Ba Gaa’ Fan ea Pi Thin

Pi walageg ni pumo’on, nge ppin, nge fagar nibay u dakean ea fayleng, gu be falflaen’ ni ngu welthin ko pi gidii’ nib yo’or, ni bo’or ko picha’ney ea gidii’en ea Galasia rodaed ma bo’or ea picha’nem ea fagar nge gidii’ ni dawori motoyil ko biney ea conference. Kamagargaed nikam bad!

Fapi mulwol ni yira pii’ ko biney ea tagil nib thothup ea be pii’ ko pi thin. Yibe yoeg ko Thin nu Merikan ma yibe pilyeg ko 100 ea thin nib thil. Gubin ngiyal’ ni taboelngin ea ta’areb. Pi Thin. Ma rib gaa’ fan ea pi thin. Mu pageg ni ngu goeg ea binem biyay. Ba Gaa’ Fan ea Pi Thin!

Pi thin ea taboelngin rogon ni baey ea tha’ u thildaed; be dag ea mich rodaed, gafaerig rodaed, nge rogon ea tin ni da guyed. Boech ngiyal’ ma gadaed be yoeg ea pi thin; ma ku boech ngiyal’ ma gadaed be motoyil. Pi thin ea ma taey rogon. Be weliy ea lem rodaed, thamiy rodaed, nge tin ni ke buch rodaed, ni fan ea tin kireb fa tin mangil.

Machane, pi thin ea rayog ni ra kireb, papay, ma ra miitheg bee’. Ra yoeg, ma dabiyog ni nge fek nge sul. Rayog ni nge miitheg, gaechig, th’aeb, ma ra powi’iy ko pi ngongol ni ra gathaey. Rayog ni nge paer rodaed ni ba tomaal.

Machane amrogon, pi thin ea rayog ni nge liyor ea gel, pi’ ea thap nge athamgil. Rayog ni nge bucheg ni ngad lem gaed biyay, ngad tabab gaed biyay, ngad thiliyeged rogdaed. Rayog pi thiin, ni nge bing tafinaey rodaed ko tin riyul’.

Amrogon, ni bin ta’areb nge bin th’abi gaa’ faen, nib gaa’ fan ea pi Thin ku Somoel.

Lane fare Babyor ku Mormon, ma fare profet i Alma nge pi gidii’ rok’ u lan ea Mariken nib kakrom mar guyed ea mael ni dabimus bi’id ko pi cha’an ni dariy fan nag fare thin ku Somoel, ra ‘el’eg niged gum’ir’cha’raed, mar kireb niged yalraed. Gidii’ ni bay e mich rayog ni kar chamgad, machane Alma ni fonow nag rad ni: “Ere chiney, e bachan e machib ko fare thin e be mʼug riy ni wawliy fapi gidiiʼ ni ngar rinʼed e tin nib matʼaw—arragon, ma bagaʼ angin ni aw nga laniyaenʼ fapi gidiiʼ nga rogon ni rinʼ e sayden, ara yug banʼen, ni ke buch roraed—ere Alma e lemnag nib gamog ni ngar gayed rogon falʼngin fare thin ku Got.”¹

Fapi “thin ku Got” ea be gel ko gubin ea thin ni yibe yoeg. Ri ke mangil ni u tomeraen ni kan Sunmiy ea fayleng u tomeraen ni yoeg Somoel: “Mu pag nira moey ea tamilang: ma ke moey ea tamilang.”²

Ke yib ko fare Somoel ea pi mich ney u lan fare M’ag nib Bi’ech: Tharmiy nge fayleng ra mus machan ea pi thin rog ea dabi mus.”³

Ma biney: “en ni gub t’uf rok e ra fol ko thin rog: ra t’uf rok e Chitamag, ma Chitamag nge gag e gamow ra yib ngak nggu pirew rok.”⁴

U Mary, fare Chitinan ea Yesus, nike yib e mich nib sobutan: “Amusap fare Tapigpig ku Somoel; am pag rog ni rogon ea pi thin rom.”⁵

Nge michaen’daed ngad fol gaed ko fare thin ku Got ea ra chuchugur nag daed ngak. President Russell M. Nelson ke micheg, “Nap’an ga ba fil ea pi thin Rok’, ma ra gaa’ nag gelngmed ni ngam pired ni boed rogon.”⁶

Gathi arrogon ni gadaed ba adage ni gadaed gubin, ni boed rogon ni yoeg fare tang nib thothup, “kan tawa’ath nag ni thothup nag—ku boech, Somoel, boed rogon”?⁷

Gu be lemnag ya’an ni Yosef Smith ni ragbug mab rung’ag fapiy thin ko Chitamangin nu Tharmiy: “[Joseph], Ireray Fakag nib t’uf nib Magagirag rog. Motoyil Ngak!”¹⁸

Gadaed ra “rung’ag Ir” u lan fapi thin ko chep nib thothup, machan ea ra da paged pithin nem ni ngar pired udakean fare babyor, ara gadaed be nang fan ni Be non ngodaed? Ra da thilyeged gadaed?

Gadaed ra “rung’ag Ir” u dakean ea yi’iy rodaed nge thogthog ni yib ko fare Kan ni Thothup, dakean ea pi ful ko meybil, ma nap’an ea pi ngyal’ nem ni kemus ni Yesus Kristus, nu dakean gelgnin ea Biyul’ Rok’, ma rayog ni nge chibiy nga lan ea tamulwol rodaed, ra pii’ ea m’agfan nge gapaes, ma ra fek daed “u lan ea paa’ ko t’uf rok’.”⁹

Bin L’agruw, ma ba gaa’ fan fapi thin ko fapi profet.

Fapi profet e yad ma micheg nib thothup Yesus Kristus. Yaed ma machib nag ea Gospel Rok’ ma yaed ma dag ea t’uf Rok’ ko gidii’ ni gubin.¹⁰ Gu be micheg ni profet rodaed ni be fos, i President Russell M. Nelson, ea ma rung’ag ma yoeg fapi thin ku Somoel.

President Nelson ea manang rogon ni nge non nib fel’ rogon. Ke yoeg, “Mu fol ko fare kanawo’ ko m’ag,”¹¹Mukunuy ea Israel,”¹² “Mu Pag Got Nge Gel,”¹³Mu toey ea waathal ko manangfan,”¹⁴ “Mu ‘Oeg ea Magar,”¹⁵ “Gaa’ nag ea Mich ngak’ Yesus Kristus,”¹⁶ “Mu gel nag ea mich rom,”¹⁷ma “Paer ni ga be yib nag ea gapaes.”¹⁸

Gathi n’uw nap’an me pining daed ni ngaed “lemniged ea tin nib celestial!” “Napan nira yib reb e mo’owar ngom,” me ga’ar, “mu tafney nag e celestial! Napan nira yib reb e lumel ngom, mu tafney nag e celestial! Napan nira kirbaen’ nigem bee’ nib t’uf rom, mu tafney nag e celestial! Napan nira yim’ bee’ ko chingiyal’ ney, ma garam tafney nag e celestial.Napan nira tomal nigem e yafos, mu tafney nag e celestial! … Napan ni bay mu tafney nag e celestial, mara thil rogon e changar rom, … gimed ra guy ea tin mo’maw nge tin gafgow nib thil rogon, … [ma] mich romed ra gaa’.”¹⁹

Nap’an ni gadaed ra lem nag ea tin nib celestial, ma … ngad guyed ea “pin’en nib riyul rogon ni be paer, ma ra paer.”²⁰ Dakea ea biney e faylen ni baey riy ea wagagaey nge macham ma ba t’uf rodaed rogon nem ni ngad guyed.

Elder George Albert Smith, ni kafararm ko ngiyal’ ni’Ir ea President ko fare Galasia, ea Ke weliy mornga’agen ea fol ko fare profet ngan fol ko pi thin rok’. Ma ke yoeg: “Fare pining ni ngad fel’eged ni nap’an ni gadaed be t’og nga lang ea pa’ rodaed … ea bin ni th’abi thothup. … Be yip’ fan ni … baey da sak’iyed ni tomuern; baey da meybil ni fan ngak’; … ma baey da gay rogon ni ngad fol gaed ko motochiyel rok’ ko rogon ni ra motochiyel nag Somoel.”²¹ U lan ea pi thin nib thil, gadaed ra ngolngoliy ea pi thin ko profet rodaed.

Ni gag reb ko 15 ea profet, tayi’iy, nge en nima thapeg e thogthog ni yib nikan yibliy gidii’en ea Galasia ko fowap, gu ba ‘adag ni ngu goeg ban’en ni buch ngog ni kug yibliy fare profet gu fol ko pi thin rok’. Ke buch ngog ni boed rogon fare profet i Jacob, ni yoeg, “kug rungʼag fare lam rokʼ Somoel ni be non ngog.”²²

Bin tomur ea October le’engig, i Melanie, nge gag ea gu moeyew u lan ea Bangkok, Thailand, ni nap’an nug fel’eg rogon ni ngu yibliy ea bin 185 ea temple ko Galasia.²³ Gag, ea gu thamiy ni biney ea muruwel ea gathi riyul’ ma be sobut’aen’ug. Biney ea bin som’on ea temple ni kan toey u dakean fare peninsula ko Southeast Asia.²⁴ Kan fal’eg rogon nib fel’ rogon—ba tafen ni baey riy ea nel ea thal, nge mereeb ea tatawo’ ni wod e spiral, “Yarmiy nib fel’”²⁵ ni binem ea na’un ko Somoel. Ke boech ea pul ni ke yean ni kug tafnaey nag morninga’agen ea yibliy ni ngu taey. Kug dugliy u lanea ya’el rog nge tafnaey rok ea fare nam nge fare temple ea kan koel u lan ea paa’ ko pi profet nge apostle. President Thomas S. Monson ea ke yoeg fare temple²⁶ ma President Nelson fare yibliy ni kan taey.²⁷

Kug fal’eg rogon fare meybil ko yibliy ni pi pul kafaram. Pi thin nem nib thothup ni ragag nge l’agruw e thin nikan pilyeg riy. Kan fal’eg rogdaed. Ara kug lem nag ni arrogon.

Ke nep ko rran u m’on ea rran ko yibliy, ma kan ‘oed nigeg ko mol rog ni kireb e thamiy rog, ni mornga’agen fare meybil. Kug gaey rogon ni ngu tay nga palog fare lem, ni gu be lem nage ni kayog fare meybil. Machan ea de pageg fare Kan ni Thothup. Kug thamiy nib t’uf ku boech ea thin, ma dakean ea tunom nib thothup ke yib ngog u dakean ea yi’iy, mug tay ea pi thin ney nga lan fare meybil, u tomuren: “ Mu pag ni ngu lem niged ea celestial, ni gadaed be pag fare kan ni Thothup ni nge gel u lanea yafos rodaed, ngad gayed rogon ni ngad yib niged ea gapas.”²⁸ Ke tay u wun’daed somoel ni ngu motoyil ko fare profet nib fos: “Mu lemnag ea celestial,” “pag fare kan ni Thothup ni nge gel,” “gay rogon ni ngu yib nag ea gapas.” Pi thin ko fare profet ea ba gaa’ fan ko Somoel nge gadaed.

Bin Dalip, ma rib gaa’ fan, ea tirodaed ea thin. Mu micheg ngog, u lane ea fayleng rodaed ni baey ea emoji riy²⁹ rib gaa’ fan ea pi thin.

Pi thin rodaed ea rayog ni be ayuweg fa puwaen, falflaen’ fa kireb, murenguy fa muun nga waen. Ko chingyal’ nem, pi thin ea rayog ni nge mitheg nge yaen nga lane ea ya’el—nge paer riy. Pi thin u dakean ea internet, test, social media, fa tweets ea rayog ni ngar feked ea yafos ngar fos gaed. Ere mu lem nag ea thin ngam moged, ma rogon ni ngam moged. U lan ea tabinaw rodaed, ni baey figirngiy, le’engin, nge bitir, ma pi thin rodaed ea rayog ni nge yib nag daed nga ta’abang fa palog nagdaed.

Mu pageg ni ngu goeg dalip ea n’en ni rayog ni ngad doeged ni rayog ni nge fek ea amiith ko tin momaw’ nge thil, nge puwiy nga lang, nge pii’ athamgil ngodaed:

“Kamagaer.”

“Sirow.”

Ma ku “Gab t’uf rog.”

Dam ngongoliyed ea pi thin ney ni yigo ko bin th’abi gaa’ fan ea ngiyal’. Mu ngongoliyed ea pi thin ney ni bo’or yay ni riyul’, ya yaed ma dag ea t’uf ko gidii’. Numon e danki wod ni somm’on; damu leak wo’en e biney.

Rayog ni ngad doeged ea “kamager” u lane fare elevator, u lan ea fare parking lot, u lan ea fare kantin, u lan ea fare gin ko muruwel, fa ngak’ ea buguliyoror fa fagar rodaed. Rayog ni ngad doeged ea “Siro” ni nap’an ni kad fal’eged ea oloboch, dad uned ea mu’ulung, kad paged talin ea birthday, fa kag guyed bee’ ni baey ea amith rok’. Rayog ni ngag doged ea “Gab t’uf rog” ma baey ko pi thin nem fapi thin ni “Gu be lem nag mornga’agem,” “Ga ba gaa’ fan ngog,” “Gu be ara’ ni fan ngom,” fa “Gur ea gab gubin ngog.”

Am pag ni ngu goeg ban’en ni ke buch u lan ea yafos rog. Pumo’on, mu motoyil mu fol riy. Pi ppin, biney ea kura aywuegmed. M’on ea muruwel rog ko fare Galasia, kug milekag nga palog ni fan ko company rog. Gu waen nga palog ni bo’or ngiyal’ ko yuyang gin ko fayleng nib palog. Tomuren ea rran rog, ni dariy’ fan bu’uw kug paer, ma kug pining nga tabinaw. Nap’an ea ppi rog, i Melanie, ea key fek fare fon mug non ngak’, ma sabathin romow ea ke thil ni gamow be yoeg ea “Gab t’uf rog.” Gubin ea rran, pi thin nem ea ke paer ni taboelngin ea ya’el nge yalen rog; ke ayuwegeg ko tin tagil. “Melanie, Gab t’uf rog” ea ma dag ni be pag’aenmow ngomow.

President Thomas S, Monson ea ke yog kofaram, “Bay rifrif’ay e dugil’nag, pa’ay ni ngan kol’, tafnay ni ngan ayuweg, gumircha’ey ni ngan chibiy, nge bee’ ni ngan ayuweg.”³⁰ Ni yoeg ea “Kammagar,””Siro’,” “Gab t’uf rog,” ea ra rin ea binem.

Pi Walageg ni Pum’on nge Ppin, i baga’ fan ea pi thin.

Gu be micheg ni fa’an gadaed ra “kaey fapi thin ku Kristus”³¹ ni ma powiy ko thap, pi thin ko profet rodaed ni ma poweiydaed ma pii’ athamgil ngoadaed, ma ku pi thin rodaed ni ma yoeg rogon ni gadaed ma par ma pin’en nib gaa’ fan rodaed, ma yira pu’oeg fapi gelngin tharmiy nga dakean daed. “Fapi thin rokʼ Kristus e ra yoeg ngomed rogon gubin e pinʼen ni ngam rinʼed.”³² Gadaed ea bitir Rok’ ma Ir ea Got rodaed, ma be t’uf rodaed ni ngad noned ko “fare lam ku pi angel”³³ u dakean gelngin fare Kan ni Thothup.³⁴

Ba t’uf rog Somoel i Yesus Kristus. Yima pining Ir, u lane fapi thin ko fare bin Kakrom e M’ag ku profet Isaiah, “Maʼangʼang, Taʼayuw, Fare Got ni Gubin marayog Rokʼ, Fare Chitamangiy ni Manemus, nge Fare Pilung ko Gapas.”³⁵ Ma boed rogon ni weliy fare Apostle John, Kristus ea “Ir fare Thin”.³⁶

Gu be micheg ea pin’ey ni gag ea Apostle ni kan Pinningeg ko fare pigpig nib thothup ku Somoe—ni nggu weliy e ma kan pinningeg ni ngu paer ni gu ma micheg Morunga’agen Ir. U dakean fithngan Somoel Yesus Kristus nib thothup, amen.