Fapi Ma’ag nge Muruwel Riy
Fare Galasia ku Yesus Kristus e yimanang ni’ir e fare galasia nima ngongliy e m’ag ngak Got.
“Uw rogon nib thil e Galasia rom ko boch e galasia?” Fulweg rog ko biney e duwer ni rib ga’fan e ke thil ko napan ni gube ilal i yean nge Galasia nibe ga’ i yean. Napan nin gargel nigeg u Utah ko 1932, ma gidii’en e Galasia e gonapan e 700,000, ni gin ni th’abi yo’or riy e bay ulan yu Utah nge fapi state nib chuchugur ngay. Napan e ngiyal’ nem, makemus ni 7 e temple nibay. Gidii’en Fare Galasia ku Yesus Kristus ni Fan ko Gidiiʼen Got ko Tin Tomur e Rran e dabay e bpag urngin e 17 million ulan 170 e nam, ni oren e be par u wuru’ yu mariken ea dabaa’. Biney e April ko 1 e bay 189 e temple nikan yibliy ulan e nam ni bo’or nge 146 ni kiybe toey ma yibe puruy’nag mornga’agen rogon. Kug thamiy nib t’ug ni ngu non morunga’agen fan ko pitemple ney nge fare chepin nge fan ko pi m’ag ko liyoer rodaed. Biney ra un fare molwul nib thothup ko pi cha’ ni kar noned.
I.
M’ag e ba michmich nikad duugliyed ni ngad rrin’ed bugi muruwel nib duugil rogon. Michmich rodaed rib ga’fan ngalan e yafos rodaed nge fan e nam rodaed ni fa’anra nge mon’og me fel’. Biney e lem e yibe gay rogon ni ngan thilyeg. Boch e gidii’ e be gay rogon ni nge thilyeg e biney e motochiyel ma be gay rogon ni ngan thilyeg e biney nira bee’ me rrin’ e tin ni laniyean’. Machane, gadaed ma nang ni bachane bo’or ni buch ko yu riyu’ ea du ni pi cha’ ngar paged ea mat’awon rodaed ni nfa ni ngad thapeged ea tin mangil ko yafos u lane ea ulung ea gidii’ ni kan yarmiy. Boch e tin ni yibe siyeg ko mat’won e gidii’ e wod bugi yalen nike yan u rogon e michmich fa fapi m’ag, ni yibe dag fa yibe gay rogon.
Tin ba’aray e wod boch ko m’ag nibay ulan e binaew rodaed: (1) pi tapuf-oloboch, (2) salthaw, (3) togta nge (4) firefighters. Pi gidii’ ney ni yaed be un ko tiney e muruwel e kar ngongliyed e michmich—ni kanog fithingan ni oath fa fare m’ag—ni ngar rrin’ed fapi muruwel roraed. Biney ab ta’ab rogon ko fapi tamachib ni yaed be pigpig ni polo’ ga’angin. Maad roraed nge fithingan raed e pow riy ni yaed bay u tan fare m’ag ni bay e muruwel roraed ni ngar pigpig gaed mi yaed machib ngak e gidii’. Biney e krayag ni ngan pugorran ngak fapi tamachib fapi m’ag rodaed nge muruwel riy. Dariy ban’en nib “magik” ko rogon e maad roraed, kemus ni ngan pugorran ngoraed fapi muruwel roraed nib thothup nikar feked nga dakean raed ni yaedra rrin’. Ka arogon ko pi ya’an ko engagment nge pi rings ko m’agpa’ nge fan rorow ni ngar dag ew ko gidii’ ni be guyrow fa ngar tayew u waen’ ko gidii’ ni yow bay rok’ ko m’ag roraed.
II.
N’en ni kugog ni mornga’agen e m’ag ni’ir e def ko yafos ko gidii’ ea ku ba’ gaa’ fan ko pi m’ag Fare def nge chipin e tiliw ni bo’or mit e bay e biney nib tu’uf riy ni bay fapi m’ag riy nib tu’uf ko fare tiliw. Wod ni, fare m’ag ku Abraham e ir fare def nge yalen boch e tiliw ni bo’or. Be dag fare tafnaey nib mangil ko pi m’ag ku Got ko pi bitir Rok’. Fare Bin Kakrom e M’ag e ma weliy mornga’agen e m’ag u thilin Got nge Abraham nge fapi awoch rok’.1
Fare gin somm’on ko fare Babyor ku Mormon, nin yoloy ko ngiyal’ fare bin Kakrom e M’ag, e dag fare muruwel ko m’ag ko napan fapi chipin e Isrealite nge rogon e liyor roraed. Kanog ngak Nephi ni fapi yol ko Isrealite ko ngiyal’ nem e ba “babyor ni chipin fapi Jews, ni bay e pi mʼag rokʼ Somoel riy, ni ke micheg ngakʼ e pi gidiiʼ ku Israel.”2 Fapi babyor ko Nephi e ku bo’or yay ni weliy fare m’ag ku Abraham3 nge ngak e Israel ni yaed e fapi “gidiiʼ rokʼ Somoel ni falʼeg ba mʼag nga thilraed.”4 Rogon ni yima rrin’ e m’ag u thiliy ngak Got fa rogon nima rrin’ e tiyugang’ ko tiliw e bay mornga’agen ko fapi yol ko Babyor ku Mormon ko mornga’agen Nephi, Joseph u Egypt, Pilung i Benjamin, Alma, nge Captain Moroni.5
III.
Napan ni taw ko ngiyal’ riy ko fare sulyarmen ko fare gospel ku Yesus Kristus nib polo’, ma Got e mel’eg reb e profet, i Joseph Smith. Dan nanged mornga’agen e roffen ni tabab fare angel i Moroni i fanow nag ere profet ney ni rib bitir. Gadaed manang nike yog ngak Joseph ni “Got e bay ba muruwel ni nge pii’ [ngak]” ni “fare ga’angin fare gospel ni dabimus bi’id” e thingar ni fulweg biyay, nib mu’un “fapi michmich ngay nin michmicheg nag ngak fapi matam ni kakrom.”6 Ka gadaed manang ni be’eg Joseph fapi thin nib thothup—u mm’on nin gagiyeg nag ni nge yarmiy fare galasia—ni bo’or mornga’gen fapi machib riy ni mornga’agen fapi m’ag ni pilyeg e thin riy ulan fare Babyor ku Mormon. Fare Babyor ku Mormon e rib ga’ fan ma kabang ko fare gospel nib polo’, ni baey riy ea tunom ku Got ni fan ko bitir Rok’m ma ku baey riy ea tin ni mornga’agen pi m’ag.
Wod nibay ulan fare Bible, sana manang Joseph mornga’agen fare babyor ko Hebrew nibe weliy mornga’agen somoel nira “ngongliy rogon reb e m’ag nib be’ech u thilig nge girdi’ nu Israel, nge ngak fare ganong rok Judah.”7 Fare babyor ko Hebrews e be yip fan Yesus Kristus ni’ir e “fare ta’ayuw ko fare bin beʼech e mʼag.”8 Fare chipin fare Tathapeg nge machib rok’ u fayleng nibay mornga’agen ulan fare bible e kan tunguy fithingan ni “Fare bin Be’ech e M’ag.”
Fapi m’ag e arram fapi def ko fare gospel ni kan fulweg yarmen. Biney e pow riy ni ku somm’on riy napan ni gagiyeg nag Somoel fare Profet ni nge yarmiy fare Galasia rok’. Tomuren nin publish nag fare Babyor ku Mormon, ma Somoel e gagiyeg nag i yarmiy fare Galasia rok’ nike sulyarmen, nin tunguy fithingan ni Fare Galasia ku Yesus Kristus ni fan ko gidii’en Got rok’ ko Tin Tomur e Rran.9 Thogthog ni yib rok’ Got nin pii’ ko April 1830 e weliy ni tomuren nira “micheg” bee’ (be yip fan nike michuwaen’) “makar kalngaen’ gaed ko denen roraed ni polo’ ga’angin, ma yaed bada’ag ni ngar feked nga dakean raed fithingan Yesus Kristus, nikar duugliyed ni ngar pigpig gaed ngak nge mada’ ko tomur,” ma arram ni yira thapegraed ko tawfe ngalan e Galasia rok’.”10
Biney nin thogthog ni yib rok’ Got e ki gagiyeng nag ni fare Galasia e ngar “mada’ gaed nga ta’abang ni ngar feked e flowa nge waeyin [ran] ni nge pug uran ngoraed fare Somoel i Yesus.” Biney e m’ag ni rib ga’fan e ku pow riy ko rogon fapi thin ko m’ag riy nima yoeg e elder fa priest ni yaed be pii’ e biney. Ke yibliy fare flowa “ngakʼ e yaʼal rok gubin e piʼin ngar kayed …, ni ngar … micheged ngom, O Got ni Chitamangiy ni Gubinfen, ni ngar feked fithingan Fakam nga dakeanraed, ma nge gubin e ngiyalʼ me yib uran ngoraed mar fol gaed ko pi motochiyel rokʼ ni ke piiʼ ngoraed.”11
Fare fan fapi m’ag ko Galasia ni ke sulyarmen e kan micheg biyay napan ni pii’ Somoel e bin th’abi somm’on ko fapi thogthog ni yib rok’ Got. U rom me pining Somoel Joseph Smith ni bachan fapi gidii’ u dakean e fayleng ni “kar malog gaed ko fapi gam’ing rok’, ma kar gathayed fapi m’ag rog ni dabimus bi’id.”12 Biney nin thogthog ni yib rok’ Got e weliy ni fare motochiyel rok’ e kan pii’ “ni ngeyag ni ngan sunmiy fare m’ag ni dabimus bi’id.”13
Daba’ ea gadaed nang fan ku buch ko fan ko pi m’ag u lan ea fare Galasia ni kan su yarmin nge fare liyoer ni tay chongin. President Gordan B. Hinckley e ke weliy e n’en nima buch napan ni gadaedra tawfe nge fek e sakrament ni gubin e wik: “Gubin e member ko re Galasia ney nike yean nga fithik’ e rran ni nge tawfe e ke mang bang ko fare m’ag nib thothup. Gubin ngiyal’ ni gadaedra fek fare sakrament ni’ir e fare abich rok’ Somoel, ma arram ni gadaed be be’ech nag ere m’ag nem.”14
Ni tay u wundad ko bo’or e tanon u biney e conference ni President Russell M. Nelson be kanoeg fare Fare Wo’en e Thap fare “kanawo’en e m’ag” ni “fekdaed ngak [Got], … ni’ir e mornga’agen rogon e tha’ rodaed ngak Got.”15 Ir ba fil mornga’agen ni ga’ fan ko fapi m’ag u temple rodad nge ir ba adag dad ni ngad sap gaed nga tomur i yean nga mm’on min “leam ni bod e celestial.”16
IV.
Chiney e nggu non ni mornga’agen fapi m’ag u tmeple. Muruwel rok’ ni’ir e nge fulweg yarmen fare gospel ku Yesus Kristus nib polo’, napan nike chugur ko ngiyal’ rok’ u fayleng me par fare Profet Joseph Smith nibe gagiyeg nag rogon i toey fare temple u Nauvoo, Illinois. Me dag Somoel fapi machib ngak nib thothup, fapi yalen, nge fapi m’ag nifan e en nira gagiyeg nag e pin’ey ulan fapi temple. Gidii’ ni ran endow nag gin ni ngan machib nag mornga’agen wo’en e thap ku Got riy min mulwol ko gidii’ ni ngar fal’agned fapi m’ag nib thothup. Pi’in nira par nib yul’yul’ ko fapi m’ag e kan micheg ngoraed fare yafos ni manechubog, ni “gubin ban’en ma fanraed” ma yeadra “par ko gin bay Got riy nge Kristus roraed dariy bi’id manemus.”17
Fapi madnom ko endowment ulan fare Temple u Nauvoo e ni tabab nag nde n’uw napan ngay me tabab fapi pioneers ko fare milekag roraed i yib ko fapi burey nibay ko Ngael. Bo’or e mich rok’ e pi pioneers nem ni mornga’agen fare gelngin nike yib ni bachan e kar m’eged raed ngak Kristus ni bachan fapi endowment roraed ulan fare Temple u Nauvoo ni pii’ gelngin raed ko fare milekag nted i yib ko Ngael.18
Gidii’ nikan endow nag raed ulan e temple e bay e muruwel roraed ni ngar chuw gaed nga madane garment ko temple, biney e maad e dabiyag ni ngan guy ya bay u tanngin e maad ni yima chunguy. Biney e ma pugorran ngak fapi members nikan endow nagraed ko fapi m’ag nikar ngongliyed nib thothup nge fapi tawa’ath riy nikan micheg ulan e temple nib thothup. Fa’anra ngan thapeg e pin’ey nib thothup, kan fanow nagdaed ni ngad chuw gaed ko garment ko temple ni gubin ngiyal’, nikemus ni ngiyal’ ni ngan luuf e bachan e ngan rrin’ e tin nib tu’uf. Ya fapi m’ag e dariy bi’id me “tal ko muruwel,” ya fa’anra ngan chuweg e be yipfan ni facha’ e be l’uf ir ko fapi muruwel nib m’ag nge tawa’ath nima yib riy. Ku wod, bee’ nibe chuw ko garment rok’ mab yul’yul’ ko fapi m’ag nike ngongliy ulan e temple e be micheg ni yaed e pi gachalpen Somoel Yesus Kristus.
Fare Galasia ku Yesus Kristus ni Fan ko Gidii’en Got ko Tin Tomur e Rran e be dumow temple u dakean e fayleng. Fan e bachan e nge tawa’ath nag fapi bitir ku Got ni bay u tan fare m’ag ni yaed be pigpig ulan fare temple nib mu’un fapi muruwel riy ngay nib thothup nge fapi taw’ath riy nib menechubog nikar thapag ned u dakean fare m’ag.
Fare Galasia ku Yesus Kristus e yimanang ni’ir e fare galasia nima ngongliy e m’ag ngak Got. M’ag ea ba gaa’ fan u lan ea gubin ea pi gam’ing ko thap nge tolang ni ma pii’ biney ea Galasia ni kan sulyarmin. Fare gam’ing ko tawfe nge pi m’ag ni baey riy e ireram rogon ni rayag ni ngan thap ulan fare gil’ilungun nib celestial. Fare gam’ing nge fare m’ag ko temple e irerram rogon ni ngan thapeg fare bin th’abi tolang ko falfalaen’ ulan fare celestial kingdom, ni’ir e fare yafos ni manechubog, ni’ir e “bin th’abi tolang ko tawa’ath ku Got.”19 Irerray e n’en nibe sap Fare Galasia ku Yesus Kristus ni Fan ko Gidii’en Got ko Tin Tomur e Rran ngay.
Gu ba micheg ku Yesus Kristus, ni ir ba gagiyeg ko Galasia riy, nge pi e tawa’ath ngak gubin ni fol fapi m’ag nib thothup. U dakean fithngan Yesus Kristus, amen.