Na Buluberi kei na iVola i Momani

Ena vica na yabaki sa oti keitou a toki vakamatavuvale mai na dua na siti osooso ka totolo sara ki na dua na itikotiko lailai vagalala ena taudaku ni dua na koro vakanomodi. E toka voleka kina e dua na veibuluberi, ka keitou a laki kerei kena itaukei, me keitou beti buluberi ena kena levu ga keitou vinakata.

Ena vica na mataka ena veimacawa ena vula ikatakata o ya keitou a vakavodoka ena motoka na vokete kei na taga ka dua na auwa na kena totoka, ka kamica na beti buluberi. E dua na mataka na luvei keirau cauravou gone duadua, o Hyrum, e vaka me sega ni via lako vata kei keitou. Sa vakadeitaka tu o koya ni keitou sa betia kece sara na buluberi ka na vakaoti gauna ke keitou lako tale kina. E kuirabui o koya ni se levu sara tu ga na buluberi. A sega ni raica rawa o koya eso na isoso, kei na so na buluberi kamica era lili toka tabanikau ka vakadeitaka o koya ni sa rai oti kina.

Ena gauna vata oqo, era a bolei ira na luvei keimami o ira na iliuliu ni itabagone mera wilika na iVola i Momani ni vakarau tekivu na vuli ena Okosita o ya. Era sa mai tukuna e vale na gone na bolebole oqo, ka keitou sa lomavata na matavuvale me keitou tokoni ira ena sasaga oqo.

E se qai oti toka ga na neitou wilika tasevu na iVola I Momani sa yaco mai na neitou Ensign ni vula o Okosita, ka sa tiko kina na bolebole nei Peresitedi Gordon B. Hinckley (1910–2008) me wilika na ivola i Momani ni bera ni cava na yabaki. Sa marau sara o Hyrum kei tacina o Joseph—ni rau nanuma ni keitou sa talairawarawa oti vua na parofita! Rau sa qai tukuna tale vei rau o tacidrau qase, o Seth kei Bethany, ni sa kerea tiko mai o Peresitedi Hinckley meda wilika tale, se cava ga na levu ni gauna eda sa wilika oti kina.

“Baleta na cava?” rau a taroga na cauravou. “Kedatou sa wilika na veivosa yadua kece sara, se cava tale meda na vulica vou mai na kena eda sa wilika oti?”

Ni yaco e dua na vakanomodi, e dua a qai tukuna mai na buluberi. “Dou nanuma tiko na gauna tou kaya ni sa oti taucoko na buluberi? Ia ena gauna tou a lesu kina, era se levu tikoga na buluberi—ena veigauna! Se cava ga na levu ni gauna tou lako kina, se na gauna se qai oti toka ga oqo, era sobe tu ga na buluberi.”

E totolo sara na neitou raica na kena isema. Me vakataka ga na iteitei o ya kei na vuavuai gugumatua ni buluberi kamica, na iVola i Momani sa ivurevure tudei ni magiti vakayalo me na kunei mai kina na dina vou. Keitou sa mani tekivu wilika tale na iVola i Momani.

Niu sa mai ciqoma na bolebole nei parofita, au sa wilika na veika ena iVola i Momani au sa wilika oti vakavica e liu, ia au sa raica ena dua na kena ituvaki vou se kila vakavinaka ena kena bulataki ena veituvaki se ibolebole vou. Au kila ni veigauna yadua eda wilika kina ena yalodina na iVola i Momani, sa rawa meda ciqoma na veivakararamataki vou ka toro voleka vua na iVakabula.