NA VAKANUINUI ena Veisorovaki

Au sa sota kei ira na tamata sa oti vakadua na nodra vakanuinui. Na veivutuni, era nanuma, ni ra sa sega ni rawata kei na veivosoti era sega ni qumia rawa. O ira oqori era sega ni kila rawa na kaukauwa veivakasavasavataki ni Veisorovaki. Se, kevaka era kila, era se bera ni vakila sara e lomadra na ibalebale ni Nona vakararawataki o Jisu Karisito mai Kecisemani ka vakakina ena kauveilatai. Kevaka e dua vei keda sa oti na nona vakanuinui ena kena vakasavasavataki na noda bula eda sa cakitaka tiko na titobu, na kaukauwa, kei na rabailevu ni Nona vakararawataki ena vukuda.

Ena vica na yabaki sa oti au a lesi meu vakataroga e dua na cauravou yabaki 21 me vakatulewataki kina na kilikili ni nona bula me laki kaulotu. Ena gauna oqo, era sega ni dau veivakatarogi na Vakaitutu Raraba vei ira e rawa ni ra laki kaulotu. E matalia kina na ka oqo. Niu wilika eso na itukutuku me baleta na vu ni noqu laki cakava na veivakatarogi oqo, e mosi na yaloqu. Na cauravou oqo e cakava na ivalavala ca bibi. Au vakataroga se cava au kerei kina meu veitalanoa kei na dua e vaka tu oya na kena itukutuku, kau mani nanuma kina ni na sega ni ganita meu vakatura me vakadonui me laki kaulotu.

Ni oti na soqoni ni koniferei ena yakavi ni Vakarauwai, au lesu ki na nona valenivolavola na peresitedi ni iteki me baleta na veivakatarogi. Niu wawa tiko a basika yani e dua na cauravou musudonu ka vakasakiti na kena irairai. Au vakasamataka se meu na vakasuka vakacava ni laurai matanavotu na nona via veitalanoa ka ni sa tu na iloku meu veitalanoa kei na dua na cauravou e leqa tu vakalevu. Qai tukuni koya mai. Sai koya sara ga na cauravou au waraka tiko.

Ni keirau tiko taurua ena valenivolavola, au taroga ga e dua na taro: “Na cava au mai vakatarogi iko kina?”

A talanoataka na kena itukutuku ni gauna sa oti. Ni sa oti, sa tekivu me vakamacalataka na veikalawa kei na rarawa sa sotava mai. E tukuna me baleta na Veisorovaki—na kaukauwa tawayalani ni Veisorovaki. A wasea na nona ivakadinadina ka vakaraitaka na nona lomana na iVakabula. Oti qai kaya, “Au vakabauta ni nona vakararawataki na iVakabula mai Kecisemani kei na Nona solibula ena kauveilatai sa rawa ni vakabula e dua sara mada ga na tamata me vakataki au.”

Ni yavalati au na nona yalomalumalumu kei na Yalotabu, Au mani kaya, “Au sa na vakaturi iko mo laki veiqaravi ka matataki Jisu Karisito.” Oti au qai kaya, “Au na kerea ga e dua na ka mai vei iko. Au vinakata mo daukaulotu vinaka duadua ena Lotu raraba. Sai koya ga qori.”

Ena tolu se va na vula i muri, keirau a vosa tiko kei Sisita Edgley ena dua na koronivuli ni veivakarautaki ki na kaulotu. Ni oti na lotu, au a sotavi ira voli na daukaulotu kau raica e dua na cauravou ka vaka niu kila na matana.

A taroga mai, “O nanumi au tiko?”

Au madua vakalailai, ka kaya, “Vosoti au. Au kila ni dodonu vei au, ia au sa sega ni nanuma.”

Oti qai kaya mai, “Meu tukuna mada vei iko o cei o au. O au na daukaulotu uasivi duadua ena koronivuli ni veivakarautaki ki na kaulotu.” Au vakabauti koya.

Na nona inuinui na cauravou oqo a yavutaki, sega walega ena nona kila kei na nona ivakadinadina me baleta na Veisorovaki, ia ena nona taura me nona na isolisoli oqo. E kila o koya ni baleti koya sara ga vakataki koya! E kila o koya na kaukauwa kei na inuinui e dau solia ena gauna sa vaka me yali kina se sega na inuinui.