lona tolu o loo maua lea i upu mulimuli e fa: “na [ia] sau ia Iesu.”

Na mafai faapefea ona alu o ia ia Iesu ae o la e tauaso? Na pau le ala o le savali agai atu ia Iesu e ala i le faalogo atu i Lona siufofoga.

Ma o se mataupu faavae lona tolu lea: tatou te maua se vaaiga manino faaleagaga pe a tatou faalogo i le siufofoga o le Alii ma tuu atu ia te Ia e taiala i tatou.

E faapei lava ona si’i a’e e lenei tagata o lona leo i luga atu o leo na vagavagaia o ia, sa mafai ona ia lagona le siufofoga o le Alii i le totonugalemu o isi leo uma.

O le faatuatua lava lea e tasi na mafai ai e Peteru ona savali i luga o le sami a o ia tausisia lana taula’iga faaleagaga i le Alii ma le’i faalavelaveina e matagi na siomia ai o ia.

Ona faaiu ai lea o le tala i lenei tagata tauaso i upu “na pupula o ia, ma sa mulimuli ia Iesu i le ala.”⁵

O se tasi o lesona aupito taua i lenei tala, na faaaoga e lenei tagata le faatuatua moni ia Iesu Keriso ma sa maua ai se vavega ona sa ia ole atu ma le faamoemoega moni, le faamoemoega moni e mulimuli ia te Ia.

Ma o le mafuaaga taualuga lea mo faamanuiaga tatou te maua i o tatou olaga, o le mulimuli lea ia Iesu Keriso. O le iloaina o Ia, osia ma tausia feagaiga ma le Atua ona o Ia, suia o o tatou lava natura e ala ia te Ia, ma tumau e oo i le iuga e ala ia te Ia.

Ia te a’u lava ia, o le tausisia o se vaaiga manino faaleagaga ua na o le taulai lava ia Iesu Keriso.

E manino la la’u vaaiga faaleagaga pe a fai tui o lo’u mata? Ia, o ai a’u e fai atu ai? Ae ou te faafetai i mea ua ou vaai i ai.

E manino la’u vaai i le aao o le Alii i lenei galuega paia ma i lo’u olaga.

Ou te vaaia le faatuatua o le toatele i soo se mea ou te alu i ai, o ē faamalolosia lo’u lava faatuatua.

Ou te vaaia agelu o siomia a’u.

Ou te vaaia le faatuatua o le toatele e le o vaaia faaletino le Alii ae iloaina o Ia faaleagaga, ona ua latou iloa lelei o Ia.

Ou te molimau atu o le talalelei lenei o le tali lea o mea uma, aua o Iesu Keriso o le tali mo tagata uma. Ou te faafetai mo mea ua mafai ona ou vaaia a o ou mulimuli i lo’u Faaola.

Ou te folafola atu a o tatou faalogo i le siufofoga o le Alii ma faataga o Ia e taiala i tatou i luga o le ala o feagaiga a le Faaola, o le a faamanuia i tatou ma se vaaiga manino, malamalama faaleagaga, ma le filemu o le loto ma le mafaufau i lo tatou olaga atoa.

Se’i o tatou alalaga atu ia a tatou molimau e uiga ia te Ia, ia leotetele atu nai lo leo o vagaia i tatou i se lalolagi ua moomia ona faalogo atili ia Iesu Keriso ae lē tuuitiitia. Se’i o tatou aveesea ia le ofutele faaletagata ‘aisi atonu o loo tatou ofuina pea ma tutū i luga a’e o le lalolagi i se olaga sili atu e ala ia Keriso. Se’i o tatou lafoa’iaese ia ‘alofaga uma e le mulimuli ia Iesu Keriso ma ia sailia mafuaaga lelei uma e mulimuli ia te Ia a o tatou faalogoina Lona siufofoga. O la’u tatalo lea i le suafa o Iesu Keriso, amene.