Ia Tasi ma Keriso

Sa loloto o’u lagona e uiga i le Togiola a Iesu Keriso a o fai si o’u talavou, ae o le moni o le Togiola a le Faaola na oo sa’o mai i lo’u loto ina ua 25 ou tausaga. Na faatoa ou faauu mai le Aoga Faaloia i Stanford ma sa ou suesue mo le suega e avea ai ma se loia i Kalefonia. Na valaau mai lo’u tina ma fai mai, ua vaivai lo’u tamamatua o Crozier Kimball, o lē sa nofo i Iuta. Sa fai mai o ia, afai e te fia vaai ia te ia, e sili ona e sau i le fale. O lo’u tamamatua sa 86 ona tausaga ma sa ma’i tigaina lava. Sa ou maua se asiasiga matagofie tele. Sa fiafia lava o ia e vaai mai ia te a’u ma faasoa mai lana molimau ia te a’u.

Ina o faatoa tolu tausaga le matua o Crozier, na maliu ai lona tamā, o David Patten Kimball, i le 44 o ona tausaga.¹ Sa faamoemoe Crozier o le a talia e lona tamā, ma lona tamamatua o Heber C. Kimball lona olaga ma sa manatu o ia sa faamaoni o ia i lona tupuaga.

O le fautuaga sili ona taua a lo’u tamamatua ia te a’u o le aloese lea mai soo se manatu o le agavaa mo ni faiga faapitoa po o ni avanoa ona o nei tuaa faamaoni. Sa ia fai mai ia te au, o lo’u taulaiga e tatau ona i luga o le Faaola ma le Togiola a le Faaola. Na fai mai o ia, o i tatou uma o fanau a se Tama Faalelagi alofa. E tusa lava po o ai o tatou tuaa faalelalolagi, o le a taitoatasi ona tatou lipoti atu i le Faaola i le lelei sa tatou tausia ai Ana poloaiga.

Sa faatatau tamamatua i le Faaola o le “Leoleo o le Faitotoa,” e faasino i le 2 Nifae 9:41. Sa ia fai mai ia te au, e faamoemoe ua lava lona salamo e agavaa ai mo le alofa mutimutivale o le Faaola.²

Sa ou matuai ootia lava. Sa ou iloa o ia o se tagata amiotonu. Sa avea o ia o se peteriaka ma sa auauna atu i ni nai misiona. Sa ia aoaoina a’u, e leai se tasi e mafai ona foi atu i le Atua e ala i na’o galuega lelei e aunoa ma faamanuiaga o le Togiola a le Faaola. O loo ou manatua lava e oo mai i le asō le alofa ma le talisapaia maoae e Tamamatua o le Faaola ma Lana Togiola.

I le 2019 i le taimi o se tofiga i Ierusalema,³ Sa ou asiasi ai i se afeafe pito a luga lea atonu na fai ma tulaga lea na mulumulu ai e le Faaola ia vae o Ona Aposetolo a o lei Faasatauroina o Ia. Sa ootia a’u faaleagaga ma mafaufau ai i Lona poloaiina o Ona Aposetolo ina ia fealofani.

Ou te manatua le tatalo o le faatoga lea na augani ai le Faaola e fai ma o tatou sui. O lenei tatalo sa tupu moni i taimi faaiu o Lona soifuaga i le olaga nei e pei ona tusiaina i le Tusi a Ioane.

O lenei tatalo sa taulai atu i soo o Keriso, e aofia ai ma i tatou uma.⁴ O le talosaga a le Faaola i Lona Tama, sa Ia aioi ai “ina ia tasi i latou uma, faapei o oe le Tama o i totonu ia te a’u, o a’u foi o i totonu ia te oe, ina ia tasi i latou i totonu ia te i taua.” Ona faaauau lea o le Faaola, “O le manuia foi ua e foai mai ia te a’u, ua ou foai atu ia te i latou, ina ia tasi o i latou, faapei o i taua ua tasi.”⁵ O le Tasi o le mea lea na tatalo ai Keriso a o lumanai Lona faalataina ma le Faasatauroga. O le tasi ma Keriso ma lo tatou Tama Faalelagi e mafai ona maua e ala i le Togiola a le Faaola.

E le faalagolago le laveaiga mutimutivale a le Alii i luga o le tupuaga, aoaoga, tulaga faaletamaoaiga, po o le ituaiga tagata. E faavae i le tasi ma Keriso ma Ana poloaiga.

Na maua e le Perofeta o Iosefa Samita ma Oliva Kaotui le faaaliga i le faatulagaga ma le taitaiga o le Ekalesia i le 1830, a o lei leva ona faavaeina le Ekalesia. O le mea ua avea nei ma vaega e 20 sa faitauina e le Perofeta o Iosefa Samita i le konafesi muamua a le Ekalesia ma o le faaaliga muamua lea sa faamaonia e ala i le maliega autasi.⁶

O le anotusi o lenei faaaliga e mata’ina moni lava. Ua aoao mai i tatou i le taua ma le matafaioi o le Togiola a le Faaola ma auala e maua ai Lona mana ma faamanuiaga e ala i Lana togiola alofa tunoa. Sa 24 tausaga o le Perofeta o Iosefa ma na uma ona ia mauaina le tele o faaaliga ma faamaeaina le faaliliuga o le Tusi a Mamona e ala i le meaalofa ma le mana o le Atua. Ua faailoaina uma Iosefa ma Oliva o ni Aposetolo faauuina, ma ua faapea ona i ai le pule e pulefaamalumalu ai i le Ekalesia.

O fuaiupu 17 e oo i le 36 o loo i ai se aotelega o aoaoga faavae taua o le Ekalesia, e aofia ai le moni o le Atua, le Foafoaga o le tagata, le Pa’ū, ma le ata o le faaolataga a le Tama Faalelagi e ala i le Togiola a Iesu Keriso. O le fuaiupu 37 o loo i ai tulaga taua e manaomia mo le papatisoga i totonu o le Ekalesia a le Alii. O fuaiupu 75 e oo i le 79 o loo faatulaga mai ai tatalo o le faamanatuga tatou te faaaogaina i Sapati uma lava.

O aoaoga faavae, mataupu faavae, faamanatuga, ma faiga ua faatuina e le Alii e ala mai ia Iosefa Samita, le Perofeta o le Toefuataiga, e musuia moni lava.⁷

E ui ina loloto, tulaga e manaomia mo le papatisoga, ae e tulagaese le faigofie. E matele lava ina aofia ai le faamaualalo i luma o le Atua, se loto momomo ma le agaga salamo,⁸ salamo i agasala uma, tauave i o tatou luga le suafa o Iesu Keriso, tumau e oo i le iuga, ma le faaali atu e ala i a tatou galuega ua tatou mauaina le Agaga o Keriso.⁹

O le mea taua o tulaga uma e agavaa ai mo le papatisoga e faaleagaga. E le manaomia ai le mauaina o ni tulaga faaletamaoaiga pe faaleagafesootai. E tutusa lava tulaga manaomia faaleagaga e le tagata mativa ma le tagata mauoa.

E leai foi ni tulaga manaomia o le ituaiga tagata, itupa, pe faaleaganuu. Ua faamanino mai i le Tusi a Mamona e faapea, ua valaaulia tagata uma e tofo i le agalelei o le Alii, “uliuli pe paepae, e pologa pe saoloto, o tane ma fafine; … ua tutusa tagata uma i le Atua.”¹⁰ “Ua aiā tagata uma o le tasi e pei o le isi, ma ua leai se tasi ua faasaina.”¹¹

I le manatu ai i le tatou “tutusa” i luma o le Atua, e leai la se uiga e faamamafa ai o tatou eseesega. Ua uunaia sese i tatou e ni isi “ia vaai faalemafaufau i tagata ia sili atu ona ese mai ia i tatou ma mai i le tasi ma le isi nai lo tagata moni e i ai i latou. O [ni isi] latou te ave eseesega moni ae laiti, ma fai o ni eseesega ogaoga i le va o tagata.”¹²

Ma le isi, o ni isi ua i ai manatu sese e faapea, ona ua valaaulia tagata uma ia maua Lona agalelei ma le ola e faavavau, o lea ua leai ai ni tulaga manaomia o amioga [e tatau ona tatou amio ai].¹³

Peitai, ua faamaonia mai i tusitusiga paia, o tagata uma e mafai ona tali atu [mo i latou lava] e manaomia ona salamo i agasala ma tausi Ana poloaiga.¹⁴ Ua faamanino mai e le Alii, ua i ai i tagata uma le tomai e fai ai filifiliga lelei ma “ua latou saoloto e filifili le saolotoga ma le ola e faavavau, e ala i le Puluvaga sili o tagata uma, … ma faalogo i ana poloaiga silisili; ma faamaoni i ana afioga, ma filifili le ola e faavavau.”¹⁵ Ina ia maua faamanuiaga o le Togiola a le Faaola, e ao ona tatou faaaoga lelei o tatou tomai e fai ai filifiliga lelei e filifili ai Keriso ma usitai i Ana poloaiga.

I le aluga o lo’u olaga, sa vailiiliina ma finauina ai le uiga o le “faitalia” ma le “loto saoloto”. Ua tele ma o loo faaauau pea ona tele finauga atamai e uiga i nei autu.

I le faavaa lata mai nei o se lomiga a se iunivesite iloga, na folafola mai ai e se polofesa o mea ola [paiolo], “E leai se avanoa mo le loto saoloto.”¹⁶ E le o se mea e faateia ai, na sii mai le saunoaga a le polofesa i le tusiga e faapea, “E leai se mea e ta’u o se Atua, … ma e leai se loto saoloto, ma o se atulaulau telē lenei, e ese, ma gaogao.”¹⁷ Ou te matuai le ioe lava i ai.

O se aoaoga faavae autu o lo tatou faatuatuaga o le, e i ai lo tatou tomai e fai ai filifiliga lelei,¹⁸ lea e aofia ai le loto saoloto.¹⁹ O le faitalia o le tomai lea e filifili ai ma faatino. O se mea e tatau ai i le ata o le faaolataga. A aunoa ma le tomai e fai ai filifiliga lelei, e le mafai ona tatou aoao, alualu i luma, pe filifili ia tasi ma Keriso Ona o le tomai e fai ai filifiliga lelei, ua tatou “saoloto e filifili le saolotoga ma le ola e faavavau.”²⁰ I le Fono i le Lagi i le muai olaga, sa aofia ai le faitalia o se elemene e tatau ai i le fuafuaga a le Tama. Sa faatuiese Lusifelo ma “saili e faaumatia le saolotoga o le tagata.”²¹ E tusa ai ma lena, sa le maua ai e Satani ma i latou sa mulimuli ia te ia le avanoa o le mauaina o se tino faitino.

Sa faaalia e isi agaga i le muai olaga o latou faitalia i le mulimuli i le fuafuaga a le Tama Faalelagi. O agaga na faamanuiaina i le fananau mai i lenei olaga faitino e faaauau pea ona i ai lea faitalia. Tatou te saoloto e filifili ma faatino, ae tatou te le pulea ia taunuuga. “O filifiliga e lelei ma amiotonu e taitai atu ai i le fiafia, filemu ma le ola e faavavau ae o filifiliga e agasala ma amioleaga o le a iu ina taitai atu i le lototiga ma le le fiafia.”²² E pei ona fai mai Alema “E lei avea lava le amioleaga ma fiafia.”²³

I lenei lalolagi matuai faatautavā tele, o loo i ai lava se taumafaiga faifaipea ia silisili ona lelei. O le tauiviga ia avea ma tagata sili ona lelei e mafai ona avea ai i tatou, o se taumafaiga amiotonu ma aoga. E ogatasi lea ma le aoaoga faavae a le Alii. O taumafaiga e taufaatauvaa pe faitio i isi pe fatu ni papupuni i lo latou manuia, ua feteenai lea i le aoaoga faavae a Keriso. E le mafai ona tatou tuuaia tulaga po o isi mo se faaiuga ia faafeagai faatinoga i poloaiga a le Atua.

I le lalolagi i ona po nei, ua faigofie ona taulai i mea o le lalolagi ma le manuia faalegaluega. O ni isi ua le toe gauai atu i mataupu faavae ma filifiliga e faavavau lea e i ai se taua e faavavau. O le a tatou atamamai e mulimuli i le fautuaga a Peresitene Russell M. Nelson e “mafaufau faaselesitila.”²⁴

E toetoe o tagata uma e mafai ona faia filifiliga e aupito sili ona taua, e tusa lava po o a taleni, tomai, avanoa, po o tulaga faaletamaoaiga. O se faamamafa i le tuuina o le faamuamua i filifiliga a le aiga e taua lea. O loo manino lenei mea i tusitusiga paia. Mafaufau i le tala i le 1 Nifae lea “ua te’a atu Liae i le vao. Ua na tuua lona fale ma le fanua o lona tofi, ma lana auro ma lana ario ma ana mea taua, ma ua le ave se mea e tasi ma ia, ua na o lona auaiga.”²⁵

A o tatou feagai ma fesuiaiga o le olaga, e tele mea e tutupu e faaleai pe le oo foi i ai la tatou pule. O luitau o le ola maloloina ma faalavelave faafuasei e mautinoa lava e mafai ona fetaui i le vaega lea. O le faama’i talu ai nei o le KOVITI-19 ua matua aafia ai lava tagata sa sa’o mea uma na latou faia. Mo filifiliga e aupito sili ona taua, e mafai ona tatou pulea. I le toe tepa i tua i ou aso o se faifeautalai, sa faia ai e Elder Marion D. Hanks o le peresitene o le matou misiona, ia matou taulotoina se vaega o se solo na tusia e Ella Wheeler Wilcox:

E uiga i faafitauli o mataupu faavae, o le amio, tausiga faalelotu, ma le ola amiotonu, o i tatou e pulea. O lo tatou faatuatua i le, ma le tapuai i le Atua le Tama ma Lona Alo o Iesu Keriso, o se filifiliga lea tatou te faia.²⁷

Faamolemole ia malamalama ou te le o fai atu ia itiiti le fiafia i le aotauina po o galuega. O le mea lea ou te fai atu ai, a sili atu le maualuga o taumafaiga e faatatau i le aotauina ma galuega nai lo le aiga po o le ia tasi ma Keriso, o taunuuga e lei faamoemoeina e mafai ona matuai le manaia lava.

O le aoaoga faavae manino ma faigofie ua faatulaga mai i le Mataupu Faavae ma Feagaiga 20 e faagaeetia ma lautele ao ia faamalosia ma faamaninoa manatu faavae paia faaleagaga. Ua aoao mai faapea o le faaolataga e oo mai a o tauamiotonu ma faapaia e Iesu Keriso agaga ua salamo ona o le alofa tunoa o le Faaola.²⁸ Na te faataatiaina le tulaga mo le matafaioi tulaga ese o Lana Togiola.

E tatau ona tatou tauivi ia faaaofia isi i lo tatou li’o o le tasi. Afai o le a tatou mulimuli i le apoapoaiga a Peresitene Russell M. Nelson e faapotopoto mai Isaraelu ua faatapeapeina i itu uma o le veli, e tatau la ona tatou faaaofia ai isi i lo tatou li’o o le tasi. E pei ona aoaoina mai ma le matagofie e Peresitene Nelson: “I konetineta uma ma i atumotu o le sami, ua faapotopotoina ai tagata faamaoni i le Ekalesia a Iesu Keriso o le Au Paia o Aso e Gata Ai. O eseesega i aganuu, gagana, itupa, ituaiga, ma tagatanuu e galoma atu i le le faatauaina a o ulufale atu tagata faamaoni i le ala o feagaiga ma o mai i lo tatou Togiola pele.”²⁹

Ua tuufaatasia i tatou e ala i lo tatou alolofa ma le faatuatua ia Iesu Keriso ma le avea ai o ni fanau a se Tama Faalelagi alofa. O le ute o le avea moni ma ni ō o le tasi lea ma Keriso. O sauniga o le papatisoga ma le faamanatuga ua tuuina mai i le Mataupu Faavae ma Feagaiga 20, faatasi ai ma a tatou feagaiga o le malumalu, ua tuufaatasia ai i tatou i ni auala faapitoa ma mafai ai ona tatou tasi i auala uma e faavavau le taua, ma ia ola i le filemu ma le lotogatasi.

Ou te tuu atu lau molimau mautu ma le mautinoa o loo soifua Iesu Keriso, ma ona o Lana Togiola, e mafai ai ona tatou tasi ma Keriso. I le suafa paia o Iesu Keriso, amene.