Na iVakavuvuli i Jisu Karisito

Eda vakabauti Karisito. Ni da lewena Na Lotu i Jisu Karisito ni Yalododonu Edaidai, eda sa sokalou Vua ka muria na Nona ivakavuvuli ena ivolanikalou.

Ni bera na Lutu, a vosa vakadodonu na Tamada Vakalomalagi vei rau o Atama kei Ivi. Mai na veidusimaki oqo, a vakatakila na Tamana na Luvena Duabau sa Vakatubura, o Jisu Karisito, ni sa noda iVakabula ka Dauveivueti ka solia mai na ivakaro meda “rogoci Koya.”¹ Mai na veidusimaki oqo eda tinia kina ni itukutuku vakaivolanikalou ni vosa a tukuna na “Kalou” se na “Turaga” era sa vakadina e veigauna na vosa i Jiova, na noda Turaga sa tucaketale, o Jisu Karisito.²

Sa soli vei keda na ivolanikalou me dusimaka na noda bula. E sureti keda yadua kina o Nifai meda “kana magiti ena vosa i Karisito; ia, raica na vosa i Karisito sa tukuna vei kemudou na veika kece mo dou kitaka.”³ E vuqa na ivolanikalou era tukuna tiko na cakacaka i Jisu e vuravura era sa tukuna tiko na veika a cakavao Koya. Na noqu itukutuku nikua era oka kina na vosa digitaki ni nona vosa na noda iVakabula—na veika a kaya. Oqo na veivosa era volai tu ena Veiyalayalati Vou (oka kina na ikuri veivakauqeti nei Josefa Simici) vakakina ena iVola i Momani. E vuqa vei ira na vosa digitaka oqo era veitaravi ena sala e vosa kina na noda iVakabula.

“E dina, e dina, au sa kaya vei iko, Kevaka sa sega ni sucu tale na tamata, ena sega ni raica rawa na matanitu ni Kalou.”⁴

“Sa kalougata ko … ira kece [sa] via kania ka via gunuva na ivalavala dodonu, ni ra na vakasinaiti ena Yalo Tabu⁵

“Sa kalougata ko ira na dautataro ni ra na vakatokai me luve ni Kalou.”⁶

“Dou sa rogoca sa kainaki vei ira e liu, Mo kakua ni dauyalewa:

“Ia koi au, kau sa kaya vei kemudou, O koya yadua ena raica na yalewa me dodomo kina, sa dauyalewa oti kaya e lomana.”⁷

“Dou sa rogoca sa kainaki, Mo lomana na wekamu, ka cata na nomu meca.

“Ia koi au, kau sa kaya vei kemudou, Dou lomani ira na nomudou meca, vosavinaka vei ira sa rukaki kemudou, caka vinaka vei ira sa cati kemudou, ka masulaki ira sa vakalialiai kemudou, ka vakacacani kemudou;

“Mo dou luvena na Tamamudou sa tiko mai lomalagi: ni sa vakacabea ko koya na nona matanisiga vei ira na tamata ca kei ira na tamata vinaka”⁸

“Ia kevaka dou sa sega ni cudruvi ira na tamata sa caka cala, ena sega talega ni cudruvi kemudou na Tamamudou vakalomalagi:

“Ia kevaka dou sa cudruvi ira na tamata sa caka cala, ena cudruvi kemudou talega ena vuku ni nomudou caka cala na Tamamudou.”⁹

“Kevaka dou sa vakavuravura ena lomana na kai nona ko vuravura, ia ni dou sa sega ni vakavuravura ia kau sa digitaki kemudou mai vuravura, sa ikoya oqo sa cati kemudou kina ko vuravura.”¹⁰

“O koya mo dou kakua kina ni vakasaqara na veika ni vuravura oqo ia vakasaqara taumada mo dou tara cake na matanitu ni Kalou, ka tauyavutaka na nona buladodonu, ia na veika kece oqo ena qai kena ikuri vei kemudou.”¹¹

“O koya, na ka vakayadua ga dou sa vinakata me ra kitaka vei kemudou na tamata, dou kitaka vakatalega kina vei ira, ni sa vakaoqo na vunau kei ira na parofita.”¹²

“Ia dou qarauni kemudou vinaka mai vei ira nai vakavuvuli vakailasu, era sa lako mai vei kemudou ka vakaisulu vaka na sipi, a ra sa wolifa daukata e lomadra.

“Dou na kilai ira ena vuadra. Era sa betia li na tamata na vua ni vaini ni wa vakavotona, se na lolo mai na soni?

“Sa vakakina sa vuataka na vua vinaka na kau vinaka kecega; a sa vuataka na vua ca na kau ca.”¹³

“Ena sega ni curu ki na matanitu vakalomalagi ko ira kecega sa kaya vei au, Turaga, Turaga, ko koya ga sa cakava na loma i Tamaqu sa tiko mai lomalagi.”¹⁴

“Dou lako mai vei au, koi kemudou vakaduaga sa oca, ka colata na icolacola bibi, ia kau na vakacegui kemudou.

“Vakataqara vei kemudou na noqu ivua, ka vuli vei au; ni’u sa yalomalua ka yalomalumalumu: dou na kunea kina na vakacegu ni yalomudou.

“Ni sa rawarawa na noqu ivua, ka mamada na noqu icolacola.”¹⁵

“Kevaka edua sa via muri au, me kakua ni muria na lomana, ia me colata na nona kauveilatai, ka muri au.

“Ia oqo me tomika cake na nona kauveilatai e dua na tamata, sai koya me cakitaka na veika kecega e sega ni vakalou, kei na gagano kecega vakavuravura, ka muria na noqu ivakaro.”¹⁶

“O koya, mo dou laivi vuravura, ka maroroya na yalomudou; a cava na kena yaga vua na tamata, kevaka ena rawati vuravura taucoko, ka vakayalia na yalona? Se cava e rawa ni solia edua na tamata me isosomi ni yalona?”¹⁷

“Kevaka e dua na tamata sa via cakava na lomai koya, ena kila se sa ka mai vua na Kalou nai ivakavuvuli, se’u vosa vakai au ga.”¹⁸

“Au sa kaya talega vei kemudou, Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemuni.

“Ni sa rawata ko koya yadua sa kerekere; ka sa kunea ko koya sa vakasaqara; ia ena dolavi vua sa tukituki.”¹⁹

“Eso tani tale na noqu sipi, era sa sega ni tiko ena bai oqo; sa kilikili me’u kauti ira tale ga mai, a ra na rogoca na domoqu; ena qai duabau ga na qele ni sipi, ka duabau ga na ivakatawa.”²⁰

“‘Sa kaya vua ko Jisu, Oi au na vu ni tucake tale, kei na vu ni bula, ko koya sa vakabauti au, kevaka sa mate, ena bula ga:

“Ia ko koya yadua sa bula ka vakabauti au, ena sega sara ni mate.”²¹

“[Na vunau cecere ena lawa o ya:] Mo lomani Jiova na nomu Kalou ena lomamu taucoko kei na yalomu taucoko kei na nomu nanuma kecega.

“Ai matai ni vunau oqo ka levu.

“Kei na kena ikarua sa tautauvata kaya, mo lomana na kainomu me vaka ko lomani iko.

“Sa vu ni vunau taucoko kei ira na parofita na vunau e rua oqo.”²²

“Ko koya sa nanuma na noqu vunau ka talairawarawa kina, sai koya oqo sa lomani au; ia ko koya sa lomani au ena lomani koya ko Tamaqu, ia kau na lomani koya, ka vakatakilai au vua.”²³

“Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere.”²⁴

“Sa noqu vunau oqo, Mo dou veilomani, me vaka kau sa lomani kemudou.”²⁵

“Raica na ligaqu kei na yavaqu, sai au dina ga: tarai au, ka raica; ni sa sega ni vakalewena se vakasuina na yalo, me vaka dou sa raica vei au” ”²⁶

“O koya mo dou qai lako, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu:

“Vakavulici ira mera vakabauta na ka kece ka’u a vosa kina vei kemudou: ka mo dou kila, au sa tiko vata kei kemudou ena veisiga kecega, ka yacova na ivakataotioti kei vuravura.”²⁷

Ni oti na Nona cakacaka ena Vanua Tabu, a rairai mai o Jisu Karisito vei ira na yalododonu ena vanua o Amerika. Oqo eso na vosa a cavuta mai kea o Koya:

“Raica, koi au ko Jisu Karisito na Luve ni Kalou. Au a bulia na lomalagi kei na vuravura, kei na veika kecega sa tu kina. Au a tiko vata kei na Tamada mai na ivakatekivu. Au sa tu vei Tamada, ka sa tu vei au ko Tamada; ka sa vakalagilagi na yacai Tamada ena vukuqu”²⁸.

“Koi au na rarama kei na vu-ni-bula kei vuravura. Ko i au na Alifa kei na Omeka, na ivakatekivu kei na ivakataotioti.

“Ia mo ni kakua tale ni vakadavea na dra ka vakacabora vei au; io, sa cava eke na nomuni isoro kei na isoro kama, ni’u sa na sega tale ni vakadonuya na nomuni i soro kei na nomuni isoro kama.

“Ia mo ni na cabora ga me isoro vei au na yalo raramusumusu kei na yalo bibivoro. Ia ko koya yadua sa lako mai vei au ena yalo raramusumusu kei na yalo bibivoro, au na papitaisotaki koya ena bukawaqa kei na Yalo Tabu. …

“Raica, au sa lako mai ki vuravura me’u kauta mai na veisereki ki vuravura, me’u vakabula kina na vuravura mai na ivalavala ca.”²⁹

“Au sa kaya tale vei kemudou, ni sa dodonu mo dou veivutuni ka papitaisotaki ena yacaqu ka yaco me vaka na gonelailai, ia kevaka e sega, ko ni na sega sara ni rawata na matanitu ni Kalou.”³⁰

“O koya au sa gadreva kina mo dou vinaka sara me vakataki au, se me vaka na Tamamudou sa tiko mai lomalagi.”³¹

“E dina, e dina, au sa kaya vei kemudou, mo dou dauvakatawa ka masu tikoga, me kakua ni temaki kemudou na tevoro ka kauti kemudou tani vakavesu.”³²

“O koya mo ni dau masu tikoga vua na Tamada ena yacaqu”³³

“O koya mo ni kitaka kina na ka kecega ko ni sa kitaka ena yacaqu, o koya mo ni vakatoka kina na lotu oqo ena yacaqu.”³⁴

“Raica au sa solia vei kemudou na noqu kosipeli, ia oqo na kosipeli au sa solia vei kemudou—niu a lako mai ki vuravura meu kitaka na lomai Tamaqu, ni a talai au mai ko Tamaqu.

“Ka sa talai au mai ko Tamaqu meu na mai laveti cake ena kauveilatai, ia niu sa laveti oti cake ena kauveilatai meu na kauti ira mai kina na tamata kecega kivei au, me ra na tu e mataqu ka lewai ena nodra ivalavala, se vinaka se ca”³⁵

“Ia oqo na ivakaro: Mo ni veivutuni, koi kemuni kecega mai na iyalayala kei vuravura, ka lako mai vei au ka papitaisotaki ena yacaqu, mo ni vakatabui kina ena isolisoli ni Yalo Tabu mo ni duri ka sega ni tauvi duka kina e mataqu ena siga mai muri.”³⁶

Eda vakabauti Karisito. Au na tinia ena Nona kaya baleta na sala meda na kila ka muria kina na Nona ivakavuvuli:

“Ia na Dauveivakacegui, na Yalo Tabu, ko koya ena tala mai ko Tamaqu e na yacaqu, ena vakavulici kemudou ena ka kecega kau a vosataka vei kemudou.”³⁷

Au sa vakadinadinataka ni sa dina na veivakavuvuli oqo ena yaca i Jisu Karisito, emeni.