Tera ae Boou n Rikirakem I Bon Iroum?

Ngkai bon te tai ni katauraoi ibukin te tai ae tamaroa are e tataninga imwaim n taai aika a na roko. Rikirakem I bon Iroum e na buokiko ni katauraoi ao e na buokiko n oota n ataakim ae natin te Atua te aine.

Rikirakem I bon Iroum bon tiaki te burokuraem are e kaokoro man maium. E kona ni buokiko ni kaaniko riki nakon te Tia Kamaiu, buokiia tabeman, reiakin aroaro ni kairiiri, karikirakea te reitaki, ao ni katauraoi ibukin berita aika a tabu n te tembora. Rikirakem I bon Iroum e kona ni buokiko ni karikirakea te etieti n anuam. Ngkana ko karaoi bwaai aika uarereke n tainako, a riki bwa mwakorom are antai ngkoe ao a kona ni bitiko. Bwa “a riki bwaai aika a korakora” man “bwaai aika a uarereke man aki kaangaanga ” (Aramwa 37:6).

Te boki ae uarereke n Rikirakem I Bon Iroum are e manga rinanoaki iai te tembora iaon baana mai tinanikuna. Te tembora bon ngaia oin mwakuri are ti karaoia n aia burokuraem Kairake n Ataeinaine. Ara kantaninga bwa ngkana ko taraa tinanikun te moan iteraniba, ko na uringa bwa karaoan Rikirakem I Bon Iroum e na buokiko ni katauraoiko ni karaoi ao ni kawakin berita aika a tabu n te tembora n te bong teuana.

Bokin Rikirakem I Bon Iroum ae boou e bingke! Te kara ibukiia aine ae beebete aio bon te kauring bwa ngkoe natin Tamara are I Karawa ma arom n aine ae iunaki, bwaintangira, ao nakoa.

Inanon te boki ae uarereke ae boou, tabeua taneiai aika a kakawaki ao karikirake a tia ni bitaki teutana bwa waaki naba ngkai ao a na boboto riki iaon berita aika a tabu n te tembora are n te bong teuana ko na karaoia ao ni kawakin. Ngkai tabeua kaeka nakon am titiraki.

Nna kanga ni karaoa Rikirakem I Bon Iroum? Moan karaoana e beebete! Waaki iaon teuana are ko nano iai. Ko aki riai ni karaoa te kainibaire mai moana ni karinanna. Karaoan bwaai aika a kantaningaaki aika ko na rinanona e na buokiko n oota iai ao bukin kakaawakina ni maium.

Antai aika a kona n iria? Aomata nako ake iai nanoia ni kan iria a butimwaeaki. Ko kona ni kaoia raraom ake tiaki membwa n te Ekaretia ni karaoi Rikirakem I Bon Iroum ma ngkoe. Tinam ke aine tabeman a kona naba n iria.

Waekoara ngai ngkana I waaki? Ngkana ko kauka bokin Rikirakem I Bon Iroum, ko na kunei bwaai tabeua ake ko a kaman kakaraoi n te reirei ke ni mweengam. Karekea am bwii ibukin karaoan bwaai ao baireia mai imwaina bwa ko aonga ni kona ni karaoi ma bonganaia. Ko kona ni karaoia ni birina are mai iroum. Ngkana ai 12 am ririki ao karaoa teuana te taneiai teuana ni katoa namwakaina ao uoua te karikirake ni katoa ririki, ko na bon bane n te tai are ko a roko n te Raurere. Imwiina e na reke am tai ni kairiia kairake n aine tabeman ake a mwakuri iaon aia boki n Rikirakem I Bon Iroum. Ngkana ko karaoa aei, ko kona ni karekea te Karineaki ni Biiaiwe, are e tei ibukin rinanona riki te kawai ae raka ni buokaia tabeman.

I Kona ni Karaoa Rikirakem I Bon Iroum n te Miutuo? Ko kona ni karaoi tabeua Rikirakem I Bon Iroum n te Miutuo. Te karikirake e kona n riki bwa am mwakuri n te Miutuo. Ko kona naba ni mwakuri iaon Rikirakem I Bon Iroum n am kiraati n Kairake n Aine ngkai ko reiakina taekan te tamaroa ao ni kamatebwaia koroboki aika a tabu.

Aekakira aro ni kairiiri ae e anganai? Ngkai ko katauraoi ni katia te karikirake ae 10-aoana, ko kona ni kaoia kairake n aine ake tabeman bwa a na buokiko. Karaoan aei e na buokiko n reiakina te konabwai ibukin nakoam n riki bwa te buu, tina, ao te tia karaoa te mweenga. E na buokiko naba n reiakina aron baireana, reitaki, ao ni katiai mwakuri aika a kaanganga.

Bukin tera ngkai I tuangaki bwa Nna kawakina te tienero? Te tienero aei e na riki bwa te rekooti ae kakaawaki ibukim n am bong n te bootaki ni Kairake n Aine ao kabaebae ake ko a tia ni karaoi. Koroboki n am tienero e na kaoa naba ana iraorao te Tamnei ae Raoiroi.

Kakabwaia n Rikirakem I Bon Iroum e reitaki nako riaon aia ririki Ataeinnaine. Am onimaki ao am koaua ibukin te Tia Kamaiu ao Ana euangkerio are e a manga kaokaki e na rikirake. Ko na tauraoi ibukin am mition mai karawa ao nakoam iaon te aba. Ko na katoonga karewen te mwakuri ao te kukurei ni katiaan te raoiroi. Ko na namakina ana ibuobuoki te Tamnei ae Raoiroi, are e e na kairiko ao e na reireiniko. Ko na karikirakea te baeten ni maiuakinii bwai ake a na kakabwaia maium, ngkai ao n aki totoki. Bon te baeten n te rikirake ao karaoan ao kawakinan te berita ae tabu n te tembora. Ko na kakabwaiaaki n am tai ni wakina te baeten n rikirakem. Ti tangiriko! E tangiriko te Uea! Ngkami Natina aine aika moan te kakaawaki.