E Taua Upu

Uso e, tuafafine, ma uo i le lalolagi atoa, ua faamamaluina a’u e lauga atu i lenei aofia toatele, o le toatele lava o tagata o le tatou Ekalesia ma le toatele foi o uo ma le au faafofoga fou i lenei faasalalauga o le konafesi. Talofa!

O savali e faasoaina atu mai lenei pulelaa e fesootai atu i upu. E tuuina atu i le FaaPeretania ma ua faaliliuina i le latalatala i le 100 gagana eseese. O le faavae e tutusa i taimi uma. Upu. Ma e taua tele upu. Se’i o’u toe ta’u atu lena mea. E taua upu!

O faavae na o le auala tatou te fesootai ai; e fai ma faatusa o o tatou talitonuga, amioga mama, ma vaaiga. O nisi taimi tatou te tautatala ai i upu; o isi taimi tatou te faalogo. E faatulaga e upu se uiga tonu o se mea. O le leo o o tatou mafaufauga, lagona, ma aafiaga, mo le lelei po o le leaga.

O le mea le manuia, o upu e mafai ona le mafaufau, faatatope, ma faatiga. O le taimi lava e fai atu ai, tatou te le mafai ona toe faafoi maia. E mafai ona latou faamanu’aina, faasalaina, faalumaluma, ma e i’u lava ina taitai atu ai i ni amioga faataumaoi. E mafai ona mamafatu ia i tatou.

I le isi itu, o upu e mafai ona patipatia ai le manumalo, maua ai le faamoemoe ma le faamalosiauga. E mafai ona latou uunaia i tatou e toe mafaufau, toe amata, ma toe faatonutonu ai lo tatou ala. O upu e mafai ona tatalaina o tatou mafaufau i le upumoni.

O le mafuaaga lena, muamua ma le silisili, e taua ai upu a le Alii.

I le Tusi a Mamona, sa fetaiai ai le perofeta o Alema ma lona nuu i Amerika anamua ma fetauaiga lē muta ma i latou na lafoaia le afioga a le Atua, ua faamaaaina o latou loto, ma faaleagaina la latou aganuu. Sa ono tau le au faatuatua, ae sa fautua atu Alema: “Ma o lenei, ona sa i ai i le talaiga o le upu se faamoemoega sili e ta’ita’i atu ai tagata ia latou faia le mea tonu—ioe, sa i ai sona aafiaga mamana sili atu i luga o mafaufau o tagata nai lo le pelu, po o se isi lava mea, ua oo ia te i latou—o lea na manatu ai Alema e tatau ona latou faata’ita’ia le mana o le upu a le Atua.”¹

O le “upu a le Atua” e silisili atu i isi uma faaupuga. Na faapena lava talu mai le Foafoaga o le lalolagi ina ua fetalai le Alii: “Ia malamalama: ona malamalama ai lea.”²

Mai le Faaola na oo mai ai nei faamautinoaga i le Feagaiga Fou: “E mavae atu le lalolagi; ae le mavae atu lava la’u upu.”³

Faapea ma lenei: “Afai e alofa mai se tasi ia te a’u, e tausia e ia la’u upu: e alofa foi lo’u Tama ia te ia; e o mai foi i ma’ua ia te ia, matou te nonofo ma ia.”⁴

Ma mai ia Maria, le tina o Iesu, na oo mai ai lenei molimau faamaualalo: “Faauta o a’u nei o le auauna a le Alii; ia faia ia te a’u e tusa ma lau fetalaiga.”⁵

O le talitonu ma le gauai atu i le upu a le Atua o le a tatou latalata atili atu ai ia te Ia. Sa folafola mai Peresitene Russell M. Nelson, “Afai o le a outou suesue i Ana upu, o le a faateleina lo outou gafatia ia avea atili ai faapei o Ia.”⁶

Tatou te le mananao uma ea, e pei o upu o le viiga, “ia ou paia—tele, pei o le Faaola”?⁷

Ou te vaai faalemafaufau i le taulealea o Iosefa Samita o tootuli ma faafofoga atu i afioga a lona Tama i le Lagi: “[Iosefa,] O Lo’u Atalii Pele lenei. Faalogo ia te Ia!”⁸

Tatou te “faalogo ia te Ia” i upu o tusitusiga paia, ae pe tatou te faataatia ai pea na upu i luga o itulau, pe mata o tatou iloaina o loo Ia fetalai mai ia i tatou? Pe tatou te sui ea?

Tatou te “faalogo ia te Ia” i faaaliga faaletagata lava ia ma uunaiga mai le Agaga Paia, i tali i tatalo, ma i taimi na e na o Iesu Keriso e ala i le mana o Lana Togiola, e mafai ai ona aveesea a tatou avega, faamatuu mai ia i tatou le faamagaloga ma le filemu, ma opo i tatou “i aao o lona alofa.”⁹

Lua, e taua upu a perofeta.

E molimau mai perofeta i le paia o Iesu Keriso. Latou te aoao atu Lana talalelei ma faaali atu le alofa [o le Alii] mo tagata uma.¹⁰ Ou te molimau atu o lo tatou Perofeta soifua, Peresitene Russell M. Nelson e faafofoga atu ma malele mai i afioga a le Alii.

E i ai lava se ala a Peresitene Nelson i upu. Sa ia saunoa, “Tumau i luga o le ala o feagaiga,”¹¹ “Faapotopoto Isaraelu,”¹² “Ia faamuamua le Atua,”¹³ “Fausia alalaupapa o le femalamalamaai,”¹⁴ “Avatu le faafetai,”¹⁵ “Faateleina le faatuatua ia Iesu Keriso,”¹⁶ “Ia pulea lau lava molimau,”¹⁷ ma le “Avea ma ē faatupuina le filemu.”¹⁸

Talu ai nei lava sa ia talosagaina i tatou ia “mafaufau faaselesitila.” “A faafetaia’ia oe e se faafitauli,” sa ia saunoa ai, “mafaufau faaselesitila! A tofotofoina e faaosoosoga, mafaufau faaselesitila! A faavaivaia oe e le olaga po o ē pele, mafaufau faaselesitila! A maliu “faafuasei” se tasi, mafaufau faaselesitila.A oo ina mamafatū le mau avega o le olaga i ou luga, mafaufau faaselesitila! … A e mafaufau faaselesitila, o le a faasolosolo ina suia lou loto, … o le a e vaai atu i tofotofoga ma mea faafeagai i se malamalama fou. … [ma] o le a faateleina lou faatuatua.”¹⁹

“A tatou mafaufau faaselesitila, tatou te vaai “i mea e pei ona i ai moni ma o le a i ai moni lava.”²⁰ I lenei lalolagi ua mamafatu i le le mautonu ma finauga, ua tatou manaomia uma ai lena vaaiga.

O Elder Siaosi Alapati Samita, ae le’i taitai lava ona avea ma Peresitene o le Ekalesia, sa saunoa e uiga i le lagolagoina o le perofeta ma le gauai atu i ana upu. Sa ia saunoa: “O le matafaioi tatou te faia pe a sii i luga o tatou lima … o se matafaioi e sili ona paia. … O lona uiga … o le a tatou tutu i ona tua; o le a tatou tatalo mo ia; … ma o le a tatou tinoū e faatino ana faatonuga e pei ona taitaiina ai e le Alii.”²¹ I se isi faaupuga, o le a tatou faatino ma le filiga upu a lo tatou perofeta.

I le avea ai ma se tasi o perofeta, tagatavaai, ma talifaaaliga e to’a 15 na lagolagoina ananafi e le tatou Ekalesia i le lalolagi atoa, ou te fia faasoa atu ai ia te outou se tasi o o’u aafiaga i le lagolagoina o le perofeta ma le taliaina o ana upu. Sa tupu ia te a’u e pei lava o le perofeta o Iakopo, o le na faamatalaina, “Sa ou faalogo i le siufofoga o le Alii o fetalai mai ia te a’u i le upu moni lava.”²²

Ia Oketopa talu ai, sa ma i ai ma lo’u toalua, o Melanie, i Bangkok, Thailand, a o ou sauniuni e faapaia le [maota] o le a avea ma malumalu lona 185 o le Ekalesia.²³ Mo a’u, o lea tofiga sa uiga ese ma faamaualaloina. O le malumalu muamua lenei i le penisula o Asia Sautesasae.²⁴ Sa matagofie le mamanuina—o se fausaga e ono fogafale, ae iva tumutumu, sa “faatatauina”²⁵ e avea ma se maota o le Alii. E tele masina sa ou mafaufau ai i le faapaiaga. O le mea sa nofomau i lo’u loto ma le mafaufau o le atunuu ma le malumalu lea ua opomau i aao o perofeta ma aposetolo. O Peresitene Thomas S. Monson sa faasilasilaina le malumalu²⁶ ae o Peresitene Nelson, o le faapaiaga.²⁷

Sa ou sauniaina le tatalo o le faapaiaga i ni masina na muamua ai. O na upu paia na faaliliuina i gagana e 12. Sa matou sauni loa. Pe o lo’u manatu lea.

O le po a o lumanai ai le faapaiaga sa ou ala a’e ai mai la’u moe ma se lagona popole faananati e uiga i le tatalo o le faapaiaga. Sa ou taumafai e tuuese le uunaiga, i le manatu ai ua lelei le tatalo. Ae sa le’i tuua a’u e le Agaga. Sa ou lagonaina e i ai upu patino o loo misi, ma e ala i le mamanu faalelagi na oo mai ai ia te a’u i se faaaliga, ma sa ou toe faaopoopo i ai nei upu i le tatalo e latalata i le faaiuga: “Tau ina ia matou mafaufau faaselesitila, i le faamuamua lea o Lou Agaga i o matou olaga, ma tauivi e avea ma ē faatupuina le filemu i taimi uma.”²⁸ Sa faamanatu mai e le Alii ia te a’u ia gauai atu i upu a lo tatou perofeta soifua: “Mafaufau faaselesitila,” “faamuamua le Agaga,” “tauivi ia avea ma ē faatupuina le filemu.” E taua upu a le perofeta i le Alii faapea foi ma i tatou.

Tolu, ma e matua taua lava, o a tatou lava upu. Talitonu mai ia te a’u, i lo tatou lalolagi ua faatumuina i emoji,²⁹e taua a tatou upu.

O a tatou upu e mafai ona lagolagoina ai le ita, olioli po o le agaleaga, agaalofa po o le lafoai ese. I le taimi e luitauina ai faalelagona, e mafai e upu ona tuia ma gotouga ifo ai ma le tiga i o tatou agaga—ma nofo ai iina. O a tatou upu i luga o le initoneti, feau tusitusia, ala o faasalalauga, po o tweets e i ai le malosiaga ma e ono faauigaseseina e ese mai mea na tatou faamoemoe i ai. O lea ia faaeteete ai i mea e te fai atu ai ma le auala e te fai atu ai. I o tatou aiga, aemaise lava i tane, avā, ma fanau, o a tatou upu e mafai ona aumaia faatasi ai i tatou pe faatupu ai le feitaga’i i o tatou va.

Se’i o’u fautua atu ni fasifuaitau faigofie se tolu e mafai ona tatou faaaogaina e aveese ai le tui tiga mai faafitauli ma eseesega, ae siitia ma toe faamautinoa atu ai i le tasi ma le isi.

“Faafetai lava.”

“Ou te faatoese atu.”

Ma “ou te alofa ia te oe.”

Aua ne’i e sefea nei fasifuaitau faatauvaa mo se mea faapitoa po o se faalavelave. Ia faaaoga soo ma le faamaoni, aua latou te faaali atua le faaaloalo mo isi. Ua faatupulaia le tautatala i mea lē aogā; aua e te mulimuli i lena faiga.

E mafai ona tatou fai atu “faafetai lava” i totonu o se lifi, i le paka taavale, i le maketi, i le ofisa, i se laina, pe i o tatou tuaoi po o uo. E mafai ona tatou fai atu “ou te faatoese atu” pe a tatou faia se mea sese, misi se fonotaga, galo se aso fanau, pe vaaia se tasi o tiga. E mafai ona tatou fai atu “ou te alofa ia te oe” ma o na upu e ave atu ai le savali “o loo o’u mafaufau ia te oe,” “ou te popole ia te oe,” “O loo ou i ai i i mo oe,” po o le “O oe o mea uma ia te a’u.”

Se’i o’u faasoa atu se faataitaiga patino. Tane, faalogo mai. Tuafafine, o le a fesoasoani foi lenei mea ia te outou. Ae le’i i ai i tofiga mo le olaga atoa i le Ekalesia, sa ou femalagaa’i solo mo la’u kamupani. Sa umi se taimi na ou oo ai i nofoaga mamao i le lalolagi. I le faaiuga o lo’u aso, po o fea lava ou te i ai, ou te vili ai lava i le fale. Pe a tali mai e lo’u toalua o Melanie le telefoni ma ou lipoti atu, o a ma talanoaga e taitai atu ai lava i ma’ua i taimi uma i le faailoaina “ou te alofa ia te oe.” O aso uma, o na upu e avea lava ma se taula i lo’u agaga ma la’u amio; o na upu o se puipuiga ia te a’u mai fuafuaga leaga. “Melanie, ou te alofa ia te oe” e faamatala ai le faatuatuaga taua i lo ma va.

Sa masani ona fai mai Peresitene Thomas S. Monson, “O loo i ai vae e faatutu, o lima e u’u mai, o mafaufau e faamalosiau, o loto ia musuia, ma agaga e laveai.”³⁰ O le fai atu “faafetai lava,” “Ou te faatoese atu,” “Ou te alofa ia te oe” o le a faia lena lava mea.

Uso e ma tuafafine, e taua upu.

Ou te folafola atu afai tatou te “taumamafa i afioga a Keriso”³¹ ia e taitai atu i le faaolataga, upu a lo tatou perofeta e taiala ma faamalosiau ai i tatou, ma a tatou lava upu e iloa ai po o ai i tatou atoa ai ma mea e pele ia i tatou, o le a liligi mai mana o le lagi i o tatou luga. “O afioga a Keriso o le a ta’u mai ai ia te outou mea uma e tatau ona outou faia.”³² O i tatou o fanau a le Tama Faalelagi ma o Ia o lo tatou Atua, ma ua Ia faamoemoeina i tatou ia tautatala i “gagana a agelu”³³ e ala i le mana o le Agaga Paia.³⁴

Ou te alofa i le Alii o Iesu Keriso. I upu a le perofeta o le Feagaiga Tuai o Isaia, o [Iesu] e “Ofoofogia, o le Faipule, O le Atua Malosi Aoao, O le Tamā Faavavau, O le Alii o le Filemu.”³⁵ Ma e pei ona faamanino mai e le Aposetolo o Ioane, o Iesu Keriso lava Ia “o le Upu.”³⁶

Ou te molimau atu ai i lenei mea o se Aposetolo ua valaauina i le galuega paia a le Alii—e folafola atu Lana upu— ma ua valaauina e tu o se molimau faapitoa ia te Ia. I le suafa o le Alii o Iesu Keriso, amene.