Bukin tera ngkai I kainnanoia bwa n na tataro i bon irou ngke I a tia n tataro ma au tutu?
Iangoia bwa iai te kanganga ae ko taonaki iai. Ko namakina ae ko mwengaraoi n tibwa kainnanom ma te kurubu, ke ko kantaningaia bwa ko na tuanga temanna n tingaia n te tabo ae onoti?
Beretitenti Spencer W. Kimball (1895–1985) e reirei: “Tabeua bwaai a tamaroa tataroakinaia n te tabo ae onoti, ngkana tiaki rangin tabe ma te tai ke kakawakin ara tataro. Te tataro n te tabo ae onoti e bon kakawaki ao e uaana. Te tataro n onoti e buokira ni kanakoa te mamaa ke taekinan bwaai aika aki koaua, e buokira ni kauki nanora ao ni kabwanina raoi ara kokoaua ao te karinerine ni kabwarabwaraan ara kantaninga ao kateira.”1 Ake tiaki mwengaraoi iai n tataroakinii inanon ara tataro n utu ngkana arona—ao ana bon riai n taai nako—ni maroroakinaki inanon te tataro ae onoti.
Ara tataro aika onoti e kariaira bwa ti na riki bwa taan kaotioti ibukin te koaua ma Tamara are i Karawa ae tangiraki ao ni kabwarabwaraa maakura ae nano ao ara kantaninga ake i nanora. E riki ngke e tataro n tingaia Iotebwa Timiti man karekea te kaotioti are e waaki iai Kaokakin ana euangkerio Iesu Kristo. N taetae ma Tamara are i Karawa n ti ngkoe n onoti e kariaira bwa ti na tatauraoi riki nakon ana kairiri te Tamnei ae katauraoaki ibukin buokara.
E ngae n anne, te tataro n utu e bon rangin kakawaki—e kariaira ni kaniira riki nakon Tamara are i Karawa ao ni karekei taian taneiai aika ibukin te maiu n tamnei ma ara utu. N aron ae e anga reirei iaona Beretitenti Kimball, “Te Ekaretia e kairoro bwa e na riai ni iai te tataro n utu ni katoa tairiki ao ni katoa ingabong.”2
E a tia n tuangira te Uea bwa ti na tataro n taetae ao ai arona naba mai inanora, i matan te aonaaba ao n te tabo naba ae raba, ibuakoia aomata ao n te tabo ae onoti (tara D&C 19:28).