Te Uea e Kainnanoia Mitinare

Ni banen Okitobwa n te maungatabu ni kabuta I wewete ibukiia riki mitinare aika mwaiti. Ni kabane aika tau, ataeinimwane aika konabwai a riai ni katauraoi ni beku n te mition. Te beku anne oin taben te nakoanibonga—te nakoa are e kantaningaia te Uea mai iroura are ti a rang kaman anganaki. Ataenimwane, I kauring ngkami bwa kam na katauraoi ibukin te mwakuri ngkai ni mitinare. Kawakiniko bwa ko na itiaki ao ni boou and n tau n tei ibukin te Uea. Kateimatoa marurungim ao korakoram. Kamatebwaia koroboki aika a tabu. Ike e tauraoi iai, ira te tieminarii ao te intitiute. Kataneiako ma aia aeniboki mitinare. Tataekina Au Euangkerio.

Aine, ngkai e aki reke iroumi te katabeaki n aroia nakoanibonga n aroia ataeinimwane ni beku bwa mitinare aika bwanin aia tai, ko karaoa naba te anganano ae moan te kakawaki bwa te mitinare, ao ti butimwaea am ibuobuoki.

Nakoia tariu ao mwaneu aika tau aia ririki n te Ekaretia, I kauringi ngkami bwa te Uea e kainnanoia aika mwaiti, mwaiti riki ibuakomi ni beku bwa mitinare aika a bwanin aia tai. Ngkana ko tuai n roko n te ririki ni maiu ni beku n te mition ae uoua ririkina, I boutokaiko bwa ko na katauraoi ngkai ibukin te bong ngkana, e riai ni kona n riki, ngkoe ao buum kam kona ni karaoia. Iai tabeua te tai inanon maiumi ngkana kam na kimwareirei ni karewen te tamnei ao te rau are e roko man am anganano n ibuobuoki ni bwaninin te tai n uaia ni mwakuri ibukin te Mwatita.

Ngkai, tabeman mai iroumi a kona ni mama n aroia ke n iangoia irouia bwa aki tau ni kaeka ni kamatoa nakon te wewete ni mitinare. Uringnga bwa aio ana mwakuri te Uea, ao ngkana ti karaoa ana mwakuri te Uea, e na reke iroura ana ibuobuoki te Uea. Te Uea e na buoki rawawatara ake ti taonaki iai.

Tabeman, e ngae ngke a tau ni beku, a kona n namakinna bwa a mwaiti riki bwaai aika kakaawaki aika moanibwai. Eng I uringa ana berita te Uea: “Bwa N na karineia akana a karineai” (1 Tamuera 2:30). Akea mai ibuakora ae e karinea Tamara are i Karawa ao ara Tia Kamaiu nakoia riki are a bane nanoia, mitinare aika akoi.

Te katooto n aron te mwakuri aei bon te namakin ni mitirane irouia Juliusz ao Dorothy Fussek, ake a weteaki bwa a na mitinare i Poland. Tari Fussek e bungiaki i Poland. E bwaati taetaen te aba. E tatangiriia aomata. Titita Fussek e bungiaki i England ao e uarereke ana atatai iaon te taetae ni Poland ao akea te bwai ae e ataia irouia kaina. Onimakinan te Uea, a karaoa mwiokoaia. Te mwakuri e kamaroa, tabeia e rikirake. Te mition e tuai n tei n te tai anne iaon Poland. Te mwakuri are e anganaki Fusseks bwa e na katauraoa te kawai bwa e aonga ni kateaki te mition.

A bwarannano Unimwane ao Titita Fussek ibukin abwabwakin te tibwanga are a anganaki? Aki ibukin te tai ae uarereke. A ataia bwa weteaia bon mai iroun te Atua. A tataro ibukin ana ibuobuoki mai Karawa, ao a kabanei nanoia ni kabane nakon aia mwakuri.

Inanon te tai Unimwane Russell M. Nelson man te Kooram n te Tengaun ma Uoman n Abotoro; Unimwane Hans B. Ringger, n te Kaitingaun; ao Ngai, n raonaki iroun Fussek, ti kaitibo ma minita ibukin aro inanoaa, Adam Wopatka, man te tautaeka ni Poland. Ti ongo ngke e kangai, “Ami ekaretia e butimwaeaki ikai. Kam kona ni katei ami kateitei; kam kona ni karokoia ami mitinare. Te aomata aei, e kotea Juliusz Fussek, “e a tia ni mwakuri raoi n ami ekaretia. Kam kona ni kimwareirei ibukin ana banna ni katooto ao ana mwakuri.”

N aroia ana utu Fusseks, ti riai ni karaoi bwaai aika ti riai ni karaoi n ana mwakuri te Uea. Imwiina ti kona, ma Juliusz ao Dorothy Fussek, ni kaoka are n Taian Areru:

“E reke buokau mairoun Iehova, Ae e karaoa karawa ma aonaaba.

“… E na aki angani waem te maran nako:

“Noria, ane E na aki matu ao E na aki kiro naba Teuae kawakiniia Iteraera” (Taian Areru 121:2–4).