Au na Raici Koya Tale

A taleitaki keitou yadudua sara na luvena o tamaqu. E lomani keda ka na dauvosoti keda vakarawarawa sara. A vakayacora na nona vinaka duadua me keitou marau vakayadudua sara, ka sa vakaraitaka tiko vakamatatata ni gadreva me yaco vei keitou yadudua na veika vinaka. Au lomani koya vakalevu sara.

Niu a se kalasi ono tiko, a laucoqa mate e gaunisala o tamaqu. Sa dua na ka na neitou rarawa vakamatavuvale. Sa mai yaco e dua na cicila levu ena neitou matavuvale. Au a dau vakararavi tu ga vei tamaqu, ni o koya ga au dau gole kina niu leqa. Au a sega ni vakasaqara na veivuke, au sa vakalaiva meu cudru ka rarawa tu ga. E kena itinitini ga niu sa vakadeitaka ni a bale vua na Kalou. Au sa sega ni wili ivolanikalou se masu. Au a gole ki lotu ni a vinakata ga o Na. Au sa saga meu yawa sara mai vei Tamaqu Vakalomalagi.

Ia au a qai gole ki na keba ni Goneyalewa ena imatai ni gauna. Au a taleitaka sara na itokani vou, ia au a se sega tikoga ni wilika na noqu ivolanikalou. Ena iotioti ni bogi, a vakayacori e dua na neimami soqoni ni ivakadinadina. Au a vakila kina e dua na ka au a sega tu ni vakila ena dua na gauna balavu: na Yalotabu. Au qoroi ira na goneyalewa era tucake yani mera cavuta na nodra ivakadinadina, ia au a dabe toka ga baleta niu nanuma ni sega tu na noqu. Vakasauri ga au vakila ni sa dodonu meu tucake. Au a dolava na gusuqu, ka vakasamataka na veika meu cavuta. Au a mani kaya niu marautaka na keba ni Goneyalewa. Au qai vakila niu sa cavuta yani niu kila ni a mate o Jisu Karisito ena vukuqu ka sa lomani au na Tamaqu Vakalomalagi ka sa dina na Lotu.

Au sa vakasinati ena vakacegu e totoka vakaoti. Au vakavinavinaka ki na ka au a sotava oqo kau kaya kina niu kila au na raici tamaqu tale baleta na Veisorovaki kei na Tucaketale ni iVakabula.