Kamimiin Mwaakan te Tataro

I teimatoa n uring au namakin n te tai are I noori iai ranin maata ni kabwarabure aika bwaro man matan natiu te mwaane ai te 10 ana ririki, Arián.

E tabe n takakaro ma tarina ae ikawai riki, Joel, ae 12, n te ruunimatu, ngke e a karina naba te kauntaeka, ao I a rinnako ao ni karekea te raoi ao ni manga karaoa te ota nakoia. Tao ibukin aia ririki, ngaia ae e teimatoa te un imarenaia ataeinimwaane aika uoman aikai.

N ana kaeka, Arián, are e ininimaki n tang imwiin unna ma tarina, e taetae nakoiu n te taeka ae aki raoiroi. I kaetia uoua te tai (ngkai ana kauntaeka e a nakoiu), ma te kanganga e rikirake ni buakaka. E bon aki kona ni kaetaki, e ura moana, ao n ruru. I a moanna n un, ma I ataia bwa e na iai katokana n akea au takarua.

Te reirei i aon te tataro e waekoa n roko n au iango. Eng, anne rekena, ngaia are I a kairia nakon au ru, I kaina te mataroa, ao n taetae nakoina, “Arián, ti a katorobubua, ao n na karaoa te tataro nakon Tamara are i Karawa.”

Ti uaia ni katorobubua ngke tangina ibukin unna e bon waaki naba. I tataro ma te kantaninga are n na kataia ni buoka natiu te mwaane. I nuukan te tataro I kakoaua bwa unna e a moanna ni kerikaaki. Ranin matana ake a bwaro rikaaki man tabana e a bitaki ngkai nakon rannimata n rairannano.

Ngke ti motika ara tataro, e tabeki matana, Arián man titiraki, “Tamau, ko kona ni kabwarai au bure?” Ti uaia n irabwati, ma I aki kona ni kanoa ranin matau. Namakinan te rau ao te tangira e kaona tamneiu. Akea te bwai ae taekinna riki Arián, ma I ataia ae e a tia n ata aron kaokan mwaakan te tataro ao te Tamnei ae Raoiroi e a tia ni karaua nanona.

Ngkai e a tia n aki ti ata mwaakan te tataro, ma e a tia ni karekea te koaua iai.