Veivosaki Vata
Oqo eso na vakatutu me baleta na kena caka e dua na noda “gauna ni veivosaki” vakamatavuvale:
-
Kerea vei rau na nomu itubutubu me baleta na kena vakatikitikitaki e dua na gauna ni veivosaki vakamatavuvale ena veisiga yadua. E rawa ni gauna ni dua na kana se dua ga na gauna ena loma ni siga.
-
Raica me ra vakaitavi kece ena vosa kei na vakarorogo. Me vakaitavi kece na tamata!
-
Rokova na nodra vakasama yadua na lewe ni nomu matavuvale. Raica me ra vakila na tamata yadua ni bibi na veika era tukuna.
Qito ni Veivosaki
Gadrevi eso na vakasama me baleta na gauna ni veivosaki? Tovolea na qito eso oqo:
Viritaki Taga Bini: Kevaka e matavuvale levu na nomudou se dau dredre na vosa yadudua, vakayagataka e dua na taga bini me vakaraitaki kina o cei e nona gauna me vosa. Ni sa tukuna o koya e tiko vua na taga bini na ka e vinakata me tukuna, viritaka na taga bini vua tale e dua na lewe ni matavuvale me nona gauna ni vosa.
Dauveivakatarogi: Dou wase vakarua ka vakaitavi yadudua me vaka ni da dauveivakatarogi. Vakasamataka e vica na taro me baleta na kemu isa qai taroga vua. E rawa sara ga ni o vakayagataka e dua na gusunivosa dina se dua na misini ni katoni rorogo ena nomu veivakatarogi.
Na Cava Beka Mo Cakava? Dou vakaitavi yadua ena kena tarogi vei iratou na matavuvale na veitaro duidui eso ka tekivu ena “Na cava beka o na cakava … ?” Eso na kena ivakaraitaki qo “Na cava beka o na cakava kevaka o lako sese?” kei na “Na cava beka o na cakava kevaka e rawa ni o lakova na veivanua kecega e vuravura?”
Veivuke vei ira na iTubutubu: Gauna ni Veitalanoa Yadua
E dina ni dau gauna taleitaki na gauna ni veivosaki vakamatavuvale, sa bibi talega vei ira na itubutubu kei ira na gone me ra dau dabe vata yadudua. Dau vakayagataka na veigauna eso ena loma ni siga mo veitalanoa kina kei ira yadua na luvemu. Sureti ira yadudua na gone me ra vukei iko ena kena qaravi e dua na cakacaka e vale, sala vata kei iko ena kena laki qaravi e dua na itavi, se veitalanoa vata kei iko ena nomu rumu ena vica na miniti. E vica wale na gauna lekaleka e rawa ni yaco kina e dua na veitalanoa vakaibalebale.