Tibwaan te Berena ni Kamaiu

Bon te bong ae kabuebue i Foz do Iguaçu, Paraná, Brazil. I a tia ni mwananga inanon tabeua te aoa ao I a kua. Ngkai ngai te tia kairiiri ni Bootaki n Reirein te Aro, iai bwaai aika N na taekinii nakon te bitiobi n tain te bootaki n taromauri. E ngae n anne, e aki tauraoi inanon tabeua te miniti ngke I roko.

Ngke I tabe n tataninga, temanna te aine e rinnako n te umwantabu. E kainetai ni kawarai ao e bubuti ma te nanorinano teutana te mwane bwa e na kabooa kanana ma buuna te kariki bwa a baki. E kabwarabwara bwa ngaia ma buuna a baki, e ngae ngke e bon mama ni bubuti, e taekinna neiei bwa akea riki ae ana anga. “Tii ibukin te berena ae uarereke,” e reitia.

I bon riingaki, ao I anai tabeua tianti man au buua. N ana iango ao e taku bwa e mwaiti. I tuangnga, “Kabooa te kariki, te miriki ao teutana te iriko.”

E rangi ni kakaitau ao e tuangai bwa buuna e berita bwa e na reke ana mwakuri n te wiiki ae e na roko n te Kauabong. E tangiria neiei ni kaboa mwiin au mwane man boon buuna ngkana e reke ana bwakabwai.

I tuangnga bwa e aki kainnanoia ni karaoia. E kamatoa.

I tuangnga, “N onea mwiin are kona kabwaka mwaane nakoiu, ko kona n oki nakon te umwantabu aei ni moaningabongin te Tabati. Ngkana ko roko ikai, tuanga temanna are ko nooria bwa ko kan maroroo ma mitinare. Ngaia?” E kariaia.

E nako te aine arei. I katia te bwai are e na maroroakinaki ma te bitiobi ao I reitanako te mwananga rinanon Paraná, ni karaoa au mwakuri.

A nako namwakaina aika mwaiti, ao e a manga reke naba au tai n oki nakon te autinibootaki i Foz do Iguaçu ibukin te maungatabu. Te kuaea e tamaroa ao ana anene a tangiraoi. Ngke e bane te maungatabu, temanna kain te kuaea e kawarai. E takinii baina neiei, kamaurai ma te moangare ae tamaroa, man taku ma te tangira, “Ko rabwa, mwaneu. Ko a tia n angani tiaki tii te kariki ni katoka bakiu ma kainabau ko anganai naba te berena ni kamaiu. Ko rabwa.

I namakina te kukurei ae korakora ngke I a kinaa bwa te aine are e roko ni butiai te mwane teutana, tabeua namwakaina mai imwaina. I ataia bwa ana euangkerio Iesu—are e anga ngaia bwa te Berena ni Kamaiu—e bita te maiu nakon are e butimwaia.