Fare Gelngin, nib Muchugbil ko fare Yalen ku Kristus

Boch e duw kafram, figirngig, i Ruth; nge fakmow nib bpin, Ashley; e gu uned ko ba milekag ni ngan kayak ko reb e state u Hawaii’ nibay nibang u Mariken. Kayak e bakan nga but’ ko ran, ni wod e fafat ni yima par nga dakean ni yib sap nga mm’on ni l’agruw raba’ ni yibe mamman riy. Susun ni nggu mamman gaed i yean nga mal’aey ko reb e donguch ma gamad sul biyay. Rib michuwun’ug ngay nrayag rog e biney ni bachan, e napan ni kab fel’yangreg, ma kug un ko mamman ko kayak u pi luul’ ulan e buruy. Ku lemnag nrayag rog e biney.

Facha’ ni’ir e be powi’iymad e yog rogon ni nggu yus niged fapi kayak. Tiney e kayak e ba thil ko tin ni’ug yus nag kakrom. Susun ni ngan par nga dakean fare kayak, gathi ngalan ggin. Napan nigu par ngalan fare kayak, ma gubay ni gub tolang ngalang ma dan gu macham ko biney, ma dani fel’ rogon e thethabil rog u daken e raen.

Napan nigu tabab gaed, mug mamman ni rib papay nggu thumur ngak Ruth nge Ashley. De n’uw napan, ngay ma kug palog rorow. Ma kari felfalaen’ug ko n’en ni kug rrin’, ere gu tal ko mamman mug son nag row. Reb e n’ew nib ga’ e yib—woed e 13 centimeters¹—ngabi aw nga barba’ ko kayak rog nge thikiyeg nga fithik’ e raen. Napan ni kug athamgil kug pingeg fare totang rog ma kug sul biyay nga dakean, ma Ruth nge Ashley e kar thumur gow ngog, ma kab balyang owcheg ni nggu mamman biyay. U mm’on nrayag ni nggu pogoffan biyay, maki yib reb e n’ew, ni rib ga’—woed ni 20 centimeters²ngabi aw biyay ko kayak rog nge thikiyeg biyay. Napan ni kug athamgil kug fal’ag rogon fare kayak, makari m’ay e pogofan rog ma kug rus ni dabkiyag rog ni nggu wan nga dakean fare kayak biyay.

Napan ni guyeg facha’, ni’ir e be powi’iy mad me yib ngog nge ayuweg neg, ni nge mom ngog ni nggu wan ngalan fare kayak. Napan ni guyeg ni ke m’ay e pogoffan rog, me yon’ reb e gaf ngog nifan e kayak rog me tabab ko mamman, nibe girngiyeg ni gube lay u tomur rok’. Fin arram e yag ni gu pogoffan mugu tabab i mamman rog ni yigo gag. Me pag fare gaf, fin arram e gu taw ko fare donguch ma dankun ayuweg neg ni bo’or yay. Napan ni ggu taw gaed, mu gub gu aw nga butt’, ni karug magaf.

Tomuren nike toffen gidii’en fare milekag, me ga’ar facha’ ngog ni’ir e be powi’iymad, “Mr. Renlund, fa’an gara ul’ul’ ngam mamman, ma damu tal, ma gube lemnag nrayag rom.” Mug rrin’ ni wod rogon nike yog napan nigu wared ko bin migid e donguch ma kagmad suled ko gin nigu tabab gaed riy ni somm’on. L’agruw yay ni yib facha’ nibe powi’iy mad nge yog ngog ni kug chag. Dariy fan nibe yib e n’ew ngabi aw ko totang rog, ya dani taflang nigeg.

Ul’ul’ i mamman nag fare kayak, era ayuweg neg nggu ul’ul’ nga mm’on, ma fapi n’ew ni babi aw ngog nga barba’ e dabi thikiyeg nga butt’. Ta’ab rogon e machib ko biney ko tin nib thothup ulan e yafos rodaed. Ra mom ni ngan mul ni fa’an gadaed ra sasaga’al ma rib ga’ ni fa’an gadaedra tal.³ Fa’an gadaed ra ul’ul ko tin nib thothup ni yibe “mamman” i yean ngak fare Tathapeg, ma yira ayuwegdaed ni bachan fare yafos rodaed nib manebuchog e be taga’ ko fare mich rodaed ngak.⁴

Ul’ul’ ko tin nib thothup era fal’ag “e yafos rodaed ni fa’anra gadaed ra ul’ul’ i fanay fare machib rok Kristus.”⁵ Biney ni yira rrin’, e ke machib nag President Russell M. Nelson, nira pii’ fare “gelngin fare muchugbil ni dariy bi’id me tal.”⁶ Arogan, fare machib rok Kristus—ni wod e mich ngak Somoel Yesus Kristus, kalngan’uy, un ko m’ag nibay e tha’ riy ngak Somoel u dakean e tawfe, thapeg fare tawa’ath ko Kan ni Thothup, nge athamgil nga mada’ ko tomur⁷e gathi kemus ni ta’abiyay ni nge buch, fa ngan rrin’ ni kemus ni nge chuw e thin riy. Nrib ga’, ni fare “athamgil nge mada’ ko tomur” e gathi ba thil ko fare machib rok Kristus—fa wod ni ngan mu’nag fare aningeg i n’en min tal, min son nge mada’ ko ngiyal’ ni ngan nim’. Danga’, athamgil nge mada’ ko tomur e wod ni ngan ul’ul’ i rrin’ fapi machib rok Kristus, ni nge falag fare “gelngin nib muchugbil” nike weliy President Nelson mornga’agen.⁸

Ul’ul’ e be yip’fan ni ngad thamiyed be buch rodaed fapi machib rok Kristus ulan e yafos rodaed ni gathi kemus ni ta’ab biyay. Biyay nge biyay e be yifan ni ngan athamgil ngan mon’og ko yean somm’on riy. Dariy fan ni yibe sul u dakean fapi n’en ni gathi ta’ab biyay, ya gathi kemus ni gadaed be yean ulan e lulbuy ni danur mon’og. Ya, arram ni gadaed be chuchugur ngak Yesus Kristus napan ni gadaed be yean biyay riy.

Yan nga mm’on e ba t’uf payngin nge kanawo’en.⁹ Fa’an gura mamman nag fare kayak ni rib gel nib sor ngabang, ma rayag nira gel gelngin machane dabiyag ni nge fekeg ko gin nggu waen ngay. Ku wod, u lan e yafos, ba t’uf ni ngad “mamman” gaed i yean ngak Somoel ni ngad bad iyib ngak.¹⁰

Mich rodaed ngak Yesus Kristus e ba t’uf ni ngan duruwi’iy ni gubin e rran.¹¹ Yibe duruwi’iy napan ni gadaed be meybil ni gubin e rran, fil fapi chep ni gubin e rran, sap ko pi n’en nike rrin’ Got nifandaed, kalngan’uy ni gubin e rran, min rin’ e pin’en nibe thogthog nag e Kan ni Thothup. Ku wod ni dani fel’ ni ngan talagney ko abich nga mada’ ko fare Madnom ma fin arram e ngan fek e tin nib fel’ nga fithik’ i dowey, ya dani fel’ ni kemus ni ngan duruwi’iy e mich rodaed ta’ab biyay ulan reb e wik.¹²

Napan ni gadaedra fek nga dakean daed e muruwel ko mich rodaed,¹³ ma arram ni rayag e thothup nogdaed i yean nga mm’on nira gelnag e mich rodaed ngak Yesus Kristus, ma fare machib rok Kristus era par ni bang ko yafos rodaed.¹⁴ Biney e krayag nira ayuwegdaed ngan ul’ul’ ngan fol ko fapi motochiyel ku Got min kalngan’. Kalngan’uy e ban’en ni bay e falfalaen’ riy mara ayuwegdaed ngad nanged e oloboch rodaed, ni’ir erram rogon nrayag ni ngad mo’onog gaed nib manechubog. Bay bochingiyal’ ni rayag ni gadaed ra fangloq u lan fare kayak rodaed fa da pire’egned ni kad mul gaed. U dakean e kalngan’uy, mrayag ni ngad suled biyay ngalang min ul’ul’, ni demuturug urngin yay ni gadaed be mul nga butt’.¹⁵ N’en ni th’abi gal’fan e dabi mulan’daed ko biney.

Bin migid ko machib rok Kristus e fare tawfe, nib mu’un fare tawfe ngay ko rran nge, thapag e thothup, fare tawfe ko fare Kan ni Thothup.¹⁶ Tawfe e kemus ni ta’ab biyay ni yima rrin’, ma gadaed ma be’ech nag biyay e m’ag ko tawfe ni gadaed be ul’ul’ napan ni gadaedra fek fare sakrament. Fare sakrament e darma yon’ luwan fare tawfe, machane ma peth nag fare bin somm’on ko fare machib rok’ Kristus—mich nge kalngaen’—ni mu’un fare Kan ni Thothup riy.¹⁷ Napan ni gadaedra fek fare sakrament, ma arram ni gadaed be pinning fare Kan ni Thothup ngeyib ngalan e yafos rodaed,¹⁸ ni wod napan nin tawfe nagdaed ma gadaed thapeg fare thothup.¹⁹ Ma fa’an gadaedra fol ko fapi m’ag nikan weliy ulan fare meybil ko sakrament, ma fare Kan ni Thothup era par rodaed.

Ma fa’anra par fare Kan ni Thothup nibe ayuwegdaed ulan e yafos rodaed, ma arram ni gadaed be bod Kristus. Ma gum’ircha’endaed era thil. Ma ngonglan e kireb era palog rodaed. Ma adag rodaed ko tin nib fel’ era mon’og nge mada’ ko ngiyal’ nira “adag laniyaenʼ maed ni nggu ululiyed i rinʼ e tin nib felʼ banʼen.”²⁰ Ma arram ni kad thapagned fare gelngiy nibe yib u tharmiy ni ngan athamgil nge yani mada’ ko tomur.²¹ Ma mich rodaed era gel, mara fel’ rogdaed ni ngad suled biyay u dakean fare gelngin nib muchubgil biyay.

Momentum nib thothup ba aywuegdad ni ngad wan nge fal’eg e m’ag ngak Got u na’un ko fare Someol. M’ag ni bo’or era chugur nag daed ngak Kristus me peth nag daed ngak nib gel. U dakean e pi gam’ing ney, e arram fare gelgin nrayag ni ngad thapegned nib gel. Nge, m’ag ko tawfe nge temple a gathi fare tafen e gelgin. Fare tafen e gelngin e fare Somoel Yesus Kristus nge fare Chitamangdad nu Tharmiy. Fal’eg nge fol fapi m’ag ba toey e kanawo ko gelngin rorow u fithik yafos rodad. Fa’an gadaedra fol ko pi gam’ing ney, ma arram ni gadaedra thapeg gubin e pin’en nibay rok e Chitamangdaed nibay u Tharmiy.²² Fare mamma nima yib ni yibe fol ko fapi machib rok Kristus e gathi kemus nibe pii’ gelngin daed ni ngad thil gaed i yean nib menuchubog machane krayag nira pii’ e athamgil ngodaed ngad ayuweged boch e gidii’ nib mat’aw rogon.

Tafney nag ni wod rogon ni ayuwegneg facha’ nibe powi’iymad napan nigu mul ulan e kayak. Dani tulul u orel nibe fith e duwer ni dani fel’ ni wod, “Mr. Rendlund, mang e gabe rrin’ u fithik’ e raen?” Ma dani mamman ni nge yib ngong ninge puwaen’, ni ga’ar, “Mr. Renlund, dabi buch e biney rom ni fa’anra bagel gelngim.” Ma dani tabab i gerngiy fare kayak napan e ngiyal’ ni gube gay rogon ni nggu wean ngalan. Ma dani puwaen’ ngog u fithik’ powchen fapi gidii’ ni gamaed be yean u ta’abang. Machane, ke pii’ ngog e ayuw ko rogon nib t’uf e ayuw rog ko ngiyal’ nem. Me yog e thin ngog nib fel’ ko ngiyal’ nib tu’uf ni ni nggu runga’ag. Maki yib ngabi pii’ e thin ko athamgil ngog.

Napan ni gadaed be pigpig ngak e gidii’, dani tu’uf ni ngad fithed e duwer ni dani fel’. Baga’ ni gidii’ nibe mo’owar e yaed manang e pin’en ni yaed be mo’owar riy. Susun ni dabda pufthin niged e gidii’; pufthin rodaed e dani fel’, ma dani tu’uf ngak facha’ ko tin nibe buch rok’.

Fal’agnem u powchen e gidii’ e dani fel’, ni rib ga’ ni fa’an gara tafney nag ni gur e gab fel’ ma gab mat’aw ngak pi’in nibe mo’owar. Biney e wod e lumoch nib dalip meters²³ u fithik’ e raen, ni gabe guy facha’ nibe lumoch ni wod e 4 meters²⁴ u fithik’ e raen, ni gur e kireb rom ni fa’an gara pufthin nag, ni gabe thamiy ni gur e fel’ e rom. Tomur gubin, gubin gadad ba magawon ko ban’en rodad. Ya dariy bagded nrayag ni nge thapeg fare wo’en e thap.²⁵ Ya dabiyag rodaed. Jacob, nibay ulan fare Babyor ku Mormon, e machib nag, “Ma ngam tayed u wunʼmed, u tomuren ni [kam] mʼaged gimed ngakʼ Got, ni kemus nu fithikʼ ngu dakean fare murnguy rokʼ Got e [gimed] rathap riy.”²⁶ Gadaed gubin nib t’uf fare Bayul rok’ Kristus rodaed, ni gathi kemus ni buchyang riy.

Paged e murnguy, t’ufeg, nge adag ni’ir e nge par nibay u thildaed e pi’in nib yileg daed.²⁸ Pi’in nibe mo’owar e ba “t’uf ni ngar thamiyed fare t’uf rok’ Yesus Kristus nib polo’ ni biney era yan u rogon e thin rodaed nge ngongol radaed nib fel’.²⁸ Napan ni gadaed be pigpig, ma ngad pii’ed e thin nib fel’ ma gadaed pii’ e ayuw. Ni demuturug ni fa’anra bay bee’ ni dubun, ngad ul’ul’ gaed ko pigpig ni dabin tal. Somoel e machib nag ni “ya piʼin ni aram rogon e ngam ululiyed e machib ni fan ngoraed; ya dam nanged ma richey me rebo rran mar suloed ngar kalgaed ngaenʼraed, marbaed ngog u poloʼ i gumʼirchaʼaraed, mug ggol nagraed; me yaeni aw ni gimed tapgin me yog ni ngar thap gaed ko yafos.”²⁹ Birok’ Somoel e murwel e nge gol nigey. Birodaed e muruwel e ngad daged e t’ufeg—t’ufeg nge pigpig ni wod rogon nira fek e gidii’ iyib ngak Yesus Kristus. Biney e ta’areb ko fare ban’en nib gelngin nib Muchugbil ko fare Yalen ku Kristus.

Gube mulwol ngomed ni ngam fol gaed ko fapi machib rok Kristus ni gubin ngiyal’ ni damu talgaed riy min ayuweg e gidii’ ni kube yib iyib. Gube micheg ni fare micheg e bay ni’ir e lukungun wo’en e tonom rok’ e Chitamangiy nibay u Tharmiy; ya ir, nge gubin riy, ni machib rok. Napan ni gadaedra gay rogon e mich ngak Yesus Kristus nge fare Bayul rok’, ma arram ni gadaed be yean u dakean fare pi’i kanawo’en e m’ag ma kagdaed be pii’ e athamgil ngak e gidii’ ni ngar yul’yul’ gaed ni pi gachalpen Yesus Kristus. Ma rayag ni ngad manged pi fak ni gadaedra par u gul’ili’ungun e Chitamangiy nibay u Tharmiy, ni’ir e bachan e kan ul’ul’ ni yibe fol ko fapi machib rok Kristus. U dakean fithngan Yesus Kristus, amen.