Iesu ngke te Teei

Maria e taua te teei ae Iesu ngke e nakonako inanon te tembora ae tabetabe i Ierutarem. Ngaia ma Iotebwa a roko mai Betereem bwa a na anga karea ibukin uoman te taobe n te tembora. E a kani koro onoua ana ririki ni maiu Iesu.

Inanon te tembora ao boni iai temanna te unimwaane ae arana Timeon. E tuangaki n te berita bwa e na kona n noora te Tia Kamaiu n te bong teuana.“Ao e tuangaki iroun te Tamnei are Raoiroi bwa e na aki mate I mwain noran ana Mesia te Atua irouna” (Ruka 2:26). Ngke e noora te teei ae Iesu, e kimwareirei Timeon ibukina ngkai e ataia bwa e a tia ni kakoroaki nanon te berita anne. Ao ngkanne te unaine ae arana Anna are e beku n te tembora e kakoaua ma te kimwareirei bwa Iesu bon te Tia Kamaiu.

Ma tiaki ni kabane aika a kukurei ibukin bungiakin te Tia Kamaiu. E ongo te Uea ae Erote bungiakin te teei are e na riki bwa uean Iutaia. E aki tangiria Erote bwa e na iai ae e na uea iaon abana. E tua bwa ataei ake a bungiaki irakin Betereem inanon uoua te ririki n nako a na bane n tiringaki!

E a kaoti te anera nakon Iotebwa inanon te mii ni kauringnga ibukin ana babaire Erote. A biri nako Iotebwa ma Maria n te bong. A kaira Iesu bwa a na maeka i Aikubita, n te tabo are e na mano iai.

Imwiin maten te Uea are Erote, a mwaing ana utu Iesu nakon te kaawa ae Natareta. E mwakuri Iotebwa bwa te kabentaa. E tararuaia kaain batana Maria.

E reiakinaki Iesu ni mwakuri irarikin Iotebwa. N aroia ni kabane ataeinimwaanen Iutaia, E kamatebwai koroboki aika tabu ao tuan Iutaia. A ongeaba nakon tuua Iotebwa ma Maria, ao Iesu e reiakinaki irouia ana karo iaon te aba. E ikawairake te tei, ao e riki ni korakora, ao E kaonaki n te rabakau: ao e mena i Rouna ana akoi te Atua” (Ruka 2:40).

Ngke e a koro ana ririki 12 Iesu, e kairaki irouia Maria ao Iotebwa bwa a na bukamarua Te Toa are te Riao. A mwamwananga ma aomata aika a mwaiti. A nakonako aine ao mwaane inanon kurubu aika kakaokoro, ao a kakaitibo utu n tatabemaniia ibukin te katairiki ngkai a katei kaembwa inanon kawaia.

Imwiin te bukamaru ao a okirii mweengaia Iotebwa ao Maria. N te tairiki anne a kunea bwa akea Iesu ibuakoia te koraki ake a mwananga ma ngaia. A waekoa n oki nako Ierutarem bwa a na kakaea. Imwiin tenibong te bong a kunea Iesu inanon te tembora. E taetaenikawai ma taan reirei ao ni kaekai aia titiraki. A rangin tounako mwaane ake a mena inanon te tembora.

Maria e tuanga Iesu bwa ngaia ao Iotebwa a bon rangi n raraoma. E kauringiia Iesu bwa E tangiria ni karaoa Ana mwakuri Tamana are i Karawa. E ngae ngke e uarereke, e ataia Iesu bwa iai ana mwakuri ae kakawaki ae e na karaoia ae mwakoron ana babaire Tamana are i Karawa.