Dusimaki na Sala ni Tubu Dina ena Veituberi ni Veiliutaki e Vuravura Raraba

Mai vei Heather Whittle Wrigley

iTukutuku ni Lotu kei na Veika e Yaco

Era vakamacalataka na veiliutaki ena Lotu na bibi ni “tubu dina” kei na sala me vakavotukanataki kina ena Veituberi ni Veiliutaki e Vuravura Raraba ena 11 ni Feperueri, 2012.

Era a vakaitavi ena veidusimaki vei ira na veiliutaki ena Lotu e veiyasai vuravura o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada, kei ira na lewe ni Kuoramu ni iApositolo Le Tinikarua, na Mataveiliutaki ni Vitusagavulu, kei ira na mataveilutaki ni veimatasoqosoqo ena Lotu.

E vakamacala vaqo o Peresitedi Uchtdorf, “ena vosa vaka-Lotu, na tubu e rawa ni tukuni me ‘o ira na lewenilotu vou.’ … Na Tubu dina, e rawa ni tukuni me, ‘tubu ena kedra iwiliwili na lewenilotu bulabula vakalotu.’”

E vakuria vaqo o Elder M. Russell Ballard ena Kuoramu ni iApositolo Le Tinikarua, “E yaco na tubu ni sa basika na vua ni nona saumaki ki na kosipeli ena nona bula taucoko e dua na tamata, ka yaco kina na vakalevutaki cake ni yalodina ena bula ni tamata yadua kei na matavuvale.”

E kaya o Peresitedi Uchtdorf, ni, kena vakalevutaki cake na yalodina oya e oka kina na veika e sega ni rawa ni dau vakarautaki vakarawarawa, me vaka na masumasu e veisiga, vulici ni ivolanikalou, lotu vakamatavuvale, veilomani e vale, kei na veika eda vakila me baleta na Veisorovaki.

E kaya o koya ni “sa rui vakavuqa, na noda dau vakadredretaka na totoka kei na rawarawa ni kosipeli i Jisu Karisito, ena veituvatuva sega ni oti rawa ni kena namaki na veika matailalai. Ia, ni da vakanamata ki na ‘cava e vuna’ ni kosipeli, sa na seyavu yani e vuqa na veilecayaki.”

E vuqa na veika ena kakaburaki e vakanamata ki na veivunau kei na ivakavuvuli bibi, ka vakarautaka na isau ni taro na “cava e vuna.”

E kaya o Peresitedi Uchtdorf ni “na taro na ‘cava e vuna’ e donu, ena kauti keda ki na kena vakatulewataki vakadodonu na ‘o cei,’ ‘na cava,’ ‘ena gauna cava,’ ‘evei,’ ‘na cava e vuna,’ kei na ‘me caka vakacava.’”

Vakamau kei na Matavuvale ena iTuvatuva

“Na Lotu e tara cake ena veimatavuvale,” e kaya o Peresitedi Boyd K. Packer, na Peresitedi ni Kuoramu ni iApositolo Le Tinikarua. “Na tabanalevu kei na iteki era ka vagauna ga. Ni da veivosakitaka na matavuvale, eda na qai raica na tubu dina ena loma ni Lotu.”

E kaya ni tagane vakawati kei na tama yadua e dodonu me dua na vakaitutu ni matabete ena nona vale, me vakatulewa tiko ena buladodonu ena nona matavuvale. Sa tautauvata kaya, e kaya o koya, na iliuliu ni matabete e dodonu me veiliutaki ena bula kilikili—e dina ni duidui na itutu ena loma ni matabete, na matabete bula kilikili yadua e tautauvata na levu ni matabete e tu vua mai vei koya na kena ikarua (raica na V&V 1:20).

E vakabibitaka o Elder Russell M. Nelson ena Kuoramu ni iApositolo Le Tinikarua o ira na tagane kei na yalewa vakawati, tama kei na tina, sa dodonu me ra tara cake e dua na isema ni veilomani, veivutuni, kei na masu me ra qaqa kina ena kena vaqaqacotaki ka taqomaki na matavuvale, ni “sa itakele ni nona ituvatuva na Dauveibuli ena nodra icavacava tawamudu na Luvena” (“Na Matavuvale: Ai Vakaro ki Vuravura Raraba,” Liaona kei na Ensign, Nove. 2010, 129).

E kaya vaqo o koya, “E tauci vakatolu ena ivolanikalou tabu na ivakasala ni qaqarauni ni na maumau sara na vuravura taucoko ena nona lesu mai na Turaga kevaka e sega ni tu na ivakarau eso. Ena veigauna yadua oqori e vakaibalebaletaki na ivakasala oqori ena ituvaki ni matavuvale ka sega ni vakayacori kina na cakacaka vakalotu ni veivauci ni valetabu. Ni sega na cakacaka vakalotu oqori ni bula vakalou, ena sega ni vakavotukana na lagilagi ni Kalou.”

Me rawati na takete ni lalawa oqori— ena nodra bula tawamudu kei na bula vakalou na luvena taucoko na Kalou— sa na gadrevi kina na tubu dina ena noda veivale, ena veitabanalevu kei na tabana, kei na loma ni Lotu raraba.

Bulataki ni Kosipeli

Na tubu dina kei na saumaki e yaco mai na kena bulataki na kosipeli ena noda bula e veisiga. Ena dua na veivosaki ni veitarotarogi, erau vakamacalataka kina o Elder L. Tom Perry kei Elder D. Todd Christofferson ena Kuoramu ni iApositolo Le Tinikarua ni ulumatua ni kena bulataki na kosipeli sai koya na kena caka kei na rokovi tiko ni veiyalayalati ni valetabu. Na talairawarawa ki na veiyalayalati, e kaya o Elder Christofferson, e rawa ni veisautaka na tamata vakayago me dua na Yalododonu ena dua na gauna.

Noda dolele yani vei ira na tani e dua tale na tiki bibi ni kena bulataki na kosipeli. Era kaya na veiliutaki, sa dui noda itavi na lewenilotu yadua vakakina vakaisoqosoqo Lotu me da dolele yani ka vueti ira era vakaleqai tu vakayago vakakina vakayalo.

E kaya o Elder Christofferson, me da kakua ni lomalomarua ena noda duavata kei ira ena matavakabauta tale eso kei na veisoqosoqo ni veiqaravi ena nodra vukei na dravudravua kei ira era vakaleqai tu. Me ra liu na veiliutaki ni matabete ena veisasaga oqori, ia me ra tokona talega na itavi oqori na lewenilotu kei na daukaulotu.

A vakabibitaki ena dua na mataveivosaki na nodra qaravi na veimatavuvale, na nodra vaqaqacotaki na Matabete i Melikiseteki, kei na kena vukei me tarai cake na nodra vakabauta kei na nodra ivakadinadina na itabagone. Ka ratou vakaitavi kina o Elder Ballard kei Elder Neil L. Andersen ena Kuoramu ni iApositolo Le Tinikarua, vata kei Elder Ronald A. Rasband ena Mataveiliutaki ni Vitusagavulu; o Elaine S. Dalton, peresitedi raraba ni Goneyalewa; kei Rosemary M. Wixom, peresitedi raraba ni Lalai.

E kaya o Elder Rasband ni dodonu me ra vakaitavi na iliuliu yadua ena nodra vakalesui mai me ra bulabula vakalotu na lewenilotu, ka vakabibitaka o Elder Andersen ni dodonu me ra vakaitavitaki vakalevu cake na itabagone ena nodra vakabulabulataki mai na vo ni itabagone.

Rawati ni Tubu Dina

E vakabibitaka o Peresitedi Uchtdorf, ni na yaco mai na tubu dina ni da bulataka ena noda bula ni veisiga na ivakavuvuli ni kosipeli.

A kaya o koya “Ni o vakasamataka na veiulutaga oqo, tarogi iko ena “cava e vuna” na nomu veiqaravi kei na nomu itavi vakalotu, o koya gona, ‘se cava’ e nomu itavi vakatamata yadua kei na itavi vakamatabose”.

Vulica Eso Tale

E rawa vei keda yadua me da sarava, rogoca, tabaka, ka lavetaka na veika eso mai na kakaburaki ena vica vata na vosa ena noda lako ki na lds.org/study/other-addresses ka kiliki ena Worldwide Leadership Training.

Ena Soqoni ni Veituberi ni Veiliutaki e Vuravura Raraba, e kaya kina o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada, “Na imatai ni ka me da cakava sai koya me da kila. Na ikarua sai koya me da cakacakataka na veika eda sa kila. … E lailai ga na vinaka ena kauta mai na noda rogoca na vosa ni Kalou kevaka eda sega ni vakadewataka na veika eda rogoca ki na noda bula.”

E sureti ira na veiliutaki ena Lotu me ra cakava e tolu na ka ni oti na kakaburaki vei ira na veiliutaki ka vakakina ena nodra gauna taucoko ni veiqaravi ena nodra ilesilesi me ra wadruca mai na levu ga ni ka era rawata mai na nodra veidusimaki na veiliutaki ena Lotu:

Vakatamata yadua vakakina vakamatabose, vakasamataka ena masumasu na idusidusi eda sa ciqoma ka raica na “cava e vuna” na nomu veiqaravi kei na ilesilesi vakalotu.
Ni oti na kena vakasamataki vakatitobu ka veivosakitaki, vakadavora e vica na cakacaka o guta na vakayacora ka mo na gumatuataka sara na kena vakayacori. Na cakacaka me na sala vata kei na ituvaki ni bula kei na veika e gadrevi ena veisoqosoqo yadua, tabanalevu, iteki, matavuvale, se tamata yadua.
Ni o sa cakava na veiyalayala oqo, taumuria ena loma ni nomu veiqaravi kei na nomu ilesilesi ena veibose yadua ni nomu matabose.

A vosa o Elder M. Russell Ballard ena Kuoramu ni iApositolo Le Tinikarua ena dua na mataveivosaki ka a vakayacori me tiki ni Soqoni ni Veituberi ni Veiliutaki e Vuravura Raraba ena Feperueri 2012.