Бид ариун сүмийг үзэхээр ирлээ

Намайг Солт Лейкийн ариун сүмд ажилладаг байхад намрын нэг өдөр ариун сүмийн шүтлэгт огт тохирохгүй хувцасласан нэг залуу найз нартайгаа ирэв.

“Бид ариун сүмийг үзэхээр ирлээ” гэж нөгөөх залуу хэллээ.

“Танд зөвшөөрлийн бичиг чинь байна уу?” гэж би асуув.

Тэр залуу хормын төдийд бодсоноо, “Бий. Миний ээжийн нэг Мормон найз Минесотад байдаг. Тэр л биднийг ариун сүмийг үзээрэй гэсэн юм л даа” гэв.

Би залуусыг хажуу тийш нь аваачиж, ярилцах үедээ Сүнсээр нөлөөлөгдлөө. Тэр залуугийн нэрийг Ларс гэдэг ажээ. Зөвхөн тэр өөрөө ариун сүмийг үзэх хүсэлтэй байх төдийгүй бас Тэнгэрлэг Эцэг түүнийг ариун сүмд ирэхийг хүсдэгийг түүнд тайлбарлалаа. Эхлээд тэр бэлтгэх хэрэгтэйг би хэлж, хэрхэн бэлтгэхийг тайлбарлав.

Тэр үед би зөвхөн богинохон хугацаагаар Сүмд идэвхтэй байлаа. Би номлолд үйлчилсэн ч хожим нь үзвэр үйлчилгээний бизнесийг сонирхож, мансууруулах бодис, архи хэрэглэдэг болсны дараа Сүмийг орхисон юм. Гэрийхэн маань миний ажил төрөл, эрүүл мэндийн талаар санаа зовох болов уу гэж бодсон ч ээж алиных нь ч талаар санаа зовсонгүй. Үүний оронд ээж миний нэрийг ариун сүмийн залбиралд үргэлж тавьдаг байсан нь миний уурыг хүргэдэг байлаа.

Миний гэрлэсэн бүсгүй бас Сүмийг орхисон байв. Тэр үеэр манай найман настай охин Тори Есүс Христийн тухай асуудаг болж эхлэхэд бид сүнслэг байдлын хувьд уналтанд орсон байлаа. Би хэдийгээр номлолд үйлчилсэн ч, Аврагчийн тухай юу ч санахгүй байв.

“Есүсийн тухай чамд заахад тэнцэх хүмүүс бий” гэж би Торид хэллээ. “Та тэдэнд яагаад хэлж болдоггүй юм бэ?”

Хэд хоногийн дараа хоёр систер манай хаалгыг тогшив. Тори тэднийг урьж, ингээд хичээл авч эхэлсэн ажээ. Үнэн гэдгийг нь миний хүлээн зөвшөөрсөн сургаалуудыг систерүүд зааж байгааг би нөгөө өрөөнөөс сэмхэн чагнасан юм.

Гурав дахь ярилцлагын дараа систерүүдийн нэг нь Торигоос “Та баптисм хүртэх үү?” гэж асуулаа.

“Тэгнэ ээ” гэж тэр хариулав.

“Аав чинь чамд баптисм хүртээх үү?”

Бид сүмд 20 жил болоогүй ч, амьдрал минь өөрчлөгдөж байсныг би мэдэж байлаа. Би сүүлчийн хэдэн ярилцлага дээр сууж, эхнэр бид хоёр сүмд очин бишоптой уулзлаа. Би наманчилж, алдагдсан жилүүдээ нөхөхийн тулд боломжтой бүхнийг хийхээр шийдэж билээ. Би ажлаа өөрчилж, сүмийн дуудлагууддаа хичээл зүтгэлээ дайчлан ажиллаж, эхнэр охин хоёртойгоо лацдан холбуулж, ариун сүмийн ажилтан боллоо. Ингэж би эдгээр сониуч залуус хэрхэн ариун сүмд ороход зохистой болж болохыг мэднэ.

Дараагийн хавар нь Ларс надад захидал бичиж, ариун сүмийн зөвшөөрлийн бичгийн жинхэнэ утга учрыг тайлбарласанд надад талархал илэрхийлсэн юм. “Ариун сүмийн зөвшөөрлийн бичгийн талаар би илүү ихийг суралцсан” гэж тэр бичжээ. “Үнэндээ би баптисм хүртээд, дөнгөж өнгөрсөн нэгдүгээр сард л ариун сүмийн зөвшөөрлийн бичгээ хүлээн авсан байсан!” Тэрээр баптисмынхаа цагаан хувцастай, өөрт нь заасан номлогчидтой хамт авахуулсан гэрэл зургаа хавсаргасныг хараад нүдэнд минь нулимс цийлэгнэж билээ.

Миний ариун сүмд эргэн ирсэн аян гайхалтай байсан. Мөн Ларсын аяны талаар мэдсэн нь бид хэрхэн хүмүүсийн амьдралд сайн нөлөө үзүүлж болдгийг надад сануулсан гайхамшигтай адислал байсан юм.