Ra Fal’rogon Gubin Binean Ni Bochane e Pi M’ag ko Temple.

Pi walageg ni m’on nge bpin, biney e mo’olung ko genereal conference ney, e gube thamiy rog, ni rib manechubog. Gube falfal’anug ngay nikan pii’ e biney e assignment ngog ninggu non ko urngin Gidii’en Got ko Tin Tomur e Rran nge kuboch e fagar rodad u lan gubin yang u fayleng. Riguba’agem, ma gumang ni Somoel e ribadagem.

Boech e 50 e duw iyan ngaram, mug pigpig nifan ko president ko Ricks College u Rexburg, Idaho. Kakadbul ko June 5, 1976, bpin rog, Kathy, nge gag e kug drive gow u Rexburg nga Idaho Falls Temple ni nggu unew ko sealing ko reb e fagar romow. Ma ngiyal’nem, e aningeg e titiy romow nikabachichig, ere ii ayuweg mow be’ ko famchew ngayog ninggu milekagow ko temple. Kug digeyew e pi bitir romow ngak ninge ayuweg, mug drive gow nigonapan ni 30-minute ngaram.

Rib mangil e yan romow ngaram ko temple e rofan nem, ni gubin ngiyal’ ni amargon. Machane, napan ni m’ay e biromad e m’ag—mugmow prepare ninggu sulew nge tabinaw—mugguyew girdi’en e murwel ko temple niyad be non non nib murus ya’anrad u lane lobby ko temple. Chingiyal’nem, me yoeg reb e girdi’en e murwel ko temple ni fare Teton Dam nikan toey u ngek u Idaho e ke puth ngabuut’. Bo’or ko 80 billion e gallon (300 million cubic meters) e ran nibe po’ ii yan ko re dam nem gononapan nibe yan ni 300 miles (775 square km) nib chichgur ko buguliyoror. Bo’or yang u Rexburg nibay u tamun e ran, bay e tabinaw nge karo nibe fek ran iyan. L’agrow-idalip 9,000 gidi’en e ii par ni dariy e ginni ra pired riy.¹

Ma ki ngiyal’nem me yan e tafiney romow ngak rogon e bitir romow nibay u roem, nge college students, nge pi binaw romow ni rigomow ba’adag. Gamow bay ni gonapan 30 miles (50 km) ko tabinaw romow, machane rofan ney, u m’on ni yib e cell phone nge text, dariy rogon ni nggu non gow fa nggu call gow nga fak romow, fa nggu drive gow ko Idaho Falls nga Rexburg, ni bachane kan ning e kanawo’.

Kemus ni bin ba’ nrayog ninggu rin’ew e nggu pirew ko reb e motel nib local u Idaho Falls. Gu warow Kathy nga gag ko motel mug meybil gow ngak Chitamangdad nu Tharmiy ni nge guy fak mow nge urngin e pi biyu’ e girdi’ nibay ko re tin nib kireb ney. Gube puguran e ya’an kathy ni ke yaen nga buutu lukungun e neap’ bachaen magaf an’um ngay ko bitir rok’. Demturug nibay e tafiney rog ngaram, yoeg ninggu tofan buch’uw mug mol.

Dawi n’uw napan me pigeg e bpin rog ni ga’ar, “Hal, urogon nigabe mol nike buch e tiney?”

Mug nangfan rogon ninggu fulweg e thin ngak u tafiney rog nge gumircha’eg. Kug yoeg ngak bpin rog: “Kathy, demturug ko mang e ra buch, mara fal’rogon gubin binean ni bochane m’ag ko temple. Kad fal’agined e m’ag ngak Got nikad sealed gad u ta’abang ko tabinaw rodad.”

Ko Chingiyal’nem, mug thamiyew u gumircha’an mow ni nen’ nibe yog fare Kan ni Thothup rok Somoel e ba riyul’: fapi gam’ing ko sealing, nin pir’eg u no’un rok Somoel nikemus ni yigo’ priesthood nibay mat’won e rayog ninge pii’, nike ta’mow nga ta’abang ni bpin nge m’on, nge fak mow nike sealed ngomow. Dariy fan e murus ninge yib, gu falfalean’ gow ni ta’aboch riy e gu pat gow ngay ni pagal fak mow e kab fal’rogonrad.

Machane re bugi thin ney ni yoeg ii President Thomas S. Monson e ra weliy rogon nigu thamiyew Kathy ko rofan nem ni balayal’. Napan gadad ra yaen nga temple, mara ii yoeg ngodad e mit ii ban’en nib thothup nge amithin e tin nib gapas. … Gadaed ra nang fan e thin rok en Tathapeg napan ni ga’ar: ‘Nggu tay e gapas nge par romed, nggu pi’ e gapas rog ngomed. … Dabi magafan’med ma dabi wagagey lanin’med, ma dab mu tamdaggad [John 14:27].’”²

Kug tow’ath nibe yog e biney e gapas ngog ko gubin ngiyal’ nigube yan nga ko temple ni manechubog. Kugumnang e rofan ninggu wan nga lane temple ko so’omon. Napan ni ku gub pagal.

Kug sap nga lang ko p’eataayuw nib wechwech nib ga’ magal ni kug thamiy ni woed ke bing ko lanelang. Chingiyal’nem, ma buguney e thin e yib ulan e tafiney rog ni: “Kuggub biyay ko giney nib tomilang.” Machane ni rib papay ke yib ulan e tafney rog, gathi thin rog, pi thin ney: “Danga’, dabmu paer ura’ kafram.” Gabe leam nag e ngiyal’ u m’on nikan gargalegem. Gabay ko gin nrayog ninge yib Somoel ngay.”

Pi walageg, rib mich u wan’ug nifa’anra gadra yan nga temple, ran pag owran ngodad fare tothup ni manemus, nge rogon fare tha’ rodad ngak Chitamangdad nge Fak ni Pagal, nge amthindad ningad suled ngarow ba’id.

Un weliy u lane conference ni dawri n’uw napan, President Russell M. Nelson e ii fil:

“Gin nib gafaeliy nran par ngay ko thothup e par u langgin e m’ag ko temple rom.”

Gubin pi’nen nigadbe michuwan’dad ngay ko urngin fare m’ag rok Got e kani michmicheg me yib nga ta’abang u lane fare temple.”³

“Ra bagdaed nima ngongliy fapi mʼag … ulan e temple—me fol riy—e bay gelingin nib gel nibe yib rok’ Yesus Kristus.”⁴

Maki fil ni “napan ni gadadra ngongliy e m’ag ngak Got, ma arram ni kad paged e tin nu fayleng ban’en. Got e dariy bi’id mara digey e pi’in nike dugliy ninge laek me fol rok’. Riyul’, gubin e pi’in ni kar ngongliyed e m’ag ngak Got e bay ba tu’ufeg nga ba murunguy nrayag ni ngar thapagned.”⁵

U tan pa’ President Nelson, Somoel e ra’i pii’ rogon gali’lingun ningan toey ma’amngin e temple rok ko gubin yang u dakaen e fayleng. Pin’ey e rayog ninge pii’ rogon faki bitir rok Got e rogon ni ngar thapeged e gam’ing ko yafos ni manemus ngorad nge rogon ningar tedfan fare m’ag ni manechubog. Rogon ninge yog e m’ag ko manechubog ngom e gathi kemus ko chingiyal’-ney. Ke yoeg Somoel nira un gubin yang ii gumircha’andad, rogondad, tafiney, nge gelngindad.⁶

Yan ko temple ni yo’or yay e ra dag gelngin bugngin e tha’ nid michmicheg niged ngak Somoel. Napan nrayib nganum’ ningam laminaeg mag tayfan e m’ag rom ko temple, magra pining fare Kan Ni Thothup ninge pii’ gelngim me bi’ech nigem.

Garam thamiy e tomilang nge athapeg nibe paguwran ngom e pi m’ag nem nib riyul’. Rayib ngan’um ni gubin e m’ag rok Got e be pii’ kanawo’in ngodad ningad chuchgur gad Ngak, ma ra’i ayuweg gumircha’em ngam athapeg ii taychilan fapi m’ag ko temple.

Kan taychilan ngodad, “Bachan e m’ag rodad ngak Got, dariy bi’id nra tal ii ayuwegdad, ma dariy bi’id nra magaf fa chuwaen’ ii pii’ e murunguy rok’ ngodad.”⁷

U fathik fare m’ag ko sealing ulane Temple e gadra thapeged e pagaen’ rodaed ko tha’ ko tabinaew rodaed nira ul’ul’ u tomuren e yam’ nge gonop ni manemus. Tayfan e m’ag ko mabgol nge tabinaw nin tay u temple rok Got e ra’i ayuwegdad nge siyeg e denen, si’in fa toelngan’ ngodad.

Ayuweg pi walagmed ko rogon ningar ayuweged yad e ra’i pow’iyem nge tabinaw rom ko biroek Somoel e kanawo’. Pii’ e kanawo’ ko bitir rom ningar maybil gad. Manang nib papay nifan nike thil bugi binean’ ninge kireb, mag nang e tin da’i si’in bugi binean’, nifan ngorad niyad gubin. Ra maybil e walag nifan ngorad niyad gubin, ma ra’i munguy gumircha’anrad ngorad nge labthir rorad.

U yuyang riy e, ii yoeg rogon ii Malachi napan ni weliy mornga’agen e yib rok’ fare profet Elijah: “Tuguliy nga fathik gumircha’an e bitir e m’ag nin taychilan ko chitamangdad, ma gumircha’enrad e ra’i sap ngak e chitamanginrad. Fa’anra gathi arrogon, ma ra paer e fayleng ni dariy fan.”⁸

Gafgow, tin mo’omaw, nge amith u gumircha’andad e ra’i yib ngodad ni gadgubin. Dariy be’ ndabi amith ko “rachngal ko tin nib fas.”⁹ Machane, napan nigadra yan ko temple mara yib nga laniyan’dad e m’ag rodad, ma rayog ningad fal’aegned rogondad ngab kanawo’an Somoel ngodad. .

Napan Kathy nge gag e gu mabgol gow migmow m’ag gow u lane Logan Utah Temple, ma kafram ni Elder Spencer W. Kimball e ii fal’agin e m’ag romow. Ulan boch e thin rok ke yog, ku pii’ e fanow ney, “Hal nge Kathy, mu fasgow ulan e rogon napan ra yib e pinning ngom, rangam marow nib moem rogon.”

Demturug ni, fa’anra darud nanged fan e fanow nifan ngodad, ma kab mangil ningad pired nib fal’rogon rogondad ngrayog ningad pigpig gad ngak Somoel ko murwel nrayib ngodad. 10 e duw niggu pirew nigamow mabgol, me yib ba fon kol ko Commissioner ko Church Education, Neal A. Maxwell.

Pi mulwol rok President Kimball ni nggu “chugow nib moem rogon” e ii buch romow. Ni pining mow Kathy ninggu digeyew e tabinaw romor nggu warow ko ba assignment ngabang ni da’angu ningew mornga’agen. Machane, tabinaw rog ke fel’frogon ni nge yaen bachaen e profet, u lan fare temple nib thothup, e tafen ko yi’iy, e guy e pi’nen ni ra buch ni gamow e ra fal’egew rograed ni ngar mada’.

Pi walageg ni bpin nge m’on, rugube yoeg e tin nriyul’ ndrayiy binean’ nib ga’fan ma kemus ni m’ag rodad nikad ted u lane fare temple. Demturug ko gin nigabay riy u lan fare kanawo’ ko m’ag, gube piningem magube pii’ e athamgil nge lanen’um ningam man ko temple. Man nib yo’or yay ni demturug ko gin nigabay riy. Fal’agin e kanawo’ nib manechubog ko m’ag rom ngak Got. Gube yoeg ngom e tin nib riyul’ ni ug yoeg boch ngak Kathy u lukngun e naep’ u lane chi singgil nem ko motel u Idaho Falls : “Demeturug ko mang e ra buch, mara fal’rogon gubin binean ni bochane m’ag ko temple.”

Gube yoeg nib riyul’ ni Yesus e ir Kristus. I Ir e ma powi’iy ma gagiyeg nag e Galasia rok’. Fapi temple e ir e na’un rok’ Somoel. President Russell M. Nelson e profet nib fas rok’ Somoel u dakaen e fayleng. Riguba’ag, ma kug ba’adagem. U dakean fithngan Yesus Kristus nib thothup, amen.