Fare Mich ngak Yesus

Mang e mich ngak Yesus?

I ir e fare mich nima yib u daken e Kan ni Thothup ni’ir e fare Fak Got nib thothup, ni’ir e fare Mesiah nge fare Tabiyul. Ii ir e fare mich rok’ John ni Yesus e ii moy rok’ Got ko so’m’on, ni’ir e Sunmeg e tharmiy nge fayleng, nge “u dakean me yib fare gospel riy, ni fare gospel e ir fare yafos, ma fare yafos e ir fare tomilang ni yib ko gidii’.”¹⁰ I ir “fare mich ko fapi Apostles nge fapi Profet, … nike yim’, min k’eyag, me foskoyam’ biyay ko bin dalip e rran ngay, me yean nga tharmiy.”¹¹ I ir fare llowaen’ ni “dakuriy reb e fithingan ngab yang ni gimed ra thap riy.”¹² Ii ir fare “mich, ni’ir e bin tomur ko gubin,” ni pii’ fare Profet Joseph Smith “ni bay nib fos! … Ni kemus ni’ir e fare Ma’agirag ni Fak Got—nikemus ni’ir, nge daken, nge bachan, min sunmiy min ngongliy fapi fayleng riy, nge gidii’ riy nibay u daken ni yead e fapi bitir ni fak Got.”¹³

Thumuren e mich e bay ba duwer riy, Mang e ngad rrin’ed ko mornga’agen e biney?

Pi’in nira thap ngalan e celestial kingdom e ke “thapeg” fare mich ngak Yesus nib polo’ nikar tawfe gaed, thapegned fare Kan ni Thothup, ma kar thapagned fare mich nib gel. Fapi machib nge mat’aw ko fare gospel ku Yesus Kristus e ke par nibe gagiyeg nag e tin ni yaed be me’eleg. Fare mich roraed ngak Yesus e be m’ug ko rogon e pin’en ni yaed be rrin’. Ma muruel roraed e t’ufeg, “fare adag rokʼ Kristus nib machalbog.”¹⁵ Ma yaed be taga’ “i yan nge mus rogodad ngad boded mam’ungun Kristus.”¹⁶

Boch e pi’in ni yira pire’eg ulan fare terrestrial kingdom e kar thapagned fare mich ngak Yesus, machane dan rrin’ed ban’en ngay. Gathi rib gel e mich ngak Somoel e wod ni—yibay u “luk’ngun”¹⁷—ni gathi wod fapi gidii’ rok’ Ammon nibay ulan fare Babyor ku Mormon, ni wod, ni yaed bugi gidii’ ni “kuʼur kiiʼ gaed u rogon e gablaenʼ roraed ngakʼ Got.”¹⁸

Ma pi’in nira par ulan fare telestial kingdom e pi’in nira fekyathin e mich ngak Yesus nib mu’un fare gospel rok’ riy, nge fapi m’ag riy, nge fapi profet rok’. Ke weliy Abinadi ni yaed e “Ma kar pired u fayleng u rogon ni yaed baʼadag ma yaed be aʼraʼr nag; ma darur meybil gaed ngakʼ fare Somoel ko ngiyalʼ ni be kʼiyeg paʼ nib sug ko murnguy ngoraed; ya fare paʼayif ko murnguy e un kʼiyeg ngoraed, ma da ur meybil gaed.”¹⁹

Mang e be yip fan ni ngan gel nag e mich ngak Yesus?

Bay in ni ban’en nrayag ni ngan tafney nag nira fulweg e biney e duwer. Bay gu weliy in e pin’ey. Gel nigey ko mich ngak Yesus e rib mu’un fare chugoliy nge gel ngay ko fare mich. Gidii’en Kristus nib yul’yul’ e darma fekyathin fapi n’en nib achig nrayag nira gel nag e mich roraed ngak Yesus, ni bod e meybil, fil fapi chep nib thothup, fare rran ni Madnom ni ngan ayuweg min fek fare sakrament, kalngan’uy, pigpig, nge liyor ulan e nu’un rok’ Somoel. President Nelson e ke pugorran ngodaed ni “tamdag payngin nib papay, mich ni danir ayuweg nge gaaʼ ni gubin e rran ko ‘fare thin nib mangil rokʼ Got’ [Moroni 6:4] era yib i aw nga buttʼ nge wear. Arrogon, … ba tuʼuf ni ngan liyor ngak Somoel ni gubin e rran min fil fare gospel rokʼ.” Ke yoeg: “Gube wenig nag ngomed ni ngam piged Got ni nge gagiyeg nag e yafos romed. Mu piiʼ boch e taym rom ngak. Ya napʼan ni gara rrinʼ, mu guy ko mang era buch ko tin ni matʼaw e mithmith rom nib thothup.”²⁰

Gel nigey ko mich e wod ni ngan bing teliy nge owchey ko tin ni be michuwan’ e gidii’ ngay. Napan e tawfe, ma kad michegned ni ngaed “pired ni gimed e pi mich rok’ Got ni gubin e ngiyal’ ngo fithik’ gubin ban’en, nge gubin yang ni [gadaed] bay riy.”²¹ Ko biney e Easter, ngad falfalaen’ gaed ngay, ma gadaed dag ko gidii’ ni yo’or, e mich rodaed ko fare foskoyam’, ku Kristus ni bay nib fos.

Reb rogon ni ngan gel nag e mich ngak Yesus e wod ni ngan motoyil ngak fapi mulwol rok’. Got e darma towasoriy daed ni ngad me’elegned e kanawo’ nib fel’, ni’ir e fare kanawo’en e m’ag, machane ma fanow nag fapi profet rok’ ni nge machib ngodad ko mornga’agen e tin nira buch u romuren e pi n’en ni kad me’elegned. Ma gathi kemus ni biney e fan ko gidii’en fare Galasia rok’. U daken fapi profet nge apostles rok’, ma be wenig nag ngak e gidii’ u fayleng ni ngar motoyil gaed ya tin riyul’ era ayuwegmed ni dam kum manged sib,²² mara pag med e kirbaen’, mara fek e falfalaen’ ngomed.

Gel nag e mich ngak Yesus e be yip fan ni ngan pii’ e athamgil ngak e gidii’, ko rogon e thin rodaed nge wo’en daed, ni ngeyag ni gel e mich roraed, ni baga’ nifan ko tabinaew rodaed. Elder Neal A. Maxwell e bay biyay ni yog “gidii’en e [Galasia] ni yad be yog raed ni yaed e gidii’ nib ‘fel’’ ni kemus nibe yaen u daken ya’an machane dar gay ‘rogon ni nge un u fihik’’ [Doctrine and Covenants 76:75; 58:27].”²³ E mu tay u wun’um ni gubin e gidii’ ma bay mat’won ni nge me’eleg ir, ni yog nag Elder Maxwell: “ya ba’aray, e n’en nira buch, fa’an yira me’eleg e malmal, ma gathi kemus ni yigo yaed e fan ngoraed, ya ku fan e tin ni migid e mfen nge tin nira yib u tomuren. Thin ni dani tomilang mornga’agen ko galibithir e rayag nira palog nag pifak raed nga orel! Tin nga mm’on e mfen ko tabinaew e rayag ni yaed be dag e liyor, ma tin ni bay ko mfen ni chiney e be dag e pow riy ko tin ni dani tomilang nag mornga’agen. Ma wod, ni bin migid ngay, me boch era me’eleg e togopluw ningan tay.”²⁴

Boch e duw kafram, Elder John H. Groberg e weliy mornga’agen ba tabinaew ni’i moy ulan reb e branch u Hawaii ko napan e 1900s. Re tabinaew ney e kar manged chonggin e Galasia ni gowa napan l’agruw e duw ko ngiyal’ ni yibi m’ar reb ii fakrow ni bpin ni yib reb e m’ar ngak ni dan nang mornga’agen. Napan ni Madnom riy ni yibay u Galasia, ma fare matam nge fare fak ni pagal e yow be fal’ag fare sakrament ni wod ni yow ma rrin’ ni gubin e wik, ma napan ni yibi ragbug fare matam ni nge yibliy fare flowa, ma fare branch president, e fani tiyan’ ko en ni bay ko fare tebel ko sakrament, me sak’iy ne ga’ar, “Mu tal. Dabiyag ni ngam math ko sakrament. Ya fakam ni bpin e bay e m’ar rok’ ni dan nang ko miti mang mm’ar. Mu chuw ni ka chingiyal’ ney ma bay ni fek be’ ni nge fal’ag e sakrament nib be’ech. Dabiyag ni ngam mub ngaray. Mman.” Ma fare matam e ii sap ngak fare branch president me mu’ me sap ko fare ulung ii gidii’ nike thamiy nike tamara’ u fithik’ e gidii’, ni gubin e gidii’ ma be sap ko gathon e tabinaew rok’, ni dakuriy be’ nibe non ulan fare chapel.

Dariy bee’ ni non, ere, suled nga ranod ko fare pi’i kanawo’ i yean ngalan e tabinaew roraed. U rom mi yaed par nga but’ ni yaed ba lulubuy, me ga’ar fare matam, “Wenig dariy be’ ni nge non nge mada’ ko ngiyal’ nrayag ni nggu non.” Fare pagal ni fak ni bitir e be tafney nag ko mang e ngar rrin’ed ni ngar fulweged taban e tamara’ nikan tay ngoraed: sana ngar lii’ed e babiy ko fare branch president, fa ni urfiy e nu’un rok’, fa ra uned ngareb e galasia nib thil? Laal, ragag, ragag nge laal, riliiw’ nge laal nike thumur ndariy bee’ nibe non.

Fin arram fani munguy nag fare matam paa’, me map’ e luu’ u owchen. Me tabab fare mitin ko yoer, ma dani n’uw napan ngay mi yaed gubin ni yaed be yoer. Me sap fare matam ngak la’engin me ga’ar, “Ri gab t’uf rog,” me mu’ maki yog ere bugithin ney ngak pifak ni gubin. “Ri gamed ba t’uf rog ma gu ba’adag ni ngad pired u ta’abang, ni manemus, ni woed e tabinaew. Ma kanawo’en nikemus nrayag ni ngad rrin’ed e biney ni ngad manged chongin Fare Galasia ku Yesus Kristus ni fan ko gidii’en Got rok’ ko Tin Tomur e Rran nib mangil e ba tu’uf ni ngad sealed gaed u temple ni bay gelngin fare priesthood riy nib thothup. Ya gathi irerray e galasia ko fare branch president. Ya ireray e Galasia rok’ Yesus Kristus. Dab da piged bee’ fa ban’en ko tamara’ fa ‘uf ni’ir e nge palog nagdaed u ta’abang ni manemus. Ra bin migid e Madnom ma gadaedra sul biyay ko galasia. Ma bay da pired ni yigo gadaed rodaed nge mada’ ko ngiyal’ nikan nang mornga’agen e mm’ar rok’, machane gadaed ra sul biyay.”

Ra suled, maki gol fare fakrow nike mm’ar, ma kun seal nag fare tabinaew ulan fare Temple u Laie Hawaii ko napan nin mu’ nag i toy. Daba’, mab pag ra’ay e ya’al ni yaed be pining e matam, tutuw, nge chitamangin e matam roraed nikan tawa’ath nag ni bachan e ke chichi’iy owchen ko fare manemus.²⁵

Bin tomur i kanawo’en nrayag ni ngad gel niged e mich rodaed ngak Yesus ni bay gog e bin ni gadaed be gay e tin nib thothup ni fan ngodaed. Yesus e Tabiyul rodaed,²⁶ make yog, “Mu kalgaed ngaenʼmed, gimed gubin e gidiiʼ ni gimed bay ko tin tomur e rran u fayleng, magmed yib ngog ngan tawfe nagmed u fithingag, ni nge yog ni ngam machalbog gaed u dakean fare Kan ni Thothup, ni nge yog ni ngam sakʼiy gaed ni dariy thibngimed u pʼoewcheg ko bin tomur e rran.”²⁷

Profet Mormon e weliy mornga’agen ba ulungi gidii’ ku Somoel nira athamgil gaed ni demuturug gelngin e pi “gafgow ni kirbaenʼ nu ir ranod u fithik’”:²⁸

“Yug aram rogon machane ra baley niged e abich roraed mar meybil gaed ni gubin e ngiyalʼ, mar monʼog ra monʼog gaed u fithikʼ e sobutʼaenʼ roraed, mar miyuluy ra miyuluy gaed nga fithikʼ e mich rokʼ Kristus, nge madaʼ ko ngiyalʼ ni ke sug e yaʼel roraed ko falfalaenʼ nge gapasaenʼ, arragon, nge yaeni madaʼ ko ngiyalʼ ni ke folont make machalbog gumʼirchaʼraed, nib machalbog ni yib ni bachan e kar og niged gumʼirchaʼraed ngakʼ Got.”²⁹ Biney e irerray fare gum’ircha’ nira thil, ni gadaed be pi’ gum’ircha’endaed ngak Got ni yira be’ech nag u daken fare murunguy rok’ Somoel—ni gadaed be gay.³⁰

Mulwol rog e daba’ e ngan rrin’ ni ka chingiyal’ ney ni yag ngom bang ni gur be’ nibay e mich rom ngak Yesus. Bay ni sana ba tu’uf e kalngan’ riy, “dab ku munʼed yaran e rran ko kalngaenʼ romed,”³¹ ya “fa’an gara yon’ yirran ko reb e awa fa bin migid e summer ni bayi thumur, make m’ay fare woldug, ma dawrin thapeg fare ya’al rom.”³² Gel nigem i ayuweg fapi m’ag rom ngak Got. Dabi kireb e tafney rom ko “pin’en ni be siyeg nag e fayleng.”³³ “Mu tayed u wunʼmed ni ngam chaʼariyed fare fithingan [Kristus] ni kan yoloey ni gubin e ngiyalʼ u lan gumʼirchaʼmed, … ni [nge] gimed ra rungʼag mi gimed nang e lam fithingan ni yira pining med u dakean, nge re fithingan nra pining ngomed.”³⁴ Nge fin arram mag, “tay e ren’ey u gum’ir’cha’med, ni ran ngongoliy pin’en nira machib nag [Yesus], min motochiyel nagmed.”³⁵

Chitamangdaed e ba’adag ni gubin pifak ni nge fanay me falfalaen’ ko fare yafos ni manechubog ulan fare celestial kingdom rok’. Yesus e gafgow, me yim’, min fosagkoyam’ ni ngeyag wo’en e biney. Ke “yaen Kristus nga tharmiy, ma ke paer nga baʼani matʼaw i paʼ Got, nge fek rokʼ e en Chitamangiy matʼawon ko murnguy ni ke tay ngakʼ e gidiiʼ.”³⁶ Gube meybil nag ni yira tawa’ath nag daed ko fare mich nib gel ngak Somoel Yesus Kristus, min falfalaen’ min gel nag fare mich rodaed, me falfalaen’uy ko fare murunguy rok’ nibe pi’ ngalan e yafos rodaed ni gubin e rran. U dakean fithngan Yesus Kristus, amen.