M’ag ni fini riyul’ u dakean Yesus Kristus

Pi walageg, gube meybil ni gadad ra gelnag e ya’el rodad u fithik’ e milwol ko fapi tiyugang’ ko biney e weekend ngad falfalaen’gad u lane pi’nen niyibe yoeg “m’ag ni fini riyul’ u dakean Yesus Kristus.” Pi’ney nib riyul’ nib t’uf ninge pegan’dad ngay e tawa’ath rok Got nike micheg nag ko pi’in nima tayfan fapi m’ag rorad nib t’uf nifan e magawon ko tiney e rran rodad.

Fare na’un rok Somoel nin toey nib be’ech u dakean e fayleng, u tanggin fare gagiyeg ko President Russell M. Nelson, nike pii’ e falfalaen’ nib ga’ u fithik’ e chongin ko Galasia nge dagreb e pow nib ga’ ko fare tugul rok’ e gil’ilungun Somoel.

Ug lem nag mornga’agen boche pi’nen nike buch ngog napan nigu maybil ko fare Feather River California Temple u October ni dawri n’uw napan, kug lemnag fa’anra gadad ma lemnag nibay e yo’or mornga’agen e falfalaen’ nibachane bay reb e temple nib bi’ech u lane community rodad magdad be pagtalin fan nib thothup ko fapi m’ag nib thothup ni kan fal’eg u lan fare temple.

Bay fare bugithin e lan doewngin fare temple nibe ga’ar: “Thothup ngak Somoel.”¹ Fapi thin ma dag nib moem e be pinning napan gadad ma yan u lan fare na’un rok’ Somoel, ma’u dared u dakaen e milekag nib thothup ni ngad fil’ed u rogon gadad ra ga’nag dad ngad manged gachelpen rok’ Kristus nib mangil. Napan gadad be fal’eg e pi m’ag u lan e thothup rodad u p’oewchen Got ma ba’adag ni ngad leak’ed fare Tathapeg, gadad ma thapeged e gelngin ni ngad thileged e gum’ircha’dad, gel nag e ya’el rodad, me ga’ nag e thaa’ rodad Ngak. Pi ngongol ney e ma fek e bi’ech ngak e ya’el rodad nge sunmiy e thaa’ nib thothup ngak Got nge Yesus Kristus, ni yow ma michmicheg ni gadad ra thapeg fare tawa’ath ko yafos ni manechubog.² Pi’nen nima buch nibachane e milekag e ma pii’ ngodad e pagan’nuy nib thothup nib ga’ nifan gubin e rran rodad ulan e pi m’ag nikad fal’eged udakaen’ Yesus Kristus.

Pagan’dad ngak e ir e thabi ga’ ko thaa’ rodad nib thothup ngak’ Got e ir ma ayuwegdad me ba ba’adag ningad pi’ed e magar rodad ni fan Yesus Kristus nge bayul ni maligach Rok’. Me gelnagdad ni ngad t’ufeged ngad pigpig gad ngak kuboech e girdii’’, me gelnag e ya’el rodad ni ngad pared ulan e feylang nib nibga’ e milmor nge kireb riy. Me pii’ athamgil ngodad ni ngad gelniged e maerwaer nge mulmulan’uy, rus nge puwaen’, amith ko gum’ircha’ey nge kirbaen’ fare to’ogor ma guy rogon ni nge tay ulan e gum’ircha’dad napan rib mo’owaw’ e yafos, sikeng ni rib polo’, fa rib mo’omaw’ boch binen’. Bayreb e verse ulan fare bible nibe pii’ e ayuw ngodad napan gadad ba fek e magawon u feylang: “Ere dabi mulan’med ngu’um pired nib pagan’med.”³

Pi walageg, pi’in nira thapeged e pagan’ ni fan e pi m’ag nima fal’eg u lan fare na’un rok’ Somoel u dakaen Yesus Kristus e be thapeged ta’areb ko boech e gelngin nib thabi ga’ ni ngad thapeged ulan e biney e yafos.

Napan ni gadad be bi’eg fare Babyor ku Mormon u lan ea Moy, Mu Leakeg biney e duw, kad guyed rogon ni Nephi ea ke dag ngodad e gelngin rok ko m’ag u dakaen e mich rok’ napan ni ke fek e magawon nge sikeng napan ke guy rogon ni nge thapeg e fapi plate ni motochiyel rok fare Somoel. Nephi, dariy’ fan e kirbaen’ rok’ bachane buchuw e mich rorow Laman nge Lemuel, ii pegaen’ somoel ninge pii’ fapi plate ngorad. Ke gaʼar ngak e pi walagen, “Woed nib fos Somoel, nge woed ni gaed ba fos, ma dab da suloed ngakʼ e chitamangdaed nga wuruʼ e binaw nge yaeni madaʼ ko ngiyalʼ ni ke yog ni ngad muguʼuliyed e pinʼen ni ke motochiyel nag Somoel ngodaed.”⁴ Bachane e pagan’ rok’ Nephi ko pi michmicheg rok’ Somoel, ma ke rrin’ e pi’nen ni motochiyel nag Somoel ngak.⁵ Tomuren, ulan fare lik’aay, Nephi e guy gelngin fan e pagan’ roek, nike yoloey, “Gag, Nephi, kug guy fare gelingin fare Saaf ku Got, ni yibi aw nga dakean chongin e galasia rokʼ fare Saaf, ngo dakean fapi gidiiʼ rokʼ Somoel ni kar longbiyed yaed ko felʼ u gelingin Got u fithikʼ e rir.”⁶

Kug sap ko pi micheg nge gelngin rok’ Somoel nibe yib ulan e yafos roraed ko bitir ku Got, me gelnag raed ni ngar thapeged e magawon ko yafos. Bay reb e rran ni yib e pin roeg nga tabinaw ko temple niyan ngay ko maybil nibe yoeg ngog nike thamiy binen’ ni rib gel nib almarin u roem. Napan ni ke yaen u langgin fare na’un rok’ Somoel, ni ke guy e pumo’on u lan e wheelchiya’ ni ke yaen u buut nib saasag’al nge rib mo’omaw’ ni nge yaen u buut’ e bpin nibay e sog rok, yow ba’adag ni ngar bow ngar liyor nigew fare Somoel u lan e na’un Rok’. Napan e la’ngig e yib u lan e seenggil ko initiatory, me guy e bpin ni kemus nibay paa’ ni ta’areb—nge reb paa’ nikemus nibay ta’abang riy —u fithik’ e murwel nibfel’ ya’an nike rrin’ demtrug e ngongol nikan pii’ ngak.

Napan e le’ngig nge gag kug sabathin gow mornga’agen e pi’nen ni ke buch, kug lem nag ni kemus e pagan’ nib machalbog u lan e pi tawa’ath nib manechubog rok’ Got ni ma pii’ u dakaen’ e pi m’ag nib thothup kug fal’eged u lan e na’un Rok’ ni ke pii’ e fan ngak e pi gachelpen ney nib fel’ rogon rok’ Kristus ni kar digeyed e na’un rorad u rran nem nib garbeb, ni dariy’ fan e magawon rorad.

Pi fagar nib t’uf rog, fa’an bay ta’areb e banen gadad ra thapeg—nge ta’areb e ba’nen rayog ni ngad pii’ed ngak e bitir nge bitir ko bitir rodad ni ra ayuweg gubin rad u lan e pi sikeng nge mo’omaw’—ir e pagaen’ u lan e pi m’ag ni ma fal’eg u fithik’ Yesus Kristus. Suwey fare banen ni ra ayuwegrad ni ngar fasgad woed e Somoel ni ke michmicheg e gachalpen Rok’: Gachalpen rog nima sakiy nga lang u yang nib thothup, nge dabi miith.⁷

Uw rogon ni ngad thapeged e pagaen’ ney u dakean Yesus Kristus? Ma yib ufithink’ e gum’aen, ma tay Tathapeg u lulukungun e yafos rodad, folgad e pi yang ko gospel ku Yesus Kristus, thapeged e gam’ing ko thap nge machalbog, nge ba’adag e pi m’ag gadad ma fal’eged ngak Got u lan e na’un Rok’.

U lan e tin tomur e thin rok’ ko October 2019 general conference, e profet rodad nib t’uf rodad ni ke pug u ran ngodad e yang nib ga’fan u mon gadad ra thapeged e pagaen’ ko m’ag, be ga’ar: “Thothup nag rom ni ngam yib u lan fare na’un rok Somoel t’uf e ta’ermadley ko ya’el. … Thothup nag ku bee’ t’uf gubin e thil’yeg ko tafney nge gum’ircha’ey ni be ang boed Somoel, me yoeg tin mangil, mang e susun nib fel’, nge thothup nagem.”⁸ Ere, fa’an gadad ra thilyeg e t’aer midlen rodad ni ngad dared u lan e temple, gadad ra thilyeg e pi’nen ni ra buch u lan e temple, ni ra thilyeg e yafos rodad u wuru’ fare temple. Me arame ra gelnag e laniyaen’ med u p’oewchen Got; nge fare machib ko fare priesthood ra yib ngomed nib buch’uw nge buch’uw.⁹

Bay ba bishop ni gumnang e ma yoeg ni class ko primary nifan e ilal e gathi kemus ni “primary” ya woed e class ko “t’aer midlen ko temple.” U lan ea January fare bishop ney me pinning e chongin ko klass ney nge fapi sensey ni ra yib nga office rok’ nima weliy u rogon ni ngar t’aer midlen rad u fithik’ bugin e duw ni ngar ranoed u lan e temple. Fare bishop me weliy ko gubin e pi duwer ko fare temple recommend interview, ni tay e bu’un nem u lan e pi fil ko Primary. Me pinning e bitir ni yad ra t’aer midlen ngorad ere napan yad ra yib ko office rok’ bin magid e duw, yad ra thapeged e pagaen’ ko m’ag, nge ba’adag ni ngar thapeged e temple recommend nge yib u lan e na’un rok’ Somoel. Biney e duw bay aningeg e bitir nib pin ni kar ba’adag, t’aer midlen, nge pagaen’ rad ni kar yaen gad u lan fare temple ni kar ba’adag fare bishop ni ke print nag e pi recommend rorad u lan e New Year’s Day u 12:01 a.m.

T’aer midlen ir gathi ni fan e bee’ ni ra yaen nga temple ko bin somm’on e yay. Gadad gubin thingarda t’aer midlen gaad ni ngad dared ko na’un rok Somoel. Ta’areb e stake ke thapeged e thin ni “Lem nag morunga’agen e na’un, thapeg e ayuweg ko Galasia, nge dared nga temple.” Dared¹⁰ ir e thin nib mangil ni ba yip’ fan nira lemnag morunga’agen e tafen ni ra yib. Ere napan ngad dared nga lan fareƒ temple min m’ag dad ngak fare Tathapeg, me pii’ ngodad e tafen ni ngad yib nge pii’ ngodad e ayuweg napan ni ngad thapeged a pagaen’ ko m’ag u dakaen Yesus Kristus. Ere, gadad gubin thingar da fal’eged bin magid e appointment ko fare Somoel u lan e na’un nib thothup Rok’, dariy’fan fa’an bay e temple nib chuchugur fa palog.¹¹

Profet rodad, President Russell M. Nelson, e ii pagowran ngodad e mornga’agen e kenggin ni ii yog: “Fare temple e ir e bay ni’ir e lukungun e tin nibe gel nag e mich nge thothup rodaed ya bachan fare Tathapeg nge machib Rok’ e bay ni’ir e gum’ircha’en fare temple. Gubin ban’en ni yibe fil u temple, rogon ni yibe fanow nag nge tin nibe yib u dakean e Ya’el, e be ga’nag e na’ab rodaed ngak Yesus Kristus. Fapi gam’ing Rok nib tu’uf e ma m’ag daed Ngak u dakean bugi micheg ko priesthood nib thothup. Ma arame, napan ni gadaed be fol ko fapi m’ag, ma bayi tawa’ath nagdaed ko golnag, me pi’ gelngindaed Rok. Nge oh, ni rib tu’uf gelngin ngodaed ko pi rran ni bayi yib nga mm’on.¹²

Fare Tathapeg ba’adag ni gadad ra t’aer midlen dad ni ngad nanged, nib gel, u rogon ni ngad ngongoliyed napan gadad ra fal’eg e m’ag ngak e chitamangdad nu tharmiy u dakaen e fithingan. Ir ba’adag ni ngad t’aer midlen dad ni ngad thapeged e tawa’ath, micheg, nge muruwel; ni ngad t’aer midlen dad ni ngad thapeged e ganop ko ya’el nifan e pi’nen gadad ba t’uf u yafos ney. Gu ma nang ni napan fare Somoel me sap e ba’adag nib achigchig fa tin nib mangil nib achigchig mornga’agen e ba’adag rodad ni ngad tay En u lulukungun e yafos rodad, nge u dakaen e pi gam’ing nge m’ag ni ngad fal’eged ulan e na’un Rok’, ir ma yibliy nagdad, ulan e rogon rok’ nib machalbog, ko pi ma’ang’ang nge murnguy gadad ba t’uf.

Rayog ni ngad thilyegdad u lan e rogon nib ga’ nib thothup u lan fare na’un rok Somoel. Ere, napan ni ma waen u wuru’ e temple, ni kam thilyegem bachane e athap rodad ko fare michmicheg ko fare m’ag, ni bay e gelngin u lang, gadad ma fek fare temple u lan e na’aun nge yafos rodad. Gube micheg ngomed fare Ya’el rok’ e na’un rok’ Somoel e ra’i thilyegmed, ni urngin.

Gadad ma nang bachane e temple ni fa’an gadad ba’adag fare Kan ni Thothup rok’ Somoel u lan e yafos rodad, ridabi kireb amithindad ngak bee’ ni demturug. Napan ni ngad tayed e thamey fa lemnag nib kireb ulan e gum’ircha’dad fa tafney ni ra sunmiy e thin nge ngongol nib kireb, u dakaen e social media fa u lan e na’un rodad, me palog fare Ya’el rok’ Somoel u gum’ircha’dad. Ere, dam palog e pagan’ romed, machane, mu gel nag e pagan’ romed.

Me yul’yul’ nge papay nag e sunmiy ko pi temple nira pii’ e falfalaen’, lem nag nge yibliy nagdad. Ere nib th’abi ga’fan, fa’an gadad ra thilyeg e t’aer midlen rodad ni ngad dared ulan e temple, gadad ra thilyeg e pi’nen nira buch u lan e temple, nira thilyeg e yafos rodad u wuru’ fare temple. Gu be athap e thilyeg ney ra sug ngodad to pagaen’ nifan e micheg nib thothup ni be fal’eg ngak Got u dakaen Yesus Kristus. Got ma fas, Yesus e ir e Tathapeg rodaed, ma iraray e Galasia rok’ nibe sulweg u fayleng. Gube yog e pin’en nib riyul’ u dakean fithingan Yesus Kristus, amen.