Man kakoauaakina nakon Ataakina

I moan kaitibo ma mitinare ni boong aika kaitira n te turein titeition ngke I a tokara 19 au ririki. I kona n taekinna bwa iai te bwai ae onoti ibukiia kairake n ataeinaine aikai, ao I namakina te kairoroaki bwa n na taetae mangaiia. Ngaire I a kawariia ao n titirakiniia bwa tera ae a karaoia I Taiwan. A tuangai ae bon ngaiia mitinare ao ni moanna n taetae ibukin te euangkerio. Iaon te kawai ni kakaitibo aika mwaiti, I a reireinaki taekan Iesu Kristo, Ana eungkerio are e a tia ni kaokaki, ao ana Boki Moomon. Bon ngaia kabanean bwaai aika taekinaki—ana Boki Moomon—are e karikai bwa n na kaaina te Ekaretia.

I kona n teimatoa n uringa te bwai are I rinanona n tataro ibukin te boki. Imwiin warekana teuana te tairiki, I kaina te boki, katorobubua, ao ni bubutia Tamara are i Karawa ngkana e koaua. I namakina te rabuna ae a buee ni katobibiai, te bwai are I tuai n namakinna inanon ana tembora Buddhist are I a tia ni kakawarii ni kabane maiu. Te namakin aei e bon kaokoro. I ataia bwa temanna e bon kakauongo. N te tai anne I a mwananga man kakoauaan te Ekaretia bwa e koaua n ataakina ae koaua, ao I baireia bwa N na bwabetitoaki

Ana Boki Moomon e teimatoa ni kakabwaia maiu ni karokoa ngkai. E kakabwaiaai ngke I beku bwa te mitinare.

E a tia naba ni kakabwaiaai n nakoau. Ngke I beku bwa te tia reirei n te intitute, I reiakinaki bwa ana Boki Moomon e koreaki ibukin ara bong.¹ Ma inanon katauraoakin au reirei, I kunea bwa te kibuntaeka anne e aki tii koaua, ma e koaua ibukia aomata aika onoti ni bwaai aika onoti n taai aika onoti. Ibukin te katoto, n taai tabetai ngke I katauraoi n anga reirei, temanna maibuakon ubuia ataein au reirei ae roko n au iango, ao I kunea te bwai teuana ae onoti ae I kainnanoia n reiakinna ibukin kabwaian te aomata arei. Ana wirikiriki te Tamnei aki toki ni kaoti ao a kakoauaaki ngkana e taetae temanna ataein te reirei nakoiu imwiin te kiraati n tuangai bwa N na ataia bwa arei te reirei are e kainnanoia teuarei ke neierei.

N tokina, ao tao n nanona raoi, e a tia ni kaira maiu ae onoti ana Boki Moomon. I uringnga okiu nakon koroboki aika a tabu ngke N nang moanna ni katoka au reitaki n te maroro. I namakina te maraki ae korakora. Ma te kibu are I warekia, 2 Nibwaai 10:20, e taetae ni bakatekea nanou ao n anganai te namakin ae e abuee. “Ao ngkai tariu aika kam tangiraki, n nooran ae e a tia Atuara ae nanoanga n anganiira te atatai ni kaineti ma bwaai aikai, ti riai n uringnga, ao kaaki buure, ao n aki nou baraaki, bwa ti aki teweaki nako; e ngae n anne ao tia bon tia ni kaeaki nako man aban rikira; ma ti a tia ni kairaki nakon te aba ae tamaroa riki, bwa e a tia te Uea ni katauraoa marawa bwa kawaira, ao ti a mena iaon aban marawa ae uarereke.”

Uringakin te Uea, n aron are e taekinaki n te kibu, e anganai te ninikoria ao te kantaninga. I kona n onimaki iaon te “rabakau ae korakora” ibukin te euangkerio are e a tia n anganai te Atua, ao I kakoaua bwa I aki “teweaki nako.” A mwaiti bwaai aika tamaroa aika imwaaira.

Bon te kakabwaia ae korakora ni kakoauaakin aia taeka mitinare ngke I kakae iaon te Ekaretia. E bon korakora riki ataakin koauan te euangkerio, korakoran ana Boki Moomon iaon bwaai ni kabane, ibukiu. I ataia bwa te Atua e maiu ao E reireiniira ni kaineti ao n onoti rinanon koroboki aika a tabu.