Maaku ni Bitaki

I ikawairake bwa te Kiritian. E ngae ngke au utu aki taua te aro, tamau e reireinai n tainako bwa n na karaoi bwaai aika I ataia bwa a koaua.

Inanon moan kairakeu I rinanon kataaki aika a mwaiti. Korokoro iaon nukau, raureia au karo, aorakin tinau, ao tararuaan tariu ae matoatoa man kabwaranano. Imwiina tabeua namwakaina imwain ae e koro 15, I kaitibo ma mitinare. Tari Johnson ao Tari Chadwick a reireinai taekan te euangkerio.

I a tia ni wareka Ana Boki Moomon, ma I aki tangiria ni kan karaoa te bitaki ake a tuangai mitinare bwa n na karaoia. I tuangiia bwa te bitaki e rangi ni korakora ao I kuri n tuangiia bwa a na katukai n arou. I tararake ngke I taekin taeka akanne ao kaitara ma matan Tari Chdwick. Teuana te rannimata e bwaka rikaaki nako aon tabana, ao I a bon rangi n namakina te maama. I tuangiia bwa n na manga weteia n te bong are imwiina.

I nakon mwengau man te taromauri ao ni kabanea warekan Ana Boki Moonon n te moan tai. Imwiina I katorobubua, are I bon tuai man karaoia mai imwaina, ao ni butiia te Atua ngkana e koaua. I tuai man titirakina te Atua te titiraki aei mai imwaina. I rangi ni maaku ni bitaki. Imwiin are I kangai “amen,” te raunnano ao te rau e roko iaou. I karekea ana tangira Tamara are i Karawa are e tangirai, I taia bwa ana Boki Moomon e koaua, ao I ataia I kona ni bitaki.

Tebwina te bong imwiina I bwabetitoaki. Ni kauoman au karo a roko n au bwabetiito. E ngae ngkai ai tibwa ngai te membwa n au utu, Iai te onimaki bwa te bong teuana a na katotobubua naba ni butiia te Atua. I wareka ana Boki Moomon ibukin te kawaniua n tai ngkai, ao e rangi ni kamiimi n te moan tai. I ataia bwa Ana Boki Moomon e koaua. Iai mwaakana ni bitiia aomata.