Au Vakila ni Dodonu Meu Gole Mai

Ni oti e rua veimama na yabaki na noqu papitaiso mai Buenos Aires, e Argentina, e se voqa tikoga vei au na vosa ni dua vei rau na daukaulotu a vakavulici au: “Au kila ni ko dua na daukaulotu.” Au nanuma vakakina na isau ni taro kaukauwa e yaco mai vei au ena noqu masuta meu kila ke sa ka dina na yalo a curuma na lomaqu. Niu sa yabaki 20, au kila ni sa dodonu meu vakavakarau ki na kaulotu.

Ia meu na daukaulotu vakacava? Au sega ni vakataki koya na cauravou agilosi a vakavulica vei au na kosipeli. Meu na biuta vakacava na noqu cakacaka? Au na laki vakaitikotiko evei niu sa na lesu mai? A dredre sara na noqu kunea na vanua au sa mai tiko kina, ka dina ga ni dua na rumu lailai ena daku ni dua na vale ni tamata.

Niu lesu tiko i vale ena dua na yakavi, sa yaco tale mai ki na noqu vakasama na yalo kei na lomatitiqa oqo. Niu yaco e vale, au sa saga meu vakatulewa kina. Au sa mani tekiduru ka cabora e dua na masu meu vukei. Niu sa masu tiko, au sa vakauqeti vakaukauwa sara meu lako vei Leandro, na noqu itokani e dau vakayaloqaqataki au ena gauna ni rarawa.

Ia niu vakasamataka niu na laki vakayadrati koya ni sa bogilevu, au sa mai vakasuka kina. Au kila ni na yadra vakamataka o koya me laki cakacaka, kau sega ni rawata meu laki tukituki e nona katuba ena auwa o ya. Sa veidreyaki na noqu vakasama ia, au sa vakila tikoga na veivakauqeti oqo meu laki raici koya. Ia, au vakawalena tikoga.

Ia, au sa mani taubale yani e gaunisala meu cegu cagi bulabula. Ena noqu nanuma rawa niu dolava tu na noqu katuba, au sa lesu tale kina ki vale. Niu curu yani, au raici Leandro ni sa dabe tiko ena noqu rumu. Sa sobuti au na Yalotabu, ka sa vaka me yali na noqu icegu. Ena voqa ni domoqu ena luluvu, au a tarogi koya, “ Na cava o cakava tiko eke?”

“Au sega ni kila,” a kaya mai. “Au nanuma tu ga meu mai raici iko.”

Au a qai tukuna vua na noqu a lomatarotarotaka tiko na laki kaulotu. A cavuta vei au na nona ivakadinadina ka vakayaloqaqataki au. A qai vukei au meu vakalewena na noqu pepa ni kaulotu, kau a kauta sara vei bisopi ena mataka tarava. Ni oti e rua na vula au sa ciqoma na noqu veikacivi meu gole ki na Tabana Ni Kaulotu e Argentina Salta.

Au kila ni a iyaya ni cakacaka ena liga ni Turaga ena bogi oya na noqu itokani oqo, kau sa kila mai na yaloqu taucoko ni sa dau rogoca ka sauma mai na Tamada Vakalomalagi na noda masu e cabori ena yalodina kei na inaki dina.