“Na cava meu lakova kina na semineri kevaka e rawa niu vulica ga vakataki au na ivolanikalou?”

O na sotava eso na itokani vovou ena semineri, ka na yaco me da veivolekati sara, me vaka na matavuvale. O na vulica e vuqa na veika vou ka na sega ni rawa ni o kila ga vakataki iko. E taleitaki ka vakayalo. Ena vakadeitaka me tekivutaki donu na siga. Kevaka o se bera ni vakaitavi tiko kina, tekivuna, ena veisautaka na nomu bula.

Taumada, e kaya na Turaga na vanua e soqoni kina e lewe rua se tolu na tamata ena yacana, ena tiko o Koya ena kedratou maliwa (raica na Maciu 18:20; V&V 6:32). Na noda vakila na Yalona e rawa ni vukei keda me da vakasamataka vakatitobu na veika sa cakava vei keda o Koya. Karua, ni da vulica vata kei ira na tani na ivolanikalou, eda na kila vakavinaka cake na veika sa volai. Ni da vakarorogo, eda na rawa ni rogoca eso na ka eda a sega tu ni kila, ka na rawa talega ni yaco oqo vei ira eso ni da wasea na veika eda kila. Katolu, niu lako ki semineri, e vaqaqacotaki na noqu ivakadinadina. Na semineri e dua na madigi me da wasea na noda ivakadinadina ka rogoca na nodra ivakadinadina na tani. E vukei keda me da tikoga ena sala dodonu.

Sega ni rawa niu sega ni lako ki na semineri. E sega walega ni vakavuvulitaka ka vakamacalataka na noqu qasenivuli yalodina na dina e kune ena ivolanikalou, ia au vulica talega e levu sara na ka ena veivosaki vakalasi. Era dau wasea na vo ni gonevuli na veika era sa sotava ena veika era vulica, ka ra sa vukei au meu kila ka vakalevu cake ena kosipeli kei na iVakabula kei na Nona Veisorovaki. E sega ni sa rauta meu vuli ga vakataki au, niu sa dau kunea eso na isau ni noqu taro ena veivosaki vakalasi. Au rawa ni vakadinadinataka ni semineri e dua na kena itavi bibi sara ena kena susugi cake na noqu ivakadinadina me baleta na Lotu dina i Jisu Karisito.

Niu vulica vakataki au na ivolanikalou, e sega soti ni taleitaki me vaka na noqu vuli vata kei ira tale eso. Kena ikuri, e rawa ni da vulica eso na vakasama taleitaki mai vei ira na tani ni da vulica vata na ivolanikalou. Au sa vulica e vuqa sara na italanoa taleitaki ena semineri, kau kila vakavinaka cake na itukutuku eso ni ivolanikalou, ka vakavuna na kena taleitaki vakalevu cake na vuli! Au marau niu a lewa meu curuma na semineri.

Na semineri e tadolava na noqu siga. E vakavuna meu tamata mamarau ka lomasoli meu veitalanoataka na kosipeli kei ira na tamata. Eda raica vakatitobu kina na ivolanikalou, sa levu cake kina na ka au kila.

Niu lako ki na semineri, au vakasaqara na rarama kei na dina ka tokara na iyaragi taucoko ni Kalou (raica na V&V 27:15–18). Na iyaragi e vukei au meu kila na Domona ena veigauna kecega kei na veivanua kecega. Na vuli ivolanikalou e veisiga e vaqaqacotaka na noqu vakabauta kei na noqu ivakadinadina ka vukei au meu tudei ena noqu vakatovolei. Na lakovi ni semineri e dua vei ira na sala vinaka duadua me da kunea kina na rarama kei na dina ka me da vulica na ivolanikalou ka vakananuma vakatitobu.

E dau veilaveti na semineri. Ena so na gauna ena sega ni rauta na noda vuli ga vakataki keda. Erau sota vakavinaka na vuli yadua kei na semineri. Era vakasakiti na qasenivuli, ia kevaka e dua na nomu taro, e rawa ni ra vukei iko ena kena isau na nomu qasenivuli kei na lewe ni nomu kalasi.

Matai, baleta niu vinakata meu kaulotu, au dau lako kina ki na semineri. Era na gadreva na daukaulotu me ra yadra totolo ka vulica vakamataka na kosipeli. Na laki semineri e vukea na noqu vakaitovotaki au ena itovo vinaka ni yadra vakamataka. Karua, ena mataka, e makare tu na noda vakasama, ka rawa ni da vakanamata vakatabakidua ena noda vuli kei na veiwasei. E vinaka me da vakayagataka na gauna vinaka duadua ena dua na siga me da vulica kina na veika ni Kalou. Katolu, kevaka au vuli vakataki au, ena sega beka ni titobu sara na noqu kila ka me vaka na noqu qasenivuli. Ena nona veituberi kei na veivakavulici, au rawa ni vulica e levu cake na ka mai na veika au na rawata vakataki au.