Fapi Temple, Na’un ku Somoel nibe Yo’or Yang u Dakaen e Fayleng
Napan ga ba maen u fithik e meybil nga na’un rok nib thothup, ni bay e gelngih Rok ngom.
Gathi fapi thin ko tang nikad yon’ed e rib fel’ lingan? “Gu ra gel nigem, ayuweg nem, ni ngeyag ni ngam sak’iy, … ba koel ko mangil rog, cha’ ni nang gubin.” Somoel e be pi’ gelngin pi gidii’en nib thilthil e duw roraed napan e yaed be yib ngalan e nu’un rok nib thothup. U Kinshasa nge mada’ nga Zollikofen nge Fukuoka nge mada’ nga Oakland, fapi fal’yangren, e tafiney rorad ningarbad, ngar sug gad ko tafen ko tawfe ko temple. Kakrom, e bo’or gidi’en e murwel ko gam’ing niba weachweach piyloelgenrad—machane ke thil e chiney. Pi missionary nikan piningrad, pi missionary nifan e pigpig, nge pi missionary nike sul ko mission rorad e yad bay nid bo’or e chiney. U lan gubinyang u fayleng, ma bay athamngin Somoel nibe pow’iydad nga lane na’un rok.
U lan reb e duw ni kafangichuw, reb e fagar ni tabinaw rog, e ba 95 e duw rok, nima par ko east coast u United States, niguy e pi missionary nike gaman e 70 e duw, mefani ga’ar ko bpin ni fak, “Guba’adag ninggu un ko temple ngom.”
Me ga’ar e bpin ni faknem, “Ma, Nina’, ba t’uf ningam tawfe bin so’omon.”
“OK,” me yoeg, “ere maguba’adag ninggu tawfe.” Kan tawfe nag. Yan buchuw e rann riy ngam’on, ke paer ulan e tafen ko tawfe ni fan e gidii’ nar maed. Ke yo’or buch’uw e puul ndawriyan, me ke fek e endowment me fal’agin e m’ag rok. Llowaen’ nge gelgin Got e be garar i yean; ma farangi veil nibe upnguy e fayleng e be mab i yean.”
Game laminag ko mangfan nibe pow’iy Somoel e pii profet rok ko kachiney ningan yo’or nag fapi temple nib thothup? Mangfan ni Nge rrin’, ko chingiyal’ neye pii’ e ayuw ko girdi’en nib m’ag ko orungin ngiyal’ nib t’uf e thothup rorad, mab bay ii meri’ay e na’un rok Somoel ningak toey?
Kadbul ney, President Dallin H. Oaks ke dag e sasing nib mangil ko fapi temple ni ba toey u dakean e fayleng. Kathy nge gag e kug mow u Philippines ni dawri n’un napan. Laminag e qangqaang: Temple u Manila e ni thothup nag ko 1984. Woed ni 26 e duw riy ngam’on min toey fabin l’agrow e temple u Cebu City, nge ma’ u 2010. Chiney, 14 e duw riy nge tomur, ma 11 e temple nibay u tomun e construction, ni yibe fal’agin ya’an, fa yibe fal’agin ninge ma’ ko dedication. U lelqoech nge mada’ nga yimuch: Laoag, Tuguegarao, Santiago, Urdaneta, Alabang, Naga, Tacloban City, Iloilo, Bacolod, Cagayan de Oro, nge Davao. Rib fal’angin ni yibe guy ma’amngin e murwel rok Got!
U dakean e nam, e na’un ko fare Somoel e be yib nibe chuchgur ngodad. Mangfan u rran rodad?
Fare tin Tomur e Rran
Fare Somoel e ii ta’chilan nira chuchgur ko tomuran e rann, mara yo’or e kireb u dakean e nam, Ra bee’ ma’i “adag ir nge pag gelngin,” gubin binen [era] yoyi’or lingan me baliyog nag owchidad,” ma “gumircha’ean e girdi’ [era] kirebnag rad.” Kug guyed gamircha’ean e girdi’ nike kireb nagrad: Fare fananikan ko fayleng, tin nibe yoyi’or nag fa be baliyang nag owchidad, yibe patlin e thothup, nge magaf ni bachan e dani gaman e min machib. Sana kam kirban’ nikam guy be’ nigamnang ma gabadag, nibay bangiyal’ riy ni noen nibay e testimony rok ko fare Babiyor ku Mormon, mab gel e mich rok ngak Yesus Kristus, mad adag nima pii’ e ayuw ko pi chamiy gelil’lungun Got, ni chiney e ke chuw ke par nge chiran e Galasia, nib palog ko tin nib mich rok riy. Thin rog ngom, e dabi kireban’! Mangil e gubin. Fa’anra bay Got rom, ma dariy binen ndabiyog ningam rin’.
Tiney e kireb ko ya’an u lane fayleng, e ii taychilan Somoel ngodad, nibay pirgidi’en nib mat’aw, pigirdi’en niyadbe soen nag ninge sul ngorad, girdi’ rok niyadma sak’iy kogin nib thothup nidabra chuwgadriy. Ii weliy mornga’agen fapi gidii’rok ni chuw u tamun e ga’ting ku moniyan’, niyadbe murwel ko mich rorad, miyadbe lam nib celestial, miyadbe pagan’rad ngak Somoel, Yesus Kristus.
Mangfan nichiney e be chuchgur nag Somoel e temple Rok ngodad? Reb i fan e biney e dariyfan nibe yoyi’or e kireb nge tagan u fayleng, make taychilan ngodad ni nge pii’ gelngin me tow’athiy e girdi’ Rok, ma tin nike micheg e ke buch!
Tin ni michmicheg ulan fare Temple u Kirtland
Urugon ni pi na’un nib thothup ney e ma pii’ gelngindad, pofanuy, nge protect nag dad? Gadra pat ko answer riy rok fare wenig ni tay fare Profet Joseph Smith u napan fare dedication u lan fare temple u Kirtland. U lane re temple ney ni yoen’ fapi member fare tang riy ni, “N’oeged migad toluul nag fare tharmiy nikab e salthaw riy.” Somoel e ii dag Ir, ma’i sul e profet kafraf, ninge pii’ e key ko tin ningan sulweg ko priesthood nge gospel ningan fulweg.
U lan fare temple u Kirtland, fare Profet e ii maybil u lane na’un ni thothup rok Somoel, ni fapi pigirdi’en e yaedra fek e ma’amngin nge gelngin Got, ni fithngan Yesus Kristus e bay u dakaen rad, ni fapi angel rok e ra’i yan u dakaenrad, miyad ilal u dakaen Somoel nibe yog gubin gelngin fare Kan ni Thothup ngorad. Pi gelngin rok ney e ra’i gel u fathik e yofas rodad nifa’anra gadra par nib gel e mich rodad ma kagdadbe tayfan fare na’un rok Somoel.
Gelnigey nibe yib Ngodaed
U lane na’un Rok, e yib ma’agdad ko gelngin u tharmiy. Mich rodad ngak Yesus Kristus nge adag rodaed Ngak e kan micheg nag makan pii’ gelngin. Kan micheg nag ngodaed ko gadad mini’ nge gin ni ngad be yan ngay u lane yofas rodad Fa’anra bgel e mich rodad, ma ra’i tow’athiydad ninge palog nag e lumeal, balbalyog ko owchidad, nge ma’adad ni ra’iryib ngodad. Gadad be thamiy fare adag rok Somoel ma be ayuwegdad ko gafgow nibe yib nge gum’ircha’dad nibe kireb. Bay gelngin rok Got rodad.
Fek Fithingan nga Dakeandad
U lane e na’un Rok, e gadma fek nga dakaenndad fithngan nib polo’. Napan nran tawfe nagdad, migad taychilan Ngak ningad tedfan fapi motochiyal Rok u lan gubinyang ko tafiney rodad. U lane temple, kad michegned, u dakaen e ma’ag rodad, ni gadadra lek ni manemus.
Pi fal’yangrean ko Galasia riyadba cheag nag. U lane e biney e fayleng ni rib mom’aw e par riy, kar feketh fithngan Kristus nga dakaenrad. Heber City, u Utah, e bay ba mo’olung nin tay nifan ko mornga’agen e gin ningan toey e temple ngay. Dalip ii mir’ay e pifal’yangrean nem kar bad nga ta’abang ngar daged e ayuw rorad nifan e temple. Reb a pagel nib fal’yangrean, e ii athamgil nge ga’ar ngak reb e tiyugang’ ko governor, “rigube athapeg ninggu mabgol u lane biney e temple. [Fare temple e ayuwegneg] ningu par nib mataw magub polo’.” Reb e ii weliy mornga’agen e temple nibe yip’fan e magal nge athapeg. Pagel nge bpin ni fal’yangrean ko Galasia u lan gubin yang u fayleng e yadbe dag e amthinrad ningar feked fithngan Yesus Kristus.
Pi Angel nibay u Fithik’daed
U lan fare Kirtland Temple, fare Prophet Joseph e maybil ni “fapi angel [era] ii yib u dakaen [fapi Saints Rok].”Ngay ni murwel ko gam’ing u lane e temple nifan ko girdi’ rodad kakrom e bay fal’ngin ko tomur nran dag ni bay a yofas u tomuran fare veil.
Ma bo’or e murwel nigadma tay u lane e na’un ku Somoel niba thothup ma dabiyog ningan share nag ko public, machane boch e rayog. Aningeg ii ragag e duw, napan nigamowma par u Florida, ma Kathy nge gag e kug milekag gow ko fare temple u Atlanta, Georgia. Wednesday ni balayal’, ko May 9, 1984, napan nigumu’ gow ko session u lane temple, me fitheg bee’ nima murwel ko gam’ing nifa’anra kubay e time rog ningu fal’agin ta’areb e gam’ing ko fal’agin rogon e initiatory. Fithngan e cha’aney niggu represent nag e rib thil lingan. Fithngan e Eleazer Cercy.
Raborann riy, ma rib sug e temple ko Gidii’en Got. Napan nigu fal’agin rogog ninggu wan ko bin magid e endowment, man pii’ fithngan e cha’an ninggu represent nag. Me gin owcheg ngay, ni fithngan e cha’an nin pii’ ngog e ta’aborgon fithngan ko cha’an nin pii’ ngog fowap ni balayal’riy, Eleazer Cercy. Gu thamiy fare Thothup rok Somoel nipan ni ma’ay ii fal’agin fare endowment. Ta’abochriy u lane misi’, napan nigamow be yan u lane temple, me guy Kathy ba labthir ni fagar rok, Sister Dolly Fernandez, nima par u Atlanta. Ni dariy e pagel ni memba u lane tabinaw rok, me fith e ayuw ngog ninggu mang e papa ko sealing rok nifan e gal labthir rok. Kug falfalaen’ ninggu pii’ e ayuw.
Napan niggu rogbug ngabuut’ ninge tabab fare gam’ing nib thothup, mug rung’ag biyay fithngan facha’, ni papa’ rok, Eleazer Cercy. Rib mich u wun’ug ni ram’ay e biney e yofas, mugra mada’ ngug fengechiy e cha’anef ni fithngan Eleazer Cercy.
Bo’or e ban’en ni ba rin’ u lan e na’un ko Somoel ba pii’ e gapas nge yi’iy. Machane: bay e angel ni aywuegdad!
Fare Kan ni Thothup nike Polo’ Ga’anggin
Fare tow’ath ko fare Kan ni Thothup e ran pii’ ngodad nipan nigadra mang reb e memba ko Galasia. Gubin e wik nigadra fek fare flowa nge ran nigad polo’ riy mabay e lamrodad ngak Somoel, ma Thothup Rok e ra’i par rodad. Gadra yib nge lane na’un rok Somoel nibay laniyan’dad riy, gin tha’abi gel e thothup riy u dakaen e fayleng, migadra ilal u fathik Somoel “mayog boch gelngin fare Kan ni Thothup ngodad.” Fathik fare Kan ni Thothup, e gadra sug ko falfalaen’ nge gapas, nge athapeg nibe yib nib alamrin. Bay yib gelngin ni gadad be a gachalpen rok ni dariy fan gadad ba par gathi e tafen ni gathi thothup.
President Russell M. Nelson e ii yoeg ni: “Somoel nge Ta Bayul rodad, Yesus Kristus, e ra’i pii’ gelngin e murwel Rok ko ngiyal’ney nge mada’ ko rofan ninge sul ngodad biyay. Gadra guy e qangqaang ni yo’ornibe yip’fan Got ni Chitamangdad nge … Yesus Kristus … ninge preside u dakaen e Galasia rok nib fal’rogon.” Fal’agin fapi na’un rok Somoel u dakaen gubin yang u fayleng e be yip’fan e pi murwel ney ni rib mangil.
Pi fagar rog, fa’anra dawri yo’or yay nigadbe yan ko temple, ma thingar da yo’or niged nag e yan rodad nga lane e na’un rok Somoel. Da yibliyed e pi temple nikan announce nag, buut’ nrayog ningan chuw’iy, ni government e rayog ninge pii’ mat’won e murwel rodad, ni girdi’en e murwel e yadra guy fal’ngin e muruwel roraed, nge yibliy riy e ra yib e gelngin e tharmiy nge fapi angel nra yib ngay.
Fapi Michmicheg
Fare temple e ra’iraram fare na’un rok fare Somoel. Rugbe michmicheg ngom nigara yib nigab polo’ makam maybil nge lane na’un Rok nib thothup, ma garam thamiy gelngin, fithngan e rayib nge dakaenaem, ma angel Rok e rayib nge par ngom, magaram thamiy e tow’ath ko fare Kan ni Thothup.
Ke ga’ar Somoel, “Gubin e gidii’ nike n’ag e denen rok me yib ngog, me pinning fithingag, me motoyil ngog, me fol ko pi motochiyel rog, e ra guy owcheg me nang ku minii’ gag.” Biy’or rogon nrayog ningad guyed owchen Kristus, dariy bang nib fal’ ma kemus u lane na’un Rok.
U lane tiney e rann nib gel e balbalyang u owchidad riy, rigube michmicheg ni temple e kemus ni na’un Rok e rayog ninge ayuweg dad, me yiroriydad, me ayuweg nge fal’agdad ko rann ninge sul, nibay urngin fapi angel nib thothup Rok ngak, Tathapeg rodad e ra sul, nib gel gelngin bugwon. U dakean fithngan Yesus Kristus, amen.