Na Veivakalougatataki ni Semineri

Na cava e bibi kina vei iko na semineri? Eso na vuna e oka kina na nodra yalayala oqo na parofita kei na iapositolo ena gauna oqo:

• Sa yaco oqo me dua na isolisoli vakalou mera vakabulai kina na Isireli vou ena veigauna dredre sara.”¹

• Ena “vukei iko mo wasea na itukutuku ni kosipeli vakalesuimai vei ira ko ni na veisotari vata.”²

• Ena vukei iko “mo kila vakavinaka na dina.”³

• Na semineri “ena vakarautaka na veimadigi totoka mo vulica kina na vunau ko na bula marau kina. E vakarautaka na veimadigi totoka mo veikilai vinaka kina kei ira na nomu icaba vakalotu.”⁴

• “Ena vakatorocaketaki na nomu kila na kosipeli. Ena vaqaqacotaki na nomu vakabauta. Ko na tauyavutaka na veimaliwai kei na veitokani totoka sara.”⁵

• “Ena vura mai kina na … bulabula vakayalo, na kaukauwa vakayalo mo vorata rawa na veika butobuto sa tu vei keda, sa vakakina na kena torocake na kila vakosipeli.”⁶

• Oqo e “dua vei ira na veivakarautaki vinaka duadua ki na kaulotu.”⁷

Na lako ki na semineri sa kena ibalebale mo vakatikitikitaka eso na ka o dau marautaka me rawa ni ko kunea na gauna mo laki tiko kina. Ia na solibula oqo ko na kunea kina na kena yaga. A digitaka o Elijah Bugayong mai Filipaini me vakatulewa kina ena iotioti ni nona yabaki ni vuli torocake. Ena gauna taucoko ni vuli torocake, e dau karua tu ga ena nona kalasi. Sa vakadeitaka tiko mai o koya me vakaliuca mada na imatai ni yabaki ena koronivuli torocake ka sa nanuma tiko me sa biuta na semineri, ka a lewena tu ena vica na yabaki sa oti, me rawa kina na nona inaki o ya.

Ia ena dua na siga sa veisau na nona nanuma. “Au [a raica] na noqu teveli ni vuli,” a kaya. “Au a raica eso na ivola e yasana, o ya na noqu ivolanikalou taucoko vata kei na ivolalailai ni semineri kei na ivolavakarau. E utoqu mai loma, au a tarogi au, ‘Na cava e bibi cake?”

A kunea o Ilaija na kena isau ena Maciu 6:33: “Ia dou vakasaqara taumada na matanitu ni Kalou, kei na nona yalododonu; ia ena soli me kena ikuri vei kemudou na ka kecega oqo.” Sa lewa kina mesa yalodinataka na nona semineri ka vakasaqara na sala eso me veiraurautaka na nona gauna me cakacakataka kina na nona vuli. Ni cava na yabaki, a taura o koya na icocovi ni gonevuli gugumatua ka soli talega vua e dua na sikolasivi ni univesiti.

A vakatikitikitaka o Spencer Douglas mai Alabama, e Amerika, eso na soqo me rawa ni qaqaco vagumatua kina ena semineri. Ena imatai ni rua na yabaki ni nona semineri, a yadra ena 4:00 ena mataka caca me laki tiko kina, kei na iotioti ni rua na yabaki a yadra ena 5:00 ena mataka lailai. A kaya o koya, “Au a sega ni rawa ni laki vakaitavi ena vuqa na soqo ena bogilevu vata kei ira na noqu itokani baleta niu gadreva meu laki moce vakayakavi. Kevaka au sega, ena sega ni rawa me taucoko na noqu vakaitavi kei na vuli ena mataka e tarava.” Vei Spencer, e sega walega me baleta na tiko rawa ena kalasi, sa baleta talega na yadra vakavinaka ka vakavakarau ki na vuli.

E vakavulica o Elder Dallin H. Oaks ena Kuoramu ni iApositolo Le Tinikarua: “Na vuna vinaka na noda vakayacora e dua na ka, e sega ni baleta ni ka vinaka. Na iwiliwili ni veika vinaka e rawa ni da vakayacora e ulabaleta na gauna sa tu meda vakayacora kina. Eso na ka e vinaka cake mai na veika vinaka, sai ira oqo na veika ka dodonu meda dau vakabibitaka cake ena noda bula.”⁸ Oqo e dua na ivakasala bibi me nanumi ena nomuni vakatulewa mo ni vakaliuca kina na semineri ena nomuni ituvatuva.

Ena veivakarautaki cecere talega na semineri ki na cakacaka ni kaulotu ko na laki vakayacora—o ya mo lewenilotu daukaulotu nikua ka vakakina mo na laki kaulotu tudei e ni mataka. E kila tu o Franco Huamán Curinuqui mai Peru ni nona vulica tiko na ivolanikalou ena semineri sa vakarautaki koya tiko ki na nona kaulotu.

E kaya o koya ni yaga sara na vakavakarau oqo ena nona yadra vakamataka ena 4:00 me tiko ena semineri, ena nona vodo bavelo ena vica na vula ena gauna ni waluvu, ka vuto yani ena vanua dada ki kalasi. A kaya, “Au vinakata meu vakacavara na semineri ka tekivu ena kalasi ni inisitute meu vakavakarau ki na kaulotu. Au na tubu tikoga ena Lotu.” E ka bibi vua na semineri baleta ni vulica kina na veika ni volanikalou ka cavuqaqataka kina na veitikina bibi, ka na vukei koya me dua na daukaulotu vinaka cake.

E sega walega ni ra vulica tiko na ivolanikalou na itabagone e vuravura taucoko ena nodra sasagataka tiko mera lewena na semineri, era sa ciqoma tiko na veivakaukauwataki. A raica kina o Cameron Lisney mai Igiladi ni sa vakalougatataki ena ituvaki kecega ni nona bula. “E sega walega ni veivuke na semineri ki na veika vakayalo, ia e veivuke talega ena veika ni koronivuli kei na vuli,“ a kaya o Cameron.

E kaya ni “tekivu vakamataka ena tekivu cakacaka sara na nomu mona. Era kaya eso na noqui itokani ni ra osooso mera tiko kina—ia, e sega ni vaka mo na raicalesu na nomu cakacaka ni fika ena 6:00 ena mataka, se vavei?” Ni ko vuli, “ena vukei iko na Turaga ena nomu veitarogi, ni ko gole ki na semineri, ena vukei iko vakalevu cake o Koya,” e kaya o Cameron.

E dina, a vukei Cameron na semineri me vaqaqacotaki vakakina na nona ivakadinadina. E kaya, “Na tekivu ni noqu ivakadinadina a lako mai na parokaramu ni semineri. Niu se cauravou gone yabaki 14, au a malumalumu voli ena kosipeli. Au a sega tu ni taleitaka na laki lotu, au a laki vakataotaki tu ena veika tawa dodonu. Sa vo sara toka ga e vica na vula meu sa na biuta laivi vakadua.” Ia ena gauna a sureti Cameron kina e dua na nona itokani me laki lewena na semineri, a lomana sara me sa gole vata kei koya. Sa qai tekivu yaco dina mai na veivakalougatataki.

“Sa tekivu meu sa vakila tale na Yalotabu,” a kaya o Cameron. “Au sa tekivu gole vakalevu ki lotu ka tiko ena noqu kalasi ni Matawilivola ni Siga Tabu kei na matabete. Sa rawarawa sara mai, kau sa tekivu marau cake vakalevu. Au sa qai rawata e dua na noqu ivakadinadina vakai au me baleta na kosipeli.” Ni oti e rua na vula na semineri, a laki veivosaki o Cameron kei nona bisopi ka sa laki tabaki me dua na ivakavuvuli ena Matabete i Eroni.

Sa kila tu o Cameron ni sa vukei koya na semineri me kaukauwa tiko ni vorata na veitemaki kei vuravura. “Ni toso tiko na semineri,” a kaya, “Au raica ni rawarawa sara na noqu vorata rawa na ibolebole sa tu ena vuravura oqo. E dua na ka dredre na bula ni itabagone ena vuravura eda bula tiko kina oqo—na ivalavala ca sa wavoliti keda tu ena veiyasana kecega. Au vakadinadinataka vei kemuni ni ko lewena na semineri, ko na kunea na kaukauwa mo na taqomaki iko mai kina Na semineri e tayavutaka e dua na isasabai vakayalo me na taqomaki iko. E vuqa na sara na veimataqali veivakatovolei kei na veitemaki a yaco mai ena noqu bula, ka sa dua na veivuke levu na semineri me vakatudonutaki au tiko ena sala dodonu ka rabalailai.”

Ena semineri ena yaco talega mo veimaliwai kei ira na itabagone era vakabauta vata kei iko. E kaya kina o Vika Chelyshkova mai Rusia, “E vakauqeti na noqu bula mai vei ira na tamata e tautauvata kei au na nodra ivakatagedegede ni bula savasava ka ra vakabauta na Kalou.” E tomana, “Ni tiko eso na noqu taro, au dau laki veivosakitaka kei noqu qasenivuli kei ira eso na gonevuli. Au rawa ni wasea na noqu vakanananu kei na ivakadinadina vei ira eso me vaqaqacotaki kina na noqu vakabauta kei ira eso tale. Nida wilika vata na ivolanikalou ka vakasamataka vakatitobu na lewedra vakayalo, eda na toro voleka yani vua na Kalou ka vakai keda.”

A yaco talega na ka oqo vei Ksenia Goncharova mai Ukraine. E kaya o koya, “Ena gauna eda wasea vakai keda vata na veika e da sotava, eda na kaukauwa cake ka kila vakavinaka cake kina na ivolanikalou. Ena gauna eda tukuna kina ena gauna ni lesoni na veika a yaco ena noda bula, au raica kina na sala sa cakacaka kina na kosipeli ena noqu bula kei na nodra bula tale eso.”

E a tarogi e dua na ilawalawa itabagone na sala cava sa vakalougatataka kina na nodra bula na semineri. A vakatakilai mai na nodra isau ni taro e dua na ikau cecere—ni a vukei ira na semineri mera toro voleka vua na Tamada Vakalomalagi kei na iVakabula. E vakavulica o Elder David A. Bednar ena Kuoramu ni iApositolo Le Tinikarua: “Sa ka bibi dina na veiulutaga kece o vulica ena semineri. Ena veiyabaki ko ni na vulica vakatabakidua kina e dua vei iratou na ivolanikalou, ka sa kena isutu ga na Turaga o Jisu Karisito.”⁹

Oqo eso na ka era tukuna e vica na gone ena kena a kauti ira na semineri vakavoleka vei Jisu Karisito.

• “Au sa mai vulica na veika sa vakayacora na iVakabula vei au, niu wilika na nodra vosa kece na parofita e vuqa kau kila kina na kequ bibi Vua. Au sa raica kina ni lomani au vakalevu o Koya me mai mate ka sotava na rarawa ena vuku ni noqu rarawa.”

• “Na semineri sa dua na sala cecere me tekivu kina na noqu siga. Se vakacava sara na noqu wawale, au dau vakila ga na Yalotabu ka vaqaqacotaki ni gauna e dau yaco mai kina na veika dredre ena dua na siga, au sa kila sega ena vakatitiqa ni sa lomani au tiko na iVakabula, kau yalonuidei cake meu tutaka na veika e dodonu.”

• “Au curuvou mai ki na Lotu. Au a tekivu tauri semineri ni se bera mada ga niu papitaiso. Ke a sega na semineri, au sega ni kila au na papitaiso rawa se sega. Ni sega na semineri, ena sega beka ni yaco mai na iVakabula ki na noqu bula ena gauna oqo se meu kila ni na rawa ni vosoti na noqu ivalavala ca. A sega tu ena noqu bula na Tamada Vakalomalagi se o Jisu Karisito. A vukei au na semineri meu kunei Rau ka vakayacora me Rau mai tiki tawamudu ni noqu bula vakakina ki na nodratou bula na luvequ.”

• “A vukei au na noqu laki semineri ena veisiga meu toro voleka sara vua na noqu Turaga ka iVakabula, o Jisu Karisito, ena noqu vulica tiko na Nona ivakavuvuli, na Nona loloma levu vei au, kei na noqu rawa ni lesu meu laki bula vata kei Koya.”

• “Niu lewena tiko na semineri, au raica kina na titobu ni ibalebale ni ivolanikalou. E vukei au meu vakananuma kina ena veimataka meu bula Vakarisito ena noqu ivakarau ena veisiga.”

• “Na semineri e vakavulici au meu dau wilika na noqu ivolanikalou ka sega walega vei marautaka tiko ia meu bulataka na veika e tukuni tiko ki na noqu bula. Au vulica kina na ivunau kei na ivakavuvuli e vukea na kena vaqaqacotaki na noqu ivakadinadina baleta e dua na tamaqu Vakalomalagi dauloloma kei Jisu Karisito, niu na kauta tiko ena vo ni veisiga ni noqu bula.”

Ena kena yaco mai e vuqa na veivakalougatataki niu laki lewena na semineri, e rawarawa sara na noqu raica na vuna era sa vakaliuca tiko kina na itabagone e vuravura ena nodra ituvatuva ni bula.