O Le A Lelei Mea Uma Ona o Feagaiga o le Malumalu

O’u uso e ma tuafafine pele, o lenei sauniga o le konafesi aoao mo a’u, o se taimi paia. Ou te faafetai mo tofiga e lauaga atu ai i le fia miliona o le Au Paia o Aso e Gata Ai ma a tatou uo i le lalolagi atoa. Ou te alofa ia te outou, ma ou te iloa e alofa le Alii ia te outou.

Pe a ma le 50 tausaga talu ai, sa ou maua ai le avanoa e auauna ai o se peresitene o le Kolisi o Ricks, i Rexburg, Idaho. I le taeao o le aso 5 o Iuni, 1976, sa ma tietie atu ai ma lo’u toalua o Kathy, mai Rexburg i le Malumalu o Idaho Falls e auai i le faamauga a se uo mamae. O le mea moni, faatasi ai ma se fanau tama laiti se toafa i lo ma aiga i lea taimi, e na o le pau le mea na mafai ai ona faataunuuina le ma malaga i le malumalu o le fesoasoani a se tausitama lototele! Sa ma tuua le ma fanau pele i lana tausiga ma faia se malaga puupuu e 30 minute.

O le ma aafiaga i totonu o le malumalu i lena aso sa matagofie, e pei lava ona masani ai. Peitai, i le mae’a ai o le faamauga o le malumalu—ma a o ma sauni e toefoi atu i le aiga—sa ma matauina le toatele o tagata faigaluega o le malumalu ma tagata ulu o loo talanoa ma le popole i le faapaologa o le malumalu. I ni nai minute, ae ta’u mai loa e se tasi o tagata faigaluega o le malumalu ia i ma’ua ua solo i lalo le Faatanoavai fou faato’a fauina i Idaho sasae! E silia ma le 80 piliona kalone (300 miliona mita kupita) o le vai ua tafe mai le faatanoavai ma alu i totonu o le 300 maila faatafafa (775 km faatafafa) o vanu tuaoi. O le tele o le aai o Rexburg ua lilofia i le vai, faatasi ai ma fale ma taavale ua tafefea i le lologa. Na faafuasei ona leai ni fale o le lua vaetolu o aiga e 9,000 o le aai.¹

E pei ona outou ono mafaufauina, sa vave ona liliu atu o ma manatu ma popolega i le saogalemu o le ma fanau pele, le faitau selau o tamaiti aoga ma faiaoga o le kolisi, ma se nuu sa ma alolofa i ai. E itiiti ifo ma le 30 maila (50 km) lo ma mamao mai le aiga, ae o lea aso, ae lei taitai maua telefoni feaveai ma feau tusitusia, sa leai ma se auala ma te vave fesootai ai i le ma fanau, pe mafai foi ona ma tietie atu mai Idaho Falls e foi atu i Rexburg, ona ua tapunia uma alatele.

E na o le pau le ma filifiliga o le nonofo i le po i se faletalimalo i Idaho Falls. Sa ma tootutuli faatasi ma Kathy i le ma tamai potu o le faletalimalo ma aioi atu ma le lotomaualalo i le Tama Faalelagi mo le saogalemu o le ma fanau pele ma le faitau afe o isi ua aafia i le faalavelave matautia. Ou te manatua le savalivali solo o Kathy i luga o le fola i le vaveao ma le popole i si ana fanau. E ui i o’u lava popolega manino, ae sa mafai ona ou faafilemuina lo’u mafaufau ma ou moe ai.

Sa le’i umi ae fafagu a’u e la’u soa lelei e faavavau ma fai mai, “Hal, e mafai faapefea ona e moe i se taimi faapenei?”

Ona oo mai ai lea o nei upu ma le manino i lo’u loto ma le mafaufau. Sa ou fai atu i lo’u toalua: “Kathy, po o le a lava le taunuuga e oo i ai, o le a lelei mea uma ona o le malumalu. Ua tatou osia feagaiga ma le Atua ma ua faamauina o se aiga e faavavau.”

I lena taimi, sa peisea’i ua faamautu mai e le Agaga o le Alii i o ma loto ma mafaufau mea ua uma ona ma iloa e moni: o sauniga o faamauga, e na’o totonu o le maota o le Alii e maua ai ma e faatautaia e le pule tatau o le perisitua, ua fusia faatasi ai i ma’ua o se tane ma se ava, ma ua faamauina le ma fanau ia i ma’ua. Sa leai moni se mea e ao ai ona fefe, ma sa ma’ua faafetai mulimuli ane ina ua iloa sa saogalemu ma atalii.

Masalo o le saunoaga lenei mai ia Peresitene Thomas S. Monson ua sili ona faamatala ai mea na ma lagonaina ma Kathy i lena po lemafaagaloina. “Pe a tatou auai i le malumalu, e mafai ona oo mai ia te i tatou se maualuga o le faaleagaga ma se lagona o le filemu. … O le a tatou pu’eina ai le uiga moni o upu a le Faaola ina ua Ia fetalai: “Ou te tuuina atu ia te outou le [filemu]; o lo’u [filemu] ou te avatu ai ia te outou. … Aua le atuatuvale o outou loto aua foi tou te matatau [Ioane 14:27].’”²

Ua faamanuiaina lava a’u i le lagonaina o lena filemu i taimi uma ou te ulufale ai i le malumalu paia. Ou te manatua le aso muamua na ou savali atu ai i totonu o le Malumalu o Sate Leki. Sa avea a’u o se alii talavou.

Sa ou tilotilo i luga o le fa’alo paepae maualuga lea sa matua malamalama ai le potu ma toetoe foliga mai e peisea’i na matala atu i le lagi. Ma i lena lava taimi, na oo mai se manatu i lo’u mafaufau i ni upu manino: “Sa ou i ai muamua i lenei nofoaga malamalama.” Ae na faafuasei ona oo mai i lo’u mafaufau, e le o lo’u leo, ia upu nei: “Leai, e te le’i i ai lava iinei muamua. O loo e manatuaina se taimi ae e te le’i fanau mai. Sa e i ai i se nofoaga paia e pei o lenei nofoaga lea e mafai ona afio mai i ai le Alii.”

Uso e ma tuafafine, ou te molimau atu ma le lotomaualalo pe a tatou auai i le malumalu, e mafai ona faamanatu mai ia i tatou le natura e faavavau o o tatou agaga, lo tatou sootaga ma le Tama ma Lona Alo paia, ma lo tatou faanaunauga silisili ia toefoi atu i lo tatou aiga faalelagi.

I saunoaga talu ai nei o konafesi aoao, na aoao mai ai Peresitene Russell M. Nelson:

“O le nofoaga sili ona saogalemu e i ai faaleagaga o le ola lea i totonu o au feagaiga o le malumalu!”

Omea uma tatou te talitonu i ai ma folafolaga uma ua faia e le Atua i Lona nuu o le feagaiga e o mai faatasi i totonu o le malumalu.”³

O tagata taitoatasi e osia feagaiga … i totonu o malumalu—ma tausi i ai—ua faateleina le avanoa e maua ai le mana o Iesu Keriso.”⁴

Na ia aoao mai foi e faapea, “o le taimi lava tatou te osia ai se feagaiga ma le Atua, tatou te o ese ai loa e faavavau mai le faalotolotolua. O le a le lafoaia e le Atua Lana sootaga ma i latou o e na faia se sootaga ma Ia. O le mea moni, o i latou uma ua osia se feagaiga ma le Atua e mafai ona maua se ituaiga faapitoa o le alofa ma le alofa mutimutivale.”⁵

I lalo o le taitaiga musuia a Peresitene Nelson, ua faatelevave ai e le Alii ma o le a faaauau pea ona faatelevaveina le fausiaina o malumalu i le lalolagi atoa. O lenei mea o le a maua ai e fanau uma a le Atua le avanoa e maua ai sauniga o le faaolataga ma le faaeaga ma ia osia ma tausia ai feagaiga paia. O le agavaa e osia feagaiga paia e le o se taumafaiga mo na’o se taimi se tasi ae o se mamanu o le olaga atoa. Ua fetalai mai le Alii o le a manaomia ai lo tatou loto atoa, manatu, mafaufau ma le malosi atoa.⁶

O le auai soo i sauniga o le malumalu e mafai ona fatua’i ai se mamanu o le tuuto i le Alii. A e tausia au feagaiga o le malumalu ma manatuaina, ua e valaauliaina le mafutaga a le Agaga Paia e faamalosia ma faamamaina oe.

Ona mafai lea ona e lagonaina se lagona o le malamalama ma le faamoemoe o molimau mai i le moni o folafolaga. O le a oo ina e iloa o feagaiga uma ma le Atua o se avanoa e latalata atili atu ai ia te Ia, lea o le a fatu ai se manao i lou loto e tausi i feagaiga o le malumalu.

Ua folafola mai ia i tatou, “Ona o la tatou feagaiga ma le Atua, o le a lē faavaivai ai lava o Ia i Ana taumafaiga e fesoasoani mai ia i tatou, ma o le a tatou le faavaivaia lava Lona onosai mutimutivale ia i tatou.”⁷

E ala i feagaiga o faamauga i totonu o malumalu e mafai ai ona tatou mauaina le faamautinoaga o sootaga alofa faaleaiga lea o le a faaauau pea pe a mavae le oti ma tumau ai mo le faavavau. O le faamamaluina o feagaiga o faaipoipoga ma aiga e osia i totonu o malumalu o le Atua, o le a maua ai le puipuiga mai le leaga o le manatu faapito ma le faamaualuga.

O le popole faifai pea o uso ma tuafafine mo le tasi ma le isi e faato’a oo mai i ni taumafaiga tumau e taitai lou aiga i le ala a le Alii. Tuu atu i fanau ni avanoa e tatalo ai mo le tasi ma le isi. Ia vave ona iloatino le amataga o feeseeseaiga, ma ia aloaia lelei ni faatinoga o auaunaga le manatu faapito, aemaise lava i le tasi ma le isi. Pe a tatalo uso ma tuafafine mo le tasi ma le isi ma feauaunaa’i, o le a faamalūlūina ia loto ma liliu atu i le tasi ma le isi ma i o latou matua.

I se vaega, o le mea lena o loo faamatalaina mai e Malaki e pei ona ia valo’ia le oo mai o le perofeta o Elia: “O le a ia totoina i loto o fanau folafolaga na faia i tamā, ma o le a liliu atu loto o fanau i o latou tamā. Afai e lē faapea, o le a faaumatia atoa le lalolagi i lona afio mai.”⁸

O tofotofoga, luitau, ma lototiga o le a mautinoa lava e oo mai ia i tatou uma. E leai se tasi o i tatou e sao mai “mea matuitui o le tino.”⁹ Ae, pe a tatou auai i le malumalu ma manatua a tatou feagaiga, e mafai ona tatou saunia e maua se taitaiga patino mai le Alii.

Ina ua ma faaipoipo ma Kathy ma faamauina i le Malumalu o Logan Iuta, o Elder Spencer W. Kimball na faatinoina le ma faamauga i lena taimi. I ni nai upu sa ia saunoa ai, sa ia tuuina mai ai le fautuaga lenei: “Hal ma Kathy, ola ai aua pe a oo mai le valaau, e mafai ona e savali ese atu ma le faigofie.”

I le amataga, ma te le’i malamalama po o le a le uiga o lena fautuaga mo i ma’ua, ae sa ma faia le mea sili na ma mafaia e ola ai i o ma olaga i se ala faapena na ma saunia ai e auauna atu i le Alii ina ua oo mai le valaau. Ina ua mavae ona ma faaipoipo mo le toeitiiti 10 tausaga, sa oo mai se valaau sa le’i faamoemoeina mai le Komesina o Aoga a le Ekalesia, o Neal A. Maxwell.

O le fautuaga alofa na tuuina mai e Peresitene Kimball i totonu o le malumalu ina ia mafai ona “savali ese atu ma le faigofie” ua tino mai. Sa ma maua ma Kathy se valaau e tuua se mea sa foliga mai o se tulaga sololelei faaleaiga i Kalefonia ina ia auauna atu i se tofiga ma i se nofoaga ou te le iloa se mea e uiga i ai. Peitai, sa saunia lo matou aiga e tuua ona o se perofeta, i totonu o se malumalu paia, o se nofoaga o faaaliga, sa vaai i se mea e tupu i le lumanai lea na matou saunia i ai.

O’u uso e ma tuafafine, ou te molimau atu e leai se isi mea e taua atu nai lo le faamamaluina o feagaiga ua outou osia pe o le a osia i totonu o le malumalu. Po o fea lava o e i ai i luga o le ala o feagaiga, ou te uunaia oe ia ta’uaogaina ma agavaa e auai i le malumalu. Asiasi soo i ai pe a faatagaina ai e tulaga. Osia ma tausia feagaiga paia ma le Atua. E mafai ona ou faamautinoa atu ia te outou lea lava upumoni e tasi na ou faasoaina ia Kathy i le vaeluapo toeitiiti limasefulu tausaga talu ai i totonu o se tamai potu o se faletalimalo i Idaho Falls: “Po o le a lava le taunuuga e oo i ai, o le a lelei mea uma ona o feagaiga o le malumalu.”

Ou te tuu atu ia te outou la’u molimau mautinoa o Iesu o le Keriso. O loo soifua o Ia ma taitaia Lana Ekalesia. O malumalu o maota o le Alii. O Peresitene Russell M. Nelson o le perofeta soifua a le Atua i le lalolagi. Ou te alofa ia te ia, ma ou te alofa ia te outou uma. I le suafa paia o Iesu Keriso, amene.