E Kaairua Au Bitiobi?

Ara uoote e a bon tibwa bwenauaaki, ngaia are ngke e bubuti te bitiobi bwa e na noorai, I bon kakoaua raoi bwa e na anganai nakoau n te uoote ae boou. I a maan ni mwakuri ma kairake n ataeinaine ao n tangiriia. A rangin tatauraoi nakon te euangkerio ao te kimwareirei aron reireinakiia. Ni kaouana te Uea e na kariaia ngai bwa N na teimatoa n reireiniia.

Inanon mimiiu, e taku te bitiobi bwa te Uea e tangirai bwa N na angareirei n te Buraimwarii n oneamwiin arei. Ni koauana e bon kaairua! E kakoaua nakoiu, ma e ngae n anne, e a tia n aki mamatam ao n tataro ao namakina te korakora ibukin nakoau. I tangiriia ataei, ma tera ae I ataia ibukin reireinakiia?

Ibukin 15 te ririki n ara mare tii te rawawata are I tibwauaia ma kainnabau bwa te Uea e aki kakabwaiaira n anganiira natira. Ara kekeiaki ibukin karaoan te tabetabe e bon aki uaana ibukin ara kanganga ni bwainaoraki.

Onimakinan te bitiobi, I butimwaea te nakoa n angareirei n te Buraimwarii, ma inanou I korakai. I bon un iroun te Uea ibukin katukakiu n akea natiu, ao I ribaa te nakoa ae boou aei.

“Bukin tera, te Uea, ngkai Koa butiiai aei?” I mimii. “Inanon Wanawanam, I a tia n aki anganaki oin natiu. Bukin tera ngkai I a butiiaki bwa N na reireiniia natiia tabeman?”

I tataro ao n korakai man noora te kanganga are I kaitara iai ma teUea, ni bubuti ma te nano ae korakora ibukin te atatai. N tokina I baireia bwa n te tai are I a tia ni butimwaea te wewete, N nang riai ni katoka te raraoma ibon ibukiu ao ni karaoa te kabanea n tamaroa are I kona ni karaoia.

Anne ngke e a roko te kakabwaia. I waekoa n rabakau n tangiriia ataei, ao a rabakau n tangirai. I kunea bwa aia tangira e bon tau korakorana ni buokai ni kanoaa te aakea inanon maiu. N te tai ae waekoa I aikoa kona n ruo nako naano nakon mataroan te umwantabu n akean uoman ataei n taua baiu ao tabeman a tei ibukin rabwatakiia ngke I a rirarikiia.Imwiin anne, kainnabau te mwaane e weteaki bwa te tia kairiri n te Tikauti. Imwaain ae e onrake mweengara irouia ataei ao aika tebwi tabun aia ririki.

E mate kainnabau n ana ririki ni maiu ae 47 n Nobembwa 1986. Ni kaokana riki te Uea e ataa are I kainnanoia nakon ae boni ngai. Inanon wiiki imwiin maten kainnabau, I weteaki bwa N na beku n te angareirei n te mition n te Buraimwarii I Fresno, California, n te mwaanga ae Laoti. Ninikoriaia aomata aika a onoti aikai ao natiia anganai te korakora ni waaki nako n akean kainnabau.

Tera te kimwareirei ae onoti aei n nooria aomata aika kairake ake I a tia n reireiniia ngkai a roko n te roro ni ikawai, ni karaoa te mwakuri ni mitinare, mare n te tembora, ao ni katei oin aia utu. A rangi ni mwaiti maibuakoia aika, “a tobwaaki” ataei a teimatoa n roko ni kamaurai ao ni kanakoraoa au bong, ao I rangin kukurei ngkana I noriia n te Tembora i Fresno California, ike I beku ngkai iai.

Au mwakuri n ibuobuoki n te Buraimwarii e a riki bwa te kakabwaia ni koaua n ua tokin maiu. I bon rangi ni kakaitau bwa nakoara a kairaki mairoun te Uea ao tiaki ngaira.