Ti Kakauongo nakon te Tamnei

N te moaningabong teuana ngai ma toau ni mitinare ti baireia bwa ti na nako n anga reirei n te kaawa teuana ae uarereke n te aono are ti baireaki ni mwakuri iai i Biribin maiaki. Inanon ara tai ni karebwerebwe iaon mataroa, e kaoti te mwaane nakoira ao n titiraki bwa tera ae ti karaoia. Ti kona n ataia bwa e koro tingai ni mangin.

Iangoakina ngkai e aki taraa n iai nanona n ara rongorongo, tia anganna te boki ae uarereki ibukin oin te kantaninga n te maiu. Tia tuangnga ngkanne bwa ngkana e wareka te boki ae uarereke ao n aki mooi n te tairiki arei, ti na roko ni kawairia ni mweengana ni kabwarabwaraa oin bukin te maiu aei. E katoutoua atuuna ao man taku bwa e na tataninga ibukira. Ti barekiira ni kaea ara boontaeka ake tia kaman kabaea ibukin ara tai n anga reirei.

Bon akea raoi ara kantaninga n okiria n reireinna n te tairiki anne, ma ni katoa bong imwiina ngkana ti rarikin ana auti, I namakinna bwa ti na riai n tei. I waekoa ni kanakoa te namakin arei, ma e boni ngae n anne, ao n raona au babaire ma bukina aika raraoi I a tuangai ibon irou bwa e a taraa n rangin manging ibukin ongoraana.

Imwiin tabeua te bong e rangin korakora ana wirikiriki te tamnei n te aro are I aki kona n totokoia. Ngke tia karebwerebwe iaon ana mataroa, tia kaaitibo ma te aine ae raraoma are e titirakiniira e aera ngkai tiaki kaman moantaai riki n roko, n are tia tia ni berita iai. E taku bwa buuna e a kaman tataningaira n te tairiki arei ao anne ai tibwa te moan tai inanon maiuia n iein, e a tibwa aki manging.

Ti boni mamaa ao ti kabatiaa te kabwara bure. Ti kabaea ara tai ni manga oki n te tairiki anne n reireinna ma kainnabana. Imwiin teutana te Tari Gumabay (e a tia ni bitaki te ara) e rairananona man ana waaki te aonaaba, e a bwabetitoaki, ao n riki bwa oin te korakora n te kaawa.

Tabeua te bong imwiin ana bwabetito, I a kamwaingaki nakon te aono teuana ao e a bua au reitaki ma te utu. Te bwai ae I kona ni karaoia bon te kantaninga ao te tataro bwa a na teimatoa n te Ekaretia.

Imwiina I ataia bwa te kaawa ae uarereke are a maeka iai te utu ae Gumabay e a reke ana mwaanga ao ai manga te uoote. Te Tari Gumabay e a weteaki bwa e na riki bwa te bitiobi n te uoote anne. I ataia naba bwa angiina ana utu a kaaina te Ekaretia.

Ngke I a oki ni kawara te aono are I moan karaoa au mwakuri ni mitinare iai, I a nooria bwa angiina aomata a kaaina te Ekaretia ikekei ibukin ana banna ni katoto te Bitiobi ae Gumabay, are e a tia ni katuka maiuna inanon bain te Uea ao ni Karaoia bwa te tia tararuaia ana utu ao ni waaki ni kakukurei ni katoa bong.

I rangi ni karabwarabwa ngkai ti kakauongo nakon ana wirikiriki te Tamnei ni kawara mweengan Gumabay. Rinanon te bwai ae e a tia n riki aei I a kamatataki riki bwa tera ae nanonna te Uea ngke E taku, “A aki kai nanoia akana maiu ngkana akea te tia katoki-aoraki irouia, ma a kai nanoia akana aoraki” (Mataio 9:12).