Sa Sereka o Koya na iVau ni Mate

Ena dua na bogi ni ra se lalai sobu na luvei keirau, keitou a tiko ena neitou gauna ni wili ivolanikalou vakamatavuvale. Keitou a wilika tiko me baleta na iVakabula ka veitalanoataka na Nona a sega vakadua ni bau cala.

E muri ena bogi ko ya ni laki vakadavori Susie na luvei keirau yalewa yabaki tolu na watiqu. A raici tinana cake o Susie ka kaya, “Nana, a cala o Jisu.”

“Na cava o tukuna tiko?” e taroga o tinana.

“A sereka o Koya e dua na ka,” e kaya o Susie.

Ni vaka me veilecayaki, a taroga o tinana, “Na cava a sereka?”

“A sereka o Jisu na ivau ni mate,” e sauma o Susie.

A qai nanuma na watiqu ni rau dau lagata vata vakavuqa kei Susie na sere ni Lalai “On a Golden Springtime”, sa kila tiko mai kina o Susie na qaqana “On a golden springtime, Jesus Christ awoke and left the tomb where He had lain; the bands of death He broke.” [Ena dua na vulaitubutubu totoka, a tucaketale ko Jisu ka biuta na ibulubulu a davo no kina; a sereka o Koya na ivau ni mate.]¹ Qai vakamacalataka o tinai Susie na ibalebale ni sereka na ivau ni mate na nona tucaketale o Jisu me rawa kina vei keda kece me da bula tale ni da sa mate oti.

Na veitalanoa oqori sa soli kina vei watiqu vata kei au e vuqa na madigi me keirau vakavulici ratou na luvei keirau yalewa, o Lizzie, Susie, kei Emma, me baleta na ibalebale dina ni Veisorovaki vei keda yadua. E dina o Susie: A sereka o Jisu na ivau ni mate. Ia e sega ni cala oya. Oqori na isolisoli cecere duadua a rawa ni solia vei keda o Koya! Raica na Vunau kei na Veiyalayalati 14:7.

A mate na iVakabula ka vakaturi cake tale me rawa kina ni da bula tale kei na Tamada Vakalomalagi kei na noda matavuvale me vaka na noda buladodonu. Kevaka e kilikili tu na noda bula, sa rawa ni da na marautaka na veivakalougatataki ni tawamate rawa kei na bula tawamudu ena dua na siga. Au vakavinavinaka ni a sereka o Jisu e dua na ka—na ivau ni mate!